Galata 1:1-24
1 1:1-2 Wa hã, Paulu, Cristuhu zadawa wasuꞌuꞌwa. Tiꞌai ãma aꞌuwẽ norĩ hã te te siwi ĩpisutu õ di, Wanhibꞌapito zadawa wasuꞌuꞌwa na ꞌre ĩhâimana mono da hã, duré tiꞌai ãma aꞌuwẽ norĩ te te siwi ĩzatõrĩ õ di. Ĩpisutuꞌwa zahuré hã, Cristu Zezusi duré Wamama ꞌRe ihâimana uꞌâsi mono me ma tô ĩpisutu zahuré isadawa wasuꞌuꞌwa zahuré na ꞌre ĩhâimana mono da, ta hã ꞌRe ihâimana uꞌâsi mono hã ma tô hâiwaꞌutu Zezusi idâꞌâ hawi. Duré uburé wasisãnawã norĩ ĩsiré ihâimana zaꞌra norĩ zama, ma ãma asawi zaꞌra waꞌwa Galasia na danhiptiꞌa nhoꞌõmo nhisi ãma asiré ꞌre iꞌaiꞌrãꞌõtõ aba mono hã.
2 ꞌMadâꞌâ 1:1
3 Wamama ꞌRe ihâimana uꞌâsi mono nhimizawi zé duré ite rowẽ uꞌâ hã, duré Wanhibꞌapito Zezu Cristuhu te zama, asiré ꞌre ihâimana uꞌâsi zaꞌra waꞌaba mono da si, iwẽ hã.
4 Zezusi hã, ma tô sisõ sisawi ãna, wawasété zaꞌra da, tiꞌai ãma rowasété ãma ꞌre iwahâimana zaꞌra mono zém hawi te te ꞌre waꞌazani mono da. Ãne wa, ma tô Zezusi hã ãma uwaimra Wamama ꞌRe ihâimana uꞌâsi mono te te sima iwẽ zé hã.
5 ꞌRe ihâimana uꞌâsi mono ãma si wa za ãma ꞌre wawata uꞌâsi zaꞌra, õne uꞌâsi! Tane tô.
Misire te ꞌre hâimana, Rowasuꞌuwẽ ité hã
6 Wa aiꞌãma ĩtobꞌuzui pese zaꞌra waꞌwa, e marĩ wa, aiwara sina asiwi rẽme aba wa, Cristuhu uꞌâbâ Asô Ihârâ zaꞌra waꞌwa hã. Ma asiwi irẽme ꞌwa saze zaꞌra waꞌaba da, rowasuꞌu aimawi senaiꞌõ hã.
7 Tane nherẽ iꞌuptabi na hã, rowasuꞌuwẽ aimawi hã hâimana õ di. Tahawa wa ãne ãma aima waihuꞌu zaꞌra waꞌwa, e marĩ wa, niꞌwam norĩ hã te tinhimirowasuꞌu na aiwi roꞌwaꞌrutu zaꞌra waꞌwa, ta norĩ hã, te sima wẽ zaꞌra Cristuhu wasuꞌuwẽ hã te te ãma siwi saprĩ da.
8 Niꞌwa hã, duré niwamhã wa norĩ hã, duré niwamhã hâiwa hawi romhuriꞌwa hã, te te aima ꞌmairowasuꞌu aba wamhã, rowasuꞌu aimawi na, wa te aima ꞌre irowasuꞌu zaꞌra waꞌaba mono nhiti, ta hã niꞌwai ma ꞌRe ihâimana uꞌâsi mono hã iwasédé te te tãma ipisutu da si, iwẽ hã.
9 E marĩ wa, wa tô aima rowasuꞌu pari zaꞌra waꞌaba ni, wa za duré ãma sahu zaꞌra ni, ãne: Niꞌwa hã rowasuꞌu aimawi na te te aima rowasuꞌu zaꞌra waꞌaba wamhã, rowasuꞌuwẽ isaze zaꞌra waꞌaba upana, taha ma ꞌRe ihâimana uꞌâsi mono iwasédé hã te te tãma ipisutu da si, iwẽ hã.
10 E te ĩsima sô ꞌre robꞌruiwapari mono bâ, da te dasiwi ꞌre iwẽ sãmri mono da hã. Mare di. Te ĩsima ꞌre iwẽ mono hã, ꞌRe ihâimana uꞌâsi mono si te te iwẽ sãmri da. E ã hã na hã, te oto ĩsima wẽ bâ bété, te dama arowẽ da hã, ĩhâimana zém na. Te ĩsima wẽ ꞌwaꞌâ hã, wa hã aré Cristuhu ma romhuriꞌwai õ di.
11 Ĩsisãnawã norĩ, tô sena wa za aima waihuꞌu zaꞌra waꞌwa, Rowasuꞌuwẽ ité te ꞌre iwasuꞌu mono hã, tiꞌai ãma aꞌuwẽ norĩ nhimiropoto õ di.
12 Niꞌwai ãma te waihuꞌu õ di, duré niꞌwa hã ãma ĩma sisanho õ di. Tazahã, Zezu Cristu siꞌuihâ na ma tô ĩma hâiꞌré.
Pauluhu zô, ꞌRe ihâimana uꞌâsi mono hã ma tô hâ
13 1:13-14 Ma tô ꞌre iwapari zaꞌra waꞌaba mo, ꞌre ĩhâimana mono ꞌrata zé wasuꞌu hã, duré Zudeu norĩ nhimizaze zarina ꞌre ĩhâimana mono zé hã. Wa tô te tãma ꞌre arobꞌmanharĩ wasété ꞌRe ihâimana uꞌâsi mono zazeiꞌwa norĩ ma hã, duré wa tô te aré ĩsima ꞌre wẽ, te ꞌre aꞌuprosi mono da hã. ꞌRe ĩhâimana mono ré hã, ã hã danhimizaze na hã, ĩsiré ãma iwahum norĩ wana, wa romhâ na ꞌre ĩhâimana, duré isipai u zaꞌra wa tô sena uptabi ãma ꞌre ĩhâimana wahiꞌrata norĩ hâimana zém na hã.
14 ꞌMadâꞌâ 1:13
15 1:15-16 Tane nherẽ, ꞌRe ihâimana uꞌâsi mono hã tinhimizawizé ma na ma tô ĩpisutu, ĩpoto wana ré ma tô sima ĩpisutu, ma tô ĩzô hâ te tãma ꞌre romhuri mono da. Duré te te sima rowairébé wamhã, Tiꞌra te te ĩma hâiꞌré da hã, te ꞌre wasuꞌu mono da Zudeuꞌõ norĩ ma Rowasuꞌuwẽ ité hã iwasuꞌu hã, niꞌwa sô ĩrĩtĩ õ di, te te ĩpawaptob da hã.
16 ꞌMadâꞌâ 1:15
17 Duré ĩmorĩ õ di, Zeruzalẽ u hã, te sadanharĩ zaꞌra da, ĩwana ré Cristuhu zadawa wasuꞌuꞌwa norĩ hã. Tazahã, wa tô mo Arabia na tiꞌa nhisi u, duré taha pari wa tô mo Damascu na ꞌri nhoꞌõmo nhisi u.
18 Siꞌubdatõ wahu parimhã, wa tô oto mo Zeruzalẽ u, Pedru hã te te ĩpawaptob da. Tamemhã maparane romhuri na wa tô nhamra.
19 Tawamhã isiré Cristuhu zadawa wasuꞌuꞌwa norĩ hã, te ꞌmazadawa pibui õ di, Tiaguhu si wa tô sõpẽtẽ, Wanhibꞌapito sisãnawã hã.
20 Tô sena wa ãma aima robꞌuiꞌéré zaꞌra waꞌwa ꞌRe ihâimana uꞌâsi mono nhoꞌa, ĩzadawa nhipese na te ãma aima robꞌuiꞌéré zaꞌra waꞌaba õ di.
21 Taha parimhã, wa tô oto mo Siria na tiꞌa nhisi u, duré Silisia na tiꞌa nhisi u zama.
22 Zudéa na danhiptiꞌa nhoꞌõmo nhisi ãma hã, Cristuhu zazeiꞌwa norĩ hã te te siwi ĩhâiba pibui õ di niwa.
23 Ãne si, ma tô ĩwasuꞌu hã te te ꞌre wapari zaꞌra: “Te te wama ꞌre iꞌarobꞌmanharĩ wasété mono hã, te te oto ꞌre wasuꞌu Wanhibꞌapito te te isaze zé hã, te te uprosi da te te aré sima ꞌre iwẽ mono hã.”
24 Tahawa, te ꞌRe ihâimana uꞌâsi mono ãma ꞌre wata zaꞌra, ĩwasuꞌu te te ꞌre wapari zaꞌra mono wa.
