1 Zuã 4:1-21
4 Ĩsisãnawã norĩ, ĩma iꞌasawi pese zaꞌra waꞌaba norĩ, uburé, ꞌre dazaze zaꞌra waꞌaba mono tõ, ꞌRe ihâimana uꞌâsi mono Pẽꞌẽzani ré ꞌre idahâimana zaꞌra mono na ꞌre dasiwasuꞌu zaꞌra mono nherẽ. Aꞌâ ꞌre dapibu zaꞌra waꞌaba mono, ꞌre waihuꞌu wẽ zaꞌra waꞌaba mono da, dahâimanazé, ãma ꞌre idahâimana zaꞌra mono hã ꞌRe ihâimana uꞌâsi mono hawib zô duré niwamhã ta hawib õ zô. E marĩ wa. Senai õ na ꞌRe ihâimana uꞌâsi mono zadawa ꞌmahârâꞌwa norĩ hã, ropâ oto wairébé mono wa.
2 Ãne te za ꞌre iwaihuꞌu zaꞌra waꞌaba mo, niꞌwam norĩ hã ꞌRe ihâimana uꞌâsi mono Pẽꞌẽzani ré, sena na ꞌre ihâimana zaꞌra mono na hã: Niꞌwa hã, Zezu Cristu tiꞌai u aꞌuwẽ na we imorĩ na te te tô ꞌre wasuꞌu mono wamhã, ta hã te ꞌRe ihâimana uꞌâsi mono Pẽꞌẽzani ré ꞌre hâimana.
3 Tazahã, niꞌwa hã Zezusi ãne na te te udâ wamhã, ꞌRe ihâimana uꞌâsi mono Pẽꞌẽzani hã isiré hâimana õ di. Cristuhu zada ꞌre Ihâimana mono pẽꞌẽzani si te taha ma hã ꞌre hâimana. Taha wasuꞌu hã ma tô ꞌre iwapari zaꞌra waꞌaba mo, niwa za isihâiꞌré na hã. Ta hã te oto ãhã na hã tihâiba, tiꞌai ãma hã.
4 Ĩꞌra norĩre, a norĩ waꞌwa hã ꞌRe ihâimana uꞌâsi mono te hã. Tahawa, ma tô ãma ꞌre iꞌaiꞌuté zaꞌra waꞌaba mo, senai õ na ꞌRe ihâimana uꞌâsi mono zadawa ꞌmahârâꞌwa norĩ ãma hã. E marĩ wa. ꞌRe ihâimana uꞌâsi mono Pẽꞌẽzani, aiwa ꞌre ihâimana zaꞌra waꞌaba mono hã siptete uptabi wa, tiꞌai ãma siwaꞌru ꞌre idahâimana zaꞌra mono norĩ wa, ꞌre ihâimana mono nhipai u.
5 Senai õ na ꞌRe ihâimana uꞌâsi mono zadawa ꞌmahârâꞌwa norĩ hã, tiꞌai ãma siwaꞌru ꞌre idahâimana zaꞌra mono norĩ te hã. Tahawa te te ꞌre irowasuꞌu zaꞌra mono hã tiꞌai ãma siwaꞌru ꞌre idahâimana zaꞌra mono hawip si. Tahawa te tiꞌai ãma siwaꞌru ꞌre idahâimana zaꞌra mono hã te te ꞌre wapari zaꞌra.
6 Tazahã, wa norĩ hã ꞌRe ihâimana uꞌâsi mono te hã. Niꞌwa hã ꞌRe ihâimana uꞌâsi mono te te waihuꞌu pese wamhã, te za wawapa. Tanei õ di, niꞌwa hã ꞌRe ihâimana uꞌâsi mono te õ wamhã. Ta hã te te wawapari õ di za. Tawamhã ãne na wa za wa te ꞌre waihuꞌu zaꞌra, aiwab õ na hã, tô sena ꞌRe ihâimana uꞌâsi mono Pẽꞌẽzani dama ꞌre ihâimana zaꞌra mono na hã duré iꞌupana robꞌrãmiꞌwa pẽꞌẽzani ré ꞌre idahâimana zaꞌra mono na zama.
ꞌRe ihâimana uꞌâsi mono hã, simizawi pese uptabi di
7 Ĩsisãnawã norĩ, ĩma iꞌasawi pese zaꞌra waꞌaba norĩ hã, wa za ꞌre wasisawi pese zaꞌra, ꞌre idasisawi pese zaꞌra mono zé hã ꞌRe ihâimana uꞌâsi mono hawi wa. Niꞌwa hã simizawi pese wamhã, ꞌRe ihâimana uꞌâsi mono ꞌra, te ꞌre mo. Duré ꞌRe ihâimana uꞌâsi mono hã tãma waihuꞌu pese di.
8 Niꞌwai ma isimizawizé tãma hâimana õ wamhã, ꞌRe ihâimana uꞌâsi mono hã tãma waihuꞌu õ di. E marĩ wa. ꞌRe ihâimana uꞌâsi mono hã simizawi pese uptabi wa.
9 ꞌRe ihâimana uꞌâsi mono ma tô tinhimizawizé hã wama hâiꞌré zaꞌra, ãhã na: Tiꞌra hã misi nherẽ, ma tô we satõ tiꞌai u dazada, dahâimanazé isiꞌutõrĩꞌõ hã wa te ãma ꞌre sõpẽtẽ zaꞌra mono da.
10 Tô sena danhimizawi hã, ã hã: ꞌRe ihâimana uꞌâsi mono hã, wa te ꞌre isawi zaꞌra mono nai õ di. Tazahã, Õ hã ma tô te te ꞌre waꞌazawi pese. Tahawa, Tiꞌra hã ma tô we satõ, te te wazada robzépata zaꞌẽtẽ zaꞌra da, taha zarina wawasédé hã te te waꞌãma ꞌre abꞌmadâꞌâ mono tõ da.
11 Ĩsisãnawã norĩ, ĩma iꞌasawi pese zaꞌra waꞌaba norĩ, ꞌRe ihâimana uꞌâsi mono hã tinhimizawizé, ãne te te wama hâiꞌré zaꞌra wa, wa za duré wa norĩ zama ꞌre wasisawi pese zaꞌra.
12 Niwa niꞌwa, ꞌRe ihâimana uꞌâsi mono titõmo na hã te te ꞌmadâꞌâ õ di. ꞌRe wasisawi pese zaꞌra mono wapsi, ꞌRe ihâimana uꞌâsi mono hã te za ꞌrâwi waꞌãma ꞌre hâimana zaꞌra. Te za duré tinhimizawizém na te te waꞌãma ꞌre aꞌuwaimrami, te te sima ꞌre iwẽ mono zéb zarina, ãma ꞌre wahâimana zaꞌra mono da.
13 Ãne na wa za wa te ꞌre waihuꞌu zaꞌra, ãma ꞌre iwahâimana zaꞌra mono na duré waꞌãma ꞌre ihâimana zaꞌra mono na, Tipẽꞌẽzani hã te te wama ꞌre anhomri mono wa.
14 Wa tô ꞌmadâꞌâ zaꞌra ni. Duré wa tô wa te dama ꞌre wasuꞌu zaꞌra, Wamama hã Tiꞌra we te te isatõrĩ na hã, Danhoꞌreptuiꞌwa da, tiꞌai ãma ꞌre idahâimana zaꞌra mono norĩ ma.
15 Niꞌwa hã Zezusi ꞌRe ihâimana uꞌâsi mono ꞌra na sõꞌawi te te ꞌre wasuꞌu mono wamhã, ꞌRe ihâimana uꞌâsi mono hã te za ãma ꞌre hâimana. Õhõ zama te za duré ꞌRe ihâimana uꞌâsi mono ãma ꞌre hâimana.
16 Taha zarina, wa waihuꞌu zaꞌra ni, ꞌRe ihâimana uꞌâsi mono te te ꞌre iwaꞌazawi pese mono na hã. Duré isimizawizém na wa wa te wasina ꞌre umnhasi zaꞌra.
ꞌRe ihâimana uꞌâsi mono hã simizawi pese uptabi di. Tahawa, niꞌwai ma isimizawizé ꞌre hâimana mono wamhã, te za ꞌRe ihâimana uꞌâsi mono ãma ꞌre hâimana. Duré ꞌRe ihâimana uꞌâsi mono hã te za ãma ꞌre hâimana.
17 Ãne wa, te tinhimizawizé hã te te wama ꞌre anhomri, ãma ꞌre wahâimana zaꞌra mono da, niwa wapahi ãna wa te wasina umnhasi zaꞌra da, Daꞌãma Rowairébézé bâdâ za ihâimana ãma hã. E marĩ wa. Tiꞌai ãma ꞌre iwahâimana zaꞌra mono zé hã, aiwa Cristu hã tiꞌai ãma ꞌre morĩ ré, ꞌre ihâimana mono zém ne.
18 Danhimizawi dama ꞌre hâimana zaꞌra mono wamhã, dapahizé hã baba di. Danhimizawi tô sena dama ꞌre hâimana mono wamhã, dapahi hã te za saꞌré danhiti. Tahawa, niꞌwai ma ipahi hã ꞌre hâimana mono wamhã, isimizawizé tô sena hã tãma ꞌre hâimana mono õ di. E marĩ wa. Dapahi hã te za hâiꞌré, marĩ, da te upai wa, asa dama robꞌmanharĩ wasété zé hã.
19 ꞌRe ihâimana uꞌâsi mono hã wama sawi pese zaꞌra di, uimrehẽne te te ꞌre waꞌazawi pese mono wa.
20 Niꞌwa hã te te nharĩ nherẽ, ãne: “Ĩma sawi di, ꞌRe ihâimana uꞌâsi mono hã”, tane nherẽ, tisisãnawã te te ꞌruiwapari wamhã, ta hã isadawa nhipe. E marĩ wa. Niꞌwa hã, tisisãnawã titõmo na te te ꞌre iꞌmadâꞌâ mono hã te te sawi õ nherẽ, ꞌRe ihâimana uꞌâsi mono hã te te sawi waihuꞌu õ wa, titõmo na te te iꞌmadâꞌâ waihuꞌu õ hã.
21 Cristu hã ma tô tinhimiroti ã hã wama hiri zaꞌra: Niꞌwa hã ꞌRe ihâimana uꞌâsi mono te te ꞌre sawi pese mono wamhã, te te duré ꞌre sawi pese mono, tisisãnawã hã.
