Zenezi 1:1-31
1 Ropoto naꞌrata hawimhã, ꞌRe ihâimana uꞌâsi mono, hâiwa duré uburé marĩ iwa ꞌre isimasa mono da hã, ma tô simisutu tiꞌai me hã poto zaꞌra.
2 Taha ré hã te niha na tiꞌa hã ꞌre saꞌwari, marĩ iwa ꞌre hâimana mono ãna. Â poré â ꞌrehâ hã te duré isisiwimhã ꞌre saꞌwari. Duré robra si te â poré nhisiwi ꞌre saꞌwari. Taha wamhã te ꞌRe ihâimana uꞌâsi mono Pẽꞌẽzani, â nhisiwimhã ꞌre mo.
3 Tawamhã ꞌRe ihâimana uꞌâsi mono te tinha ãne:
— Maꞌãpé airowaꞌa na.
Tahawa imreme hawi ma tô oto tirowaꞌa naꞌrata.
4 Tawamhã rowaꞌa iwẽ na te te iꞌmadâꞌâzéb zarina, ma tô oto ãma aipoꞌo zahuré, robra me hã.
5 Tahawa rowaꞌa, ma tô sisi, rowaꞌa na. Duré robra, ma tô sisi, mara na. Tawamhã ma tô timara. Duré ma tô oto tiꞌawẽ. Ã hã oto bâdâ isãnaꞌrada.
6 Tawamhã ãne te duré tinha, ꞌRe ihâimana uꞌâsi mono hã:
— Â, maꞌãpé aiwa asima aipoꞌo aba, maparane misi zahuré siꞌuiwa na ꞌre saꞌwari zahuré mono da.
7 Tahawa ꞌRe ihâimana uꞌâsi mono hã ma tô â na ãma aipoꞌo. Ãma isipoꞌo hâiba amo hã ãma isiwãnhizari zahuré ꞌrowimhã te ꞌre saꞌwari. Duré ãma isipoꞌo hâiba amo hã te hâimo ꞌre saꞌwari.
8 Tahawa ta hã ma tô ꞌRe ihâimana uꞌâsi mono hã sisi, hâiwa na. Tawamhã ma tô duré oto timara. Ma tô oto tiꞌawẽ. Ã hã oto duré maparane bâtâ ãma hã.
9 Tawamhã te duré tinha ãne:
— Â hã hâiwa zahâpâ ꞌre isaꞌwari mono hã te za misi haré oto ubumro, tiꞌai ꞌré na oto sihâiꞌré da, tiꞌa hã.
Tahawa ãne hã ma tô oto tiromhâiba.
10 Tawamhã robꞌré ma tô duré sisi, tiꞌa na. Duré â, sitẽme isito simisutu hâimana da hã ma tô sisi, âporé na. Tawamhã ꞌRe ihâimana uꞌâsi mono, te te iꞌapoto mono hã, ma tô iwẽ na hã aꞌmadâꞌâ ze.
11 Tahawa te duré ãne tinha:
— Tiꞌa na te za sipuꞌu pese na rowede norĩ hã oto ꞌre poto zaꞌra, nima norĩ inhama ré mono hã duré nima norĩ iꞌrãi ré mono hã.
Tahawa ãne hã ma tô oto tiromhâiba.
12 Tiꞌai ꞌremhã ma tô marĩ sipuꞌu pese na uburé hã apoto, robꞌre isipotozéb ré hã, duré rowede, ꞌre iꞌrã zaꞌra mono da hã. Tahawa ꞌRe ihâimana uꞌâsi mono, marĩ te te iꞌapoto mono zé, ma tô iwẽ na hã aꞌmadâꞌâ zei pese.
13 Tawamhã ma tô duré timara. Ma tô tiꞌawẽ. Ã hã oto siꞌubdatõ bâtâ ãma hã.
14 Tawamhã ꞌRe ihâimana uꞌâsi mono te duré tinha ãne:
— Hâiwa na te te ꞌre irobꞌuiwẽ zahuré mono da hã wa za oto aimawi pisutu zahuré, ihâiba amo hã bâtâ na da hã duré ihâiba amo mara na da hã, bâdâ hã duré wahu hã duré robꞌré te hã duré tãi pĩni naꞌratazép te hã da te ãma ꞌre iwaihuꞌu zaꞌra mono zéb da hã.
15 Tahawa ta norĩ hã te za hâiwa na te te ꞌre robꞌuiwẽ zahuré, te te ꞌre rowaꞌa zahuré mono da, tiꞌai ãma.
Tahawa ãne hã ma tô oto tiromhâiba.
16 ꞌRe ihâimana uꞌâsi mono, maparane ma tô isaꞌẽtẽ norĩ hã poto zahuré, isaꞌẽne hã bâtâ na te te ꞌre irobꞌuiwẽ mono da hã, duré isaꞌẽtẽ prã hã barana te te ꞌre ĩrobꞌuiwẽ mono da hã. Tawamhã wasi norĩ zama ma tô te te apoto.
17 Ã norĩ hã tiꞌai ãma te te ꞌre rowaꞌa zaꞌra mono da hã ma tô hâiwa na azaꞌra, ꞌRe ihâimana uꞌâsi mono hã,
18 bâtâ na mara na zama te te ꞌre robꞌuiwẽ zaꞌra mono da, duré rowaꞌa robra me hã ãma siwãnhizari zahuré da hã. Tahawa ꞌRe ihâimana uꞌâsi mono te te iꞌapoto mono zé hã ma tô iwẽ na hã aꞌmadâꞌâ ze.
19 Tawamhã ma tô duré oto timara. Ma tô oto tiꞌawẽ. Ã hã oto duré maparane siꞌuiwa na bâtâ ãma hã.
20 Taha pari ꞌRe ihâimana uꞌâsi mono te duré tinha ãne:
— Â ꞌrowi sipuꞌu pese na te za ihâiba ré norĩ hã ahâ na te te sina ꞌre ânhitob zaꞌra. Duré tiꞌa nhisiwi te za hâiwi, si norĩ hã ꞌre sisaꞌrei mono.
21 Ãne ma tô ꞌRe ihâimana uꞌâsi mono, â ꞌrowi ꞌre inomro mono da hã te te apoto, hâiba ré isaꞌẽtẽ norĩ hã, uburé sipuꞌu pese na hâiba ré â ꞌrowi ahâ uptabi na ꞌre inomro mono da hã. Duré uburé si norĩ zama ma tô ipoto mono bâ te te apoto. Tahawa ꞌRe ihâimana uꞌâsi mono, tinhimipodo ma tô iwẽ na hã aꞌmadâꞌâ ze.
22 Tawamhã ꞌRe ihâimana uꞌâsi mono, tinhimipoto ma, iwẽ hã te te tãma pisutu zaꞌra sina, te ãne tãma nharĩ zaꞌra:
— Maꞌãpé atébré aba, â ꞌrowi asina aihâꞌâ aba da. Duré si norĩ zama, atébré aba, tiꞌai ãma.
23 Tawamhã ma tô duré timara. Ma tô tiꞌawẽ. Ã hã oto imrotõ bâtâ ãma hã.
24 Tawamhã te duré tinha ãne:
— Tiꞌai ꞌremhã te za oto abaze norĩ, da te ꞌre itébré zaꞌra mono hã, duré rom na ꞌre ihâimana zaꞌra mono hã, duré diꞌi na ꞌre inomro mono hã sina ꞌre hâꞌâ, ipoto mono bâ.
Tahawa ãne ma tô tiromhâiba.
25 Tawamhã ꞌRe ihâimana uꞌâsi mono ma tô abaze norĩ hã uburé te te apoto, ipoto mono bâ, da te ꞌre itébré zaꞌra mono da hã, duré rom na ꞌre ihâimana zaꞌra mono da hã, duré diꞌi na ꞌre inomro mono zama. Tahawa ꞌRe ihâimana uꞌâsi mono, tinhimipodo ma tô duré iwẽ na hã aꞌmadâꞌâ ze.
26 Tawamhã te duré tinha ãne:
— Ãhã na, wasine ꞌre ihâimana zaꞌra mono da hã aꞌuwẽ wa te oto poto zaꞌra na. Tawamhã ta norĩ hã te za â ꞌrowi tebe ꞌre inomro mono norĩ ma, siptete na hã ꞌre hâimana zaꞌra, duré si norĩ ma hã, duré abaze da te ꞌre itébré zaꞌra mono norĩ ma hã, duré rom na ꞌre ihâimana zaꞌra mono norĩ ma hã, duré diꞌi na ꞌre inomro mono norĩ ma hã.
27 Ãne ma tô ꞌRe ihâimana uꞌâsi mono, aꞌuwẽ hã poto naꞌrata zaꞌra. Isine ꞌre ihâimana zaꞌra mono da hã ma tô te te apoto, aibâ duré piꞌõ.
28 Tahawa iwẽ hã te te tãma pisutu zaꞌra sina, te duré ãne tãma nharĩ zaꞌra:
— Te za atébré aba mo, asina aihâꞌâ aba da hã. Uburé te za duré tiꞌa hã asina isito waꞌwa, asiptete na asiwi ꞌre ꞌmadâꞌâ aba mono da hã. Tawamhã duré â ꞌrowi tepe ma, te za asiptete na tãma ꞌre aihâimana zaꞌra waꞌaba mo, duré si hâiwi ꞌre isisaꞌrei mono ma, duré uburé abaze norĩ, tiꞌai baba ꞌre inomro mono norĩ ma hã.
29 Duré asazéb zaꞌra waꞌaba da, uburé wa za robꞌre inhama ré hã, duré rowede iꞌrãi ré hã aima pisutu zaꞌra waꞌwa.
30 Wa za duré abaze norĩ ma, si norĩ ma, duré diꞌi na ꞌre inomro mono norĩ ma, du hã duré robꞌrã norĩ hã uburé tãma pisutu zaꞌra, ãma ꞌre isaihuri mono zéb da hã.
Tahawa ãne ma tô tiromhâiba.
31 Tawamhã ꞌRe ihâimana uꞌâsi mono, uburé marĩ te te duré iꞌapoto mono hã ma tô iwẽ na hã aꞌmadâꞌâ ze. Tawamhã ma tô duré timara. Ma tô tiꞌawẽ. Ã hã oto 6 na bâtâ ãma hã.
