Zenezi 14:1-24
14 Taha wahub ꞌremhã, te Anrafe na isisi, Sina na romnhisi ãma apito na ꞌre hâimana. Arioqui, Elasa na romnhisi ãma apito na te ꞌre hâimana. Quedorlaome, Elã na romnhisi ãma te apito na hã ꞌre hâimana. Duré Tidau, te Goꞌĩ na romnhisi ãma apito na hã ꞌre hâimana.
2 Tawamhã ã norĩ maparane siꞌuiwa na apito, ma tô ãne ꞌri nhoꞌõmo nhisi norĩ ãma apito norĩ te te ꞌre ꞌwapé zaꞌra: Bera Sodoma ãma, Birsa Gomora ãmamhã, Sinabe Adma ãmamhã, duré Semebe Zeboꞌĩ ãmamhã. Bela na ꞌri nhoꞌõmo nhisi ãma zama ma to apito te te siwi ꞌre ꞌwapé. (ꞌRi nhoꞌõmo nhisi amo hã Zoa na.)
3 Tawamhã ã hã 5 na apito norĩ, ma tô tite dasiꞌwapéi ꞌmanharĩꞌwa norĩ hã ꞌrãꞌõtõ zaꞌra, romharé Sidĩ na isisi ãma, Â warĩrĩ na puꞌu nhisi ꞌre ihâimana mono ãma.
4 Ta norĩ hã ma tô aré 12 na wahub ꞌremhã apito Quedorlaome nhimiꞌmadâꞌâ zahi na ꞌre hâimana zaꞌra. Tane nherẽ, ta norĩ 13 na wahub ãma hã ma tô ihawi iwairébé da hã sada tihâimana zaꞌra oto.
5 Tawamhã duré Quedorlaome, tisiré apito na ꞌre ihâimana zaꞌra mono norĩ me ma tô 14 wahub ãma ãne aꞌuwẽ wamri norĩ ãma hã aiꞌuté zaꞌra: Refaꞌĩ norĩ Asterote-Carnaꞌĩ ãmamhã, zuzĩ norĩ Hã ãmamhã, duré emi norĩ Savé-Quiriataĩ ãmamhã.
6 Duré horeu norĩ zarina Seꞌi na ẽtẽ nhisi ꞌre ihâimana mono hawi, El-Parã na romnhisi ꞌre ihâimana mono u, rop si ꞌre irosaꞌwari mono nhanaꞌrata u isarina siꞌabaꞌréi wamhã, ma tô ta norĩ ãmab zama duré aiꞌuté zaꞌra.
7 Taha parimhã En-Mispate na romnhisi u ma tô apâ aiꞌabaꞌré, tô Cadi na isisi amoi u. Tahawa, ma tô amalequita norĩ nhiptiꞌai ãma hã, duré amoreu norĩ Hazazã-Tama na ꞌri waꞌõtõ nhisi ãma ꞌre ihâimana zaꞌra mono norĩ ãma aiꞌuté zaꞌra.
8 Tahawa, Sodoma ãma apito, Gomora ãma apito, Adma ãma apito, Zeboꞌĩ ãma apito, duré Bela ãma apito, ma tô ta norĩ hã tite dasiꞌwapéi ꞌmanharĩꞌwa norĩ ré hã wairé, Sidĩ na romharé nhisi u tame te te ꞌwapé zaꞌra da hã,
9 Elã ãma apito hã, Goꞌĩ ãma apito hã, Sina ãma apito hã, duré Elasa ãma apito hã. Tawamhã 4 na apito norĩ hã te za 5 na apito me hã sisada tihâimana zaꞌra.
10 Tawamhã Sidĩ na romharé nhisi ãma te abꞌre, wedewaꞌu tob ré hã ahâ na ꞌre hâimana zaꞌra. Tawamhã Sodoma ãma apito, Gomora ãma apito me dasiꞌwapéi wi simaꞌuri pibu zahuré da sisamroi wamhã, ma tô nima norĩ ite dasiꞌwapéi ꞌmanharĩꞌwa hã abꞌre ꞌremhã nasi titobro zaꞌra. Tahawa, nima norĩ si ma tô dawi aimani zaꞌra, ẽne ꞌre ihâimana zaꞌra mono u hã.
11 Tawamhã maparane siꞌuiwa na apito norĩ hã ma tô uburé Sodoma ãma duré Gomora ãma dasa norĩ hã siwi waibu zaꞌra, uburé marĩ iwaꞌâbâ zaꞌẽtẽ me. Taha pari ma tô oto iré aiꞌabaꞌré.
12 Lo, Abrãhã ꞌra wapté Sodoma ãma ma tô ꞌre hâimana. Tahawa taha zama ma tô duré daꞌuꞌâbâmhã dasiwi saprõni ni. Duré uburé isimarĩ, tãma ꞌre ihâimana zaꞌra mono zama, ma tô dasiwi ꞌwasari ni.
13 Tane nherẽ, ma tô aibâ misi dawi aimani. Tawamhã ta hã ma tô mo, uburé marĩ ihâimanazé Ebreu Abrãhã ma, te te tãma rowasuꞌu da. Abrã hã te rowede iwazéb zahi ꞌrata ꞌre hâimana, amoreu norĩ siré Mare te rowede ꞌrata. Tawamhã Mare norĩ hã te tisisãnawã Escol me Aner norĩ me hã Abrãhã niwĩmhã ꞌre hâimana zaꞌra.
14 Tawamhã Abrã, iꞌra wapté da te dasiwi âri wa, da te dasiwi isaprõnizé te te waihuꞌu wamhã, ma tô tite aibâ norĩ dasiꞌwapé na ãma ꞌre isisanho zaꞌra mono hã sima ꞌrãꞌõtõ, uburé isõrõwa mono bâ ꞌre ipoto zaꞌra mono norĩ hã. Uburé ta norĩ hâiba zaꞌra hã 318 na. Tawamhã Abrã, maparane siꞌuiwa na apito norĩ zarina ma tô isiré zaꞌra mo, ꞌrinhoꞌu Dã na isisi u hã.
15 Tawamhã tame tite aibâ norĩ na maparane iwaꞌõtõ na hã ma tô ãma aipoꞌo. Tawamhã tinhitobꞌru norĩ, barana te te sima sahui wamhã, ma tô ãma aiꞌuté zaꞌra. Te duré isarina hã timorĩ zaꞌra, Damascu nhipai ãma hâiwa nhimire niwĩ, Hoba na ꞌri nhoꞌõmo nhisi ꞌre ihâimana mono u.
16 Tahawa, isitobꞌru norĩ, marĩ te te aré tiwi iꞌwasari hã ma tô Abrã hã uburé apâ tiwi waibu zaꞌra, te te apâ ꞌwasari da. Tawamhã tizamarĩꞌwai ꞌra Loho zama ma tô apâ saprõ. Duré isimarĩ zama hã ma tô apâ tidu. Piꞌõ norĩ zama ma tô duré apâ te te tãma simro. Duré isibꞌaꞌuwẽ tãma isiꞌmairẽme norĩ zama ma tô te te tãma simro apâ.
Mequizédéqui, Abrãhã ma, iwẽ hã te te tãma ipisutuzé wasuꞌu
17 Tawamhã Quedorlaome ãma, duré isiré norĩ apito ãma te te aiꞌuté zaꞌra pari, Abrã apâ tinhorõwa u te te sina siri wa, ma tô Sodoma ãma apito hã itẽme mo, ꞌrâwi te te sõpẽtẽ da, romharé Savé na isisi ãma, isisi amo hã romharé Danhibꞌapito na iwamri ãma.
18 Tawamhã Mequizédéqui, Salẽ* na ꞌri nhoꞌõmo nhisi ãma apito, duré Danhipai u pese ꞌRe ihâimana uꞌâsi mono te, sasedoti na ꞌre ihâimana mono hã ma tô iꞌuꞌẽtẽ wapu norĩ, uva ꞌrãi waꞌu isé me hã tãma mrami zahuré.
19 Tawamhã Mequizédéqui, Abrãhã ma, iwẽ te te tãma pisutu sina, ma tô ãne tãma tinha:“Abrã, ꞌRe ihâimana uꞌâsi mono, danhipai u ꞌre ihâimana mono,hâiwa ꞌmanhariꞌwa hã, duré tiꞌai ꞌmanharĩꞌwa hãiwẽ si te te aima ꞌre pisutu mono da, wa tiwi te ꞌre waptẽrẽ.
20 Duré ꞌRe ihâimana uꞌâsi mono danhipai u ꞌre ihâimana mono,asitobꞌru norĩ asibꞌrata te te aima isõmri zaꞌra ãma si ꞌre wawata zaꞌra aba mono!”
Tawamhã Abrã, uburé marĩ na apâ te te ãma isiri zaꞌra hã 10 na ihâimana zaꞌra te te ipo hã misi ma tô tãma waze, Mequizédéquihi ma, te te tãma sõmri da.
21 Tawamhã taha pari Sodoma ãma apito, te Abrãhã ma hã tãma tinha ãne:
— Marĩ hã aima hâimana zaꞌra. Aꞌuwẽ norĩ si te za apâ ĩma isõmri zaꞌra.
22 Tane nherẽ, Abrã ma te ãne asa ãma tãma waꞌrã:
— Uburé Danhibꞌapito, danhipai u ꞌre ihâimana mono, hâiwa ꞌmanharĩꞌwa, duré tiꞌai ꞌmanharĩꞌwa, taha nhoꞌa wa za ĩnhibꞌrada hã hâimo wẽ,
23 asimarĩ hã za ĩma ihâimana zaꞌra õ na te tãma ropisutu da hã, niha wamhã, abazi isidi surure na, niha wamhã duré daparaꞌuza wasisizém na hã. Ãhã wamhã, a hã niwamhã ãne na inharĩ da hã mare di za: “Tãma ĩnhimiꞌmanharĩ wẽ zéb zarina ma tô Abrã hã sisimarĩ pese.”
24 Marĩ ĩma ihâimana da hã te ĩsima wẽ õ di. Ĩnhibꞌaꞌuwẽ norĩ tisa te te ãma ihuri si te za ĩma tiꞌmaihâiba za. Tane nherẽ, te za ĩsiré norĩ ma si marĩ hã ite mono bâ tãma tihâimana zaꞌra, ã norĩ ma, Aner, Escol, duré Mare.
Ĩwaꞌõtõ piꞌreba watsuꞌu mono
^ 14:18 Salẽ nhisi amo hã Zeruzalẽ na.
