Éfézu 3:1-21
3 Ãne wa, Zudeuꞌõ norĩ, wa hã Paulu ꞌRe ihâimana uꞌâsi mono wi, wa te te aiꞌãma ꞌre rowaptẽrẽ zaꞌra waꞌwa, asawi te zaꞌra waꞌaba. Cristu Zezusihi ma romhuriꞌwa na ꞌre ĩhâimana mono uꞌâbâ, wa dazazéb ꞌremhã za.
2 Aima waihuꞌu pese zaꞌra waꞌaba di tô, ꞌRe ihâimana uꞌâsi mono tinhimizawizéb zarina ã hã romhuri te te ĩma isõmri na hã, aiꞌudâna zaꞌra waꞌaba.
3 ꞌRe ihâimana uꞌâsi mono hã tite rowaꞌõno dama waihuꞌu ãna aré ꞌre ihâimana mono hã te te ĩma ihâiꞌrézéb zarina wa tô oto waihuꞌu. Taha na wa tô ãma robꞌuiꞌéré, ꞌrutu na.
4 Ta hã ꞌre sõré zaꞌra waꞌaba mono wamhã, te za iwaihuꞌu zaꞌra waꞌwa, Cristuhu wasuꞌu dama waihuꞌu ãna ꞌre ihâimana mono te iwaihuꞌu pese na hã.
5 Duréihã, ã hã rowasuꞌu dama waihuꞌu ãna ꞌre ihâimana mono hã, aꞌuwẽ norĩ ma ꞌRe ihâimana uꞌâsi mono te te hâiꞌré õ di. Tanei õ di ãhã na hã. Tipẽꞌẽzani na ma tô oto ꞌRe ihâimana uꞌâsi mono hã hâiꞌré, tizadawa wasuꞌuꞌwa aimawi tãma ꞌre ihâimana zaꞌra mono norĩ ma, duré tizadawa ꞌmahârâꞌwa norĩ ma zama.
6 Dama waihuꞌu ãna rowasuꞌu aré ꞌre ihâimana mono hã, ã hã: Rowasuꞌuwẽ itéb zarina te Zudeuꞌõ norĩ hã Zudeu norĩ zu oto tãma ꞌre hâimana zaꞌra, ꞌRe ihâimana uꞌâsi mono iwẽ uptabi te te dama ꞌre iꞌapisutu mono na hã. Ta norĩ hã aiwa dahâiba na dapru siré ꞌre ihâimana zaꞌra mono ne, te oto Zudeu norĩ me simisutu ꞌre hâimana zaꞌra. Te duré oto dasiré ꞌre hâimana zaꞌra, ꞌRe ihâimana uꞌâsi mono te te dama iropisutuzém na Cristu Zezusihi ãma.
7 ꞌRe ihâimana uꞌâsi mono nhoprubzé iwẽ uptabi hã tinhimizawizéb zarina ma tô ĩma tisõ, tiwaihuꞌu pese uptabi zarina. Taha zarina ma tô ĩnha, tãma iromhuriꞌwa na ꞌre ĩhâimana mono da, Rowasuꞌuwẽ ité hã te ꞌre ꞌmahârâ mono da.
8 Wa hã dazahâpâ uptabi, wa ĩwapu na ꞌre ĩhâimana, ꞌRe ihâimana uꞌâsi mono nhibꞌaꞌuwẽ norĩ ꞌremhã. Tane nherẽ, ꞌRe ihâimana uꞌâsi mono hã ma tô romhuri aimawi iwẽ uptabi hã ĩma tisõ, Zudeuꞌõ norĩ ma Rowasuꞌuwẽ ité hã te ꞌre wasuꞌu mono da, Cristuhu ãma marĩ iwaꞌâbâ zaꞌẽne isiꞌutõrĩ waihuꞌu õ ꞌre ihâimana zaꞌra mono hã.
9 Aimawi romhuri iwẽ uptabi hã ma tô duré ĩma tisõ, ite rowaꞌõno dama waihuꞌu ãna aré ꞌre ihâimana mono hã te dama ꞌre hâiꞌré mono da. Ropoto naꞌrata hawim haré ma tô ã hã ite rowaꞌõno dama waihuꞌu ãna ꞌre ihâimana mono hã simiꞌuri na aré ꞌre hâimana, ꞌRe ihâimana uꞌâsi mono uburé marĩ te te iꞌapoto ãma.
10 ꞌRe ihâimana uꞌâsi mono ma tô sima wẽ, tizazeiꞌwa norĩ ãma, hâiwa ãma duré hâiwa nhoꞌre na siptete na ꞌre ihâimana zaꞌra mono hã duré ipire norĩ hã te te waihuꞌu zaꞌra da, ite rowaihu iwẽ hã iwaꞌõtõ mono bâ.
11 Ãne zarina, ꞌRe ihâimana uꞌâsi mono hã ma tô ꞌmanha, te te sima irowaꞌõtõzé isiꞌutõrĩ õ, Cristu Zezusi Wanhibꞌapito ãma te te iꞌuwaimrami hã.
12 Tahawa, Cristuhu ãma ꞌre wahâimana zaꞌra mono wa, wa te wasina ꞌre iꞌumnhasi zaꞌra mono zéb zarina, wa wapahi ãna ꞌre wasimasa ꞌRe ihâimana uꞌâsi mono nhoꞌremhã, wasiwawãi ãna.
13 Tahawa, wa za ãma aiwi waptẽrẽ zaꞌra waꞌwa. Maꞌãpé aiwi ꞌre robzeiꞌõ zaꞌra waꞌaba mono tõ, aiꞌuꞌâbâ zaꞌra waꞌaba te ꞌre irobzépata mono na hã. E marĩ wa. Ta hã te za aipire na ꞌre iꞌaihâimana zaꞌra waꞌaba mono zé hã te te aima sina ꞌre ãwisi zaꞌra waꞌwa.
Paulu hã, isazeiꞌwa norĩ ãma te te irowaptẽrẽzé
14 Ãne zarina, wa Wamama nhoꞌre ĩhiꞌrãtitõ ꞌre ĩsimasisi.
15 Ta hã te uburé isimipoto norĩ hâiwa ãma duré tiꞌai ãma zama ꞌre ihâimana zaꞌra mono norĩ ꞌre ihâimana zaꞌra mono zé hã te te tãma ꞌre anhomri.
16 ꞌRe ihâimana uꞌâsi mono wi wa te te ꞌre rowaptẽrẽ, tiwaihuꞌu pese uptabi hawi Tipẽꞌẽzani na asiptede hã te te aima sõmri zaꞌra waꞌaba da, aipẽꞌẽ ꞌre asiptete sina ꞌre aihâimana zaꞌra waꞌaba mono da.
17 Wa duré te tiwi ꞌre waptẽrẽ, asina ꞌre iꞌumnhasi zaꞌra waꞌaba mono zéb zarina, Cristu hã aipẽꞌẽ ꞌre, ꞌre sãmra aba mono da. Wa duré te tiwi ꞌre rowaptẽrẽ, wede hã tizari nhiptete na ꞌre isimasa mono ne duré ꞌri nhanaꞌrata ne asimizawizém na asiptete na ꞌre aimasa waꞌaba mono da,
18 ãne zarina, uburé ꞌRe ihâimana uꞌâsi mono nhibꞌaꞌuwẽ norĩ siré waihuꞌu pese zaꞌra waꞌaba da, Cristuhu nhimizawizé isaꞌẽtẽ uptabi na iꞌrãsutu waihuꞌu õ na.
19 Duré isimizawizé iwaihuꞌu pese wẽ da hã pire nherẽ, wa te te ꞌre rowaptẽrẽ, tô waihuꞌu pese zaꞌra waꞌaba da, taha zarina ꞌRe ihâimana uꞌâsi mono hã ibâ na te te ꞌre aihâiba ubu zaꞌra waꞌaba mono da, tihâimanazém na.
20 ꞌRe ihâimana uꞌâsi mono hã waihuꞌu pese uptabi di, ꞌrãsutu waihuꞌu ãna uburé marĩ, wa te ꞌre iwaptẽrẽ zaꞌra mono nhipai u pese, duré niwamhã uburé marĩ na, wa te ꞌre irosaꞌrata zaꞌra mono nhipai u pese, te te ãma wama ꞌre iꞌaꞌuwaimrami mono da hã, waihuꞌu pese uptabi na waꞌãma ꞌre ihâimana zaꞌra mono zéb zarina.
21 Tahawa, ꞌRe ihâimana uꞌâsi mono ãma si wa za ãma ꞌre wawata zaꞌra, saꞌẽtẽ uptabi na ꞌre ihâimana mono zém na, isibꞌaꞌuwẽ norĩ te te ꞌre ihâiꞌré zaꞌra mono zéb zarina, duré Cristu Zezusihi ãma zama, ꞌre dapoto zaꞌra mono sidâpâsi, õne uꞌâsi! Tane tô!
