Provébiu 7:1-27
7 Ĩꞌra, marĩ na te aima inharĩ mono zém na hã, aima ĩnhimirotizé mono na hã niwamhã ãma aipoꞌre siꞌâri tõ.
2 Ĩmreme hã ꞌre wapari pese mono. Tawamhã te za ꞌre aihâimana uꞌâsi mo. Duré maꞌãpé aima ĩnhimirotizé hã ꞌre ꞌmadâꞌâ pese mono, ato hã marĩ wi ꞌre iꞌmadâꞌâ pese mono ne.
3 Maꞌãpé aima ĩnhimirotizé hã aipẽꞌẽ na asima ꞌre tété uꞌâsi mono, marĩ hã danhibꞌratap si da te ꞌre iꞌwasari mono ne, tãma danhimirẽme ãna.
4 Maꞌãpé aihidiba ne rowaihu iwẽ hã ꞌre ꞌmadâꞌâ pese mono. Asimizaꞌrese wẽ hã duré ꞌre ꞌmadâꞌâ pese mono, asiwaihu iwẽ uptabi ne.
5 Ta norĩ hã te za piꞌõ iwasété wi hã, duré imreme wazidi wi hã isiti aiꞌãma ꞌre pahâ, romhâ na.
Wasété na piꞌõ ꞌre ihâimana mono wasuꞌu
6 Nimahã na ĩnhorõwa zanela ꞌri zadazâri hawi te robꞌmadâꞌâ wamhã,
7 wa tô siwazari ipréduptém norĩ simirosaꞌrata waihuꞌu prã na ꞌre ihâimana zaꞌra mono norĩ hã ꞌmadâꞌâ zaꞌra. Ta norĩ ꞌremhã te isimizaꞌreseꞌõ hã tiꞌmaihâiba dawazari.
8 Ã hã aibâ iprédupté te ꞌri nhiꞌriti na hã mo, ꞌri nhiꞌriti wẽꞌẽzéb ꞌrata, piꞌõ hã ꞌre ihâimana mono zéb uwaibaba. Piꞌõ nhorõwa ꞌrata ma tô ꞌrâwi roꞌrazâ,
9 robzaꞌrã wi, irobra pese zéb u hã.
10 Tawamhã piꞌõ hã simirosaꞌrata nhipese na ma tô sô watobro, te te sõpẽtẽ da hã, piꞌõ siwaꞌâbâ zô ꞌre isisõmri mono, ꞌre isiꞌuza zaꞌra mono zéb ré.
11 Ta hã marĩ na tãma rowazéb ãna mreme ꞌrãihâ na si ꞌre ihâimana mono, duré õne uꞌâ te te sina ꞌre idaꞌaꞌrãiwaꞌro zani mono, duré hâiwi si ꞌri nhiꞌriti na ꞌre ine mono.
12 Ta hã te nimahã ꞌri nhiꞌriti wẽꞌẽzéb ãma aibâ zô simipari sina ꞌre simasisi, ꞌri nhiꞌriti ãma, niha wamhã, duré ꞌre idasisõpẽtẽ pese zaꞌra mono zéb ãma, te te sima ꞌmaipaꞌâri da hã.
13 Tawamhã piꞌõ, aibâ tinhoꞌutu te te oto âri wamhã, ma tô õne haré tobꞌrata hârâ. Tãma rowazéb ãna itõmo u te te ꞌmadâꞌâ sina, te ãne tãma tinha:
14 — Ĩnhorõwa ãma te romnhi hã tihâiba, ã bâtâ na hã ꞌRe ihâimana uꞌâsi mono ma, te iropisutuzé te tãma ãma iꞌuwaimramizéb da hã, danhoprubzé ãma dama ꞌre irowẽ zaꞌẽtẽ zaꞌra mono zé hã.
15 Tahawa, asô ĩrĩtĩ mono da hã wa tô wei watobro, te ĩsima wẽ wa, te iꞌasõpẽtẽ da hã. Tane nherẽ, te ãme aihâiba!
16 Ĩnhimiwaptâ, iꞌubuzé ihâpré warõ na hã wa tô ubu, Ezitu hawim na.
17 Wa tô waptâ hã ꞌmaꞌwama sadaze da, wedewati isadaze na, duré wedehâ ꞌwaꞌri isadaze na hã.
18 We oto ĩsiré aimorĩ, mara wahuré na wasiré wazaꞌwari hâ. Ãne wa, duré wasihâiba na wa te wasima rowẽ hâ.
19 Ĩmro ꞌri na hã hâimana õ di. Romhâ na ma tô mo.
20 Robꞌuiprazé hã saꞌẽtẽ na ma tô siré tiꞌâ. Aꞌamo ãma sapoto õ ré, we apâ hã wisi õ di za.
21 Ãne, piꞌõ timreme wazidi hâire na te te pibui wamhã, ma tô oto siꞌra.
22 Tawamhã siꞌabaꞌré na ma tô oto isarina mo, powawẽ ipãrĩzéb u da te ꞌre isimroi mono ne, duré pozé wedenhorõ nhihâꞌre uwaibaba ꞌre sisaꞌrei mono wa, ãma ꞌre isiwaibui mono ne.
23 Tãma isimimnha hã te te sina waihuꞌu ãna, te isarina mo, ti hã saꞌrese ãna inomo wi te te isiptâꞌâ ne, duré si hã imramizéb u ꞌre isisaꞌrei mono ne hã.
24 Tahawa, ĩꞌra, te za ĩwapari pe! Aipoꞌre pese na ĩwapari, za te aima inharĩzém na hã.
25 Ãne piꞌõi ma, aihâiba hã ꞌre saꞌréi mono tõ. Duré isarina hã ꞌre aimorĩ tõ.
26 E marĩ wa. Ta hã ma tô aibâ ahâ na te te ꞌre awamnarĩ. Ahâ uptabi na ma tô duré te te ꞌre aꞌuprosi.
27 Isõrõwa u ꞌre ane mono wamhã, te za bâdâdi ꞌre idadâꞌâ zaꞌra mono zép te u hã ꞌre aimo, bâdâdi ãma idahâimana huture u hã.
