Sosue 6:1-27
6 Pea neʼe pupunu fakalelei te ʼu matapa ʼo Seliko ʼuhi ko te kau Iselaele. Neʼe mole hu he tahi ki tuʼa pea neʼe mole hu he tahi ki loto.+
2 Neʼe ui leva e Sehova kia Sosue: “Koʼeni, ʼe au tuku atu kia koe ia Seliko, mo tona hau pea mo ʼana tagata tau malolohi.+
3 Ko koutou fuli, kau solia, ʼe kotou foliʼi tuʼa tahi anai ia te kolo. ʼE kotou fai feia anai lolotoga ʼaho ʼe ono.
4 ʼE ke kole anai ki he ʼu pelepitelo ʼe toko fitu ke natou tahi toʼo tana fakatagi pupuhi neʼe fai ʼaki te tala ʼo he ovi tagata, pea mo haʼele ʼi muʼa ʼo te Aleka. Kae ʼi te fitu ʼaho, ʼe kotou foliʼi tuʼa fitu anai te kolo, pea ʼe pupuhi anai e te kau pelepitelo te ʼu fakatagi pupuhi.+
5 Ka pupuhi te ʼu talaʼi manu ʼaia, pea mo kotou logo anai ki ai,* ʼe fai anai e te kau solia fuli he kalaga tau lahi. Pea ʼe holo anai te kaupa ʼo te kolo,+ pea ʼe tonu anai ke feulufi te kau solia ki te kolo, ʼo natou tahi alu fakahagatonu ki ai.”
6 Koia, neʼe fakatahiʼi ai e Sosue, te foha ʼo Nune ia te kau pelepitelo pea neʼe ina ui age kia natou: “Kotou fata te aleka ʼo te fuakava, pea ke olo ni pelepitelo ʼe toko fitu ʼi muʼa ʼo te Aleka ʼo Sehova, mo tahi toʼo tana fakatagi pupuhi neʼe fai ʼaki te tala ʼo he ovi tagata.”+
7 Pea neʼe ina ui ki te kau solia: “Kotou olo pea kotou foliʼi ia te kolo. ʼE haʼele anai te kau tagata mo ʼanatou mahafu+ ʼi muʼa ʼo te Aleka ʼo Sehova.”
8 ʼI te ʼosi palalau ʼa Sosue ki te kau solia, neʼe olo ai leva te ʼu pelepitelo ʼe toko fitu ʼae neʼe natou toʼo ʼanatou talaʼi manu ia muʼa ʼo Sehova pea neʼe natou pupuhi ʼanatou fakatagi pupuhi. Pea neʼe muliʼi natou e te kau pelepitelo ʼae neʼe natou fata te aleka ʼo te fuakava ʼa Sehova.
9 Neʼe haʼele te kau solia mo ʼanatou mahafu ʼi muʼa ʼo te kau pelepitelo ʼae neʼe natou pupuhi te ʼu fakatagi pupuhi, kae neʼe muliʼi e te tahi kau solia ia te Aleka. Pea neʼe pupuhi hoholo e te kau pelepitelo ʼanatou fakatagi pupuhi.
10 Pea neʼe fai e Sosue te fakatotonu ʼaeni ki te kau solia: “ ʼAua naʼa kotou kalaga pea ʼaua naʼa kotou palalau. ʼEi, ʼaua naʼa kotou palalau ʼo kaku ki te ʼaho ʼae ka au ui atu ai: ‘Kotou kalaga!’ Pea ʼe tonu anai ke kotou kalaga.”
11 Neʼe fakatotonu leva e Sosue ki te kau pelepitelo ʼae neʼe natou fata te Aleka ʼo Sehova, ke natou foliʼi tuʼa tahi pe ia te kolo. Hili ʼaia, neʼe toe liliu te kau tagata ki te nofoʼaga pea neʼe natou nonofo ai ʼi te poʼuli.
12 ʼI te ʼaho ake, neʼe ʼala uhuuhu leva ia Sosue. Neʼe fata leva e te kau pelepitelo te Aleka+ ʼo Sehova.
13 Neʼe haʼele te ʼu pelepitelo ʼe toko fitu ʼi muʼa ʼo te Aleka ʼo Sehova mo ʼanatou talaʼi manu, ʼo natou pupuhi hoholo ʼanatou fakatagi pupuhi. Neʼe haʼele ʼi muʼa ʼo natou te kau solia mo ʼanatou mahafu, kae neʼe muliʼi e te tahi kau solia ia te Aleka ʼo Sehova. Pea neʼe pupuhi hoholo e te kau pelepitelo ʼanatou fakatagi pupuhi.
14 Neʼe natou foliʼi tuʼa tahi ia te kolo, ʼi te lua ʼaho. Hili ʼaia, neʼe natou toe liliu ki te nofoʼaga. Neʼe natou fai feia lolotoga ʼaho ʼe ono.+
15 ʼI te fitu ʼaho leva, neʼe natou ʼaʼala uhuuhu, ʼi te mafoata, pea neʼe natou foliʼi ia te kolo, ohage pe ko tanatou fai mahani, kae neʼe natou foliʼi tuʼa fitu. Neʼe ko te ʼaho pe ʼaia neʼe natou foliʼi tuʼa fitu ai ia te kolo.+
16 ʼI tona tuʼa fitu leva, neʼe pupuhi ai e te kau pelepitelo ʼanatou fakatagi pupuhi, pea neʼe ui e Sosue ki te kau solia: “Kotou kalaga,+ he ʼe kua tuku atu e Sehova kia koutou ia te kolo!
17 Kotou maumauʼi te kolo pea mo te ʼu meʼa fuli ʼae ʼe maʼu ai.+ Ko te ʼu meʼa fuli ʼaia ʼe ʼa Sehova. Kotou tuku pe ke maʼuli ia Laape,+ te fafine paomutu, pea mo natou fuli ʼae ʼe nonofo mo ia ʼi tona ʼapi, he neʼe ina fakanono te ʼu tagata ʼae neʼe tou fekauʼi ke olo ʼo vakaʼi fakafufu te fenua.+
18 Kae ke kotou fakamamaʼo mai te meʼa ʼae ʼe tonu ke pulihi,+ naʼa kotou holi ki ai pea mo kotou toʼo.+ ʼE feala ai anai ke hoko he malaʼia ki* te nofoʼaga ʼo Iselaele ʼuhi ko koutou, pea ʼe liliu anai ko he meʼa ʼe tonu ke pulihi.+
19 Kae ʼe taputapu kia Sehova te siliva fuli mo te aulo fuli pea mo te ʼu meʼa fuli ʼae neʼe fai ʼaki te kapa mo te ukamea.+ ʼE tuku anai te ʼu meʼa ʼaia ki te tanakiʼaga koloa ʼo te fale ʼo Sehova.”+
20 Pea ʼi te temi ʼae neʼe pupuhi ai te ʼu fakatagi pupuhi, neʼe kalaga te kau solia.+ ʼI tanatou logo pe ʼae ki te pupuhi ʼo te ʼu fakatagi pupuhi, neʼe natou fai ai he kalaga tau lahi pea neʼe holo ai te kaupa.+ Pea neʼe feulufi ai te kau solia ki te kolo, ʼo tahi alu fakahagatonu ki ai, pea neʼe natou maʼu leva te kolo.
21 Neʼe natou tamateʼi ʼaki te heleta te ʼu meʼa fuli ʼae neʼe ʼi te kolo, ia te hahaʼi tagata mo te hahaʼi fafine, te kau tupulaga mo te hahaʼi matuʼa, mo te ʼu vitulo, mo te ʼu ovi pea mo te ʼu asino.+
22 Pea neʼe ui e Sosue ki te ʼu tagata ʼe toko lua ʼae neʼe olo ʼo vakaʼi fakafufu ia te fenua: “Kolua olo ki te ʼapi ʼo te fafine paomutu pea kolua ʼaumai ia ia ki tuʼa pea mo natou fuli ʼae neʼe fakatahitahi ki tona ʼapi, ohage pe ko takolua fakapapauʼi age ki ai.”+
23 Koia, neʼe olo ai te ʼu tagata ʼaia ʼo ʼaumai ki tuʼa ia Laape, mo tana tamai, mo tana faʼe, mo ʼona tokolua, pea mo natou fuli ʼae neʼe fakatahitahi ki tona ʼapi, ʼei, tona famili katoa.+ Neʼe nā puipui ia natou ʼo ʼave ki he koga meʼa ʼi tuʼa atu ʼo te nofoʼaga ʼo Iselaele.
24 Pea neʼe tutu e te kau solia te kolo pea mo te ʼu meʼa fuli ʼae neʼe maʼu ai. Kae neʼe tuku te siliva, mo te aulo pea mo te ʼu meʼa fuli ʼae neʼe fai ʼaki te kapa mo te ukamea ki te tanakiʼaga koloa ʼo te tapenakulo* ʼo Sehova.+
25 Neʼe tuku pe e Sosue ke maʼuli ia Laape, te fafine paomutu, mo te famili ʼo tana tamai pea mo natou fuli ʼae neʼe fakatahitahi ki tona ʼapi.+ Pea ʼe kei maʼuli ʼi Iselaele ʼo kaku mai ki te ʼaho nei,+ he neʼe ina fakanono te ʼu tagata ʼe toko lua ʼae neʼe fekauʼi e Sosue ke olo ʼo vakaʼi fakafufu ia Seliko.+
26 ʼI te temi ʼaia, neʼe fai e Sosue* te ʼu palalau ʼaeni: “Ke malaʼia ia muʼa ʼo Sehova te tagata ʼae ʼe faiga anai ke ina toe laga te kolo ko Seliko. ʼE mate anai tona foha lahi ʼi te temi ʼae ka ina fakatuʼu ai ʼona fakatafito, pea ʼe mate anai tona foha muli ʼi te temi ʼae ka ina ʼai ai ʼona matapa.”+
27 Koia, neʼe nofo ia Sehova mo Sosue,+ pea neʼe iloa leva ia Sosue ʼi te kele katoa.+
Nota
^ Peʼe “ki tana tagi fakamateloloa.”
^ Peʼe “ke liʼakina.”
^ Hep. “fale.”
^ Peʼe lagi “neʼe fakatotonu e Sosue ke fai e te hahaʼi.”
