2 Tesalonita 1:1-12
1 Wa hã Paulu, duré Silas duré Timotiuhu zama, wa ãma aima robꞌuiꞌéré zaꞌra waꞌaba ni, wasiré isazeiꞌwa norĩ ꞌri nhoꞌu Tesalonita ãma asiré ꞌre iꞌaiꞌrãꞌõtõ aba mono norĩ ma, Wamama ꞌRe ihâimana uꞌâsi mono ãma duré Wanhibꞌapito Zezu Cristuhu ãma zama ꞌre iꞌaihâimana zaꞌra waꞌaba mono norĩ ma.
2 Wa wa te aiꞌãma ꞌre rowaptẽrẽ uꞌâsi zaꞌra waꞌwa, Wamama ꞌRe ihâimana uꞌâsi mono te rowẽ uꞌâ hã duré Wanhibꞌapito Zezu Cristuhu te zama, aiꞌãma ꞌre ihâimana uꞌâsi zaꞌra waꞌaba mono da si.
Cristu hã apâ wei morĩ wa, za te te daꞌãma iꞌarowairébézé
3 Wasisãnawã norĩ, ꞌRe ihâimana uꞌâsi mono ãma tô ꞌre iwawata uꞌâsi zaꞌra mono da si, aiꞌãma zaꞌra waꞌaba hã, tô iꞌuwaibaba wa. E marĩ wa. Cristu asina ꞌre iꞌumnhasi zaꞌra waꞌaba mono zé hã saꞌẽtẽ uꞌâsi mono wa, duré ꞌre iꞌasisawi pese zaꞌra waꞌaba mono zé hã aima ꞌre saꞌẽtẽ uꞌâsi zaꞌra waꞌaba mono wab zama.
4 Tahawa, isazeiꞌwa norĩ siré ꞌre isiꞌrãꞌõtõ mono norĩ ma, wa wato sina wa te ꞌre aiwasuꞌu zaꞌra waꞌwa. Wa wa te wasima ꞌre rowẽ zaꞌra aiꞌãma zaꞌra waꞌaba hã, asimiꞌẽi hâ aima ꞌre hâimana zaꞌra waꞌaba mono wa, Cristu asina ꞌre iꞌumnhasi zaꞌra waꞌaba mono zé hã ꞌre ihâiꞌré zaꞌra waꞌaba mono zéb zarina, da te aima ꞌre robꞌmanharĩ wasété zaꞌra waꞌaba mono nherẽ, duré ꞌre robzépata zaꞌra waꞌaba mono nherẽ.
5 Ã hã, sena na wa te ãma iwaihuꞌu zaꞌra zé, ꞌRe ihâimana uꞌâsi mono iꞌuwaibaba na si te te daꞌãma ꞌre iꞌarowairébé mono na hã.
Ãne zarina, te za tô sada na ꞌre aihâimana zaꞌra waꞌaba mo, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb ãma ꞌre aihâimana zaꞌra waꞌaba mono da hã, taha uꞌâbâ ꞌre robzépata zaꞌra waꞌaba mono wa, ãhã na hã.
6 ꞌRe ihâimana uꞌâsi mono hã iꞌuwaibaba si te za tô te te ꞌre abꞌmanharĩ: ꞌRe robzépata zaꞌra waꞌaba mono da, te te aima ꞌre irobꞌmanharĩ wasété zaꞌra waꞌaba mono norĩ ma, te za te te ãma tãma ꞌre awaꞌrãmi, ta norĩ zama te te ꞌre robzépata zaꞌra mono da.
7 Te za duré te te aima ꞌre anhomri ꞌwa, ꞌre aiwaꞌutu zaꞌra waꞌaba mono da hã, wa te ꞌre irobzépata zaꞌra mono ne, ꞌre irobzépata zaꞌra waꞌaba mono norĩ ma zama. Ãne hã te za ꞌRe ihâimana uꞌâsi mono hã ꞌmanha, niwa Wanhibꞌapito Zezusi hã unhama roꞌo waꞌwa we te te hâiꞌré wamhã, ite hâiwa hawi romhuriꞌwa norĩ waihuꞌu pese na ꞌre ihâimana zaꞌra mono norĩ siré.
8 Tawamhã ꞌRe ihâimana uꞌâsi mono te te ꞌre iwẽꞌõ zaꞌra mono norĩ ma, te za tãma arobꞌmanharĩ wasété, Wanhibꞌapito Zezusihi wasuꞌuwẽ ité te te ꞌre iꞌmadâꞌâ zaꞌra mono õ norĩ ma hã.
9 Ta norĩ ma, te za arobꞌmanharĩ pipa, isiti ꞌre hâimana uꞌâsi zaꞌra mono da, õne uꞌâsi. Duré Wanhibꞌapito nhiti te za romhâ na ꞌre hâimana zaꞌra, duré wẽ uptabi na iwaihuꞌu pe ꞌre ihâimana mono nhiti.
10 Ã hã za iromhâimanazé Wanhibꞌapito Zezusi apâ we imorĩzé bâtâ ãma hã, uburé isibꞌaꞌuwẽ norĩ, ãma iwata zaꞌra zéb da hã duré uburé isazeiꞌwa norĩ ãma itobꞌuzu zaꞌra zéb ãma hã za. A norĩ waꞌaba zama te za dame aihâimana zaꞌra waꞌwa za, Rowasuꞌuwẽ ité, wa te aima iwasuꞌu zaꞌra waꞌwa hã saze zaꞌra waꞌaba wa.
11 Tahawa, wa wa te aiꞌãma ꞌre rowaptẽrẽ uꞌâsi zaꞌra waꞌwa, wate zaꞌra ꞌRe ihâimana uꞌâsi mono dahâimanazé itéb u asô ihârâ zaꞌra waꞌwa hã, te te aima ꞌmanharĩ zaꞌra waꞌaba da, aiwẽ uptabi na iꞌuwaibaba na sada ꞌre aihâimana zaꞌra waꞌaba mono da, dahâimanazé itéb da hã. Wa wa te duré tiwi ꞌre rowaptẽrẽ zaꞌra, tiwaihuꞌu pese uptabi na te te ãma aima uwaimrami zaꞌra waꞌaba da, uburé marĩ iwẽ ꞌre ꞌmanharĩ zaꞌra waꞌaba mono da, asima ꞌre iwẽ zaꞌra waꞌaba mono zé hã duré romhuri ꞌre iꞌmanharĩ zaꞌra waꞌaba mono zé hã, Cristu asina ꞌre iꞌumnhasi zaꞌra waꞌaba mono sina ꞌre ꞌrãsutu wẽ zaꞌra waꞌaba mono da.
12 Ãne zarina, Wanhibꞌapito Zezusihi nhisi hã saꞌẽtẽ uptabi na ꞌre ihâimana mono na te za ãma ꞌre dawata zaꞌra. Te za duré Õhõ zama te te ꞌre aiwẽsãmri zaꞌra waꞌwa, ꞌRe ihâimana uꞌâsi mono hã tinhimizawi pese zéb uꞌâbâ duré Wanhibꞌapito Zezu Cristuhu uꞌâbâ zama.
