2 Pedru 2:1-22
2 Duréihã senai õ na ꞌRe ihâimana uꞌâsi mono zadawa ꞌmahârâꞌwa norĩ hã ma tô sihâiꞌré zaꞌra dawazari. Tane te za duré aiwazarib zaꞌra waꞌaba hã sihâiꞌré zaꞌra. Ta norĩ hã te za te te dama ꞌre rowahutu zaꞌra, ꞌRe ihâimana uꞌâsi mono na danhimizaze senai õ na hã, taha na te te dawi ꞌre uprosi zaꞌra mono da. Rowahutuꞌwa te te isõꞌreptu zaꞌra hã te za duré te te siwi ꞌre wẽꞌõ. Tahawa, te za ta norĩ nhisiwimhã ꞌre waptãꞌã, waptu na ꞌre isiꞌutõrĩ zaꞌra mono zé hã.
2 Daꞌahâ uptabi na te za ta norĩ hâimana nhiséb õ na, ꞌre ihâimana zaꞌra mono zéb zarina, da te ꞌre hâimana nhizusi zaꞌra. Tawamhã ta norĩ uꞌâbâ te za Sena na Bâdâdi na ꞌre idanomro mono zém na da te ãma ꞌre wasété zaꞌra.
3 Robꞌuiprazéb zô te te sima ꞌre irobꞌruiwapari zaꞌra mono zéb zarina te za robꞌuiprazé hã te te aiwi ꞌre ubumro zaꞌra waꞌwa, sihawi rowasuꞌu te te ꞌre ipoto zaꞌra mono na hã. Tane nherẽ duréi uptabi te Daꞌãma Rowairébéꞌwa hã simizaꞌrese sada tihâimana zaꞌra. Duré Iꞌuprosi zaꞌra ꞌwa da hã te sõtõ ãna ꞌre hâimana.
4 E marĩ wa. Hâiwa ãma romhuriꞌwa norĩ hã tiwasédé te te ꞌmanharĩ zaꞌra wamhã, ꞌRe ihâimana uꞌâsi mono hã tinhimihâzé te te tãma baꞌa zaꞌra õ di. Tazahã, abꞌre hâ robra u ma tô sãmra, tame pawasisi na ꞌre simasa mono da, Daꞌãma Rowairébézé bâdâ iwisizéb u simipari sina, ꞌre hâimana zaꞌra mono da.
5 Duréi uptabi hã, ꞌRe ihâimana uꞌâsi mono hã tinhimihâzé te te dama baꞌa õ di, iwẽꞌõꞌwa norĩ siꞌmanhoꞌreptu da hã, âpusi mono da, te te pisutu wamhã. Tazahã Noéhé si ma tô sõꞌreptu. Ta hã ma tô nasi aré dama robꞌmahâ, ꞌRe ihâimana uꞌâsi mono hã, uburé da te ꞌre wapari pese zaꞌra mono da. ꞌRe ihâimana uꞌâsi mono hã ma tô duré isiré hã 7 na dahâiba hã daꞌanhoꞌreptu.
6 ꞌRe ihâimana uꞌâsi mono hã te te siwi idaꞌawẽꞌõ pese zarina ma tô duré unhama na uprosi, ꞌri nhoꞌu Sodoma duré Gomora zama. Ta hã te za ꞌre hâimana, da te ãma ꞌre waihuꞌu zaꞌra mono da, daro mono bâ iwasété norĩ ma, za ꞌre iromhâimana mono zéb da hã.
7 Tamemhã ma tô sõꞌreptu Lo na aibâ isisi hã. Ta hã aibâ iwẽ. Dahâimana nhisébꞌõ na, ꞌre dahâimana zaꞌra mono wa, ma tô te te daꞌãma ꞌre robzépata.
8 Lo hã aibâ ꞌre imorĩ wẽ, bâtâ sidâpâ dawazari ꞌre ihâimana mono hã ma tô te te daꞌãma ꞌre robzépata tô, marĩ iwasédé, da te ꞌre iꞌmanharĩ zaꞌra mono zé hã te te ꞌre ꞌmadâꞌâ mono wa, duré te te ꞌre wapari mono wa.
9 Taha wasuꞌu na wa waihuꞌu zaꞌra ni, Uburé Danhibꞌapito ma, iwaihuꞌu pese uptabi na, isimiroti ꞌmadâꞌâ pese ꞌwa norĩ hã ropire hawi te te ꞌre iꞌanhoꞌreptui waihuꞌu pese mono na hã. Duré tãma waihuꞌu pese uptabi di, marĩ iwasédé te te ꞌre iꞌmanharĩ zaꞌra mono norĩ ma, te te ꞌre iꞌarobꞌmanharĩ mono da hã, bâdâ te te ꞌre sapari zaꞌra mono ré, Daꞌãma Rowairébézé za ihâimana hã.
10 Te za te te tãma ꞌre arobꞌmanharĩ wasété, te te sima iwẽ zarina ꞌre hâimana zaꞌra mono da, hâimana nhiséb õ na te te sima ꞌre iwẽ zaꞌra mono norĩ hã duré isimiroti pire hã te te siwi ꞌre iwẽꞌõ zaꞌra mono norĩ zama.
à norĩ senai õ na rowahutuꞌwa norĩ hã, te pahi ãna marĩ iꞌupa te te ꞌre ꞌmanharĩ zaꞌra. Te duré ꞌre siꞌmadâꞌâ ze zaꞌra. à norĩ hã te pahi ãna te te ꞌre wasété zaꞌra, hâiwa ãma romhuriꞌwa norĩ ãma hã.
11 Tazahã, hâiwa ãma romhuriꞌwa norĩ hã isipai u siptete na ꞌre hâimana zaꞌra mono nherẽ, asa hã te te ãma ꞌre wasété waihuꞌu zaꞌra mono õ di, Uburé Danhibꞌapito nhoꞌremhã, iwasété norĩ ãma hã.
12 Ãne niꞌwam norĩ ꞌre ihâimana zaꞌra mono hã isimirosaꞌrata waihuꞌu õ, abaze rom na ꞌre ihâimana zaꞌra mono ne hã. Ta norĩ hã da te ꞌre sarẽ zaꞌra mono da, duré da te ꞌre uprosi mono da, te ꞌre poto zaꞌra. Te te ꞌre isadaihuꞌu zaꞌra mono õ na te te ꞌre wasété zaꞌra. Ãne zarina, te za uburé ꞌRe ihâimana uꞌâsi mono hã te te ꞌre aꞌuprosi, abaze rom na da te ꞌre iꞌuprosi zaꞌra mono ne.
13 Ta norĩ hã te za robzépata na iwaꞌrãmi waꞌâbâ zaꞌra, robzépada hã te te dama ꞌre iꞌmanharĩ zaꞌra mono zéb zarina. Te te sima ãma ꞌre rowẽ zaꞌra, bâtâ na marĩ, tihâimana nhiséb õ na te te ꞌre iꞌmanharĩ zaꞌra mono na hã. Asiré waꞌaba ꞌre siꞌrãꞌõtõ mono wamhã, te siséb ãna duré tãma rowazéb ãna te te ꞌre wasété zaꞌra, daꞌãma. Bâtâ bâre te sima te te ꞌre rowẽ zaꞌra, dama robꞌrãmi na ꞌre ihâimana zaꞌra mono na hã.
14 Ta norĩ hã te sô ꞌre sõpré uꞌâsi, piꞌõ na ꞌre hâimana zaꞌra mono da hã. Duré tiwasédé te te ꞌre iꞌmanharĩ zaꞌra mono na hã ꞌre sadâꞌâ wairébé waihuꞌu mono õ di. Niꞌwam norĩ sibꞌuwa na ꞌre ihâimana zaꞌra mono norĩ hã te te ꞌre simro, tiwasédé te te ꞌre ꞌmanharĩ zaꞌra mono da hã. Tipẽꞌẽ ꞌremhã, te robꞌuiprazéb zô si te te ꞌre robꞌruiwapari uꞌâsi zaꞌra. Tahawa, te ta norĩ hã ꞌRe ihâimana uꞌâsi mono nhimirobꞌmanharĩ ipipa zahâpâ ꞌre hâimana zaꞌra.
15 Ta norĩ hã bâdâdi iꞌuwaibaba na ꞌre idanomro mono zém nhiti sipa zaꞌra wa, te oto siwaꞌru ꞌre nomro. Balaãu nhirã zarina te aiꞌabaꞌré, Beoho ꞌra nhirã zarina. Ta hã ma tô robꞌuiprazé hã te te sima ꞌre sawi, marĩ iwasédé te te ꞌre iꞌabꞌmanharĩ mono waꞌrãmi te te ꞌre iꞌawaibui mono hã.
16 Tane nherẽ, iwasété uꞌâbâ ma tô awaru poꞌrepore hã tãma timreme tete. Awaru poꞌrepore hã ꞌre mreme zusi mono õ nherẽ, ma tô tiꞌai ãma aꞌuwẽ mreme na tãma tinha. Ma tô sõwada, simizaꞌrese ãna morĩ uꞌâsi tõ da, tite bâdâdi iwasété na ꞌRe ihâimana uꞌâsi mono zadawa ꞌmahârâꞌwa hã.
17 Ã norĩ hã senaiꞌõ na rowahutuꞌwa norĩ hã te aiwa ubꞌre iꞌâ õ ne ꞌre hâimana zaꞌra, duré hunhizé rowaꞌu te te ꞌre isate mono ne. ꞌRe ihâimana uꞌâsi mono ma tô ro hã sô pisutu siromo zaꞌra, robra uptabi hã.
18 Ta norĩ hã te te ꞌre rowasuꞌu zaꞌra, ãma ꞌre datobꞌuzu zaꞌra mono da, timreme na te te ꞌre danhiptete zaꞌra mono dai õ nherẽ. Tihâimana uptabi õ na duré tihâimana nhiséb õ na te te dama ꞌre robꞌrãmi zaꞌra. Taha na te te apâ ꞌre dapizari zaꞌra, niꞌwam norĩ dahâimanazé iꞌupa na ꞌre ihâimana zaꞌra mono zém hawi, aré ꞌre iwairébé mono hã.
19 Senaiꞌõ na rowahutuꞌwa norĩ hã te duré te te dama ꞌre ropisutu zaꞌra, dasima iwẽ na siwaꞌru ꞌre idahâimana zaꞌra mono zém na. Tane nherẽ, te ta norĩ hã dahâimanazé iwasété uptabi ma si ꞌre hâimana zaꞌra, tiwi ꞌre wairébé waihuꞌu mono ãna. E marĩ wa. Marĩ iwasédé hã te te sitẽme ꞌre idaꞌwani zaꞌra mono zarina te te daꞌãma ꞌre aiꞌuté zaꞌra mono wamhã, taha ma si te za ꞌre dahâimana zaꞌra, tiwi ꞌre dawairébé waihuꞌu mono ãna.
20 Tahawa, niꞌwam norĩ hã Wanhibꞌapito Wanhoꞌreptuiꞌwa Zezu Cristu hã te te waihuꞌu zaꞌra wa, tiꞌai ãma dahâimana nhisébꞌõ hawi ꞌre wairébé mono nherẽ, apâ itẽme ꞌre isipizari zaꞌra mono zarina te te ãma ꞌre aiꞌuté zaꞌra mono wa, te za tihâimana ꞌrãsutu u ropire uptabi na oto ꞌre hâimana zaꞌra, iwana ré, ꞌre ihâimana zaꞌra mono zém nhipai u.
21 Tahawa, iwẽ hã aré tãma zaꞌra hã, bâdâdi iꞌuwaibaba na ꞌre idanomro mono zé hã niwa te te iwaihuꞌu zaꞌra õ da hã, te te waihuꞌu zaꞌra parim nherẽ, apâ tihâimana ꞌrata u te te sina isiri zaꞌra zém nhipai u, ꞌRe ihâimana uꞌâsi mono nhimiroti iwazé pe, te te iwapari zaꞌra nhiti romhâ na oto hâimana zaꞌra da.
22 Ta norĩ ma iromhâimanazé hã ma tô sina uwaimrami zaꞌra, ã hã ãma ꞌre idamreme zusi mono zé, ãne hã: “Wapsã hã te za apâ sina siri, tinhoꞌoꞌo zô” duré ã hã “Uhâbâ upsõi ré nherẽ, apâ te za sina siri, roptob u.”
