Éfézu 4:1-32
4 Tahawa, wa hã Wanhibꞌapito Zezu Cristuhu ma, te ꞌre iromhuri mono uꞌâbâ dazazéb ꞌre ĩza hã, wa za aima roti zaꞌra waꞌwa, ãne: Maꞌãpé ꞌRe ihâimana uꞌâsi mono te te sima ꞌre iwẽ mono zéb uwaibaba si, ꞌre aihâimana zaꞌra waꞌaba mono. Taha da, ma tô asô tihârâ zaꞌra waꞌwa.
2 Maꞌãpé asiꞌmadâꞌâ zei ãna ꞌre aihâimana zaꞌra waꞌaba mono, duré asimiwazé pese na duré asimiꞌẽ sina. Daꞌãma ꞌre aiwaꞌa suꞌu zaꞌra waꞌaba mono tõ, asimizawizé aima ꞌre ihâimana zaꞌra waꞌaba mono zarina.
3 ꞌRe ihâimana uꞌâsi mono Pẽꞌẽzani te te aima ꞌre isõmri zaꞌra waꞌaba mono zéb zarina rowẽ uꞌâsi asiré ꞌre aihâimana zaꞌra waꞌaba mono wa oto, maꞌãpé ãma ꞌre pibui pese zaꞌra waꞌaba mono, tô õhõ na si asiré ꞌre aihâimana uꞌâsi zaꞌra waꞌaba mono da, ꞌrâwi.
4 Wa norĩ hã misi dahâiba ne, wa oto ꞌre wahâimana zaꞌra. Duré misi Ipẽꞌẽzani ꞌre ihâimana mono zarina te wahâiba mono bâ wama ꞌre hâimana zaꞌra. Tane duré misi haré wa iwẽ uptabi zô ꞌre wanhimipari zaꞌra wasiwawãi ãna. Taha da si, ma tô sima aipisutu zaꞌra waꞌwa.
5 Misire Õhõ si Wanhibꞌapito hã, duré misire Õhõ ãma si, wa ꞌre wanhimizaze zaꞌra. Duré Õhõ zadawa parap si, wa â dawabzuri hã wa te ꞌre ꞌmanharĩ zaꞌra.
6 Õhõ si misire ꞌRe ihâimana uꞌâsi mono, uburé Damama hã. Ta hã Uburé Danhibꞌapito. Ta hã te uburé waꞌãma zaꞌra te te ꞌre romhuri. Duré uburé te isazeiꞌwai pẽꞌẽ mono bâ ꞌre sãmra.
7 Wahâiba mono bâ te Cristuhu nhoprubzé iwẽ uptabi hã wama ꞌre hâimana zaꞌra, wa te ãma ꞌre idapawaptob zaꞌra mono da hã, te te sima iwẽzéb zarina te te wama ꞌre iꞌanhomri mono hã.
8 Ãne na te ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã ãma tinha, ãne:“Hâimo uptabi u apâ morĩ wamhã, siré ma tô daꞌahâ na te te danhimro, dazazéb ꞌre, ꞌre idasimasa mono ne ꞌre idahâimana zaꞌra mono hã.Ma tô duré dahâiba mono bâ dama tinhopru, tinhoprubzé iwẽ uptabi na.”
9 Tawamhã e marĩ te wasuꞌu, “hâimo uptabi u imorĩzé hã.” Tiꞌai ꞌrowi uptabi u zama te te isiꞌra na te wasuꞌu, tô adâ ꞌre ihâimana zaꞌra mono zéb u.
10 Ta hã we te te isiꞌra hã, tô ta hã apâ hâimo uptabi u imorĩ, ropâ ꞌre hâimana mono da.
11 Ta hã Cristu, siꞌuihâ na ma tô tinhoprubzé iwẽ uptabi hã niꞌwam norĩ ma te te ꞌre apisutu, te te dama ꞌre sadawa wasuꞌu zaꞌra mono da, duré niꞌwam norĩ hã isadawa ꞌmahârâꞌwa da, duré niꞌwam norĩ hã Rowasuꞌuwẽ ité hã te te dama ꞌre ꞌmahârâ zaꞌra mono da, duré niꞌwam norĩ isazeiꞌwa norĩ ꞌmadâꞌâꞌwa da, rowahutuzéb ꞌre te te ꞌre rowahutu zaꞌra mono da.
12 Ãne ma tô Cristu hã daꞌapisutu, ꞌRe ihâimana uꞌâsi mono nhibꞌaꞌuwẽ norĩ hã te te ꞌre azaꞌra pese mono da, isazeiꞌwa norĩ ꞌre ihâimana zaꞌra mono zéb ꞌre, te te ꞌre romhuri zaꞌra mono da, da te ꞌre iꞌri nhoré mono ne, Cristuhu hâiba hã siptete na ꞌre hâimana mono da.
13 Ãne zarina, wa za misi haré wasiré ꞌre wahâimana zaꞌra, wa te wasina ꞌre iꞌumnhasi zaꞌra mono zém na hã duré ꞌRe ihâimana uꞌâsi mono ꞌra, wa te ꞌre iwaihuꞌu zaꞌra mono zém na hã. Ãne wa, te za duré wahâimana prédup sina ꞌre iwanomro mono zé hã wama ꞌre hâimana zaꞌra. Wa za duré wa te ꞌre uwe zaꞌra, Cristu ꞌre ihâimana mono zém na oto ꞌre wahâimana zaꞌra mono da.
14 Ãne wa, aiꞌuté norĩ ne oto ꞌre wahâimana zaꞌra mono õ di za, rosaꞌrese ãna. Âsisasi hã ubaꞌre siwaꞌru te te ꞌre iꞌmapraba zaꞌra mono ne duré rowaꞌu hã siwaꞌru te te ꞌre isate mono ne, senaiꞌõ na sipuꞌu pese na danhimiroti hã wa te ꞌre wapari zaꞌra mono õ di za. Ta norĩ hã te sadawa nhipese na sihawi te te ꞌre ropoto zaꞌra, taha zarina te te ꞌre danhimroi mono da, bâdâdi iꞌupana.
15 Tazahã, wa norĩ hã ꞌRe ihâimana uꞌâsi mono nhimiroti tô sena ꞌre ihâimana mono na si, wanhimizawi sina, wa te dama ꞌre rowasuꞌu uꞌâsi zaꞌra mono wamhã, uburé wahâimanazé imono bâ, wa za ꞌre waprédub uꞌâsi zaꞌra, Cristuhu hâimanazém ne oto ꞌre wahâimana zaꞌra mono da, ta hã daꞌrã na ꞌre hâimana mono dâꞌâsina.
16 Õhõ si te te ꞌre aꞌmanharĩ, ihâiba hã* wahuré siptete na ꞌre hâimana mono da hã duré uburé ihâiba na iwaꞌõtõ mono hã siꞌãma ꞌre hâimana zaꞌra mono da, siré ꞌre hâimana zaꞌra mono wa. Ãne zarina, te ihâiba na iwaꞌõtõ mono bâ ꞌre ihâimana zaꞌra mono hã wẽ na te te ꞌre romhuri zaꞌra. Duré ihâiba hã wahuré te za tiprédu wẽ. Te za duré siré ꞌre hâimana zaꞌra, isimizawizé hã tãma ꞌre hâimana zaꞌra mono wa.
Dahâimanazé iꞌrata hawi, Cristuhu ãma oto ꞌre idanomro mono zé ité
17 Tahawa, ãne wa za aima roti zaꞌra waꞌwa. Tô Wanhibꞌapito nhisi na wa za aima ĩzadahutuꞌõ zaꞌra waꞌwa: Maꞌãpé ꞌre aihâimana zaꞌra waꞌaba mono tõ, Wanhibꞌapito zazeiꞌõꞌwa norĩ ꞌre ihâimana zaꞌra mono zém ne hã. E marĩ wa. Ta norĩ nhimirosaꞌrada hã marĩ dai õ di.
18 Isimirosaꞌrata zaꞌra ꞌremhã robra di. ꞌRe ihâimana uꞌâsi mono, dahâimanazé iwẽ uptabi te te dama ꞌre iꞌanhomri mono zém nhiti te ꞌre hâimana zaꞌra. E marĩ wa. ꞌRe ihâimana uꞌâsi mono hã te te waihuꞌu zaꞌra tõ da, te te sima pisutu zaꞌra wa, ipẽꞌẽ tete zaꞌra uꞌâbâ.
19 Sisém na aré ꞌre ihâimana zaꞌra mono zé hã ma tô simini pese zaꞌra. Ma duré sisõmri pese zaꞌra, uburé marĩ hâimana nhiséb õ na te te ꞌre iꞌmanharĩ zaꞌra mono ma. Marĩ iwasété wi hã ꞌre sitété waihuꞌu zaꞌra mono õ di. Duré uburé marĩ iwasédé hã te siwaꞌru te te ꞌre ꞌmanharĩ zaꞌra.
20 Tanei õ di, a norĩ waꞌwa hã. Ã hãi õ di dahâimanazé iwaihuꞌu zaꞌra waꞌwa hã, Cristuhu nhirã zarina ꞌre anomro aba mono wamhã.
21 Aipoꞌre na ma tô iwasuꞌu hã iwapari zaꞌra waꞌwa tô. Duré isirã zarina ꞌre anomro aba mono wa, ma iwaihuꞌu zaꞌra waꞌwa, tô sena ꞌRe ihâimana uꞌâsi mono nhimiroti Zezusihi ãma ꞌre ihâimana mono hã.
22 Tahawa, maꞌãpé rẽme pese zaꞌra waꞌaba, aihâimanazé iꞌrada hã. Ta hã ma tô aré te te aima ꞌre ꞌmanharĩ zaꞌra waꞌwa, aiwasété si ꞌre ꞌmanharĩ uꞌâsi zaꞌra waꞌaba mono da. Duré marĩ iwẽ newa aré asima ꞌre iwẽ zaꞌra waꞌaba mono zé hã ma tô aihâimanazéb ꞌrada hã te te aiwi ꞌre uprosi zaꞌra waꞌwa.
23 Ma tô da te aima ꞌre roti zaꞌra waꞌwa, aihâimanazé itéb ré oto ꞌre aihâimana zaꞌra waꞌaba mono da, duré ꞌre irosaꞌrata zaꞌra waꞌaba mono zé itéb ꞌré zama.
24 Maꞌãpé aihâimanazé itép si oto asima ꞌre séme aba mono, ꞌRe ihâimana uꞌâsi mono te te iꞌaipoto zaꞌra waꞌaba zarina, isine ꞌre aihâimana zaꞌra waꞌaba mono da, duré dahâimanazé tô sena na ãma ꞌre asihâiꞌré zaꞌra waꞌaba mono da, iꞌuwaibaba na Õhõ ma si ꞌre aihâimana zaꞌra waꞌaba mono da.
25 Tahawa, ꞌre asadawa nhipese zaꞌra waꞌaba mono tõ oto. Iwẽ hã, tô sena na aihâiba mono bâ asima ꞌre irowasuꞌu zaꞌra waꞌaba mono da si, asiré isazeiꞌwa norĩ ma hã. E marĩ wa. Uburé wa norĩ hã, Cristuhu hâiba ꞌre wahâimana zaꞌra mono wa.
26 ꞌRe asitiꞌru zaꞌra waꞌaba mono wamhã, taha zarina aiwasédé ꞌre ꞌmanharĩ zaꞌra waꞌaba mono da hã asima ꞌre rowairébé zaꞌra waꞌaba mono tõ. Duré bâtâ wahuré na hã asitiꞌrui haré ꞌre aihâimana zaꞌra waꞌaba mono tõ.
27 Waꞌuburé ma hã bâdâ ꞌre sõmri zaꞌra waꞌaba mono tõ, te te ꞌre aipibu zaꞌra waꞌaba mono wa, aiwasédé hã ꞌre ꞌmanharĩ zaꞌra waꞌaba mono tõ da.
28 Niꞌwa hã danhibrom na aré dawi ꞌre simisaihuri mono wamhã, ꞌre simisaihuri mono tõ oto. Tazahã, te te ꞌre romhuri pese mono, tinhibꞌrata na marĩ iwẽ te te ꞌre ꞌmanharĩ mono da, taha zarina marĩ te te dama ꞌre anhomri mono da, marĩ zô niꞌwai wi rowaptâꞌâ wamhã.
29 Aimreme iwasété na dama ꞌre nharĩ zaꞌra waꞌaba mono tõ. Iwẽ na si dama ꞌre aimreme zusi aba mono, iꞌuwaibaba na si ãma ꞌre danhiptete zaꞌra waꞌaba mono da, aiwapariꞌwa norĩ hã ãma ꞌre pawaptob zaꞌra waꞌaba mono da.
30 Duré ꞌRe ihâimana uꞌâsi mono Pẽꞌẽzani wi aihâimana wasété na tiwi ꞌre robzeiꞌõ zaꞌra waꞌaba mono tõ. E marĩ wa. ꞌRe ihâimana uꞌâsi mono Pẽꞌẽzani hã te aiꞌãma ꞌre hâimana zaꞌra waꞌwa, atobꞌrata to ré ne ꞌre iꞌaihâimana zaꞌra waꞌaba mono zé hã, za niwa bâdâ iꞌrãsutu ãma te te iꞌasõꞌreptu zaꞌra waꞌaba zé hã.
31 Uburé ꞌre idaꞌruiwapari uꞌâsi zaꞌra waꞌaba mono zé hã rẽme pese zaꞌra waꞌaba, duré asitiꞌru hã duré asahi hã duré aimreme ꞌrãihâ na dama ꞌre iꞌapari zaꞌra waꞌaba mono zé hã duré daꞌãma ꞌre iwasété zaꞌra waꞌaba mono zé hã duré uburé marĩ iwasété ꞌmanharĩ zama!
32 Aihâimana wẽ na si ꞌre aihâimana zaꞌra waꞌaba mono. Duré asimizawizé hã dama ꞌre hâiꞌré zaꞌra waꞌaba mono, daꞌãma ꞌre iꞌaiba zaꞌra waꞌaba mono zéb zarina. Marĩ iwasédé da te aiꞌãma ꞌre iꞌmanharĩ zaꞌra waꞌaba mono zé hã daꞌãma ꞌre ꞌmadâꞌâ uꞌâsi zaꞌra waꞌaba mono tõ, ꞌRe ihâimana uꞌâsi mono hã aiwasédé te te aiꞌãma ꞌre iꞌaꞌmadâꞌâ aba mono õ ne, Cristu hã asada dâꞌâ aba wamhã.
Ĩwaꞌõtõ piꞌreba watsuꞌu mono
^ 4:16 Ihâiba hã te wasuꞌu: “Isazeiꞌwa norĩ.”
