1 Tesalonita 2:1-20
2 Wasisãnawã norĩ, aima waihuꞌu pese zaꞌra waꞌaba di, wa te ãma iꞌasabu zaꞌra waꞌaba zé hã, taréi õ na hã.
2 Aima waihuꞌu pese zaꞌra waꞌaba di duré, Filipus ãma da te wama irobꞌmanharĩ wasété zaꞌra na hã duré da te waꞌãma iwasété zaꞌra na hã, tamomo Tesalonita u ãma wasihutu wana ré hã. Wazada dahâimana zaꞌẽtẽ zaꞌra nherẽ, wate zaꞌra ꞌRe ihâimana uꞌâsi mono hã ma tô wama sõmri zaꞌra wanhibꞌru hã, Rowasuꞌuwẽ ité ihawimhã wa te aima wasuꞌu zaꞌra waꞌaba da.
3 Wa te iꞌaiwadaꞌuri zaꞌra waꞌaba zé hã, iꞌupai õ di duré marĩ iwasédé, wa te wasima wẽ zaꞌra wab õ di. Duré wa te wasima wẽ zaꞌra wab õ di, wa te aima robꞌrãmi zaꞌra waꞌaba da hã.
4 Tazahã, ꞌRe ihâimana uꞌâsi mono te te sima ꞌre iwẽ mono zéb zarina si, wa wa te ꞌre rowasuꞌu zaꞌra, ta hã te te wawẽsãmri zaꞌra wa, duré romhuri hã te te wama sõmri zaꞌra wa, Rowasuꞌuwẽ itém na wa te dama ꞌre robꞌmahârâ zaꞌra mono da. Wa te wasima ꞌre robꞌruiwapari zaꞌra mono õ di, tiꞌai ãma aꞌuwẽ te te ꞌre iwawẽsãmri zaꞌra mono da hã. ꞌRe ihâimana uꞌâsi mono si, te te ꞌre waꞌawẽsãmri mono da si, taha si wapẽꞌẽ ꞌremhã te te ꞌre waꞌapibui mono wa, wa te wasima ꞌre iwẽ zaꞌra mono zé hã, tô sena zô.
5 Aima wawaihuꞌu pese zaꞌra waꞌaba di, wamreme zasi ãna wa te ꞌre irowasuꞌu zaꞌra mono õ na hã wa te aima ꞌre robꞌrãmi zaꞌra mono da hã. Duré robꞌuiprazé, wa te aiwi ubumro zaꞌra waꞌaba da hã, Rowasuꞌuwẽ hã wa te aima wasuꞌu zaꞌra waꞌaba õ di. Ãne na hã ꞌRe ihâimana uꞌâsi mono si te te wawaihuꞌu pese zaꞌra di.
6 Niwa, niꞌwa hã te te waꞌuzei wẽ zaꞌra zô wasina wanhopré õ di, duré iwaꞌuzei wẽ zaꞌra waꞌaba zô duré da te waꞌuzei wẽ zaꞌra zô zama.
7 Tô, marĩ hã wa te aré aiwi iwaptẽrẽ zahi zaꞌra waꞌaba da hã iré hã, Cristuhu zadawa wasuꞌuꞌwa ꞌre wanomro mono wa. Tane nherẽ, aiꞌrata wahâimana zaꞌra waꞌaba ré hã, dana hã tiꞌra norĩ te te ꞌre iꞌaꞌmadâꞌâ pese mono ne, wa tô wanhimizawi wẽ na aima wahâimana zara waꞌaba ni.
8 Wama asawi uptabi zaꞌra waꞌaba wa, wa tô wasima rowairébé zaꞌra ni, Rowasuꞌuwẽ ité hã ꞌRe ihâimana uꞌâsi mono hawimhã wa te aima sõmri zaꞌra waꞌaba da, duré wasisawi ãna wa te ꞌre aipawaptob zaꞌra waꞌaba mono da. Wama asawi uptabi zaꞌra waꞌaba di tô!
9 Wasisãnawã norĩ, waꞌãma iꞌaipoꞌre puꞌu zaꞌra waꞌaba ré hã tô, wa te iromhuri pese zaꞌra na hã. Bâtâ na hã duré barana zama wa romhuri pese zaꞌra ni, asibꞌratab zaꞌra waꞌaba wahâimana zaꞌra tõ da, tame ꞌRe ihâimana uꞌâsi mono hawi Rowasuꞌuwẽ itém na wa te aima rowasuꞌu zaꞌra waꞌaba ré hã.
10 Cristuhu zazeiꞌwa norĩ ꞌrata, aiꞌrata wahâimana zaꞌra waꞌaba ré hã, sena na wa aima wahâimana zaꞌra waꞌaba ni, duré iꞌuwaibaba na duré wa te upa zaꞌra ãna. Atõmo nhoꞌa zaꞌra waꞌaba, duré ꞌRe ihâimana uꞌâsi mono nhoꞌa, wa tô ãne hã wahâimana zaꞌra ni.
11 Duré aima waihuꞌu pese zaꞌra waꞌaba di, damama hã tiꞌra norĩ te te ꞌre iꞌaꞌmadâꞌâ wẽ mono ne, aihâiba mono bâ wa te iꞌaiꞌmadâꞌâ wẽ zaꞌra waꞌaba na hã.
12 Ãne zarina, rowasuꞌu na wa tô asiptete zaꞌra waꞌaba ni. Wa tô duré aipẽꞌẽ nhiptete zaꞌra waꞌaba ni. Wa duré aima roti zaꞌra waꞌaba ni, ꞌre aihâimana wẽ zaꞌra waꞌaba mono da, taha zarina ꞌRe ihâimana uꞌâsi mono ma, aiꞌãma ꞌre rowẽ zaꞌra waꞌaba mono da. Ta hã ma tô aipisutu zaꞌra waꞌwa, Daꞌãma ꞌre Isibꞌaꞌuwẽ mono zé hã duré saꞌẽtẽ uptabi na ꞌre ihâimana mono zé hã aima ꞌre hâimana zaꞌra waꞌaba mono da.
13 ꞌRe ihâimana uꞌâsi mono ãma, wa duré ꞌre wawata uꞌâsi zaꞌra. E marĩ wa. Isimiroti hã wahawi wapari zaꞌra waꞌaba wa, ma isaze zaꞌra waꞌwa. Mare di, aibâ norĩ nhimiroti da te ꞌre iwapari zaꞌra mono ne hã. Tazahã, tô sena ꞌRe ihâimana uꞌâsi mono nhimiroti ꞌre ihâimana mono, ma isaze zaꞌra waꞌwa. Ta hã te aiꞌãma tihâimana zaꞌra waꞌwa, isaze zaꞌra waꞌaba norĩ ãma hã.
Isazeiꞌwa norĩ ma, da te ꞌre irobꞌmanharĩ wasété zaꞌra mono zé, Zezusihi uꞌâbâ
14 Ĩsisãnawã norĩ, aima iromhâimana zaꞌra waꞌaba zém ne ma tô duré tiromhâiba, Zudéa na danhiptiꞌa nhoꞌõmo nhisi ãma isazeiꞌwa norĩ, ꞌRe ihâimana uꞌâsi mono te, ꞌre isiꞌubumroi mono norĩ ma hã, tame Cristu Zezusihi nhibꞌaꞌuwẽ ꞌre ihâimana zaꞌra mono norĩ ma hã. Ta norĩ hã asiré uptabi aꞌuwẽ nherẽ, ma tô te te aima ꞌre robꞌmanharĩ wasété zaꞌra waꞌwa, Zudéa ãma isazeiꞌwa norĩ ma, Zudeu norĩ te te ꞌre irobꞌmanharĩ wasété zaꞌra mono ne.
15 Tô õ norĩ Zudeu norĩ hã ma tô te te ꞌre simro, ꞌRe ihâimana uꞌâsi mono zadawa ꞌmahârâꞌwa norĩ hã. Tane ma tô duré Wanhibꞌapito Zezusi hã siwi hâiba nho, da te wĩrĩ da hã. Tane te duré ãhã na hã te te wama ꞌre robꞌmanharĩ wasété zaꞌra. Ta norĩ hã ꞌRe ihâimana uꞌâsi mono ma, tihâimanazém na te te ꞌre rowẽ zaꞌra mono õ di. Duré ta norĩ hã te uburé dazada ꞌre hâimana zaꞌra.
16 Ta norĩ hã te te sima ꞌre wẽ zaꞌra, te te wawi ꞌre sawi zaꞌra mono da, Zudeuꞌõ norĩ ma danhoꞌreptuzé wasuꞌu hã wa te ꞌre wasuꞌu zaꞌra mono tõ da. Taha na te ta norĩ hã tiwasédé te te ꞌre saꞌwari ꞌrãihâ uꞌâsi zaꞌra. Tane nherẽ, ãhã na hã ꞌRe ihâimana uꞌâsi mono nhimihâzé ma tô oto isisiwib zaꞌra hã waptãrã.
Paulu hã Tesalonita u apâ morĩ da, te te sima irowaꞌõtõzé
17 Wasisãnawã norĩ, romnhimimnhasi te, wa aꞌâ asiti zaꞌra waꞌaba wahâimana zaꞌra ni, niha bâtâ u. Romhâ na wa wahâimana zaꞌra ni, wasitõmo nhiti. Tane nherẽ, wapẽꞌẽ na hã wa ꞌrâwi wasiꞌratamhã wahâimana zaꞌra ni. Aiꞌãma zaꞌra waꞌaba hã wapẽꞌẽzé uptabi zaꞌra di. Tahawa wa wasima wẽ zaꞌra ni, apâ wa te ãma asabu zahu zaꞌra waꞌaba da.
18 Tahawa, wa te ãma asabu zaꞌra waꞌaba neza. Tô wa hã Paulu, wa ĩsima wẽ pese aré, te nasi ãma asabu zaꞌra waꞌaba da hã, õne uꞌâsi. Tane nherẽ, Satanasi hã ma tô wawi roꞌwaꞌrutu zaꞌra.
19 E marĩ wa. A norĩ waꞌwa hã wasiwawãi ãna ꞌre iwanhimipari zaꞌra mono zé, Wanhibꞌapito Zezusi apâ wei imorĩzéb zô, duré watoi uꞌâsi zé, duré wanhoprezém ne, wa te wasima irowẽ zaꞌra zéb da hã, niwa apâ wei morĩ wa.
20 Tane tô, a norĩ waꞌwa hã wa te wasima ꞌre irowẽ zaꞌra mono zé, duré watoi uꞌâsi zé.
