Éfézu 2:1-22
2 Duréihã, ꞌRe ihâimana uꞌâsi mono nhimiroti ꞌre ꞌmadâꞌâ zaꞌra waꞌaba mono õ wa, duré aiwasédé hã sada ꞌre ꞌmanharĩ zaꞌra waꞌaba mono wa, ma tô aipẽꞌẽ ꞌre atâꞌâ na aré ꞌre anomro aba mo.
2 Tiꞌai ãma isazeiꞌõꞌwa ꞌre inomro mono ne, ma tô aré ꞌre anomro aba mo. Ma tô duré aré ꞌre iwapari zaꞌra waꞌaba mo, hâiwa nhoꞌre na ipire norĩ wadaꞌuri wasété ꞌwa nhimiroti hã. Ta hã te ãhã na hã te te ꞌre roti wasété, niꞌwam norĩ ꞌRe ihâimana uꞌâsi mono nhimiroti te te ꞌre iꞌmadâꞌâ zaꞌra mono õ norĩ ma hã.
3 Uburé wa norĩ hã ta norĩ ne, wa aré ꞌre wahâimana zaꞌra. Wa te wasima ꞌre iwẽ zaꞌra mono zé iwasété si, wa aré wa te ꞌre ꞌmanharĩ zaꞌra, wahâimanazé iwasété zarina, duré wanhimirosaꞌrata wasété zarina. Dasine wa aré ꞌre wahâimana zaꞌra, ꞌRe ihâimana uꞌâsi mono nhimihâzéb ꞌremhã.
4 Tane nherẽ, ꞌRe ihâimana uꞌâsi mono daꞌãma ꞌre isiba mono zé hã saꞌẽtẽ uptabi di. Duré te te ꞌre iwaꞌazawi pese mono zé hã saꞌẽtẽ uptabi di.
5 Tahawa, wawasédé hã wa te ꞌre ꞌmanharĩ zaꞌra mono wa, wapẽꞌẽ ꞌre wadâꞌâ na ꞌre wanomro mono ré, ma tô oto wahâimanazé ité hã wama sõmri zaꞌra, Cristuhu ãma oto ꞌre wanomro mono da. ꞌRe ihâimana uꞌâsi mono nhimizawizéb zarina ma asõꞌreptuzé hã asina iꞌuwaimrami zaꞌra waꞌwa.
6 Cristu Zezusihi ãma ꞌre wahâimana zaꞌra mono wa, ma tô ꞌRe ihâimana uꞌâsi mono hã isiré waꞌahâiwaꞌutu, hâiwa ãma duré hâiwa nhoꞌre ãma wapire na ꞌre wasiꞌubumroi mono da, isiré.
7 ꞌRe ihâimana uꞌâsi mono ma tô ãne hã ꞌmanha, tinhimizawizé isaꞌẽtẽ uptabi marĩ na ãma simiréꞌé waihuꞌu ãna ꞌre ihâimana mono hã te te hâiꞌré da, niwa za sidâpâsi ꞌre idapoto zaꞌra mono norĩ ma hã. Ã hã isimizawizé hã tihâimana wẽ zéb zarina ma tô wama hâiꞌré zaꞌra, Cristu Zezusihi ãma.
8 E marĩ wa. ꞌRe ihâimana uꞌâsi mono nhimizawizém na ma tô asõꞌreptuzé hã asina iꞌuwaimrami zaꞌra waꞌwa, asina ꞌre iꞌumnhasi zaꞌra waꞌaba mono zéb zarina. Ta hã aihawib zaꞌra waꞌaba õ di. Tazahã, ꞌRe ihâimana uꞌâsi mono nhoprubzé, ta hã.
9 Asõꞌreptuzé hã mare di, asihawi marĩ zô ꞌre iꞌasiwasutu zaꞌra waꞌaba mono zéb zarina hã, niꞌwa hã siꞌmadâꞌâ ze tõ da.
10 E marĩ wa. Wa norĩ hã ꞌRe ihâimana uꞌâsi mono nhimipodo, Cristu Zezusihi ãma te te iwaꞌapodo, romhuri iwẽ hã wa te tãma ꞌre ꞌmanharĩ zaꞌra mono da, duréi uptabi te te wazô isaꞌra pese siromo zaꞌra, wa te ꞌre ꞌmanharĩ zaꞌra mono da.
Cristuhu ãma si ꞌre idanomro mono zé
11 A norĩ waꞌwa Zudeuꞌõ norĩ hã, maꞌãpé ãma aipoꞌre puꞌu zaꞌra waꞌaba, Zudeu norĩ asihâiwata nhihâri ãna te te ꞌre iꞌasisi zaꞌra waꞌaba mono na hã, ta norĩ hã isihâiwata nhihâri ré na ꞌrâwi ꞌre sisisi zaꞌra mono wa, ꞌre sisihâiwata nhihâri zaꞌra mono wẽ te. Maꞌãpé duré ãma aipoꞌre puꞌu zaꞌra waꞌaba, duréihã aré ꞌre iꞌaihâimana zaꞌra waꞌaba mono zém na hã.
12 Taha bâtâ mono na hã Cristuhu nhiti ma tô aré ꞌre aihâimana zaꞌra waꞌaba mo, dasiré aꞌuwẽꞌõ na. Duré ꞌRe ihâimana uꞌâsi mono tinhibꞌaꞌuwẽ da, te te sima iꞌapisutu norĩ siré aré ꞌre aihâimana zaꞌra waꞌaba mono õ di. Te te iropisutu zahi hã aré aima ꞌre hâimana zaꞌra waꞌaba mono õ di, ta hã ꞌRe ihâimana uꞌâsi mono tinhibꞌaꞌuwẽ norĩ ma, te te ãma iropisutuzé. Tahawa ãme tiꞌai ãma dahâimanazé isiꞌutõrĩꞌõ hã asina ꞌre uwaimrami waihuꞌu zaꞌra waꞌaba mono ãna ma tô aré ꞌre aihâimana zaꞌra waꞌaba mo, duré ꞌRe ihâimana uꞌâsi mono hã asiré ꞌre hâimana zaꞌra waꞌaba mono ãna.
13 Tane nherẽ, ãhã na hã Cristu Zezusihi ãma te oto ꞌre anomro aba mo. Duréihã romhâ na ꞌRe ihâimana uꞌâsi mono nhiti aré ꞌre aihâimana zaꞌra waꞌaba mono nherẽ, Cristu hã wedepoꞌo nhonhiꞌrãmi na isaꞌozém na ma tô sitẽme aiꞌãwisi zaꞌra waꞌwa.
14 E marĩ wa. Cristuhu si ma tô rowẽ uꞌâ hã wama sina ãwisi zaꞌra. Taha zarina ma tô duré ꞌmanha, Zudeu norĩ hã Zudeuꞌõ norĩ me misi aꞌuwẽ wamri siré ꞌre ihâimana zaꞌra mono ne ꞌre hâimana zaꞌra mono da oto. Tihâiba na te te irobzépatazém na ma tô waꞌra ne ꞌre isa mono hã pru, Zudeu norĩ, Zudeuꞌõ norĩ me ꞌre isiꞌruiwapari zaꞌra mono zé hã.
15 Zudeu norĩ hâimanazém na roti zahi hã ma tô uprosi, da te ꞌre ꞌmanharĩ zaꞌra mono da, roti ãma ꞌre ihâimana zaꞌra mono zama. Maparane aꞌuwẽ sipoꞌo na ꞌre ihâimana zahuré mono hã ma tô ãma ato, misi haré oto ꞌre hâimana zaꞌra mono da, itém na duré isiré ꞌre hâimana zaꞌra mono da oto simisutu. Ãne zarina, ma tô we rowẽ uꞌâ hã ãwisi.
16 Cristu hã wedepoꞌo nhonhiꞌrãmi na tidâꞌâzém na ma tô uprosi, maparane aꞌuwẽ wamri aré ꞌre isiꞌruiwapari zaꞌra mono zé hã. Wedepoꞌo nhonhiꞌrãmi na tidâꞌâzém na ma tô ãma atob zaꞌra, misi ihâiba na oto ꞌre hâimana zaꞌra mono da, duré taha na apâ ꞌRe ihâimana uꞌâsi mono u te te ãwisi zaꞌra da.
17 Ãne, Cristu hã ma tô wei mo. Ma tô duré te te ꞌre rowasuꞌu Rowasuꞌuwẽ ité rowẽ uꞌâsi ꞌre idahâimana zaꞌra mono zém na hã, aima zaꞌra waꞌaba Zudeuꞌõ norĩ hã, ꞌRe ihâimana uꞌâsi mono nhiti romhâ na aré ꞌre iꞌaihâimana zaꞌra waꞌaba mono norĩ ma, duré Zudeu norĩ ꞌRe ihâimana uꞌâsi mono ꞌrata ꞌrâwi ꞌre ihâimana zaꞌra mono norĩ ma zama.
18 Cristuhu uꞌâbâ, wa za uburé wa norĩ hã ꞌre wanomro Wamama nhoꞌre u, Ipẽꞌẽzani iwaihuꞌu pese uptabi zarina Zudeu norĩ duré Zudeuꞌõ norĩ zama.
19 Tahawa, Zudeuꞌõ norĩ a norĩ waꞌwa hã dasiré aꞌuwẽꞌõ ne oto ꞌre aihâimana zaꞌra waꞌaba mono õ di, duré dama aiwaihuꞌu õ ne. A norĩ waꞌwa hã dasiré aꞌuwẽ ne, te oto ꞌre aihâimana zaꞌra waꞌaba mo, ꞌRe ihâimana uꞌâsi mono nhibꞌaꞌuwẽ na. Isipoto na te oto ꞌre aihâimana zaꞌra waꞌaba mo.
20 A norĩ waꞌwa hã ꞌri ꞌrãihâ ne te oto ꞌre aihâimana zaꞌra waꞌaba mo, ꞌri naꞌrata nhanaꞌrata nhisiwi da te ꞌre iꞌri zaꞌra mono ne. ꞌRi naꞌrata nhanaꞌrada hã ta norĩ hã, Cristuhu zadawa wasuꞌuꞌwa norĩ duré ꞌRe ihâimana uꞌâsi mono zadawa ꞌmahârâꞌwa norĩ. Tawamhã ẽtẽ tõmo wawẽ ꞌri naꞌrata nhanaꞌrata uparizé ipire uptabi hã, ta hã tô Cristu.
21 Ta hã te te ꞌre ꞌmadâꞌâ pese ꞌri ꞌrãihâ hã, siptete na ꞌre sa mono da. Te duré te te ꞌre ꞌmanharĩ, ꞌri ꞌrãihâ hã prédu wẽ da, Wanhibꞌapito ma si aimawi ꞌre hâimana mono da.
22 Tane, a norĩ waꞌaba zama, Cristuhu ãma ꞌre iꞌaihâimana zaꞌra waꞌaba mono hã, te Cristu hã aiꞌãma ꞌri zaꞌra waꞌwa dasiré, ꞌRe ihâimana uꞌâsi mono nhorõwa na oto ꞌre aihâimana zaꞌra waꞌaba mono da, Tipẽꞌẽzani na ꞌre isãmra mono zém na.
