Sosue 11:1-23
11 ʼI te iloʼi e Sapini, te hau ʼo Atesoli te meʼa ʼae neʼe hoko, neʼe ina fekauʼi ai he ʼu tagata ʼave logo ke olo kia Sopape, te hau ʼo Matoni,+ mo te hau ʼo Similone, pea mo te hau ʼo Akisafi.+
2 Neʼe ina toe fekauʼi foki he ʼu tagata ʼave logo ke olo ki te ʼu hau ʼae neʼe nonofo ʼi te potu noleto, ia te potu moʼugaʼia, mo natou ʼae neʼe nonofo ʼi te ʼu potu fenua laulelei* ʼi te potu saute ʼo Kineleti, mo natou ʼae neʼe nonofo ʼi te Sefela pea mo te potu fenua ʼo te ʼu kiʼi moʼuga ʼo Tole+ ʼi te potu uesite.
3 Neʼe toe olo ai he ʼu tagata ʼave logo ki te kau Kanaane+ ʼi te potu esite pea mo te potu uesite, mo te kau Amole,+ mo te kau Heti, mo te kau Pelesite, mo te kau Sepusi, ia natou fuli ʼaia neʼe nonofo ʼi te potu moʼugaʼia, pea mo te kau Hevi+ ʼae neʼe nonofo ʼi te vaʼe moʼuga ʼo Helemoni,+ ʼi te potu fenua ʼo Misipa.
4 Neʼe natou ʼomai ai mo ʼanatou foʼi kautau fuli. Neʼe kaugamalie ʼaupito ʼanatou tagata solia ohage ko te ʼu fisiʼi ʼone ʼo te tai, pea mo lahi ʼaupito ʼanatou hosi mo ʼanatou saliote.
5 ʼI te ʼosi fakatuʼutuʼu e te ʼu hau fuli ʼaia ke natou fakatahitahi ki te ʼu vai ʼo Melomi, neʼe natou fakatuʼu ovi ai ʼonatou nofoʼaga, ke natou tauʼi te kau Iselaele.
6 Pea neʼe ui e Sehova kia Sosue: “ ʼAua naʼa ke mataku ia natou,+ he ʼe au tuku anai ia natou ki te ʼu nima ʼo Iselaele, apogipogi ʼi te hola ʼaeni, ʼei, ʼe kotou matehi anai ia natou fuli. ʼE ke tuʼusi anai te ʼu ivi ʼo te ʼu vaʼe ʼo ʼanatou hosi+ pea mo tutu ʼanatou saliote.”
7 Neʼe alu ai ia Sosue pea mo ʼana tagata solia ʼo ʼohofi fakapunamaʼuli ia natou ʼi te ʼu vai ʼo Melomi.
8 Neʼe tuku e Sehova ia natou ki te ʼu nima ʼo Iselaele.+ Neʼe malo te kau Iselaele ia natou, pea neʼe natou tuli ia natou ʼo kaku ki Sitoni Lahi,+ mo Misilefoti-maime,+ pea mo te Potu Fenua Laulelei ʼo Misipe ʼi te potu esite. Neʼe natou matehi ia natou pea neʼe mole natou tuku ke maʼuli he tahi.+
9 Pea neʼe fai e Sosue te meʼa ʼae neʼe fakatotonu age e Sehova: neʼe ina tuʼusi te ʼu ivi ʼo te ʼu vaʼe ʼo ʼanatou hosi pea mo tutu ʼanatou saliote.+
10 Tahi ʼae meʼa, neʼe toe liliu mai ia Sosue, pea neʼe ina maʼu ia te kolo ko Atesoli, pea neʼe ina matehi tona hau ʼaki te heleta,+ koteʼuhi ʼi muʼa atu, ko Atesoli neʼe ko te kolo muʼa ʼo te ʼu puleʼaga fuli ʼaia.
11 Neʼe matehi e te kau Iselaele ia natou* fuli ʼae neʼe nonofo ʼi te kolo ʼaia ʼaki te heleta. Neʼe natou pulihi ai ia natou.+ Neʼe mole natou tuku ke maʼuli he tahi.+ Pea neʼe tutu leva e Sosue ia Atesoli.
12 Neʼe maʼu e Sosue te ʼu kolo fuli ʼaia pea neʼe ina matehi ʼonatou hau ʼaki te heleta.+ Neʼe ina pulihi ia natou,+ ohage pe ko tona fakatotonu age e Moisese, te tagata faifekau ʼa Sehova.
13 Kae neʼe mole tutu e te kau Iselaele te ʼu kolo ʼae neʼe tutuʼu ʼi te ʼu kiʼi moʼuga, gata pe ki te kolo ko Atesoli. Neʼe ko te kolo pe ʼaia ʼe tahi ʼae neʼe tutu e Sosue.
14 Neʼe toʼo e te kau Iselaele maʼa natou te ʼu koloa fuli ʼae neʼe natou maʼu ʼi te ʼu kolo ʼaia, ʼo feia mo te faga manu.+ Kae neʼe natou matehi ia te hahaʼi fuli ʼaki te heleta.+ Neʼe mole natou tuku ke maʼuli he tahi.+
15 Ko te ʼu meʼa ʼae neʼe fakatotonu age e Sehova ki tana tagata faifekau ko Moisese, neʼe toe fakatotonu pe e Moisese kia Sosue ke ina fai.+ Pea neʼe mulimuli pe ki ai ia Sosue. Neʼe mulimuli fakalelei ia Sosue ki te ʼu meʼa fuli ʼae neʼe fakatotonu age e Sehova kia Moisese.+
16 Neʼe maʼu e Sosue te fenua katoa ʼaeni: te potu moʼugaʼia, mo te Nekepe katoa,+ mo te fenua katoa ʼo Koseni, mo te Sefela,+ mo te Alapa,+ pea mo te potu moʼugaʼia ʼo Iselaele mo tona Sefela,*
17 mai te Moʼuga ʼo Halake, ʼae ʼe ovi ki Seili, ʼo kaku ki Paale-kati+ ʼi te Potu Fenua Laulelei ʼo Lipane, ʼi te vaʼe Moʼuga ʼo Helemoni.+ Neʼe ina puke ʼonatou hau fuli, pea neʼe ina matehi ia natou.
18 Neʼe fualoa te tauʼi e Sosue ia te ʼu hau fuli ʼaia.
19 Neʼe mole he kolo neʼe ina fai he fuakava ʼo te tokalelei mo te kau Iselaele, gata pe ki te kau Hevi ʼae neʼe nonofo ʼi Kipeone.+ Koia, neʼe natou tauʼi ai te ʼu kolo fuli ʼaia, ʼo natou maʼu.+
20 Neʼe ko Sehova ʼae neʼe ina tuku ke lotofefeka te hahaʼi ʼaia,+ ʼo natou tauʼi ai ia Iselaele, ke feala ai hana fakaʼauha ia natou pea ke mole lotomanavaʼofa kia natou.+ Neʼe tonu ke pulihi ia natou, ohage pe ko tona fakatotonu age e Sehova kia Moisese.+
21 ʼI te temi ʼaia, neʼe matehi e Sosue ia te kau Anake+ ʼae neʼe nonofo ʼi te potu moʼugaʼia, mo Hepelone, mo Tepile, mo Anape, mo te ʼu potu moʼugaʼia katoa ʼo Suta pea mo te ʼu potu moʼugaʼia katoa ʼo Iselaele. Neʼe pulihi e Sosue ia natou ʼaia pea mo maumauʼi ʼonatou kolo.+
22 Neʼe mole toe maʼu pe la he tagata Anake ʼi te fenua ʼo te kau Iselaele, kae neʼe kei maʼu+ pe ʼi Kasa,+ mo Kiete+ pea mo Asoti.+
23 Koia, neʼe puleʼi ai e Sosue te fenua katoa, ohage pe ko tona fakapapauʼi age e Sehova kia Moisese.+ Pea neʼe foaki leva e Sosue te fenua ki te ʼu telepi ʼo Iselaele ko honatou tofiʼa, ke vaevae ʼi te ʼu telepi. Neʼe tahi maʼu ai e te telepi tona vahe.+ Neʼe maʼuli leva te fenua ʼi te tokalelei, pea neʼe mole toe hoko ai he tau.+
