Senesi 42:1-38
42 ʼI te iloʼi ʼae e Sakopo neʼe ʼi ai te meʼa kai* ʼi Esipito,+ neʼe ina ui ki ʼona foha: “He koʼe ʼe kotou fesioʼaki feia ia koutou kae mole kotou fai he meʼa?”
2 Neʼe ina hoko atu: “Neʼe au logo ʼe ʼi ai te meʼa kai ʼi Esipito. Kotou olo ʼo totogi mai ai hatatou meʼa kai, ke ʼaua naʼa tou mamate ʼi te pakupaku.”+
3 Neʼe olo ai te ʼu tehina ʼe toko hogofulu ʼo Sosefo+ ki Esipito ʼo totogi mai ai hanatou meʼa kai.
4 Kae neʼe mole tuku e Sakopo ke alu ia Pesamino,+ te tehina ʼo Sosefo mo ʼona taʼokete, he neʼe ina ui: “ ʼE feala pe ke hoko kia ia he tuʼutamaki, ʼo mate ai.”+
5 Neʼe olo ai te ʼu foha ʼo Iselaele ʼo feia mo ʼihi hahaʼi ʼo totogi mai hanatou meʼa kai, he neʼe kua kaku te hoge ki te fenua ʼo Kanaane.+
6 Neʼe ko Sosefo ʼae neʼe pule ʼi te fenua+ pea neʼe ko ia ʼae neʼe ina fakatau te meʼa kai ki te hahaʼi fuli ʼo te kele.+ Neʼe ʼomai ai te ʼu tehina ʼo Sosefo ʼo tulolo ki te kele ʼi ʼona muʼa.+
7 ʼI te sio ʼa Sosefo ki ʼona tehina, neʼe ina iloʼi atu aipe ia natou, kae neʼe mole ina fakaha age pe ko ai ia ia.+ Neʼe palalau fefeka age kia natou ʼo ina ui: “ ʼE kotou ʼomai maifea?” pea neʼe natou tali age: “ ʼE matou ʼomai mai te fenua ʼo Kanaane ʼo totogi hamatou meʼa kai.”+
8 Neʼe iloʼi ai e Sosefo ʼona tehina, kae neʼe mole natou iloʼi ia ia.
9 Neʼe manatuʼi atu aipe e Sosefo te ʼu moemisi ʼae neʼe ina fai ʼo ʼuhiga mo natou,+ pea neʼe ina ui kia natou: “Ko koutou ko he ʼu tagata neʼe ʼomai ʼo vakaʼi fakafufu te ʼu faʼahi ʼae ʼe mole puipui ʼi te fenua!”
10 Neʼe natou tali age: “Kailoa, siʼomatou ʼaliki, kae neʼe matou ʼomai ʼo totogi hamatou meʼa kai.
11 ʼE matou tamai tahi. Pea ko matou ko he ʼu tagata faitotonu, pea neʼe mole matou ʼomai ʼo vakaʼi fakafufu te fenua.”
12 Kae neʼe ina ui age: “ ʼE mole au tui au! Neʼe kotou ʼomai ʼo vakaʼi te ʼu faʼahi ʼae ʼe mole puipui ʼi te fenua!”
13 Neʼe natou tali age ki ai: “Siʼomatou ʼaliki, ko matou ko he fale tau tehina, pea ʼe matou toko 12.+ ʼE matou tamai tahi,+ pea ʼe maʼuli tamatou tamai ʼi te fenua ʼo Kanaane. ʼE nofo tomatou tehina muli mo tamatou tamai,+ kae kua puli te tahi.”+
14 Kae neʼe tali age e Sosefo: “Neʼe tonu pe te meʼa ʼae neʼe au ui atu: ‘Neʼe kotou ʼomai ʼo vakaʼi fakafufu te fenua!’
15 ʼE au iloʼi anai pe neʼe kotou tala mai te moʼoni ʼi te aluʼaga ʼaeni: Kapau ʼe mole kotou ʼaumai tokotou tehina muli, ʼe au tala moʼoni atu, ʼe mole kotou mavae anai ʼi heni.+
16 Kotou fekauʼi he tahi ia koutou ke alu ʼo kumi mai tokotou tehina, kae ʼe pilisoniʼi anai ia koutou ʼae ʼe nonofo. ʼAki te faʼahi ʼaia, ʼe au iloʼi ai anai pe neʼe kotou tala mai te moʼoni. ʼE au tala moʼoni atu, kapau neʼe kotou kakaʼi au, pea ko koutou ko he ʼu tagata neʼe ʼomai ʼo vakaʼi fakafufu te fenua.”
17 Neʼe ina tuku leva ia natou fuli ki te fale pilisoni lolotoga ʼaho ʼe tolu.
18 ʼI te tolu ʼaho, neʼe ui age e Sosefo kia natou: “ ʼE au manavasiʼi ki te ʼAtua. Koia, kotou fai te meʼa ʼae ʼe au ui atu pea ʼe kotou maʼuʼuli anai.
19 Kapau ʼe kotou faitotonu, ke nofo he tahi ia koutou ʼi te fale pilisoni ʼaeni, kae ʼe feala kia natou ʼae ke olo pea kotou ʼave hakotou meʼa kai maʼa ʼokotou famili ʼae ʼe nonofo pakupaku.+
20 Pea kotou ʼaumai tokotou tehina muli, ke au iloʼi ai neʼe kotou tala mai te moʼoni, pea ʼe mole kotou mamate anai.” Neʼe natou mulimuli leva ki ai.
21 Pea neʼe natou feuiʼaki: “ ʼE mahino ia, ʼe fakatuʼā tatou ʼuhi ko totatou tehina.+ Neʼe tou sisio ki tona lotomamahi ʼi tana kole mai ʼae ke tou ʼofa age ki ai, kae neʼe mole tou fakalogo ki ai. Koia ʼae ʼe tou mamahi ai ʼi te ʼaho nei.”
22 Pea neʼe ui e Lupeni kia natou: “Neʼe mole au ui atu koa la ke ʼaua naʼa kotou fai he meʼa ʼe kovi* ki te tama? Kae neʼe mole kotou fakalogo mai.+ ʼE mahino ia, ʼe fakatuʼā tatou koteʼuhi neʼe tou matehi ia ia.”*+
23 Kae neʼe mole natou iloʼi neʼe mahino ia Sosefo ki ʼanatou palalau, he neʼe ʼi ai he tagata fakahoko lea ia natou.
24 Koia neʼe fakamamaʼo ai mai ia natou pea neʼe tagi.+ ʼI tana toe liliu mai ʼo palalau age kia natou, neʼe ina toʼo ia Simeone+ mai ia natou ʼo haʼi ʼi ʼonatou muʼa.+
25 Neʼe fakatotonu leva e Sosefo ke fakafonu ʼanatou taga ʼaki te meʼa kai pea ke toe ʼai ki ʼanatou taga tanatou falā, pea ke foaki hanatou meʼa kai ki tanatou faifagona. Neʼe fai leva te ʼu faʼahi ʼaia maʼa natou.
26 Neʼe natou hili ai ʼanatou taga meʼa kai ki ʼanatou asino pea neʼe natou olo ai leva.
27 Neʼe natou tutuʼu ʼi he koga meʼa ke natou momoe ai. Pea neʼe avahi e he tahi ia natou tana taga ke ina fafaga tana asino, pea neʼe sio ki tana falā neʼe tuku ʼi tana taga.
28 Neʼe ina ui ki ʼona tehina: “Neʼe toe liufaki mai taku falā pea koʼeni ʼi taku taga!” Neʼe natou matataku ai, mo tete pea mo natou feuiʼaki: “Kotea koa te meʼa ʼaeni kua fai mai e te ʼAtua kia tatou?”
29 ʼI tanatou tau atu ki te fenua ʼo Kanaane, ki tanatou tamai ko Sakopo, neʼe natou fakamatala age te ʼu meʼa fuli ʼae neʼe hoko kia natou. Neʼe natou ui:
30 “Ko te tagata ʼae ʼe pule ʼi te fenua neʼe palalau fefeka mai kia matou+ pea neʼe ina ui neʼe matou olo age ʼo vakaʼi fakafufu te fenua.
31 Kae neʼe matou tali age ki ai: ‘Ko matou ko he ʼu tagata faitotonu pea neʼe mole matou ʼomai ʼo vakaʼi fakafufu te fenua.+
32 Ko matou ko he fale tau tehina, ʼe matou toko 12,+ pea ʼe matou tamai tahi. Kua puli te tahi,+ pea ʼe nofo tomatou tehina muli mo tamatou tamai ʼi te fenua ʼo Kanaane.’+
33 Kae neʼe ui mai e te tagata ʼae ʼe pule ʼi te fenua: ‘ ʼE au iloʼi anai ʼe kotou faitotonu ʼi te aluʼaga ʼaeni: Ke nofo he tahi ia koutou mo au.+ Pea kotou toʼo hakotou meʼa kai maʼa ʼokotou famili ʼae ʼe nonofo pakupaku pea kotou olo.+
34 Pea kotou ʼaumai tokotou tehina muli ke au iloʼi ai neʼe mole kotou ʼomai ʼo vakaʼi fakafufu te fenua, kae ʼe kotou faitotonu. ʼE au toe tuku atu anai tokotou tehina, pea ʼe feala anai hakotou faikoloa ʼi te fenua.’ ”
35 ʼI tanatou huaʼi ʼanatou taga, neʼe natou tahi maʼu tana kato falā ʼi tana taga. ʼI tanatou sisio mo tanatou tamai ki ʼanatou falā, neʼe natou matataku ai.
36 Neʼe ui age e tanatou tamai ko Sakopo kia natou: “Neʼe kotou toʼo ʼaku fanau!+ Kua puli ia Sosefo,+ kua puli mo Simeone+ pea ʼe kotou toe toʼo anai mo Pesamino! Ko au ʼae ʼe hoko ki ai te ʼu meʼa fuli ʼaia!”
37 Kae neʼe ui e Lupeni ki tana tamai: “ ʼE feala anai hau matehi ʼoku foha ʼe lua mo kapau ʼe mole au toe ʼaumai ia ia kia koe.+ Tuku mai ia ia pea ʼe au tokaga anai ki ai. ʼE au toe liliu mai anai mo ia.”+
38 Kae neʼe ina tali age: “ ʼE mole alu anai toku foha mo koutou, koteʼuhi kua mate tona tehina pea ʼe ko ia pe ʼae kei nofo mo au.+ Kapau ʼe hoko kia ia he tuʼutamaki ʼi takotou faifagona, ʼo mate ai, ʼe kotou fakahifo anai au ki te Faitoka*+ ʼuhi ko toku lotomamahi.”+
Nota
^ Neʼe lagi ko te fulumeto peʼe ko te olose.
^ Peʼe “liligi tona toto.”
^ Hep. “agahala.”
^ Vakaʼi Te ʼu Kupu.
