Apocalipsi 20:1-15
20 Tawamhã wa tô duré ꞌmadâ, hâiwa ãma ꞌRe ihâimana uꞌâsi mono ma romhuriꞌwa hã. Hâiwa hawi te wei mo, abꞌre ꞌrehâ zô ꞌridawazéb ré, duré isiꞌuwazi nhorõ rutu ipire ré zama.
2 Tawamhã te te siꞌrai wi, ma tô hoꞌorã hâiba ne ropoto siwamnarĩ hã õne haré saꞌẽtẽ uptabi tiꞌâ, siptete uptabi na. Hoꞌorã hâiba ne ropoto siwamnarĩ hã ta hã Satanasi, wanhitobꞌru, duréihã wahi na isihâiba. Ta hã hâiwa ãma romhuriꞌwa hã te te saꞌẽtẽ âri wamhã, ma tô pawasisi, miu na wahub u pawasisi ré, ꞌre hâimana mono da.
3 Taha da, ma tô oto time, abꞌre ꞌrehâ u. Taha wamhã, ma tô duré oto iré sito. Ma tô duré iré upto, miu na wahub u daro mono bâ sadawa nhipese na te te ꞌre daꞌaꞌrãmi tõ mono da. Miu na wahub ꞌrãsutu parip si, te za ꞌRe ihâimana uꞌâsi mono zadawa para tãma wasihu ni, suru na aꞌâ ꞌre morĩ da, te te sima iwẽzéb zarina.
4 Tawamhã wa tô duré ꞌmadâ danhibꞌapito simasisizém ne na ꞌre idasiꞌubumroi mono zé hã. Ãma isiꞌubumroi mono ma, ma tô ꞌRe ihâimana uꞌâsi mono hã tãma pisutu zaꞌra, dahâimanazém na te te ꞌre idaꞌawaihuꞌu mono zéb zarina, dama pire na te te dama ꞌre arowairébé mono da, isadawa para. Tawamhã wa tô duré ꞌmadâꞌâ zaꞌra, ꞌRe ihâimana uꞌâsi mono zadawa wasuꞌu te te ꞌre sazei pese zaꞌra mono ꞌru te, da te ꞌre iꞌrãnhihâri zaꞌra mono norĩ pẽꞌẽzani hã, tô sena na Zezusihi zazeiꞌwa na dama ꞌre siwasuꞌu zaꞌra mono ꞌru te. Ta norĩ hã â hawi ropoto siwamnarĩ ãma ꞌre iwata zaꞌra mono õ. Duré ihâiba ꞌmanharĩ na romhâiba ãma ꞌre iwata zaꞌra mono õ. Duré â hawi ropoto siwamnarĩ nhisi na iꞌuihâ uiꞌéré zaꞌra õ, duré isibꞌrata uiꞌéré zaꞌra õ. Ta norĩ hã ma tô oto hâiba ré apâ ꞌre hâimana zaꞌra. Ma tô tihâiwaꞌutu zaꞌra. Tawamhã Cristuhu siré te oto dama pire na te te dama ꞌre roti zaꞌra, Satanasi hã pawasisi ré, miu na ãma iwahub u.
5 Ã hã, ꞌre idahâiwaꞌutu ꞌrata zaꞌra mono zé. Tawamhã miu na wahub ꞌrãsutu parip si, ma tô daro mono bâ uburé pese ꞌre idadâꞌâ zaꞌra mono hã tahâiwaꞌutu zaꞌra ni, dahâiwaꞌutu ꞌrata na ꞌre idahâiwaꞌutu zaꞌra mono õ norĩ hã. Ãne wa tô te te aꞌmadâꞌâ.
6 Tawamhã ꞌre idahâiwaꞌutu ꞌrata zaꞌra mono norĩ ma hã, tãma ꞌre rowẽ uptabi zaꞌra mono di za. Ta norĩ hã ꞌre idadâꞌâ zahu zaꞌra mono ne, unhama roꞌo uꞌâsi u, da te ꞌre idanhamra zaꞌra mono norĩ zu ꞌre sisisi mono õ di za. Miu na wahub u te za ꞌRe ihâimana uꞌâsi mono ma sasedoti na ꞌre hâimana zaꞌra, duré Cristuhu ma zama. Te za duré isiré dama pire na te te dama ꞌre roti zaꞌra, miu na wahub u.
Satanasi, unhama roꞌo uꞌâsi u, da te imezé wasuꞌu
7 Tawamhã miu na wahu ꞌrãsutu wapsi, te za Satanasihi ma wasihu ni, ꞌre isa mono zém hawi oto watobro da.
8 Tawamhã watobro wamhã, daro mono bâ te za oto te te ꞌre daꞌaꞌrãmi, sadawa nhipese na. Tiꞌai ãma hã darom nhisi zahuré hã maparane za oto. Gogui na duré Magogui na darom nhisi zahuré hã. Tame te za Satanasi hã daꞌrãꞌõtõ, dasiꞌwapé da. Daꞌahâ uptabi na te za daꞌaꞌrãꞌõtõ. Â poré zaihâ na supara ꞌre isimiꞌwara mono ne, daꞌahâ uptabi di za.
9 Tawamhã daro mono bâ te za oto dasiwi romnhitom ni. Da te dasiwi romnhito wamhã, te za ꞌri nhoꞌu hã dasiwi ubu ni, ꞌRe ihâimana uꞌâsi mono te te ꞌre isawi mono hã, isibꞌaꞌuwẽ norĩ, iwa ꞌre ihâimana zaꞌra mono zé hã. Ta norĩ hã da te dasiwi uprosi da, te za dasiwi ubu ni. Tane nherẽ, ꞌRe ihâimana uꞌâsi mono hã te za hâiwa hawi uzâ hã sãmra. Te te sãmra wamhã, te za ãma daꞌuprosi, unhama roꞌo na.
10 Tawamhã Waꞌuburé hã sadawa nhipese na te te ꞌre idaꞌaꞌrãmi mono hã te za me ni, unhama roꞌo uꞌâsi u, ẽtẽ roꞌo nhizédé uzé pire u. Â hawi ropoto siwamnarĩ norĩ, da te iwabzurizéb u te za me ni. Tawamhã tame te za oto te te ꞌre robzépata zaꞌẽtẽ uꞌâsi zaꞌra, õne uꞌâsi.
Da te ꞌre idazaꞌré zaꞌra mono zé ꞌrãsutu wasuꞌu
11 Tawamhã wa tô duré ꞌmadâ, danhibꞌapito simasisizé irã hã, isaꞌẽtẽ uptabi hã. Ãma isãmra hã wa tô duré ꞌmadâ. Tawamhã uburé pese hã, ma tô tiꞌa hã aiꞌutõ, duré hâiwa zama. Taha wamhã, marĩ õ uptabi di oto. Tahawa, da te ꞌre ꞌmadâꞌâ zahuré mono õ di oto, tiꞌa norĩ hã hâiwa me. Tâibâ ma tô aiꞌutõrĩ pese zahuré.
12 20:12-13 Tawamhã wa tô duré ꞌmadâꞌâ zaꞌra, ꞌre idadâꞌâ zaꞌra mono hã, dama ipire norĩ hã, duré dama iwapu norĩ hã. Daꞌupsãtã mono bâ, te aihĩni pese danhibꞌapito simasisizém nhoꞌre aimasam ni. Â poré mono bâ, â na ꞌre idasiꞌutõrĩ mono norĩ zama te aimasam ni, adâ ꞌre ihâimana zaꞌra mono zém hawib zama. Tawamhã ibaihâ ahâ na ma tô sõzi zaꞌra ni, tiꞌab ré uburé marĩ, da te ꞌre iꞌmanharĩ zaꞌra mono zém na robꞌuiꞌéré ré hã, marĩ iwẽ na, duré marĩ iwasété na zama. Ma tô duré sõzi ibaihâ hã, ꞌRe ihâimana uꞌâsi mono ꞌrata za rowẽ na ꞌre idahâimana uꞌâsi zaꞌra mono norĩ nhisi ré hã. Tawamhã ibaihâ na da te ꞌre iꞌmanharĩ wẽ zaꞌra mono zéb uiꞌéré zarina, ma tô daꞌãma rowairébé zaꞌra ni. Da te ꞌre iꞌmanharĩ wasété zaꞌra mono zéb uiꞌéré zarina zama, ma tô aihĩni pese daꞌãma rowairébé zaꞌra ni.
13 ꞌMadâꞌâ 20:12
14 20:14-15 Tawamhã niꞌwam norĩ hã ibaihâ na ꞌre ihâimana uꞌâsi zaꞌra mono norĩ nhisi, ꞌre isimiꞌwara mono zém na isisi isimiꞌwara õ norĩ hã ma tô sãmra ni, unhama roꞌo uꞌâsi u. (Ã hã unhama roꞌo uꞌâ hã maparane ãma ꞌre idadâꞌâ zahu zaꞌra mono zé, te wasuꞌu.)
ꞌRe idadâꞌâ zaꞌra mono zé hã tâibâ oto. Duré adâ hã aré ꞌre ihâimana zaꞌra mono zé hã, tâibâ duré oto. Ma tô abꞌre ꞌre sãmra ni, uburé adâꞌâ norĩ hã, unhama roꞌo uꞌâsi u. Tahawa, tâibâ oto, adâ ꞌre ihâimana zaꞌra mono zé hã.
15 ꞌMadâꞌâ 20:14
