1 Tesalonita 5:1-28
5 Wasisãnawã norĩ, Wanhibꞌapito apâ we imorĩzé bâdâ hã niwa za iromhâimanazém na hã wa te ãma aima irobꞌuiꞌéré zaꞌra waꞌaba da hã, sadai õ di.
2 E marĩ wa. Isimisaihuri simisaihuri da, barana sô ꞌre idanhimipari zaꞌra mono õ zém na ꞌre isisisi mono ne, Wanhibꞌapito te bâdâ dama saꞌrese ãna za iwisizé hã aima waihuꞌu pese zaꞌra waꞌaba wa.
3 Sô danhimipari zaꞌra õ wa, da te oto inharĩ zaꞌra zéb ãma, ãne: “Rowẽ uꞌâsi wa za ꞌre wahâimana zaꞌra. Duré marĩ waꞌãma ꞌre hâimana zaꞌra mono õ di za”, tane nherẽ, waptu na rosaꞌrese õ ré, te za ropire hã dazô ꞌre wairébé. Tawamhã niꞌwa hã sisõꞌreptui waihuꞌu õ di za, piꞌõ norĩ ma, iꞌra ꞌre rereꞌe mono da, tihâzé te te ꞌre sépata zaꞌra mono wa, te te ꞌre irobzépata zaꞌra mono zé wi, tiwi ꞌre iwairébé waihuꞌu mono õ ne, da te robzépata zaꞌẽtẽ zaꞌra wa za.
4 Tane nherẽ, ĩsisãnawã norĩ, a norĩ waꞌwa hã robra na ꞌre aihâimana zaꞌra waꞌaba mono õ di oto. Tahawa, Wanhibꞌapito te bâdâ wisi wamhã, rosaꞌrese õ ré te te aiwaibui waꞌaba õ di za, isimisaihuri rosaꞌrese õ ré, simisaihuri zô danhorõwa u ꞌre izasi mono ne.
5 A norĩ waꞌwa hã rowaꞌa te na, te uburé ꞌre anomro aba mo, duré bâtâ na rowaꞌa te na zama. Wa norĩ hã mara tei õ di, duré robra tei õ di.
6 Tahawa, ꞌre wanhotõ zaꞌra mono õ di za, dasine. Wanhimizaꞌrese sina wa te ꞌre robꞌmadâꞌâ uꞌâsi zaꞌra waꞌaba mono. Duré âzé na ꞌre wasiꞌrãiwamnarĩ zaꞌra mono ãna ꞌre wahâimana zaꞌra waꞌaba mono.
7 ꞌRe isõtõ zaꞌra mono hã, barana si te ꞌre sõtõ zaꞌra. Duré âzé na ꞌre isiꞌrãiwamnarĩ zaꞌra mono hã, barana te ꞌrãi wasété na ꞌre hâimana zaꞌra.
8 Tazahã, wa norĩ, bâtâ na rowaꞌa na ꞌre iwahâimana zaꞌra mono hã, âzé na ꞌre wasiꞌrãiwamnarĩ zaꞌra mono õ di za. ꞌRe ihâimana uꞌâsi mono, wa te wasina ꞌre iꞌumnhasi zaꞌra mono zém na, wa za ãma ꞌre wasiꞌuza zaꞌra, duré dazawizém na zama, dasiꞌwapéi ꞌmanharĩꞌwa norĩ, tiꞌuza ihâtete na ãma ꞌre isiꞌuza zaꞌra mono ne. Duré wanhoꞌreptuzéb zô wasiwawãi ãna ꞌre iwanhimipari zaꞌra mono zém na, wa za ãma wasiꞌrãzaza zaꞌra ni, dasiꞌwapéi ꞌmanharĩꞌwa norĩ ꞌrãzaza itete ne.
9 E marĩ wa. ꞌRe ihâimana uꞌâsi mono hã te te sima waꞌapisutu õ di, isimihâzé wa te ꞌre isépata zaꞌra mono da hã. Tazahã, te te ꞌre waꞌanhoꞌreptui mono da si, Wanhibꞌapito Zezu Cristu wazada idâꞌâ zaꞌra zém na.
10 Ta hã ma tô wazada tidâꞌâ zaꞌra, isiré ꞌre wahâimana uꞌâsi zaꞌra mono da, wahâiba ré ꞌre wahâimana zaꞌra mono ré hã duré niwamhã ꞌre wadâꞌâ zaꞌra mono wab zama, niwa apâ wei morĩ wamhã.
11 Tahawa, ꞌre asipawaptob uꞌâsi zaꞌra waꞌaba mono, duré ꞌre asisiptete uꞌâsi zaꞌra waꞌaba mono, ãwa bâtâ u ꞌre iꞌmanharĩ zaꞌra waꞌaba mono ne.
ꞌRe idanomro wẽ mono zém na roti
12 Wasisãnawã norĩ, wa ãma aiwi waptẽrẽ zaꞌra waꞌaba ni, aiꞌreb zaꞌra waꞌaba te te ꞌre iromhuri zaꞌra mono norĩ hã ꞌre iwazéb zaꞌra waꞌaba mono da si. Ta norĩ hã te isazeiꞌwa norĩ hâimanazém na te te ꞌre asimroi waꞌwa. Te duré te te aima ꞌre roti wẽ zaꞌra waꞌwa.
13 Ta norĩ hã ꞌre wazé pese zaꞌra waꞌaba mono, duré ꞌre sawi pese zaꞌra waꞌaba mono, isimiromhuri zaꞌra uꞌâbâ. Duré rowẽ uꞌâsi asiré ꞌre aihâimana zaꞌra waꞌaba mono.
14 Wasisãnawã norĩ, ãne wa za duré ãma aima roti zaꞌra waꞌaba ni. Iwaꞌa norĩ ma hã aimreme tete na tãma ꞌre roti zaꞌra waꞌaba mono. Duré sina ꞌre ihâtâꞌâ zaꞌra mono norĩ hã ꞌre pawaptob zaꞌra waꞌaba mono. Duré isimiꞌumnhasizém na sibꞌuwa na ꞌre ihâimana zaꞌra mono norĩ hã ꞌre pawaptob zaꞌra waꞌaba mono. Duré daꞌãma ꞌre aiwaꞌa suꞌu zaꞌra waꞌaba mono tõ.
15 Ãma ꞌre pibui pese zaꞌra waꞌaba mono, niꞌwai ma marĩ iwasédé da te ꞌmanharĩ wa, asa marĩ iwasédé te te dama ꞌmanharĩ tõ da. Iwaꞌrãmi asima sô ꞌre asõpré waꞌaba mono, uburé marĩ mono na iwẽ si asima ꞌre ꞌmanharĩ zaꞌra waꞌaba mono da, duré niꞌwam norĩ asiré isazeiꞌõꞌwa norĩ ma zama.
16 Ato sina ꞌre aihâimana uꞌâsi zaꞌra waꞌaba mono.
17 ꞌRe rowaptẽrẽ uꞌâsi zaꞌra waꞌaba mono.
18 Duré ꞌRe ihâimana uꞌâsi mono ãma ꞌre aiwata uꞌâsi zaꞌra waꞌaba mono, uburé aiꞌãma ꞌre iromhâimana zaꞌra waꞌaba mono zém na. E marĩ wa. Ã hã ꞌRe ihâimana uꞌâsi mono te te sima ꞌre wẽ, ꞌre ꞌmanharĩ zaꞌra waꞌaba mono da hã, Cristu Zezusihi ãma ꞌre anomro aba mono wa.
19 ꞌRe ihâimana uꞌâsi mono Pẽꞌẽzani nhimiromhuri wi ꞌre roꞌwaꞌrutu zaꞌra waꞌaba mono tõ.
20 Niꞌwa hã ꞌRe ihâimana uꞌâsi mono Pẽꞌẽzani te te tãma iwaihuꞌu zarina, marĩ te te aima waihuꞌu aba wamhã, isimirowasuꞌu hã asiwi wẽꞌõ waꞌaba tõ, taré newa.
21 Uburé marĩ hã ꞌre pibu zaꞌra waꞌaba mono, wẽ zô. Duré iwẽ si asima ꞌre tété zaꞌra waꞌaba mono.
22 Uburé marĩ iwasédé imono bâ ꞌre ihâimana zaꞌra mono wi, romhâ na ꞌre aihâimana zaꞌra waꞌaba mono.
23 ꞌRe ihâimana uꞌâsi mono, rowẽ uꞌâ te te wama ꞌre iꞌanhomri mono hã, aimawi Õhõ ma si ꞌre aihâimana zaꞌra waꞌaba mono da, te te aima iꞌmanharĩ zaꞌra waꞌaba da si, iwẽ hã. Uburé aihâiba uptabi hã, duré aipẽꞌẽzani hã duré aihâiba zaꞌra waꞌwa hã te te aima ꞌre iꞌmadâꞌâ pese zaꞌra waꞌaba mono da si, aiwasédé, da te aiꞌãma ꞌre saꞌra waihuꞌu zaꞌra waꞌaba mono ãna ꞌre iꞌaihâimana zaꞌra waꞌaba mono da si, niwa Wanhibꞌapito Zezu Cristu apâ we imorĩzéb u.
24 Te te sima iꞌaipisutu zaꞌra waꞌwa hã umnhasi uptabi di. Tahawa ta hã te za tô aima ꞌmanharĩ zaꞌra waꞌwa, ãne hã.
Robꞌuiꞌéré iꞌrãsudu
25 Wasisãnawã norĩ, waꞌãma ꞌre rowaptẽrẽ zaꞌra waꞌaba mono.
26 Uburé asiré isazeiꞌwa norĩ hã ꞌre sawi zaꞌra waꞌaba mono, tobꞌrata hârâ na.
27 Wanhibꞌapito zadawa para, wa ãma aima ꞌru zaꞌra waꞌwa, ã hã robꞌuiꞌéré hã sõré zaꞌra waꞌaba da, uburé wasisãnawã norĩ ma.
28 Wa wa te aiꞌãma ꞌre rowaptẽrẽ zaꞌra waꞌwa, Wanhibꞌapito Zezu Cristuhu nhimizawizé hã, aiꞌãma ꞌre ihâimana uꞌâsi zaꞌra waꞌaba mono da si.
