2 Pedru 1:1-21
1 Wa hã Simau Pedru, Zezu Cristuhu ma romhuriꞌwa duré isadawa wasuꞌuꞌwa, wa aima robꞌuiꞌéré zaꞌra waꞌwa, wate ꞌRe ihâimana uꞌâsi mono wẽ uptabi na ꞌre ihâimana mono uꞌâbâmhã duré Waꞌanhoꞌreptuiꞌwa Zezu Cristuhu zama, asina ꞌre iꞌumnhasi zaꞌra waꞌaba mono zé iwẽ uptabi iwaibui waꞌaba ma hã, wasine.
2 ꞌRe ihâimana uꞌâsi mono nhimizawi pese zé duré ite rowẽ hã asiré ꞌre ihâimana uꞌâsi zaꞌra waꞌaba mono da si, iwẽ hã. Ta hã duré aima isaꞌẽtẽ uꞌâsi zaꞌra waꞌaba mono da si, iwẽ hã, ꞌRe ihâimana uꞌâsi mono te rowaihu hã aima ꞌre ihâimana zaꞌra waꞌaba mono uꞌâbâ duré Wanhibꞌapito Zezusihi te zama.
3 Uburé marĩ hã, ãma ꞌre wahâimana zaꞌra mono da, duré ꞌRe ihâimana uꞌâsi mono ma, wa te ãma ꞌre iromhuri zaꞌra mono da, sô ꞌre iwanhimnhasi zaꞌra mono hã ma tô te te wama ꞌre anhomri, waihuꞌu pese uptabi na ꞌre ihâimana mono zém na, rowaihu hã wama ꞌre hâimana zaꞌra mono wa, wazô ihârâ zaꞌra hawimhã, ite rowẽ uptabi ré ꞌre wahâimana zaꞌra mono da, duré wẽ uptabi na ꞌre ihâimana mono zéb ré zama.
4 Ãne zarina, ma tô tinhimiropisudu iwẽ uptabi hã duré ipire uptabi hã te te wama ꞌre anhomri, wama ꞌre hâimana zaꞌra mono wa, ãma ꞌre wahâimana zaꞌra mono da, ite rowẽ ré duré romhâ na ꞌre wahâimana zaꞌra mono da, siwaꞌru dasina dahâimana wi tiꞌai ãma hã ꞌrâwi da te dasima ꞌre iwẽ zaꞌra mono wi hã.
5 Tahawa, sada ꞌre asiptete zaꞌra waꞌaba mono, aihâimana wẽ na ꞌre iꞌaihâimana zaꞌra waꞌaba mono zém na, ãma ꞌre sisiwi zaꞌra waꞌaba mono da, ꞌRe ihâimana uꞌâsi mono ꞌre iꞌumnhasi zaꞌra waꞌaba mono zém nhisiwi. Tawamhã rowaihu iwẽ na te za ãma ꞌre isisiwi zaꞌra waꞌaba mo, dahâimana wẽ na dahâimanazém nhisiwimhã.
6 Duré ꞌrâwi dasiwi danhimiꞌrãmi na te za ꞌre isisiwi zaꞌra waꞌaba mo, rowaihuꞌu iwẽ nhisiwi. Duré robzépata nherẽ, dawaꞌa ãna dahâimanazém na te za ãma ꞌre isisiwi zaꞌra waꞌaba mo, ꞌrâwi dasiwi danhimiꞌrãmi nhisiwimhã. Tawamhã ꞌRe ihâimana uꞌâsi mono nhimiroti ꞌmadâꞌâ pese ꞌwa na dahâimanazém na te za duré ãma ꞌre isisiwi zaꞌra waꞌaba mo, robzépata nherẽ, dawaꞌa ãna dahâimanazém nhisiwimhã.
7 Duré isazeiꞌwa norĩ ꞌre isisawi zaꞌra mono zém na te za ãma ꞌre isisiwi zaꞌra waꞌaba mo, ꞌRe ihâimana uꞌâsi mono nhimiroti ꞌmadâꞌâ pese ꞌwa na dahâimanazém nhisiwimhã. Tawamhã danhimizawizém na te za duré ãma ꞌre isisiwi zaꞌra waꞌaba mo, isazeiꞌwa norĩ ꞌre isisawi zaꞌra mono zém nhisiwimhã.
8 Ã norĩ hã aihâimanazéb ꞌre, aima ꞌre hâimana zaꞌra waꞌaba mono wamhã, duré te te aima sina ꞌre hâimo uꞌâsi zaꞌra waꞌaba mono da, asima ꞌre wẽ zaꞌra waꞌaba mono wamhã, tawamhã te za iwẽ hã te te aima ꞌre tébré zaꞌra waꞌwa, aima ꞌre hâimana zaꞌra waꞌaba mono da, Wanhibꞌapito Zezu Cristu ãma rowaihu hã, waihuꞌu pese zaꞌra waꞌaba da.
9 Tane nherẽ, ã norĩ hã niꞌwai ma hâimana zaꞌra õ wamhã, itobꞌa ne te za ꞌre hâimana. Duré niwamhã marĩ ꞌrâwi pesere si, da te ꞌre iꞌmadâꞌâ zaꞌra mono ne, te za ꞌre hâimana. Ta hã te za duré siꞌãma poꞌre haꞌâ, tiwasédé te te ꞌre iꞌmanharĩ ꞌrata mono zé, ꞌRe ihâimana uꞌâsi mono te te tãma ipari na hã.
10 Ĩsisãnawã norĩ, tahawa, maꞌãpé asima sô ꞌre asõpré uꞌâsi aba mono, asiptete na asiwawãi ãna ꞌre aihâimana zaꞌra waꞌaba mono da, ꞌRe ihâimana uꞌâsi mono asô ihârâ zaꞌra waꞌaba zém na duré te te sima iꞌaipisutu zaꞌra waꞌaba zém na zama. Ãne hã ꞌre ꞌmanharĩ zaꞌra waꞌaba mono wamhã, niwa isazeiꞌõ utõrĩ zaꞌra waꞌaba da hã, mare di za.
11 Taha zarina, te za ꞌRe ihâimana uꞌâsi mono to sina te te ꞌre aiꞌaꞌmazasi ꞌwa hâiwa u hã, Wanhoꞌreptuiꞌwa, Wanhibꞌapito Zezu Cristuhu u, Danhibꞌapito uptabi na dama ꞌre ihâimana uꞌâsi mono zéb u.
12 Tahawa, wa za te ãma ꞌre aiꞌapoꞌre puꞌu uꞌâsi ꞌwa, aima waihuꞌu pese zaꞌra waꞌaba nherẽ, duré asiptete na ãma ꞌre aihâimana uꞌâsi zaꞌra waꞌaba mono nherẽ, tô sena ꞌRe ihâimana uꞌâsi mono nhimiroti iwaibu zaꞌra waꞌaba na hã.
13 Ĩte rosaꞌrada ãne, zahadu ĩhâiba ré ré hã, ĩma hã iꞌuwaibaba, ã hã roti na te ãma ꞌre aipoꞌre puꞌu zaꞌra waꞌaba mono da hã.
14 E marĩ wa. Ĩma waihuꞌu pese di, romhutu na za ã hã ĩhâiba, te irẽme na hã Wanhibꞌapito Zezu Cristu sõꞌawi te te ĩma iwaihuꞌu siromo zarina.
15 Tahawa, wa za sada asapẽtẽ, ĩꞌuirĩ na hã ãma ꞌre asipoꞌre puꞌu uꞌâsi zaꞌra waꞌaba mono da.
Cristu hã rowaꞌa isaꞌẽtẽ ré, ꞌre ihâimana mono zé
16 Wa te aima rowasuꞌu zaꞌra waꞌaba wamhã, wasihawi wa te ropoto zaꞌra õ di, waihuꞌu pese uptabi na Wanhibꞌapito Zezu Cristu we imorĩzé hã wa te aima wasuꞌu zaꞌra waꞌaba wamhã. Tazahã, watõmo na wa tô ꞌmadâꞌâ zaꞌra ni, iwaihuꞌu pe hã.
17 Wanhoꞌa zaꞌra, ma tô ꞌRe ihâimana uꞌâsi mono Imama hã tãma tisõ, wazé pese uptabi na ꞌre ihâimana mono zé hã duré waihuꞌu pese uptabi na ꞌre ihâimana mono zéb zama. Danhipai u Pire uptabi na Waihuꞌu pese uptabi na ꞌre Ihâimana mono hã ma tô tãma tinha, ãne: “Ã hã Ĩꞌra, ĩma isawi uptabi, rowẽ zaꞌẽne hã te te sina ĩma ꞌre isani mono.”
18 Damreme hâiwa hawi we te te inharĩ hã, wapoꞌre na wa wapari zaꞌra ni, Wanhibꞌapito Zezusihi siré wahâimana zaꞌra ré hã, ẽtẽꞌrãihâ iwazé pese ãma hã.
19 Ãne wa, wama umnhasi uptabi zaꞌra di, ꞌRe ihâimana uꞌâsi mono zadawa ꞌmahârâꞌwa norĩ te te irowasuꞌu zaꞌra zé hã. Wẽ uptabi di, za ã hã rowasuꞌu wapari pese zaꞌra waꞌaba wamhã. E marĩ wa. Ta hã robꞌuiwẽzé, robra ãma te te ꞌre irobꞌuiwẽ mono ne hã, ꞌre iꞌawẽ mono zéb u, duré wasi wawẽ hã awẽ u te te ꞌre irobꞌuiwẽ mono ne, aipẽꞌẽ ꞌre, te te ꞌre rowaꞌa zaꞌra waꞌaba mono da.
20 Uburé marĩ nhipai u hã, maꞌãpé ãma ꞌre aipoꞌre puꞌu zaꞌra waꞌaba mono, ãhã na: ꞌRe ihâimana uꞌâsi mono zadawa ꞌmahârâꞌwa norĩ hã sihawim na te te dama hâiꞌré waihuꞌu zaꞌra õ di, Ibaihâ iwazé pese na Imreme na ãma robꞌuiꞌéré hã.
21 E marĩ wa. Niwa niꞌwa hã te te sima iwẽzéb zarina, romnhowa ꞌRe ihâimana uꞌâsi mono mreme sõꞌawi te te dama hâiꞌré õ wa. Tazahã, ꞌRe ihâimana uꞌâsi mono Pẽꞌẽzani hã ma tô niꞌwam norĩ hã te te ꞌre simroi wẽ, ꞌRe ihâimana uꞌâsi mono mreme te te ꞌre ꞌmahârâ zaꞌra mono da, te te tãma ꞌre iꞌawaihuꞌu mono hã.
