Senesi 30:1-43
30 ʼI te sio ʼa Lasele neʼe mole ina fanauʼi he ʼu tamaliki ʼa Sakopo, neʼe kamata maheka ki tona tehina pea neʼe ina ui kia Sakopo: “Foaki mai he ʼu fanau naʼa au mate.”
2 Neʼe kovi ʼosi te ita ʼo Sakopo kia Lasele, pea neʼe ina ui age: “ ʼE ko au koa te ʼAtua, ʼae neʼe ina taʼofi koe ke mole ke maʼu fanau?”
3 Neʼe ina tali age leva: “Koʼeni taku fafine kaugana ko Pila.+ Ke ke momoe mo ia ke feala hana fuafatuʼi he ʼu fanau maʼaku,* pea ke feala foki haku maʼu fanau ʼaki ia ia.”
4 Neʼe ina foaki ai tana fafine faifekau ko Pila ke ʼohoana mo ia, pea neʼe momoe ia Sakopo mo ia.+
5 Neʼe faitama leva ia Pila pea neʼe ina fanauʼi he tamasiʼi tagata.
6 Pea neʼe ui e Lasele: “Ko te ʼAtua neʼe ko toku tuʼi fakamau pea neʼe toe logo ki toku leʼo, ʼo ina foaki mai ai haku tamasiʼi tagata.” Koia, neʼe ina fakahigoaʼi ai ko Tane.*+
7 Pea neʼe toe faitama ia Pila, te fafine faifekau ʼa Lasele kia Sakopo, pea neʼe ina fanauʼi he tamasiʼi tagata, ko te tama lua ʼaia.
8 Neʼe ui leva e Lasele: “Neʼe lahi taku fetauʼaki mo toku tehina. Pea neʼe au malo ʼi ai!” Koia, neʼe ina fakahigoaʼi ai ko Nefetali.*+
9 ʼI te sio ʼa Lea neʼe mole kei fanaunau, neʼe ina toʼo ai tana fafine faifekau ko Silipa, ʼo ina foaki kia Sakopo ke ʼohoana mo ia.+
10 Pea neʼe fanauʼi leva e Silipa, te fafine faifekau ʼa Lea he tamasiʼi tagata.
11 Neʼe ui leva e Lea: “Ko he manuʼia!” Koia, neʼe ina fakahigoaʼi ai ko Kate.*+
12 Hili ʼaia, neʼe toe fanauʼi e Silipa, te fafine faifekau ʼa Lea, he foha ʼo Sakopo, ko te tama lua ʼaia.
13 Neʼe ui leva e Lea: “Kua lahi toku fiafia! ʼE mahino ia, ʼe fakamatala anai e te ʼu taʼahine fuli toku fiafia.”+ Koia, neʼe ina fakahigoaʼi ai ko Asele.*+
14 ʼI te temi ʼae neʼe utu ai te fulumeto, neʼe alu ia Lupeni+ ʼo haʼele, pea neʼe ina maʼu ʼi te vao he ʼu fuaʼi ʼakau ko te matakole.* Neʼe ina ʼaumai ki tana faʼe ko Lea. Pea neʼe ui e Lasele kia Lea: “Fakalelei siʼou loto, ke ke foaki mai he ʼu fuaʼi ʼakau ʼi te ʼu fuaʼi ʼakau ʼae neʼe haʼu mo tau tama.”
15 Kae neʼe ina tali age: “ ʼE mole ke feʼaugaʼia koa koe tau toʼo toku ʼohoana?+ Pea ʼi te lakaga nei ʼe ke toe fia toʼo mo te ʼu fuaʼi ʼakau ʼo taku tama?” Koia neʼe ui age leva e Lasele: “ ʼIo, ʼe momoe anai ia Sakopo mo koe ʼi te po ʼaeni mo kapau ʼe ke foaki mai te ʼu fuaʼi ʼakau ʼo tau tama.”
16 ʼI te liliu mai ʼa Sakopo ʼi te afiafi, neʼe alu ia Lea ʼo fakafelaveʼi kia ia, pea neʼe ina ui age: “ ʼE ke momoe anai mo au, he neʼe au totogi te fealagia ʼaia ʼaki te ʼu fuaʼi ʼakau ko te matakole ʼae neʼe maʼu e taku tama.” Koia, neʼe momoe ai mo ia ʼi te po ʼaia.
17 Pea neʼe logo te ʼAtua pea mo tali te ʼu faikole ʼa Lea. Koia, neʼe faitama leva kia Sakopo ʼo ina fanauʼi he tamasiʼi tagata, ko te tama nima ʼaia.
18 Neʼe ui leva e Lea: “Neʼe foaki mai e te ʼAtua toku totogi he neʼe au foaki taku fafine faifekau ki toku ʼohoana.” Koia, neʼe ina fakahigoaʼi ai ko Isakale.*+
19 Pea neʼe toe faitama ia Lea kia Sakopo pea neʼe ina fanauʼi he tamasiʼi tagata, ko te tama ono ʼaia.+
20 Pea neʼe ui e Lea: “Neʼe foaki mai kia au e te ʼAtua he koloa matalelei. Koia, ʼe tali anai au e toku ʼohoana,+ he neʼe au fanauʼi ʼona foha ʼe toko ono.”+ Koia, neʼe ina fakahigoaʼi ai ko Sepulone.*+
21 Hili ʼaia, neʼe ina fanauʼi he taʼahine pea neʼe ina fakahigoaʼi ko Tina.+
22 Neʼe manatuʼi leva e te ʼAtua ia Lasele, pea neʼe logo mo tali e te ʼAtua ʼana faikole ʼo ina fakafealagia ke faitama.+
23 Neʼe faitama leva pea neʼe ina fanauʼi he tamasiʼi tagata. Neʼe ina ui leva: “Neʼe toʼo e te ʼAtua toku ufiufi!”+
24 Koia, neʼe ina fakahigoaʼi ai ko Sosefo,*+ ʼo ina ui: “ ʼE toe hilifaki mai e Sehova haku tahi tama.”
25 Hili pe te fanauʼi e Lasele ia Sosefo, neʼe ui e Sakopo kia Lapane: “Tuku ke au toe liliu ki toku famili mo toku fenua.+
26 Ke ke foaki mai ʼoku ʼohoana, ʼae neʼe au gaue ke au maʼu ia naua, ʼo feia mo ʼaku fanau, ke feala ai haku alu, he ʼe ke iloʼi lelei pe neʼe au gaue agatonu kia koe.”+
27 Pea neʼe ui e Lapane ki ai: “Kapau ʼe ke ʼofa ia au, ke ke nofo mo au, koteʼuhi ʼaki te ʼu fakailoga ʼae neʼe au kumi,* neʼe au mahino ai ʼe tapuakiʼi au e Sehova ʼuhi ko koe.”
28 Neʼe ina toe ui age ki ai: “Fakaha mai te totogi ʼae ʼe ke loto ki ai, pea ʼe au foaki atu anai.”+
29 Neʼe tali age e Sakopo ki ai: “ ʼE ke iloʼi lelei pe neʼe au gaue agatonu kia koe pea neʼe au tauhi lelei tau faga manu.+
30 Neʼe mole lahi te meʼa ʼae neʼe ke maʼu ʼi muʼa ʼo taku haʼu, kae talu taku haʼu mo te tuputupu mo te lahi ʼo tau faga manu, pea kua tapuakiʼi koe e Sehova. Kae ʼi te temi leva ʼaeni, ʼe au fia fai he meʼa maʼa toku famili totonu.”+
31 Neʼe ina fehuʼi age: “Kotea ʼae ʼe tonu ke au foaki atu?” Neʼe tali age e Sakopo: “ ʼE mole ke foaki mai anai he meʼa! ʼE hoko atu pe anai taku tauhi pea mo leʼo tau faga ovi mo kapau ʼe ke fai te faʼahi ʼaeni maʼaku:+
32 ʼI te ʼaho nei, ʼe au alu anai ʼo vakaʼi tau faga ovi fuli. Ke ke vaheʼi kehe te ʼu ovi fuli ʼae ʼe pulepule pea ke ke vaheʼi kehe natou ʼae ʼe huʼa vaisi ʼi te ʼu ovi tagata ʼae kei mui. Pea ke toe vaheʼi kehe mo te ʼu tao fafine ʼae ʼe pulepule. ʼE ko toku totogi ʼaia ʼo kamata atu ʼi te ʼaho nei.+
33 Ka ke haʼu ʼi he ʼaho ʼo vakaʼi toku totogi, ʼe ke iloʼi ai anai taku agatonu. Kapau ʼe ke maʼu he ʼu tao fafine ʼe mole pulepule pea mo he ʼu ovi tagata kei mui ʼe mole huʼa vaisi, ʼe fakaʼuhiga anai neʼe au kaihaʼa te ʼu manu ʼaia.”
34 Pea neʼe ui age e Lapane: “ ʼE foʼi lelei ʼosi, ta fai taua ki ai.”+
35 Koia ʼi te ʼaho ʼaia, neʼe ina vaheʼi kehe te ʼu tao tagata ʼae neʼe matohitohi mo pulepule, pea mo te ʼu tao fafine ʼae neʼe pulepule, ʼo feia mo te ʼu manu fuli ʼae neʼe pulepule hina pea mo te ʼu ovi tagata kei mui ʼae neʼe huʼa vaisi. Pea neʼe ina tuku te ʼu manu ʼaia ke tokakaga ki ai ʼona foha.
36 Hili ʼaia, neʼe mavae ia Lapane mai ia Sakopo ʼo faifagona ia ʼaho ʼe tolu. Pea neʼe tauhi leva e Sakopo te ʼu manu ʼae neʼe kei toe ʼi te faga manu ʼa Lapane.
37 Neʼe taʼaga leva e Sakopo he ʼu vaʼa ʼakau mata ʼi he fuʼu sitilase, mo he fuʼu amatie pea mo he fuʼu palatane. Pea neʼe ina fohi leva te kili ʼi ʼihi faʼahi ʼo te ʼu vaʼa ʼakau ʼaia, ke ha te hina ʼo te ʼu vaʼa ʼakau.
38 Neʼe ina fakatuʼu leva te ʼu vaʼa ʼakau ʼaia ia muʼa ʼo te faga manu, ʼi te ʼu tafega vai, mo te ʼu inuʼaga vai ʼo te ʼu manu. Neʼe ina fai te faʼahi ʼaia ke tupu ai hanatou feholiʼaki ia natou moka natou ʼomai ʼo iinu.
39 Neʼe feholiʼaki ai te ʼu manu ʼi muʼa ʼo te ʼu vaʼa ʼakau ʼaia, pea neʼe fanauʼi ai he ʼu ʼuhi matohitohi mo pulepule.
40 Neʼe vaheʼi kehe e Sakopo te ʼu ovi tagata kei mui pea neʼe ina fakahaga te faga manu ki te ʼu manu ʼae neʼe matohitohi pea mo huʼa vaisi ʼo te faga manu ʼa Lapane. Neʼe ina vaheʼi kehe leva tana faga manu mai te faga manu ʼa Lapane.
41 Pea ʼi te temi fuli pe ʼae neʼe feholiʼaki ai te ʼu manu malolohi, neʼe fakatuʼu e Sakopo te ʼu vaʼa ʼakau ʼi te ʼu tafega vai ia muʼa ʼo te faga manu, ke natou sisio ki ai pea mo feholiʼaki ai.
42 Kae kapau ko ni manu ʼe vaivai, neʼe mole ina fakatuʼu te ʼu vaʼa ʼakau ʼi ai. Koia, neʼe maʼu tuʼumaʼu pe e Lapane te ʼu manu vaivai, kae neʼe maʼu e Sakopo te ʼu manu malolohi.+
43 Pea neʼe lahi ʼaupito te ʼu koloa ʼo Sakopo, mo tana faga ovi pea neʼe kaugamalie ʼana fafine mo tagata faifekau, mo ʼana kamelo pea mo ʼana asino.+
Nota
^ Hep. “hana fanau ʼi ʼoku tuli.”
^ Ko tona fakaʼuhiga “Tuʼi Fakamau.”
^ Ko tona fakaʼuhiga “Neʼe Au Fetauʼaki.”
^ Ko tona fakaʼuhiga “Manuʼia.”
^ Ko tona fakaʼuhiga “Fiafia,” peʼe “Fiafiaʼaga.”
^ Neʼe kai e te hahaʼi fafine te fuaʼi ʼakau ʼaia he neʼe natou manatu neʼe feala ke tokoni age ke natou fanaunau.
^ Ko tona fakaʼuhiga “Ko Ia Ko He Totogi.”
^ Ko tona fakaʼuhiga “Tali.”
^ Ko te fakanounou ʼaia ʼo te higoa ʼae ko Sosifia, ko tona fakaʼuhiga “Ke Hilifaki (Ke Fakatuputupu) e Sehova.”
^ Peʼe “ ʼaki he ʼu fakamoʼoni.”
