Sosue 4:1-24
-
Neʼe fakatuʼu ni foʼi maka ko he fakamanatu (1-24)
4 ʼI te kua fakalaka ʼa te puleʼaga katoa ʼi te Solotane, neʼe ui e Sehova kia Sosue:
2 “Kotou filifili ni tagata ʼe toko 12 ʼi te hahaʼi, ko he tagata ʼe tahi ʼi te ʼu telepi takitahi,+
3 pea kotou fakatotonu age kia natou: ‘Kotou toʼo he ʼu foʼi maka ʼe 12 ʼi te lotomalie ʼo te Solotane, ʼi te faʼahi ʼae neʼe tutuʼu ai te kau pelepitelo,+ pea kotou ʼave te ʼu foʼi maka ʼaia ʼo tuku ki te faʼahi ʼae ka kotou nonofo ai ʼi te poʼuli.’ ”+
4 Koia, neʼe pauʼi ai e Sosue te ʼu tagata ʼe toko 12 ʼae neʼe ina filifili ʼi te kau Iselaele, ko he tagata ʼe tahi ʼi te ʼu telepi takitahi,
5 pea neʼe ina ui age kia natou: “Ke kotou olo ki te lotomalie ʼo te Solotane, ki te muʼa Aleka ʼo Sehova tokotou ʼAtua. Pea kotou tahi toʼo mai ai tana foʼi maka ʼo ʼamo, ke takitahi te telepi ʼo te kau Iselaele mo tana foʼi maka.
6 ʼAki te ʼu foʼi maka ʼaia, ʼe tonu anai ke kotou manatuʼi te meʼa ʼae neʼe fai e te ʼAtua. Pea kapau ʼe fehuʼi atu e ʼakotou fanau* ʼi he temi ki ʼamuli pe koʼe neʼe kotou fakatuʼu ʼi heni te ʼu foʼi maka ʼaia,+
7 ʼe tonu anai ke kotou tali: ‘Koteʼuhi neʼe gata te tafe ʼo te vai ʼo te Solotane ʼi te muʼa aleka+ ʼo te fuakava ʼa Sehova. Neʼe mole kei tafe ai te vai ʼo te Solotane ʼi te temi ʼae neʼe fakalaka ai te fata ʼo te aleka ʼi te Solotane. ʼE liliu anai te ʼu maka ʼaia ko he fakamanatu ki te hahaʼi ʼo Iselaele ʼo talu ai.’ ”+
8 Neʼe fai leva e te kau Iselaele ohage pe ko tona fakatotonu age e Sosue: neʼe natou toʼo foʼi maka ʼe 12 ʼi te lotomalie ʼo te Solotane, ke takitahi te telepi ʼo te kau Iselaele mo tana foʼi maka, ohage pe ko tona fakatotonu age e Sehova kia Sosue. Pea neʼe natou ʼave te ʼu foʼi maka ʼaia ʼo tuku ki te faʼahi ʼae ka natou nonofo ai ʼi te poʼuli.
9 Neʼe toe fakatuʼu foki e Sosue he ʼu foʼi maka ʼe 12 ʼi te lotomalie ʼo te Solotane, ʼi te faʼahi ʼae neʼe tutuʼu ai te kau pelepitelo ʼae neʼe natou fata te aleka ʼo te fuakava.+ Pea ʼe kei tuʼu ai te ʼu foʼi maka ʼaia ʼo kaku mai ki te ʼaho nei.
10 Neʼe tutuʼu te kau pelepitelo ʼae neʼe natou fata te Aleka ʼi te lotomalie ʼo te Solotane, ʼo kaku ki te ʼosi fai e te kau Iselaele te ʼu meʼa fuli ʼae neʼe fakatotonu e Sehova ʼaki ia Sosue. ʼI tanatou tutuʼu ʼaia, neʼe fakalaka fakavilivili ia te hahaʼi.
11 ʼI te ʼosi fakalaka ʼa te hahaʼi fuli, neʼe toe fakalaka mo te kau pelepitelo ʼae neʼe natou fata te Aleka ʼo Sehova, kae sisio ki ai te hahaʼi.+
12 Neʼe teuteu ki te tau ia te kau Lupeni, mo te kau Kate pea mo te vaelua ʼo te telepi ʼo Manase ʼi tanatou fakalaka ʼi te Solotane,+ ʼo natou olo ʼi muʼa ʼo te tahi age kau Iselaele, ohage pe ko tona fakatotonu e Moisese kia natou.+
13 Neʼe ko tagata solia ʼe teitei toko 40 000 ʼae neʼe natou fakalaka ʼi te Solotane mo ʼanatou mahafu, ia muʼa ʼo Sehova ʼo natou olo ki te ʼu kele toafa ʼae ʼe ina ʼa takai ia Seliko.
14 ʼI te ʼaho ʼaia, neʼe fakamaʼuhigaʼi e Sehova ia Sosue ia muʼa ʼo Iselaele katoa,+ pea neʼe natou fakaʼapaʼapa* kia ia ʼi te temi ʼae neʼe kei maʼuli ai, ohage pe ko tanatou fakaʼapaʼapa kia Moisese.+
15 Pea neʼe ui e Sehova kia Sosue:
16 “Fakatotonu ki te kau pelepitelo ʼae ʼe natou fata te aleka+ ʼo te Fakamoʼoni* ke natou mavae ʼi te Solotane.”
17 Koia, neʼe fakatotonu ai e Sosue ki te kau pelepitelo: “Kotou mavae ʼi te Solotane.”
18 ʼI te mavae leva ʼa te kau pelepitelo, ʼae neʼe natou fata te aleka+ ʼo te fuakava ʼa Sehova mai te lotomalie ʼo te Solotane, pea mo lave ʼonatou vaʼe ki te kele moamoa, neʼe toe tafe leva te vai ʼo te Solotane pea neʼe hake ai,+ ohage pe ko te mahani.
19 Neʼe fakalaka te hahaʼi ʼi te Solotane ʼi te ʼaho hogofulu ʼo te ʼuluaki mahina pea neʼe natou fakatuʼu tonatou nofoʼaga ʼi Kilekale,+ ʼi te potu esite ʼo Seliko.
20 Pea neʼe fakatuʼu e Sosue ʼi Kilekale te ʼu foʼi maka ʼe 12 ʼae neʼe toʼo ʼi te Solotane.+
21 Pea neʼe ina ui ki te kau Iselaele: “Kapau ʼe fehuʼi atu e ʼakotou fanau ʼi he temi ki ʼamuli pe kotea te ʼu foʼi maka ʼaeni,+
22 ʼe tonu anai ke kotou fakamahino age kia natou: ‘Neʼe fakalaka ia Iselaele ʼi te Solotane, ʼi he kele moamoa,+
23 ʼi te temi ʼae neʼe fakamamaha e Sehova tokotou ʼAtua te vai ʼo te Solotane ʼi ʼonatou muʼa, ʼo kaku ki tanatou ʼosi fakalaka ai. Neʼe hage pe te meʼa ʼae neʼe fai e Sehova tokotou ʼAtua ʼi te Solotane, ko te meʼa ʼae neʼe ina fai ʼi te Tai Kula, ʼi tana haga ʼo fakamamaha ʼi ʼomatou muʼa, ʼo kaku ki tamatou fakalaka.+
24 Neʼe ina fai te faʼahi ʼaia ke iloʼi ai e te hahaʼi fuli ʼo te kele ia te mafimafi ʼo te nima ʼo Sehova+ pea ke kotou manavasiʼi tuʼumaʼu ai kia Sehova, tokotou ʼAtua.’ ”
Nota
^ Hep. “ ʼokotou foha.”
^ Hep. “manavasiʼi.”
^ Vakaʼi te kupu “Aleka ʼo te fuakava” ʼi Te ʼu Kupu.
