2 Corĩtu 11:1-33
11 Ãhã na, wa za ĩsisõwa ãma ĩsina aipoꞌre puꞌu zaꞌra waꞌwa, ĩꞌãma aiwaꞌa zaꞌra waꞌaba tõ da, ĩnhimizaꞌreseꞌõ na ĩꞌãma ꞌre rosaꞌrata zaꞌra waꞌaba mono nherẽ.
2 Wa hã te ꞌre asawi pese zaꞌra waꞌaba mono wa, wa tô te aiꞌãma ꞌre rosaꞌrata uꞌâsi zaꞌra waꞌwa, ꞌRe ihâimana uꞌâsi mono te te ꞌre iꞌasawi pese zaꞌra waꞌaba mono ne. Niꞌwa hã aibâ ma, tiꞌra hâiba ubuni hã mro da, te te tãma ipisutu ne, wa tô aipisutu zaꞌra waꞌwa, Cristuhu ma si oto ꞌre aihâimana zaꞌra waꞌaba mono da.
3 Tane nherẽ, wa ĩhâtâꞌâ sina, te aiꞌãma ꞌre rosaꞌrata uꞌâsi zaꞌra waꞌwa. E marĩ wa. Cristuhu ãma si, ꞌre sasõmri pese zaꞌra waꞌaba mono nherẽ, ãté niꞌwam norĩ hã roti tô senaiꞌõ na taré te te aima ꞌre irowasuꞌu zaꞌra waꞌaba mono zéb zarina, te za Cristuhu wasuꞌuwẽ hã irẽme zaꞌra waꞌwa. Duréihã Waꞌuburé hã wahi na sihâiba wa, Evaha ma, sadawa nhipese na te te irowasuꞌu ne, te za tô ãté niꞌwam norĩ hã te te aima ꞌre rowasuꞌu zaꞌra waꞌwa, roti tô senaiꞌõ na hã.
4 Zezusihi wasuꞌuwẽ tô sena uptabi si, wa tô aré aima wasuꞌu zaꞌra waꞌaba ni. Tawamhã taha wasuꞌu na, wa te aima irowasuꞌu zaꞌra waꞌaba zéb zarina, ma tô isaze zaꞌra waꞌwa. Taha zarina, ma tô duré asima iwẽ zaꞌra waꞌwa, ꞌRe ihâimana uꞌâsi mono Pẽꞌẽzani hã aipẽꞌẽ ꞌre, aima ꞌre hâimana uꞌâsi zaꞌra waꞌaba mono da. Tane nherẽ, niꞌwam norĩ hã Zezusihi wasuꞌuwẽ upana, tô senaiꞌõ na te te aima ꞌre rowasuꞌu zaꞌra waꞌaba mono nherẽ, Wanhibꞌapito wasuꞌuwẽ ne, tô senai õ nherẽ, ꞌrâwi asiwi ꞌre wẽꞌõ zaꞌra waꞌaba mono õ di. Õne haré ma tô ãma ꞌre isasõmri zaꞌra waꞌaba mo. ꞌRe ihâimana uꞌâsi mono Pẽꞌẽzani upana, ma tô ihâibaꞌõ mreme si asima ꞌre iwẽ zaꞌra waꞌaba mo.
5 E ta norĩ hã Cristuhu zadawa wasuꞌuꞌwa pâ, ma tô bété isimirowasuꞌu na ãma isaze zaꞌra waꞌwa. E ĩnhimiromhuri hã tãma wapu bâ, ta norĩ nhimiromhuri ma hã.
6 Ãté ĩmreme hã, ĩma pibu prã ti tô, daꞌahâ nhoꞌa te dama ꞌre irowahutu mono zéb da hã. Tane nherẽ, Cristuhu wasuꞌuwẽ si, tô sena hã ĩma waihuꞌu pese di. Ãne na ma tô oto ĩꞌãma iwaihuꞌu pese zaꞌra waꞌwa, a norĩ waꞌwa hã.
7 Asiwi ĩpawaꞌâbâ aba ãna, wa tô ꞌRe ihâimana uꞌâsi mono wasuꞌuwẽ na si te ꞌre aipawaptob zaꞌra waꞌwa. Taha waꞌrãmi, a norĩ waꞌaba si, ĩma aipire na aihâimana zaꞌra waꞌaba da, wa tô ĩhâimanazéb da hã, ĩsiꞌuihâ na nasi waꞌâ, ĩpire na aima ĩhâimana zaꞌra waꞌaba tõ da. E ãne wamhã, ĩwasédé wa tô ꞌmanha. E tô ꞌre ĩhâimana mono zéb zarina, ma tô ãne na ĩꞌãma irosaꞌrata wasété zaꞌra waꞌwa, asima.
8 Cristuhu wasuꞌuwẽ na te aipawaptob zaꞌra waꞌaba da, aiꞌrata ĩnhamra aba ré, robꞌuiprazém na ĩma asõprub zaꞌra waꞌaba õ nherẽ, ma tô aiꞌupana zaꞌra waꞌaba, isazeiꞌwa norĩ hã ĩpawaptob zaꞌra, darob amoi ãma ꞌre isiꞌubumroi mono norĩ hã. Ta norĩ hã Wanhibꞌapito wasuꞌuwẽ na te pawaptob zaꞌra dai õ nherẽ, ma tô tite robꞌuiprazém na ĩpawaptob zaꞌra, aima zaꞌra waꞌaba si, te ãma iromhurizéb da hã.
9 Aiꞌrata ĩnhamra aba ré, asimarĩ zô, te aiwasutu zaꞌra waꞌaba da, te nasi aiwi rowaptẽrẽ zaꞌra waꞌaba õ di, marĩ zô ĩwi rowaptâꞌâ wamhã. Wasisãnawã norĩ si, ma tô uburé marĩ na siwi ĩpawapto, ãma ĩhâimana mono zéb da hã, Masédonia hawi, ãma ĩsiré isiꞌabaꞌré norĩ hã. Tahawa, aiꞌrata ĩnhamra aba ré hã, ĩnhiwari na hã te nasi ropire hã aima ꞌmanharĩ zaꞌra waꞌaba õ di. Tane, wa za duré ĩhâimana, apâ ĩmorĩ na te sahu wamhã, ãma atẽme zaꞌra waꞌaba.
10 Niꞌwa hã marĩ na te wari ãna, wa tô aipawaptob zaꞌra waꞌwa, aiꞌrata ĩnhamra aba ré hã, asiwi ĩpawaꞌâbâ aba ãna. Ãne hã ĩma wẽ uptabi di tô. Ãhã wasuꞌu hã da te ĩwi pari waihuꞌu õ di, Acaia ãma, ꞌre idahâimana zaꞌra mono norĩ hã. Cristuhu nhimiroti hã tô sena uptabi, te ꞌre hâimana. Tane duré, wa hã tô sena, wa ãne na aima ãma rowaihuꞌu zaꞌra waꞌwa.
11 E marĩ wa, wa tô ĩnhiwari ãna aima romhuri zaꞌra waꞌwa. E ĩma asawi zaꞌra waꞌaba õ wa. Mare di. Ĩma asawi uptabi zaꞌra waꞌaba di. Ãne na ma tô ꞌRe ihâimana uꞌâsi mono si ĩwaihuꞌu, ꞌre ĩhâimana mono zém na hã.
12 Zezusihi zadawa wasuꞌuꞌwa newa, tô senaiꞌõ na te te dama ꞌre iroti zaꞌra mono norĩ hã, aiwa ĩsine hã te te dama ꞌre iromhuri zaꞌra mono na dama ꞌre siwasuꞌu zaꞌra mono tõ da, wa za tô ĩpawaꞌâbâ ãna te ꞌre daꞌapawaptob uꞌâsi.
13 Ta norĩ hã Zezusihi zadawa wasuꞌuꞌwa na, tô sena ꞌre hâimana zaꞌra mono õ di. Sadawa nhipese na, te tô te te ꞌre romhuri zaꞌra, Zezusihi zadawa wasuꞌuꞌwa newa, da te ãma ꞌre rosaꞌrata wẽ zaꞌra mono da, dasima.
14 Tô ibâre, te ta norĩ hã ãne hã te te ꞌre ꞌmanharĩ zaꞌra. E marĩ wa. Satanasihi nhimiroti na si, te te dama ꞌre romhuri zaꞌra mono wa, ta norĩ hã. Duré Satanasihi ma hã waihuꞌu pese di, tihâiba na rowaꞌa na dama ꞌre isihâiꞌré mono da hã, hâiwa ãma ꞌRe ihâimana uꞌâsi mono ma romhuriꞌwa newa, da te ãma ꞌre saze zaꞌra mono da.
15 Tahawa, tô ibâre te za tãma iromhuriꞌwa norĩ hã isadawa para, sadawa nhipese na dama ꞌre hâimana zaꞌra, ꞌRe ihâimana uꞌâsi mono ma, romhuri wẽ ꞌwa, ꞌre hâimana zaꞌra mono newa, da te ãma ꞌre irosaꞌrata wẽ zaꞌra mono zéb da hã, dasima. Tahawa, ta norĩ hã tiwasédé te te ꞌre iꞌmanharĩ zaꞌra mono zéb zarina, te za tô ꞌRe ihâimana uꞌâsi mono hã te te ꞌre ahâ zaꞌra.
Paulu hã te te ꞌre irobzépata mono zé wasuꞌu
16 Ãne wa za ĩsiwasuꞌu na ãma aima sahu zaꞌra waꞌwa. Ĩnhimiromhuri wẽ na, aima ꞌre ĩsiwasuꞌu zaꞌra waꞌaba mono nherẽ, ĩnhimizaꞌrese ãna ꞌre ĩhâimana mono zém na, ĩꞌãma rosaꞌrata zaꞌra waꞌaba õ di za. Tane nherẽ, ãté te za tô ãne na hã duré ĩꞌãma irosaꞌrata zaꞌra waꞌwa, ĩnhimizaꞌrese õ na ꞌre ĩhâimana mono zém na hã. Ãne na ĩꞌãma ꞌre rosaꞌrata zaꞌra waꞌaba mono nherẽ, te za tô asiwi ĩwẽꞌõ zaꞌra waꞌaba ãna, ĩwapari pese zaꞌra waꞌwa, Wanhibꞌapito wasuꞌuwẽ na te dama ꞌre iromhuri wẽ mono zém na aima ĩsiwasuꞌu zaꞌra waꞌaba da na hã. ꞌRe ihâimana uꞌâsi mono zadawa wasuꞌu uptabi õ ꞌwa norĩ, aima ꞌre siwasuꞌu pari zaꞌra waꞌaba mono nherẽ, wa za tô aima ĩsiwasuꞌu zaꞌra waꞌwa.
17 Ãté Wanhibꞌapito te te ĩma iwaihuꞌuzéb zarina, aima ĩsiwasuꞌu zaꞌra waꞌaba õ di, ãhã na hã. Ãté danhimizaꞌrese ãna ꞌre idahâimana zaꞌra mono zéb zarina si, wa za aima ĩsiwasuꞌu zaꞌra waꞌwa, ĩnhimiromhuri wẽ na hã.
18 Niꞌwam norĩ hã te Wanhibꞌapito wasuꞌuwẽ na te te dama ꞌre iromhuri wẽ zaꞌra mono zém na hã aima ꞌre siwasuꞌu zaꞌra waꞌwa, ãma ꞌre iwẽsãmri zaꞌra waꞌaba mono zéb da hã. Tane, wa za duré wa hã aima ĩsiwasuꞌu zaꞌra waꞌwa, Wanhibꞌapito wasuꞌuwẽ na te dama ꞌre iromhuri wẽ mono zém na hã, asiwi ĩwaihuꞌu zaꞌra waꞌaba da.
19 A norĩ waꞌwa hã asimizaꞌrese sina ꞌre iꞌaihâimana zaꞌra waꞌaba mono zém na, ꞌrâwi ꞌre asiꞌmadâꞌâ ze zaꞌra waꞌaba mono nherẽ, e niha te bété simizaꞌrese ãna ꞌre ihâimana zaꞌra mono norĩ nhimiroti si, ꞌre iwapari pese zaꞌra waꞌaba mo, asiwi ꞌre wẽꞌõ zaꞌra waꞌaba mono ãna. Tane duré, wa hã ĩnhimizaꞌrese ãna ꞌre ĩhâimana mono di pâ, te za pé ĩzama asiwi ĩwapari pese zaꞌra waꞌwa duré.
20 Niꞌwam norĩ hã ma tô ꞌre ihâimana zaꞌra mono zéb zarina, ꞌre aihâimana zaꞌra waꞌaba mono da, te te aima ꞌre ꞌrui uꞌâsi zaꞌra waꞌwa, ta norĩ zadawa para si, uburé marĩ hã ꞌre ꞌmanharĩ zaꞌra waꞌaba mono da si. Tane nherẽ, asiwi ꞌre wẽꞌõ zaꞌra waꞌaba mono õ di, ta norĩ hã. Sadawa nhipese na, aiwi ꞌre sipsaihuri uꞌâsi zaꞌra waꞌaba mono nherẽ, duré ta norĩ ma si, ꞌre aihâimana zaꞌra waꞌaba mono da, te te ꞌre aiwaibui waꞌaba mono nherẽ, e niha bâ bété, asiwi ꞌre wẽꞌõ zaꞌra waꞌaba mono õ di. Ta norĩ si, aima pire na ꞌre hâimana zaꞌra waꞌaba mono newa, ꞌrâwi ꞌre siꞌmadâꞌâ ze zaꞌra mono nherẽ, duré te te aiꞌãma ꞌre wasété zaꞌra waꞌaba mono da, atobꞌrata wi te te ꞌre aihâ zaꞌra waꞌaba mono nherẽ, e asiwi hã ꞌre wẽꞌõ zaꞌra waꞌaba mono ãna bété.
21 Wa hã ãne, te aima ꞌre iꞌmanharĩ zaꞌra waꞌaba mono da hã, ãté aré sada ĩnhibꞌuware di. Ta norĩ si hã tinhimirosaꞌrata na sina ꞌre siptete zaꞌra mono di, ãne te te aima ꞌre irobꞌmanharĩ wasété zaꞌra waꞌaba mono zéb da hã. E ãne da hã, ꞌre ĩhâimana mono bâ, wa hã bété. Mare di.
Ta norĩ hã marĩ wasuꞌu wẽ na, dama ꞌre isiwasuꞌu zaꞌra mono zém na hã te te siwi ãma ĩwabzu zaꞌra õ di, Wanhibꞌapito wasuꞌuwẽ na te dama ꞌre iromhuri wẽ mono zém na hã. Tane nherẽ, wa hã ãne na aima ĩsiwasuꞌu zaꞌra waꞌaba ꞌwaꞌâhã, ãté tô ĩnhimizaꞌreseꞌõ ne, wa aré aima ꞌre ĩhâimana zaꞌra waꞌwa.
22 Zezusihi zadawa wasuꞌuꞌwa newa, tô senaiꞌõ na te te aima ꞌre iroti zaꞌra waꞌaba mono norĩ hã te sina aima ꞌre wata zaꞌra waꞌwa, Ebreu na ꞌre ihâimana zaꞌra mono na hã, duré Izaraéu nhihudu ꞌre ihâimana zaꞌra mono na hã, duré Abraꞌãhã nhihudu ꞌre ihâimana zaꞌra mono na hã. Tane, wa duré wa hã Ebreu na, duré Izaraéu nhihudu na, duré Abraꞌãhã nhihudu na ĩwamri na hã ꞌre ĩhâimana. Ãne na wawamri na ꞌre iwahâimana zaꞌra waꞌaba mono hã aiwa tô wama zaꞌra hã.
23 Cristuhu ma romhuriꞌwa na, te duré ta norĩ hã aima ꞌre siwasuꞌu uꞌâsi zaꞌra waꞌwa. Tane nherẽ, wa wa hã ta norĩ nhipai u, Cristuhu ma romhuriꞌwa na hã ꞌre ĩhâimana. (Ãté ĩnhimizaꞌrese õ na ꞌre ĩhâimana mono na, ĩꞌãma rosaꞌrata zaꞌra waꞌaba da nherẽ, wa za tô ãne na aima ĩsiwasuꞌu zaꞌra waꞌwa.) E marĩ wa, wa merẽ ta norĩ nhipai u Cristuhu ma romhuri wẽ ꞌwa na hã ꞌre ĩhâimana. Wa tô te tãma ꞌre romhuri pese uptabi, ta norĩ nhipai u. Dazazéb ꞌre, ma tô da te dasiwi ꞌre ĩzai uꞌâsi, ta norĩ ꞌre ihâimana zaꞌra mono zém nhipai u. Ma tô duré da te dasiwi ꞌre ĩꞌahâri uꞌâsi, powawẽ hânhorõ na, senaiꞌõ na rowasuꞌuꞌwa norĩ hã da te dasiwi ꞌre ihâ zaꞌra mono zém nhipai u. Ãne wa, wa tô aré ꞌre ĩdâꞌâ uꞌâsi, te ĩsina ꞌre romnhimimnhasi zaꞌẽtẽ mono wa.
24 Ĩsiré Zudeu norĩ hã ma tô duré nimahã na hã te te siwi ꞌre ĩpréꞌé. Ãne na hã nimahã bâtâ na ma tô 5 na ĩzada tiromhâiba. Misi bâtâ na, 39 na da te dasiwi ꞌre ĩpréꞌé mono zé hã, Zudeu norĩ te te sima ꞌre irobꞌmanharĩ zaꞌra mono zéb zarina.
25 Romanu norĩ hã ma tô duré te te siwi ꞌre ĩpréꞌé, wedehu na. Ãne na hã siꞌubdatõ oto duré, ĩzada iromhâimana wasété zé hã nimahã bâtâ na. Ẽtẽ na ma tô duré dasiwi ĩhâ ni, da te dasiwi ãma ĩwĩrĩ da. Duré, ubaꞌre hã ma tô ĩré ãzé, â ꞌrowi, â sisasi hã saꞌẽtẽ wa. Ãne, taha na siꞌubdatõ te oto duré irobzépatazé hã. Ãne hã ubaꞌre hã misi â na ĩré sipoꞌo pese wamhã, bâtâ na wa tô â poré waꞌwa ĩhâiba, bâtâ bâre, duré mara bâre.
26 Daro mono bâ ꞌre ĩmorĩ ré hã, ĩma romnhimimnhasi uptabi nherẽ, wa tô âpré na te ꞌre saprĩ, panhoꞌõmo na hã. Duré isimisaihuri norĩ ahâ di, bâdâdi na hã, danhibrob zô dapãrĩꞌwa norĩ hã. Niꞌwam norĩ hã ĩsiré Zudeu ꞌre hâimana zaꞌra mono nherẽ, ma tô duré ĩzada ꞌre hâimana wasété uꞌâsi zaꞌra, zudeuꞌõ norĩ zama hã duré. ꞌRi nhoꞌõmo mono bâ, ma tô duré da te dasima ꞌre ĩꞌru zaꞌra, niha na da te ĩma ꞌre robꞌmanharĩ zaꞌra mono da. Aꞌubuni wi ꞌre ĩmorĩ ré hã, ĩsina romnhimimnhasi na, wa tô duré ꞌre ĩhâimana, â poré na zama ꞌre ĩmorĩ ré hã. Niꞌwam norĩ hã tô sena Cristuhu zazeiꞌwa ꞌre hâimana zaꞌra mono newa, ma tô duré ĩzada ꞌre hâimana zaꞌra, ta norĩ zama. Tahawa, ĩsina romnhimimnhasi uptabi nherẽ, wa tô ꞌre ĩhâimana uꞌâsi.
27 Duré ãma ꞌre ĩhâimana mono zéb da hã, wa tô te ĩsima ꞌre romhuri pese, ĩnhibꞌrata na. Bâtâ ahâ na wa tô duré ĩnhotõ ãna hã ĩzaꞌwari. Mram na zama hã te duré robzépata ahâ di, duré ꞌrubu na zama. Ĩsai ãna te ꞌre iromhuri mono zém na hã, wa tô duré te ꞌre robzépata. Ĩꞌuza ãna ꞌre ĩhâimana mono zém na zama, wa tô duré te ꞌre robzépata.
28 Tane nherẽ, taha si õ di, te ꞌre irobzépata mono zé hã. Awẽ sidâpâsi, wa ĩpẽꞌẽ na te ꞌre robzépata uꞌâsi, daro mono bâ isazeiꞌwa norĩ, siré ꞌre isiꞌrãꞌõtõ mono norĩ ãma, te ãma ꞌre rosaꞌrata uꞌâsi zaꞌra mono wa. Ta norĩ ãma, wa ꞌre ĩhâtâꞌâ zaꞌẽtẽ zaꞌra.
29 Niꞌwam norĩ isazeiꞌwa norĩ hâimanazéb ꞌre, sibꞌuware na ꞌre ihâimana zaꞌra mono norĩ ãma hã, e niha wa za te ãma ꞌre rosaꞌrata zaꞌra. Ta norĩ ãma hã wa za tô ãma ꞌre ĩpẽꞌẽzé zaꞌra. Duré niꞌwam norĩ hã tisiré nhimiꞌmanharĩ wasété zarina, tiwasété na ꞌre siꞌmarõpãrĩ zaꞌra mono ꞌru te, wa za sada ꞌre ĩhâimana zaꞌra, tiwasédé te te ꞌre iꞌmanharĩ ꞌrata zaꞌra mono norĩ zada hã, ta norĩ hã poꞌre ãna ꞌre hâimana zaꞌra mono wa.
30 Ãté niwapsi, wa za tô ãne na hã aima ĩsiwasuꞌu zaꞌra waꞌwa, uburé marĩ na te ꞌre irobzépata mono zém na si, taha zarina, marĩ da hã, ĩsiꞌuihâ na ĩnhibꞌuware na ꞌre ĩhâimana mono zém na, asiwi ĩwaihuꞌu zaꞌra waꞌaba da.
31 ꞌRe ihâimana uꞌâsi mono hã, Wanhibꞌapito Zezusihi mama hã, taha ma si ĩwaihuꞌu pese di, ĩzadawa nhipese ãna aima ĩsiwasuꞌu zaꞌra waꞌaba zém na hã za. Taha ãma si, wa za ꞌre wawata uꞌâsi zaꞌra, wa norĩ hã.
32 Uburé marĩ da, ĩsiꞌuihâ na ĩnhibꞌuware na ꞌre ĩhâimana mono zém na hã wa za aima ãma ĩsiwasuꞌu zaꞌra waꞌwa. Damascu na ꞌri nhoꞌõmo nhisi ãma ĩnhamra ré, apito Aretaha zapari daꞌmadâꞌâꞌwa hã ma tô damramiꞌwa norĩ ma ĩꞌru, ꞌri nhoꞌõmo ꞌwawi waꞌra, ꞌridawa nhitob zaꞌẽtẽ mono bâ, te te ĩzô robꞌmadâꞌâ zaꞌra mono da, te te siwi ĩsãmri wa, te te siwi ĩꞌâri da.
33 Tane nherẽ, niꞌwam norĩ hã ma tô siꞌõtõ na siwi ĩꞌãma siꞌra, ꞌri nhoꞌõmo ꞌwawi waꞌra zadazâri hawi. Tahawa, wa tô rowẽ na dawi watobro rob u, dasiꞌwapéi ꞌmanharĩꞌwa norĩ wi hã.
