Apocalipsi 10:1-11
10 Tawamhã wa tô duré ꞌmadâ, hâiwa ãma ꞌRe ihâimana uꞌâsi mono ma romhuriꞌwa aimawi hã isimiwadaꞌuri pire hã. Hâiwa hawi ma we siꞌra, hâiwaꞌa na ubu ré. Tãiwaipore te duré iꞌrã nhisiwimhã za. Duré iꞌubu hã aiwa bâtâ roꞌo ne. Duré unhama roꞌo nhoto pa ne, iza hã.
2 Tawamhã ibaihâ nhinha isurure te sõzi haré ꞌre tiꞌâ, tinhibꞌrata. Tawamhã â poré nhisiwi ma tô tipara nhimire niwĩmhã tipara hã tisã. Tiꞌa nhisiwi ma tô duré tipara nhimiꞌe niwĩmhã tipara hã tisã.
3 Tawamhã mreme ꞌrãihâ na te hâ. Huꞌu zérépa wairõ ꞌrãihâ ne, ihârâ hã. Hârâ wamhã, awaꞌawi ma tô tãiwapsa hã tiwapsaꞌa zaꞌra, wapsaꞌa ꞌrãihâ na. 7 na iwapsaꞌa zaꞌra hã.
4 Wapsaꞌa zaꞌra wamhã, damreme ne hã wa tô wapa. Tahawa, wa tô imreme zaꞌra hã te iwapari na aré robꞌuiꞌéré. Tane nherẽ, te niꞌwa hã hâiwa hawimhã ĩma tinha, te robꞌuiꞌéré tõ da. Ãne te ĩma tinha:
— Tôꞌã. Robꞌuiꞌéré tõ. Taré asiꞌrepsi asima si hã waihuꞌu, tãiwapsaꞌa norĩ mreme hã.
5 Tawamhã hâiwa ãma romhuriꞌwa hã â nhisiwi isa hã tiꞌa nhisiwib zama isa hã te iꞌmadâ hã ta hã ma tô hâiwa nhoꞌõmo tinhibꞌrada hã wẽ, tinhimire niwĩ hã.
6 10:6-7 Tawamhã simiwẽ sina, ma tô waihuꞌu:
— ꞌRe ihâimana uꞌâsi mono hã za te te irobꞌmanharĩzéb da hã sô rowaptâꞌâ õ di za oto. Tawamhã 7 ãma hâiwa ãma romhuriꞌwa hã tinhimnhihârâzém na simnhihârâ wamhã, te za ꞌRe ihâimana uꞌâsi mono hã ãma uwaimra, duréihã te te daꞌãma sima iropisutuzé hã dama iwaihuꞌuꞌõ hã. Duréihã tizadawa ꞌmahârâꞌwa norĩ ma, te te iropisutuzém na te za oto dama robꞌmanha. Ãne, wa tô sena na awaihuꞌu, ꞌRe ihâimana uꞌâsi mono nhoꞌa, isimiropisutuzém na zama. — Ãne ma tô ꞌRe ihâimana uꞌâsi mono zadawa para waihuꞌu, hâiwa ãma romhuriꞌwa hã, hâiwa nhoꞌõmo tinhibꞌrada te te iwẽ hã. ꞌRe ihâimana uꞌâsi mono hã ta hã hâiwa ꞌmanharĩꞌwa, duré tiꞌai ꞌmanharĩꞌwa, duré â poré ꞌmanharĩꞌwa, duré uburé iwa ꞌre idahâimana zaꞌra mono poto ꞌwa.
7 ꞌMadâꞌâ 10:6
8 Tawamhã hâiwa hawi we te te ĩma inharĩ ꞌrata mreme hã wa tô duré wapa. Ãne te duré ĩma tinha:
— Maꞌãpé, sô aimorĩ, ibaihâ nhinha isurure zô, âri da, hâiwa ãma romhuriꞌwa, sõꞌa haré tinhibꞌrata te te ꞌre iꞌrâꞌâri zô. Õ hã hâiwa ãma romhuriꞌwa, â nhisiwi isa hã, tiꞌa nhisiwib zama.
9 Tawamhã wa tô itẽme sô mo. Sô ĩwisi wamhã, wa tô tiwi waptẽ, ibaihâ nhinha isurure hã. Te tiwi waptẽrẽ wamhã, te ĩma tiꞌru, ãne:
— Maꞌãpé âri, ꞌrẽne da. ꞌRẽne wamhã, ropĩni ne hã isei uptabi za, asadaiꞌré ꞌremhã. Tane nherẽ, oto sõmri wamhã, aipẽꞌẽ ꞌremhã te za adiꞌizé.
10 Tawamhã wa tô oto tiꞌâ, isibꞌrata hawi ibaihâ nhinha isurure hã. Te âri wamhã, wa tô tiꞌrẽ. Te ꞌrẽne wamhã, ropĩni ne hã sei uptabi di, ĩzadaiꞌré ꞌremhã. Tane nherẽ, oto te sõmri wamhã, ĩpẽꞌẽ ꞌremhã, ma ĩdiꞌizé.
11 Tawamhã niꞌwa hã te ĩma tinha:
— Te za duré ꞌRe ihâimana uꞌâsi mono hã dama ꞌre isadawa wasuꞌu mo, dapoto mono bâ za dama ꞌre iromhâimana zaꞌra mono zém na hã, damreme sipoꞌo mono bâ. Daro mono bâ dama ipire zaꞌra norĩ ma, za ꞌre iromhâimana mono zém na zama te za duré dama ꞌre isadawa wasuꞌu mo.
