Apocalipsi 21:1-27
21 Tawamhã wa tô duré ꞌmadâ hâiwa ité hã, duré tiꞌa ité hã. Hâiwa iꞌrada hã ma tô aiꞌutõrĩ pese. Duré tiꞌa iꞌrata zama hã ma tô aiꞌutõrĩ pese. Â zama hã ma tô duré aiꞌutõrĩ pese.
2 Tawamhã wa tô duré ꞌmadâ, ꞌri nhoꞌu hã, iwasédé iwa ꞌre ihâimana mono õ hã, Zeruzalẽ itém na isisi hã. Ta hã te hâiwa hawi wei mo, ꞌRe ihâimana uꞌâsi mono hawi. Piꞌõ hã oto mro da, ꞌre isiꞌuza wẽ uptabi zaꞌra mono ne, ma we siꞌra, ꞌri nhoꞌu iwẽ uptabi hã.
3 Tawamhã damreme ꞌrãihâ hã wa tô duré wapa, danhibꞌapito simasisizém hawi we te te inharĩ hã. Ãne te we ĩma tinha:
— Maꞌãpé, waihuꞌu. ꞌRe ihâimana uꞌâsi mono hã te za oto dasiré ꞌre hâimana uꞌâsi, ꞌrâwi. Isibꞌaꞌuwẽ te za oto ꞌre dahâimana uꞌâsi zaꞌra. Te za tô oto duré dasiré ꞌre hâimana uꞌâsi. Isibꞌapito zaꞌra te za oto ꞌre hâimana, ꞌRe ihâimana uꞌâsi mono hã.
4 Te za duré oto daꞌatõmo uꞌõ, dapẽꞌẽzé õ uꞌâsi ꞌre dahâimana uꞌâsi zaꞌra mono da. Tawamhã duré oto ꞌRe dadâꞌâ zaꞌra mono õ di za. Duré ꞌre dasiwaꞌõ zaꞌra mono õ di za oto. Duré dahâzé, da te ꞌre sépata zaꞌra mono õ di za oto. E marĩ wa. Uburé ꞌre iromhâimana ꞌrata mono zé hã siꞌutõrĩ pese wa oto.
5 Tawamhã ꞌRe ihâimana uꞌâsi mono hã danhibꞌapito simasisizém na isãmra hã te ĩma tinha, ãne:
— Maꞌãpé waihuꞌu. Wa hã wa za tô marĩ ité hã te abꞌmanharĩ, ãhã na hã.
Tawamhã te duré ĩma tiꞌru:
— Maꞌãpé ãne ãma arobꞌuiꞌéré mono. Ãhã wasuꞌu hã uburé marĩ ité hã za te iꞌabꞌmanharĩ mono na hã, tô sena. Tô sena wa, ãhã na da te ꞌre robꞌumnhasi zaꞌra mono sina, da te ꞌre ĩzazei pese zaꞌra mono da na, te za ãma iꞌarobꞌuiꞌéré mo.
6 Tawamhã te duré ĩma tinha, ãne:
— Tâibâ oto. Wa tô te ãma aꞌuwaimrami. Wa hã isãnaꞌrata hawimhã marĩ õ ré hã, wa tô ꞌre ĩhâimana uꞌâsi. Uburé marĩ hã siꞌutõrĩ pese nherẽ, wa hã marĩ zarina ĩsiꞌutõrĩ õ di za. Õne uꞌâsi, wa za ꞌre ĩhâimana. Tawamhã niꞌwam norĩ hã te te ꞌre ꞌrubu zaꞌra mono wamhã, wa za â uꞌâ hã te tãma ꞌre õb zaꞌra, waꞌâbâ ãna, da te ꞌre âhuri mono wa, ĩsiré rowẽ na ꞌre idanomro uꞌâsi mono zéb da hã.
7 Niꞌwam norĩ hã tidâꞌâzéb u ĩwi sipizari ãna, Satanasihi ãma te te iꞌaiꞌuté zaꞌra norĩ hã ta norĩ ma, wa za Isibꞌapito zaꞌra na ꞌre ĩhâimana. Ĩnhibꞌaꞌuwẽ si te za oto ta norĩ hã ꞌre hâimana zaꞌra.
8 Tane nherẽ, niꞌwam norĩ hã te za unhama roꞌo uꞌâsi waꞌwa ꞌre hâimana uꞌâsi zaꞌra, aré da te ꞌre simroi mono pipa te, ĩwi ꞌre isipizari zaꞌra mono norĩ hã, duré te te ꞌre ĩzazei utõrĩ zaꞌra mono norĩ hã, duré marĩ iwasété uptabi na ꞌre ihâimana wasété zaꞌra mono norĩ hã, duré dapãrĩꞌwa norĩ hã, duré dahâiba na ꞌre ihâimana wasété zaꞌra mono norĩ hã, duré simiꞌâ na ꞌre ihâimana zaꞌra mono norĩ hã, duré romhâiba ꞌmanharĩ ãma ĩꞌupana ꞌre iwata zaꞌra mono norĩ hã, duré sadawa nhipese na ꞌre ihâimana zaꞌra mono norĩ hã. Uburé pese, te za ẽtẽ roꞌo nhizédé uzé pire waꞌwa ꞌre dahâimana uꞌâsi zaꞌra, ꞌre idahâimana wasété zaꞌra mono norĩ hã, unhama roꞌo uꞌâsi waꞌwa. Unhama roꞌo uꞌâ hã maparane ãma ꞌre idadâꞌâ zahu zaꞌra mono zé, te wasuꞌu.
Zeruzalẽ ité wasuꞌu
9 Tawamhã 7 na hâiwa ãma romhuriꞌwa norĩ siré hã ma tô misi we ĩtẽme ꞌmaimo, 7 na uꞌawi ré ihâimana zaꞌra norĩ siré hã, robꞌmanharĩ pipa na te te dama ꞌre irobꞌmanharĩ wasété zaꞌra mono norĩ siré hã. Tawamhã ta hã te ãne ĩzatõ:
— Maꞌãpé we ĩsiré aimorĩ, Poneꞌẽrebâ mro da hã, za te aima ihâiꞌré hã sabu da.
10 Tawamhã ꞌRe ihâimana uꞌâsi mono Pẽꞌẽzani hã ma tô duré aimawi ĩꞌuihâ piꞌra. Te te ĩꞌuihâ piꞌrai wa, wa tô duré aimawi ĩhâiba. Taha pari, ma tô hâiwa ãma romhuriꞌwa hã ĩzaprõ, ẽtẽ ꞌrãihâ zaꞌẽtẽ uptabi u, iꞌrãihâ uptabi u. Te te ĩzaprõni wamhã, Zeruzalẽ ité hã wa tô ꞌmadâ, marĩ iwasédé hã iwa ꞌre ihâimana mono õ hã, hâiwa hawi we te te isiꞌra hã, ꞌRe ihâimana uꞌâsi mono hawi.
11 ꞌRe ihâimana uꞌâsi mono nhimirowaꞌa na, te ꞌri nhoꞌu hã tirowaꞌa zaꞌẽtẽ. Ẽtẽꞌubuzi zarobꞌa siꞌubuzi ne, ma aiꞌubuzi, ꞌri nhoꞌu hã.
12 21:12-13 Duré ꞌri nhoꞌõmo ꞌwawi waꞌra hã ꞌrãihâ uptabi di. ꞌRidawa isaꞌẽne hã 12 na ihâiba hã. Bâtâ pusizém niwĩmhã siꞌubdatõ ꞌridawa isaꞌẽne hã, duré bâtâ zasizém niwĩmhã, duré tô siꞌubdatõ ꞌridawa isaꞌẽne hã. Duré hâiwa nhimire niwĩmhã, duré tô siꞌubdatõ. Duré hâiwa nhimiꞌe niwĩmhã, duré tô siꞌubdatõ, ꞌridawa isaꞌẽne hã. Uburé hã 12 na ihâiba hã. Duré ꞌridawa zaꞌẽtẽ mono bâ te hâiwa ãma ꞌRe ihâimana uꞌâsi mono ma romhuriꞌwa norĩ hã misi si simasa, ꞌridawa ꞌmadâꞌâꞌwa norĩ hã. Duré ꞌridawa zaꞌẽtẽ mono bâ robꞌuiꞌéré mono hã misi si, 12 na Izaraéu ꞌra nhisi mono na.
13 ꞌMadâꞌâ 21:12
14 Duré waꞌra nhanaꞌrata uparizé mono hã ẽtẽ tõmo wawẽ topa hã 12 na ihâiba hã. Taha na 12 na Poneꞌẽrebâ zadawa wasuꞌuꞌwa norĩ nhisi mono hã. Misi si ãma isisi uiꞌéré mono hã.
15 Tawamhã hâiwa ãma romhuriꞌwa hã te te ĩma inharĩ hã te wedehu waré ne hã ꞌre tiꞌâ, marĩ pibuzé hã, ẽtẽ waipo pré oru ꞌmanharĩ hã. ꞌRi nhoꞌõmo zadaꞌré te te ãma ipibuzéb da hã te ꞌre tiꞌâ, duré ꞌridawa isaꞌẽtẽ mono pibuzéb da zama, duré ꞌri nhoꞌõmo ꞌwawi waꞌra pibuzéb da zama.
16 Tawamhã ꞌri nhoꞌõmo zadaꞌré te te pibui mono wamhã, isaséꞌre mono hã aiwapsi ma wairébé, tiꞌai pibuzém na ipibuzé mono hã. Inaꞌre pibuzé mono hã duré aiwapsi ma wairébé. Duré iꞌaꞌre mono pibuzé hã aiwapsi ma te duré wairébé, duré isihâi mono hã. Uburé pese aiwapsi ipibuzé mono hã. Tawamhã ãne ipibuzé mono hã, 2.200 na tiꞌai pibuzém na inaꞌre pibuzé mono hã duré iꞌaꞌre pibuzé mono hã, duré isihâi pibuzé mono hã.
17 Tawamhã ma tô duré pibu, waꞌra nhimiꞌrãmi hã hâzaꞌõtõ zô. Te te pibui wamhã, 64 na ipibuzé hã. Tiꞌai ãma da te ꞌre iropibu zaꞌra mono zéb zaꞌratazéb zarina, ipibuzé hã.
18 Duré ꞌri nhoꞌõmo ꞌwawi waꞌra hã ẽtẽꞌubuzi zarobꞌa na iꞌmanharĩ hã. Duré ꞌri nhoꞌu hã oru uptabi na si ꞌri ꞌmanharĩ mono hã, aimawi na wazari ãna. Aiwa simhi ne hã isarobꞌa uptabi.
19 21:19-20 Duré ꞌri nhoꞌõmo ꞌwawi waꞌra nhanaꞌrata uparizé mono wazarimhã, misi si ẽtẽꞌubuzi waꞌâbâ zaꞌẽtẽ mono hã iwamri mono bâ. 12 na ẽtẽꞌubuzi waꞌâbâ zaꞌẽtẽ mono hã, iwamri mono bâ, duré ito pré wamri mono bâ, duré itobꞌuzé wamri mono bâ.
20 ꞌMadâꞌâ 21:19
21 Duré 12 na ꞌri nhoꞌõmo ꞌwawi waꞌra ꞌridawa zaꞌẽtẽ mono hã, aꞌé tõmo wawẽ ne itobꞌa ꞌmanharĩ mono hã, misi si. Duré ꞌri nhoꞌõmo ꞌri waꞌwa ꞌri nhiꞌriti wawẽ hã ẽtẽ waipo pré oru uptabi na iꞌmanharĩ hã, iwazari õ na. Aiwa simhi rã ne sarobꞌa uptabi di.
22 Tawamhã ꞌri nhoꞌõmo ãma ꞌRe ihâimana uꞌâsi mono nhorõwa ꞌri hã iwa ihâimana hã sãmri õ di. Robaba di. Uburé Danhibꞌapito ꞌRe ihâimana uꞌâsi mono iwaihuꞌu pe hã, duré Poneꞌẽrebâi me oto ꞌrâwi daꞌrata ꞌre hâimana uꞌâsi zahuré mono na dâꞌâsina, isõrõwa hã oto hâimana õ di.
23 Duré ꞌri nhoꞌõmo na hã bâdâ te te ꞌre robꞌuiwẽ mono õ di za oto, duré aꞌamo zama hã. ꞌRe ihâimana uꞌâsi mono nhimirowaꞌa si te za oto te te ꞌre rowaꞌa, Poneꞌẽrebâ nhimirowaꞌa zama.
24 Tawamhã daro mono bâ ꞌre idahâimana zaꞌra mono norĩ hã te za isimirowaꞌa na ꞌre dahâimana zaꞌra. Duré dama ipire zaꞌra norĩ hã te te ꞌre idaꞌmadâꞌâ zaꞌra mono norĩ hã te za tinhibro hã ahâ uptabi na ꞌwasa, ꞌri nhoꞌu itéb u.
25 Tawamhã duré ꞌridawa zaꞌẽtẽ mono hã ꞌri nhoꞌõmo ꞌwawi waꞌra ꞌridawa zaꞌẽtẽ mono hã te za ꞌridawa haré ꞌre simasab uꞌâsi, õne uꞌâsi sitob ãna. Tame oto ꞌre mara waihuꞌu mono õ wa, te za ꞌridawa haré ꞌre simasab uꞌâsi.
26 Tawamhã daro mono bâ te za danhibro hã ꞌwasari ni, ꞌri nhoꞌu itéb u hã. Uburé dawaihuꞌu pese na romhuri pese zéb ré, te za asisi ni.
27 Tawamhã marĩ iwasédé hã da te ꞌmazasi zaꞌra õ di za. Duré ꞌre idahâimana wasété zaꞌra mono norĩ hã, duré ꞌre idazadawa nhipese zaꞌra mono norĩ hã itẽme ꞌre danhisisi waihuꞌu mono õ di za oto. Ibaihâ na ꞌre idahâimana uꞌâsi zaꞌra mono norĩ nhisi ꞌre isimiꞌwara mono zém na, isisi, ꞌre isimiꞌwara mono norĩ si, te za itẽme ꞌre sisisi, Poneꞌẽrebâ te na isisi uiꞌéré ré mono norĩ si hã.
