ROMNHORÉ 58
Atsimirẽme ãna ꞌre anomro uꞌötsi mono Jeová ma
Jesus dzadawa dzamarĩꞌwa ĩꞌuptabi norĩ te tsima roti dzaꞌra te te tsaꞌré dzaꞌra tõ da marĩ niwamhã niꞌwa te te tiwi roꞌwaꞌré da ĩtsiwaihuꞌu dzaꞌra dzém na Jeová ãma. Tô tsena ãne duré te aihöiba. Jeová ma, atsimirẽmeꞌõdzé ĩpire uptabi. (Tsõré na 1 Crônicas 28:9 TNM.) E mahã romhöimanadzém norĩ na atsimirẽmeꞌõdzé te dza pibu ni duré e niha te dza tsada aihöiba.
1. E niha niꞌwam norĩ te dza pibu dzaꞌra wanhimirẽmeꞌõdzé Jeová ma.
Niꞌwam norĩ te dza waꞌwapé dzaꞌra Jeová ma romhuri wa te tsadzöri dzaꞌra da. E ꞌwam norĩ bété. Niꞌwam norĩ rowahutu uptabi hã te te ĩrẽme dzaꞌra hã te natsi tidzadawa nhipetse dzaꞌra Ropotoꞌwa nhimiꞌuptsãtãdzém na te te wanhimidzadze wamnarĩ dzaꞌra da. Õ norĩ hã, ĩꞌmahörö dzaꞌra wadzada ĩtsipidzari norĩ. Duré niꞌwa dama ĩpire norĩ danhimidzadze na te wawatsuꞌu wamnarĩ dzaꞌra da te rẽme dzaꞌra da rowahutu uptabi hã. Pipa di wa te ꞌwapé dzaꞌra wamhã wadzada ĩtsipidzari norĩ ma, wa te ãma rowatsuꞌu dzaꞌra da ĩte ĩhöiwarobo norĩ, niwamhã internet na te te ĩtsihötö dzaꞌra nhoré duré ĩte ĩropoto norĩ ꞌmadöꞌö na. Jesus te tinha te te ĩwaꞌwapé dzaꞌra norĩ ãma Jeová ma romhuri wa te tsadzöri dzaꞌra da: ‘Ãma aihötöꞌö dzaꞌra waꞌaba tõ . . . ta norĩ hã dadzaprõniꞌwa, tobꞌa dzaꞌra nherẽ. Ĩtobꞌa dzahuré tsitsaprõni dzahuré wamhã, te dza tsiré tiwaptãꞌã dzahuré, abꞌre wa.’ — Mateus 15:14.
2. E niha wa dza höiꞌré dzaꞌra ni wanhimirẽmeꞌõdzé Jeová ma wanhimipitsutudzém na.
Jeová dzawi dzarina dame wahöimana dzaꞌra õ di dza danhimidzadze ĩꞌuptabiꞌõ ãma. Taha wa, dame wahöimana dzaꞌra õ di daꞌubumroi ꞌremhã, romhuri ꞌremhã niwamhã danhimiꞌuptsãtãdzéb ꞌremhã ĩhöimana dzaꞌra danhimidzadze ĩꞌuptabiꞌõ dzarina. Jeová te wapoꞌre puꞌu dzaꞌra: ‘Ĩ̱nhibꞌaꞌuwẽ norĩ, maꞌãpé Babilônia hawi, dama ĩtsaꞌretse dzaꞌẽne hã, aiwairébé aba.’ — Apocalipse 18:2, 4.
WAIHUꞌU DURÉ
Te dza ĩꞌmadö ĩꞌmanharĩdzéb da hã niꞌwa atsimirẽmeꞌõdzé Jeová ma te te wamnarĩ tõ da. Te dza ĩꞌmadö duré e marĩ wa, ĩpire Babilônia ĩtsaꞌẽtẽ hawi aiwatobro da atsimirẽmeꞌõdzé höiꞌré da.
3. Atsiꞌmadöꞌö rowahutu ĩꞌuptabiꞌõ wi
E marĩ, wa dza ꞌmanharĩ dzaꞌra ni wa te wapari dzaꞌra wamhã da te ĩwatsuꞌu wamnarĩ dzaꞌra dzé Jeová nhimiꞌuptsãtãdzéb ãma. Atsiré tsõré aba Provérbios 14:15. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E marĩ wa, wa te tsadze tsuꞌu dzaꞌra õ di dza uburé wa te ĩwapari dzaꞌra dzé.
Atsiré tsõré aba 2 João 9, 10. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E niha wa dza wahöimana dzaꞌra ni wadzada ĩtsipidzari norĩ ma.
-
Õne haré wa te robdzanhamri dzaꞌra õ nherẽ wadzada ĩtsipidzari norĩ ma, e niha ãté te dza warétsi dzaꞌra ni ĩtsimirotsaꞌrata dzaꞌra na.
-
Aima hã, e niha Jeová te tihöiba wa te natsi wapari dzaꞌra wamhã, da te ĩwatsuꞌu wamnarĩ dzaꞌra dzé õhõ ãma duré ĩtsimiꞌuptsãtãdzéb ãma.
4. Atsimirẽme ãna Ropotoꞌwai ma ꞌre anomro uꞌötsi mono watsitsãnawã tiwatsédé te te ꞌmanharĩ nherẽ
Wa te waihuꞌu dzaꞌra wamhã niꞌwa datsiꞌrãꞌõtõ ãma ĩwatsété dzaꞌẽtẽ na, e marĩ, wa te ĩꞌmanharĩ dzaꞌra da tsi. ꞌMadöꞌö Ropotoꞌwa te te ĩnharĩdzé tinhibꞌaꞌuwẽ norĩ ma Israel ãma duréihã. Atsiré tsõré aba Levítico 5:1 TNM.
Ãhã romnhihötö dzarina, wa te waihuꞌu dzaꞌra wamhã niꞌwa ĩwatsété dzaꞌẽtẽ na, wa te ĩwatsuꞌu dzaꞌra da tsi daꞌmadöꞌöꞌwa norĩ ma. Tadzahã, ĩmorĩꞌrada wanhimidzawi na wa dza nharĩ dzaꞌra ni ĩwatsété ma hã tiwatsété na tsiwatsuꞌu da daꞌmadöꞌöꞌwa norĩ ma. Tawamhã, ãne te te ꞌmanharĩ õ wamhã, Jeová ma wanhimirẽmeꞌõdzéb dzarina, wa dza watsuꞌu dzaꞌra ni daꞌmadöꞌöꞌwa norĩ ma wa te ĩwaihuꞌu dzaꞌra dzé. E niha ãhã ꞌmanharĩ na wa dza höiꞌré dzaꞌra ni wanhimidzawi nhimirẽmeꞌõdzé . . .
-
Ropotoꞌwa Jeová ma.
-
õhõ ĩwatsété ma.
-
ĩhöiba amo norĩ ma datsiꞌrãꞌõtõ ãma.
Watsitsãnawã tiwatsédé te te ꞌmanharĩ wamhã, pawapto na!
5. Babilônia ĩtsaꞌẽtẽ nhiti aihöimana
Atsiré tsõré aba Lucas 4:8 duré Apocalipse 18:4, 5. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E dzahadu dame wa ĩ̱höiba nimahã danhimidzadze ĩꞌuptabiꞌõ ãma.
-
E dame wa ĩ̱höiba danhimiꞌuptsãtãdzéb ãma ĩhöimana hã danhimidzadze ĩhöiba amo dzarina.
-
E ĩ̱nhimiromhuri na wa te ꞌre upari mono danhimidzadze ĩꞌuptabiꞌõ marĩ na.
-
E marĩ ĩ̱höimanadzéb ꞌremhã ĩré hã te rẽme da, danhimidzadze ĩꞌuptabiꞌõ nhiti ĩ̱höimana da.
-
Te tsadaꞌöbö wamhã “ĩhe” nimahã dadzadanharĩ da hã e marĩ na ĩ̱höimanadzém na te ãma ĩtsaprĩ da tsi.
Ãhã romhöimanadzé mono bö pitsutu wẽ na höiꞌré da atsimirẽmeꞌõdzé Jeová ma, duré atsitsãmridzé ĩwẽ da.
E marĩ te aré ĩꞌmanha da te aiwi waptẽrẽ dzaꞌra ꞌwaꞌöhã upari da romhuri dapawaptobdzém na danhimidzadze ĩꞌuptabiꞌõ nhimiꞌmanharĩ.
NIꞌWAM NORĨ TE NHARĨ DZAꞌRA ÃNE: “Wa ĩ̱tsima wẽ te waihuꞌu da wadzada ĩtsipidzari norĩ te te ĩwatsuꞌu dzaꞌra dzé Jeová Watsuꞌuꞌwa norĩ ãma hã te höiꞌré da wanhimirowahudu ĩbö na hã.”
-
Aima hã, e niꞌwa ĩtsimidzaꞌre ãne te dza ꞌmanha. E marĩ wa.
ĨWAIHUꞌUDZÉ HÃ
Jeová ma, wanhimirẽme ãna ꞌre wanomro uꞌötsi mono da, wahöimana dzaꞌra õ di dza te te ĩꞌwapé dzaꞌra norĩ me te te wama robꞌrãmi dzaꞌra da.
Ãma aipoꞌre puꞌu
-
E marĩ wa, wa te ĩwapari dzaꞌra tõ da tsi wadzada ĩtsipidzari dzaꞌra norĩ nhimirotsaꞌrada.
-
Wa te waihuꞌu dzaꞌra wamhã watsitsãnawã ĩwatsété dzaꞌẽtẽ na te te ĩꞌupa na hã, e marĩ, wa dza ꞌmanharĩ dzaꞌra ni.
-
E niha wa dza tsadawa dzamarĩ dzaꞌra ni roti danhimidzadze ĩꞌuptabiꞌõ hawi wawairébé da.
TSÔ AIRĨTĨ DURÉ
ꞌMadöꞌö ĩꞌmanharĩdzéb da hã da te watsuꞌu wamnarĩ watsété dzaꞌra wamhã Jeová Watsuꞌuꞌwa norĩ.
E niha te dza ĩꞌuptsibi me nimahã danhimiꞌuptsãtãdzé niwamhã romhuri te te upari dzô Babilônia ĩtsaꞌẽne hã.
E marĩ niꞌwam norĩ wadzada ĩhöimana dzaꞌra, ma ꞌmanharĩ dzaꞌra te te wanhimidzadze wamnarĩ dzaꞌra da.
Tsõré na rowatsuꞌu “Ropotoꞌwa dzô wa ꞌre rĩtĩ mono aiꞌutére hawi”, waihuꞌu da e niha danhibꞌihöꞌa xintoísta, ma tirẽ danhimidzadze ĩꞌuptabiꞌõ.
“Ropotoꞌwai mreme te te daꞌadzaprĩ waihuꞌu petse di” (Roꞌmadöꞌöꞌwa, 1.º julho na, 2011 na)
