Galata 2:1-21
2 Tawamhã 14 na wahu pari, wa tô apâ ĩsina siri Zeruzalẽ u hã, wa tô ĩsiré saprõni zahuré Barnabé norĩ Tituhu me.
2 Tamomomhã, wa tô apâ ĩsina siri ꞌRe ihâimana uꞌâsi mono te te ĩma hâiꞌré wa, ãne hã te ꞌmanharĩ da. Tamemhã, isazeiꞌwa norĩ ꞌmadâꞌâꞌwa norĩ me hâiba pisutu wasiꞌrãꞌõtõ wamhã, wa tô ãma tãma rowasuꞌu zaꞌra Rowasuꞌuwẽ ité te ꞌre iwasuꞌu mono na Zudeuꞌõ norĩ ma. Te ĩsima wẽ õ di, romhuri te iꞌmanharĩ hã, duré te ꞌre iꞌmanharĩ mono hã taré hâimana tõ da hã.
3 Titu hã, ma tô ĩsiré tihâiba. Tane nherẽ sisihâiwata nhizâri da hã, te te tãma ꞌru zahi zaꞌra õ di, Gregu na ꞌre hâimana mono nherẽ.
4 E marĩ wa, niꞌwam norĩ hã, ma tô wasiré tihâimana zaꞌra, wasiré isazeiꞌwa newa, duré ma tô aré sima wẽ zaꞌra sisihâiwata nhihâri zaꞌra da hã. Ta hã, niꞌwam norĩ hã, ma tô asisi wapsãiꞌaꞌwa ne, te te wawi waihuꞌu zaꞌra da, wasima iwẽ na wahâimana wẽ na ꞌre iwahâimana zaꞌra mono zé hã Cristu Zezusihi ãma. Te te sima ꞌre wẽ zaꞌra mono wa apâ ꞌre wahâimana zaꞌra mono da, roti zahi hã wa te ꞌre ꞌmadâꞌâ pese zaꞌra mono sina.
5 Tane nherẽ, ta norĩ suru pese na hã, wa te ãma saze zaꞌra õ di, Rowasuꞌuwẽ ité hã, aima ꞌre hâimana uꞌâsi zaꞌra waꞌaba mono da.
6 Isazeiꞌwa norĩ ꞌmadâꞌâꞌwa newa, ꞌre ihâimana zaꞌra mono hã. Wa wasuꞌu zaꞌra ãne, e marĩ wa, ĩma hã marĩ dai õ di, ꞌre ihâimana zaꞌra mono zé hã, e marĩ wa, ꞌRe ihâimana uꞌâsi mono hã te te daꞌãma ꞌre arowairébé mono õ wa dahâiba mana wa wim na. Wa za ãma sahu apâ ãne, isazeiꞌwa norĩ ꞌmadâꞌâꞌwa newa, ꞌre ihâimana zaꞌra mono hã, ta norĩ hã rosaꞌrada ité hã te te ĩma sõmri zaꞌra õ di.
7 Tazahã, ma tô ꞌmadâꞌâ waihuꞌu zaꞌra ꞌRe ihâimana uꞌâsi mono te te ĩpisutu na hã Rowasuꞌuwẽ ité te ꞌre ꞌmahârâ mono da, isihâiwata nhihâri õ norĩ ma, Pedru hã isihâiwata nhihâri ré norĩ ma te te ꞌre irobꞌmahârâ mono ne.
8 E marĩ wa, ꞌRe ihâimana uꞌâsi mono tiwaihuꞌu pese uptabi na, ma tô ĩpisutu Rowasuꞌuwẽ ité hã, te re wasuꞌu mono da Zudeuꞌõ norĩ ma, Pedru hã te te ipisutu ne, Rowasuꞌuwẽ ité hã, te te ꞌre wasuꞌu mono da, Zudeu norĩ ma.
9 Tiagu hã, duré Pedru duré Zuwãhã zama, isazeiꞌwa norĩ ꞌmadâꞌâꞌwa na da te ꞌre iꞌmadâꞌâ zaꞌra mono norĩ hã, ma tô waihuꞌu zaꞌra ꞌRe ihâimana uꞌâsi mono ãhã romhuri iwẽ uptabi aimawi hã te te ĩma isõmri na hã. Tahawa, ma tô ĩzawi zaꞌra sibꞌrata tete na, ma tô duré ĩma sõmri zaꞌra Barnabéhé zama, da te waihuꞌu zaꞌra da, wa te wasiré ꞌre iromhuri zaꞌra mono na. Ãne wa, wa tô waihuꞌu zaꞌra ni, wa norĩ hã Zudeuꞌõ norĩ ma, za wa te ꞌre irowasuꞌu zaꞌra mono na na hã, duré õ norĩ hã, Zudeu norĩ u.
10 Ãne si, ma tô misi marĩ hã wawi waptẽrẽ zaꞌra: Ãma ꞌre wapoꞌre puꞌu zaꞌra mono da, Wanhibꞌapito zazeiꞌwa norĩ isibrob õ norĩ ãma. Tahawa ta hã te ꞌre ꞌmanharĩ mono da si, wasa da ꞌre ĩnhiptete.
Paulu hã, Pedruhu ma te te ipẽtẽ zé
11 2:11-12 Tane nherẽ, Pedru hã Ãtioquia u wei wisi wamhã, danhoꞌa wa tô sada ĩhâiba, te te ãma upai uptabi wa. Ãne ma tô tiromhâiba: Aibâ norĩ, Tiagu te te ãma isatõrĩ zaꞌra, ãma sihutu wana ré hã, Pedru hã ma tô nasi aré tisa duré isiré zaꞌra ma tô nasi aré tihâiba Zudeuꞌõ norĩ siré. Tane nherẽ aibâ norĩ oto ãma sihutu wamhã, ma tô tiwi aiꞌré zaꞌra, ma tô duré tiwi sina tipahâ zaꞌra Zudeuꞌõ norĩ wi. Ãne hã ma tô ꞌmanha, Zudeu norĩ ma pahi wa, ta norĩ hã te te sima ꞌre wẽ zaꞌra mono wa, Zudeuꞌõ norĩ hã uburé ꞌre sisihâiwata nhihâri zaꞌra mono da.
12 ꞌMadâꞌâ 2:11
13 Tane duré wasisãnawã norĩ Zudeu norĩ hã, ma tô hâimana siꞌahâ na ꞌre ihâimana zaꞌra mono ne tihâimana zaꞌra Pedruhu ne. Tawamhã Barnabéhé zama ma tô ãma sasõmri zaꞌra.
14 Tawamhã te ꞌmadâꞌâ zaꞌra wamhã, tô sena ꞌRe ihâimana uꞌâsi mono nhimiroti ꞌre ihâimana mono zarina ihâimana zaꞌra õ na, wa tô Pedruhu ma tinha, danhoꞌa, ãne: “A hã Zudeu. Tane nherẽ aihâimana mono õ di Zudeuꞌõ norĩ hâimana zém na duré Zudeu norĩ hâimana zém na zama. Tahawa, e niha te za tãma iꞌru zahi zaꞌra Zudeuꞌõ norĩ hã, Zudeu norĩ hâimana zém na ꞌre hâimana zaꞌra mono da hã.”
15 Wa norĩ hã, Zudeu na wa ꞌre wahâimana zaꞌra wapoto hawim haré, mare di, Zudeuꞌõ norĩ siwaꞌru tiwasédé te te ꞌre iꞌmanharĩ zaꞌra mono ne hã.
16 Tane nherẽ, wama waihuꞌu pese zaꞌra di, ꞌRe ihâimana uꞌâsi mono te te ꞌre idaꞌawẽ sãmri mono na hã Zezu Cristu hã da te dasina ꞌre iꞌumnhasi zaꞌra mono zéb zarina, mare di, ꞌRe ihâimana uꞌâsi mono nhimiroti zahi na Mozésihi te te ãma irobꞌuiꞌéré zé da te ꞌre iꞌmadâꞌâ pese zaꞌra mono zarina hã. Tane duré wa norĩ hã, Cristu Zezusi hã, wa saze zaꞌra ni ꞌRe ihâimana uꞌâsi mono hã te te ꞌre waꞌawẽ sãmri mono da Cristu hã wa te wasina ꞌre iꞌumnhasi zaꞌra mono zém na, mare di, ꞌRe ihâimana uꞌâsi mono nhimiroti zahi na Mozési te te ãma irobꞌuiꞌéré te te iꞌru wa te ꞌre ꞌmanharĩ zaꞌra mono wẽ te hã. E marĩ wa, ꞌRe ihâimana uꞌâsi mono hã niꞌwa te te wẽ sãmri waihuꞌu õ wa, Mozésihi nhimiꞌuiꞌéré na roti zahi te te iꞌru te te ꞌre ꞌmanharĩ wẽ mono wẽ te.
17 Wasima sô ꞌre wanhopré mono wamhã, ꞌRe ihâimana uꞌâsi mono te te ꞌre waꞌawẽ sãmri mono da Cristuhu ãma ꞌre wahâimana zaꞌra mono wa, ãne wamhã sõꞌawi wa za wa te ꞌre waihuꞌu zaꞌra, wa norĩ zama wa wasété na ꞌre iwanomro mono na hã, Zudeuꞌõ norĩ ne. Ãne wamhã, e wa za wa te ãma ꞌre rosaꞌrata upa zaꞌra Cristu hã, ꞌre wa wasété zaꞌra mono da, te te ꞌre iromhuri mono na hã, mare uptabi di.
18 E marĩ wa, wa aré ãma upai pese, marĩ te irẽme zaꞌra na apâ te ꞌre rowahutu mono wamhã, ta hã te irẽme zaꞌra hã, Mozésihi nhimiꞌuiꞌéré na roti zahi.
19 2:19-20 Ãhã na hã, ꞌre ĩhâimana mono õ di oto ꞌRe ihâimana uꞌâsi mono nhimiroti roti zahi na Mozési te te ãma irobꞌuiꞌéré zéb zarina. Roti zahi hã ma ĩwĩ, wa dârâ tô, ꞌRe ihâimana uꞌâsi mono ma si oto ꞌre ĩhâimana mono da. Cristuhu siré wede poꞌo nhonhiꞌrãmi na wa oto daꞌo ã hã na hã. Tahawa, wa hã oto ꞌre ĩhâimana mono õ di, Cristuhu si te oto ĩwa ꞌre ĩhâimana. Ã hã dahâimana zém na wa oto ꞌre ĩhâimana ã hã na hã, ꞌRe ihâimana uꞌâsi mono ꞌra te ꞌre umnhasi mono sina wa oto ꞌre ĩhâimana, ĩzawi pese ꞌwai ma duré ĩzada isisõmri ma.
20 ꞌMadâꞌâ 2:19
21 Te ĩsiwi wẽꞌõ waihuꞌu õ di ꞌRe ihâimana uꞌâsi mono nhimizawi zé hã. E marĩ wa, ꞌRe ihâimana uꞌâsi mono nhimiroti roti zahi na Mozési te te ãma irobꞌuiꞌéré zéb zarina ꞌre dahâimana zaꞌra mono wẽ te ꞌRe ihâimana uꞌâsi mono te te ꞌre daꞌawẽ sãmri mono ꞌwaꞌâ hã, marĩ dai õ di, aré Cristu idâꞌâ zé hã.
