Apocalipsi 19:1-21
19 Taha pari, wa tô duré wapa, hâiwa ãma daꞌahâ uptabi na damreme ꞌrãihâ na da te inharĩ zaꞌra ne hã. Ãne te damreme ꞌrãihâ na nharĩ zaꞌra ni:
— Wanhibꞌapito ꞌRe ihâimana uꞌâsi mono ãma ꞌre wawata uꞌâsi zaꞌra waꞌaba mono. Ta hã Danhoꞌreptuiꞌwa. Danhipai u wẽ uptabi di, duré waihuꞌu pese uptabi di.
2 Marĩ na te te upai ãna, te iꞌuwaibaba si te te dama ꞌre arowairébé, sena na. Piꞌõ siwaꞌâbâ zô ꞌre isisõmri mono ꞌre ihâimana wasété mono zéb zarina, isine daro mono bâ ꞌre dahâimana wasété zaꞌra mono wa, ma tô ꞌRe ihâimana uꞌâsi mono hã iwasédé hã ãma tihi. Ma tô wẽꞌõ pese. Isibꞌaꞌuwẽ norĩ te te ꞌre simroi mono wa, ma tô ꞌRe ihâimana uꞌâsi mono hã uprosi, piꞌõ hã.
3 Tawamhã te duré damreme ꞌrãihâ na nharĩ zaꞌra ni, ãne:
— ꞌRe ihâimana uꞌâsi mono ãma ꞌre wawata uꞌâsi zaꞌra waꞌaba mono. ꞌRi nhoꞌõmo zaꞌẽtẽ roꞌo nhizé hã õne uꞌâsi hâimo ꞌre sizédé siꞌréi mono wẽ te, ãma ꞌre wawata uꞌâsi zaꞌra waꞌaba mono.
4 Tawamhã 24 na dama ipire zaꞌra norĩ hã duré maparane siꞌuiwa na ropoto na ihâiba norĩ hã ma tô hiꞌrãtitõ ana, ꞌRe ihâimana uꞌâsi mono ãma wata zaꞌra da, danhibꞌapito simasisizém na isãmra ãma. Ãne te ãma tiwata zaꞌra:
— Tane tô. ꞌRe ihâimana uꞌâsi mono ãma si ꞌre wawata uꞌâsi zaꞌra waꞌaba mono.
Poneꞌẽrebâ imrozém na datozé wasuꞌu, ãma isimiréꞌézém na hã
5 Tawamhã danhibꞌapito simasisizém hawi te niꞌwa hã tinha, ãne:
— Maꞌãpé, Wanhibꞌapito ꞌRe ihâimana uꞌâsi mono ãma si ꞌre aiwata uꞌâsi zaꞌra waꞌaba mono, uburé isibꞌaꞌuwẽ norĩ hã, duré dama aipire zaꞌra waꞌaba norĩ hã, duré dama aiwapu na ꞌre iꞌaihâimana zaꞌra waꞌaba norĩ hã, duré uburé ꞌRe ihâimana uꞌâsi mono ꞌre ihâimana wazéb zaꞌra waꞌaba mono norĩ zama hã.
6 Tawamhã wa tô duré wapa, daꞌahâ uptabi na ꞌre idamreme zusi mono mreme hã. Âꞌaꞌa ꞌrãihâ ruruꞌu ne, damreme hã. Duré tãiwapsaꞌa zaꞌẽtẽ rãrãꞌã ruruꞌu ne, damreme hã. Ãne te damreme ꞌrãihâ na nharĩ zaꞌra ni:
— Uburé Danhibꞌapito iwaihuꞌu pese uptabi hã ta hã danhipai u, pire uptabi na te ꞌre hâimana, ꞌRe ihâimana uꞌâsi mono hã. Tahawa, ãma ꞌre wawata uꞌâsi zaꞌra waꞌaba mono za.
7 Bâdâ hã ma tô iwa waptãrã, Poneꞌẽrebâ imrozéb da hã. Duré ãma imro da hã ma tô sima apese. Tahawa, ãma ꞌre watoi uꞌâsi zaꞌra waꞌaba mono. Duré ꞌRe ihâimana uꞌâsi mono hã wẽ uptabi wa, ãma ꞌre wawata uꞌâsi zaꞌra waꞌaba mono.
8 Za ãma imro ma hã, ma tô ꞌRe ihâimana uꞌâsi mono hã tãma tisõ, iꞌuzazé hâirã wẽ uptabi hã, ãma isiꞌuza da hã.
Ãma imro da uzazé hã ꞌRe ihâimana uꞌâsi mono nhibꞌaꞌuwẽ te te ꞌre iromhuri wẽ zaꞌra mono zé, te wasuꞌu.
9 Tawamhã hâiwa ãma ꞌRe ihâimana uꞌâsi mono ma romhuriꞌwa hã te ĩma tinha, ãne:
— Maꞌãpé, ãne na ãma robꞌuiꞌéré: “Poneꞌẽrebâ imrozém na da te dasima ãma iromhuꞌu zaꞌra zéb u sihutu da, ꞌRe ihâimana uꞌâsi mono hã sô ihârâ zaꞌra norĩ ma, tãma ꞌre rowẽ uptabi zaꞌra mono di za.”
Ãne te duré ĩma tinha:
— Ã hã ꞌRe ihâimana uꞌâsi mono mreme hã tô sena uptabi.
10 Tawamhã tô õ hã hâiwa ãma romhuriꞌwa papara, wa tô ĩhiꞌrãtitõ aime, ãma ĩwata da aré. Tane nherẽ, te ĩma tinha, ãne:
— Tôꞌã. Ãne hã ꞌmanharĩ tõ. Wa hã asine hã, ꞌRe ihâimana uꞌâsi mono ma romhuriꞌwa, wa ꞌre ĩhâimana, duré asisãnawã norĩ ne hã, duré asiré isazeiꞌwa norĩ ne hã. Ta norĩ hã roti tô sena uptabi hã, Zezusi te te dama ꞌre iꞌawaihuꞌu mono hã te te ꞌre iwapari pese zaꞌra mono. Ta norĩ ne hã, wa ꞌre ĩhâimana, wa hã. Maꞌãpé ꞌRe ihâimana uꞌâsi mono ãma si ꞌre aiwata mono.
ꞌRe ihâimana uꞌâsi mono zadawa ꞌmahârâꞌwa norĩ hã, Ipẽꞌẽzani te te tãma ꞌre iwaihuꞌu zaꞌra mono zéb zarina si, te ta norĩ hã te te dama ꞌre sadawa wasuꞌu zaꞌra. E marĩ na te bété te te dama ꞌre sadawa wasuꞌu zaꞌra. Tô õhõ na, Zezusi, tiꞌab ré uburé te te dama ꞌre iꞌawaihuꞌu mono na si, te ta norĩ hã te te dama ꞌre sadawa wasuꞌu zaꞌra, ꞌRe ihâimana uꞌâsi mono hã.
Awaru irã nhisi isãmra hã â hawi ropoto siwamnarĩ ãma te te iꞌaiꞌutézé wasuꞌu
11 Taha pari, wa tô duré ꞌmadâ. Te ꞌmadâꞌâ wamhã, ma tô ĩma siꞌridawa, hâiwa hã. Tawamhã awaru irã hã wa tô ꞌmadâ. Iꞌmaprabaꞌwa nhisi hã, sena na Dama iꞌumnhasi na. Duré isisi amo hã, Tô sena uptabi na, isisi hã. Ta hã dawasédé hã da te ꞌre iꞌmanharĩ zaꞌra mono zéb zarina te te ꞌre daꞌawẽꞌõ mono wamhã, tô iꞌuwaibaba si te te ꞌre daꞌawẽꞌõ. Tô isarina si te duré te te ꞌre daꞌahâ zaꞌra, te te ãma ꞌre upai mono ãna. Duré dawasété na ꞌre idanomro mono norĩ hã te te ꞌre ꞌwapé zaꞌra mono wamhã, tô isarina si te te tãma ꞌre robꞌmanharĩ zaꞌra, te te ãma ꞌre upai mono ãna.
12 Duré ito hã aiwa unhama roꞌo ne. Duré iꞌrã na hã iꞌrãzaza siꞌubuzi hã, ahâ uptabi di. Danhibꞌapito ꞌrãzaza siꞌubuzi ne, iꞌrãzaza mono hã. Duré ihâiba na danhisi na robꞌuiꞌéré hã, dama isaꞌreseꞌõ na. Õhõ ma si waihuꞌu pese di, ãma isimiréꞌézé hã.
13 Duré iꞌuza hã dawapru na hâzapré di. Taha nhisi hã ꞌRe ihâimana uꞌâsi mono mreme na, isisi hã.
14 Tawamhã hâiwa ãma dasiꞌwapéi ꞌmanharĩꞌwa norĩ hã te duré isarina sisaꞌre, awaru irã na uza hâirã wẽ uptabi na.
15 Duré awaru irã na isãmra zadaiꞌré hawimhã, te sibꞌézé ꞌwa siꞌuiwa iꞌwa pe hã aipra. Taha na, te za daꞌãma aiꞌuté, daro mono bâ ꞌre idahâimana wasété zaꞌra mono norĩ ãma hã. Simiwadaꞌuri nhiptete na te za duré te te ꞌre daꞌawadaꞌuri. Uva ꞌru ꞌrã hã ẽtẽꞌre ꞌre, iwaꞌu zô da te ꞌre wati zaꞌra mono wamhã, te za iwaꞌu hã ꞌre puꞌu zaꞌra. Tane te za dawapru hã dawi ꞌre puꞌu zaꞌra, ꞌRe ihâimana uꞌâsi mono isiptete uptabi hã saꞌẽtẽ te te ꞌre daꞌahâ zaꞌra mono wamhã.
16 Tawamhã duré iꞌuza hâpa na isisi na robꞌuiꞌéré, duré izadaꞌõtõ na zama. Ãne isisi na robꞌuiꞌéré hã, uburé danhipai u Danhibꞌapito. Duré isisi amo na robꞌuiꞌéré hã, Danhipai u dama ipire.
17 Tawamhã wa tô duré ꞌmadâ hâiwa ãma romhuriꞌwa hã, aimawi hã. Bâtâ nhisiwi te za. Tawamhã te hârâ ꞌrãihâ na uburé si norĩ zô hã hâ, hâimo uptabi ꞌre isisaꞌrei mono norĩ zô. Ãne te sô tihârâ zaꞌra:
— We asina ubumroi waꞌaba. ꞌRe ihâimana uꞌâsi mono hã te za oto aima a zaꞌra waꞌwa, saꞌẽtẽ na asaihuri aba da.
18 Tawamhã daro mono bâ daꞌupsãtã mono nhi na te za asaihuri ꞌwa, adâꞌâ norĩ nhi na, duré tiꞌai ãma danhibꞌapito norĩ nhi na, duré dasiꞌwapéi ꞌmanharĩꞌwa norĩ nhibꞌapito nhi na, duré dasiꞌwapéi ꞌmanharĩꞌwa norĩ nhi na, duré awaru nhi na, duré awaru ꞌmaprabaꞌwa norĩ nhi na, duré dapawaꞌâbâ ãna dawadaꞌuri zarina si da te dama ꞌre iromhuri zaꞌra mono norĩ nhi na, duré dawadaꞌuri ãna dasiꞌuihâ na ꞌre idahâimana zaꞌra mono norĩ nhi na, duré dama ipire norĩ nhi na, duré dama iwapu norĩ nhi na zama. Uburé pese daro mono bâ ꞌre idahâimana wasété zaꞌra mono norĩ dâꞌâ nhi na te za asaihuri ꞌwa.
19 Tawamhã â hawi ropoto siwamnarĩ hã wa tô ꞌmadâ, tiꞌai ãma dama ipire zaꞌra mono norĩ me. Ta norĩ hã ma tô tite dasiꞌwapéi ꞌmanharĩꞌwai mono bâ te te ꞌrãꞌõtõ, awaru irã ꞌmaprabaꞌwa hã te te siwi ꞌwapé da, duré isiré dasiꞌwapéi ꞌmanharĩꞌwa norĩ zama te te siwi ꞌwapé zaꞌra da.
20 Tawamhã â hawi ropoto siwamnarĩ hã ma tô âri ni. Awaru irã ꞌmaprabaꞌwa ma tô tiꞌâ. ꞌRe ihâimana uꞌâsi mono zadawa wasuꞌu uptabi õ ꞌwa, ꞌRe ihâimana uꞌâsi mono nhimipisutu newa, romhõsi na dama ꞌre isadawa nhipese mono, ma tô duré isiré hã tiꞌâ. Ta hã ma tô aré â hawi ropoto siwamnarĩ nhoꞌa te te ꞌre romhõsi, dama isaꞌreseꞌõ na. Te te ꞌre iromhõsi mono zém na ma tô dama ꞌre sadawa nhipese aré, â hawi ropoto siwamnarĩ nhisi na ihâiba uiꞌéré mono hã, ihâiba ꞌmanharĩ na romhâiba ãma ꞌre idawata zaꞌra mono hã. Tawamhã awaru irã ꞌmaprabaꞌwa hã ma tô â hawi ropoto siwamnarĩ norĩ hã, dama ꞌre isadawa nhipese mono me wabzu. Unhama roꞌo uꞌâsi u, ma tô hâiba ré wabzu, ẽtẽ roꞌo nhizédé uzé pire u.
21 Tawamhã awaru irã na isãmra hã tizadaiꞌré hawi sibꞌézé ꞌwapa iꞌwa pese siꞌuiwa zahuré na ma tô uprosi, uburé pese dasiꞌwapéi ꞌmanharĩꞌwa norĩ hã. Uburé ma sõꞌrebzâri pese. Tawamhã si norĩ hã danhi na saihuri mono wa, ma tô te te ꞌmahâpãrĩ pese.
