Atus 28:1-31
28 Rob u wawairébé wẽ wamhã, wa tô rowaihuꞌu zaꞌra ni, robꞌré zaꞌidi Mauta na isisi na hã.
2 Tame ꞌre isiꞌubumroi mono norĩ hã ma tô wawaibui wẽ. Tã taꞌa wamhã, duré hâ wa, ma tô uzâ hã siwi pré.
3 Tawamhã Paulu hã ma tô mi awaibu. Unhama nhisiwi te te saꞌra ré, wahi hã unhama waꞌro wi iwara hã ma tô isibꞌrata wi tisa. Ma tô ãma ꞌre sipra.
4 Robꞌré zaꞌiti ãma ꞌre isiꞌubumroi mono norĩ hã wahi isibꞌrata na ꞌre isipra mono na te te siwi ꞌmadâꞌâ wamhã, ma tô sima nharĩ zaꞌra, ãne:
— Õhõ aibâ hã ãté tô dapãrĩꞌwa. Â pore wi sisõꞌreptu nherẽ, ꞌre morĩ da hã sisõꞌreptui õ di za. Iꞌuwaibaba te za tô oto dârâ.
5 Tane nherẽ, Paulu ma tô wahi ré tinhibꞌrada hã waiwẽ, unhama u waptãꞌã da. Waptãꞌã parimhã, ãma sépuꞌu õ di.
6 Ma tô ãma rosaꞌrata zaꞌra, tiwi dupto da newa, duré waptu na dâꞌâ siromo za waptãꞌã da newa. Tane nherẽ, te te sapari hâ zaꞌra nherẽ, marĩ hã ãma hâimana õ wa, ma tô rosaꞌrata na ãma saprĩ zaꞌra. Ma tô oto nharĩ zaꞌra, Paulu hã ihâibaꞌõ iwaihuꞌupese na hã.
7 Taha ꞌratamhã, te tiꞌa hã ꞌre hâimana, Pubriu te hã. Ta hã aibâ dama ipire, robꞌré zaꞌiti ãma hã. Ta hã ma tô wawaibui wẽ. Tawamhã siꞌubdatõ bâtâ na isõrõwa ꞌre, wa tô aiꞌubumro ni.
8 Imama hã hâzé ré te nomro, waptâ. Waꞌro zaꞌẽtẽ na duré isãnapru hã te ãma tihâiba. Tawamhã Paulu hã ma tô itẽme ãzé. Ma tô ãma rowaptẽ. Taha pari tinhibꞌrada hã ma tô ãma tihi. Tahawa ma tô tipese.
9 Ãne hã romhâimana parimhã, robꞌré zaꞌiti ꞌre, uburé ihâzé ré norĩ hã ma tô Pauluhu u aihutu. Ta norĩ zama ma tô duré tipese zaꞌra.
10 Ta norĩ hã ma tô wawazé wẽ zaꞌra. Oto wasiꞌabaꞌréi wamhã, uburé marĩ hã ma tô ubaꞌre wa wama séme zaꞌra, wasisaꞌrei mono ré ãma iwahâimana zaꞌra da hã.
Mauta hawi Roma u iwasihutuzé
11 Robꞌré zaꞌiti ãma siꞌubdatõ aꞌamo na wahâimana zaꞌra parimhã, ubaꞌre na wa tô oto wasisaꞌre ꞌri nhoꞌu Alesãdria hawim na, rowaꞌuꞌu wahâ siꞌutõrĩ da, aꞌâ robꞌré zaꞌiti ãma inomro na. Ubaꞌre wata ãma hã ihâibaꞌõ norĩ isiꞌubza norĩ poto ꞌmanharĩ, Castor duré Polosihi me.
12 Tawamhã wa tô aihutu ni Siracuza na ꞌri nhoꞌõmo nhisi u. Tame siꞌubdatõ bâtâ na wa tô wahâimana zaꞌra ni.
13 Ta hawimhã wa tô wawairébé ni. Réziu na ꞌri nhoꞌõmo nhisi u wa tô aihutu ni. Awẽm na hã rowaꞌu hã te rowapõ, hâiwa nhimiꞌei hawi. Tawamhã wawara na wa tô ãma uzusi zaꞌra ni. Wa tô aihutu ni, Potéoli u hã bâdâ maparane waꞌãma neb zaꞌra parip si.
14 Tamemhã nima norĩ wasisãnawã norĩ hã wa tô sõpẽtẽ zaꞌra ni. Ta norĩ hã ma tô wawaptẽrẽ zaꞌra, misi romhuri na iꞌrata wasiꞌubumro da. Taha pari, wa tô aihutu ni, Roma u hã.
15 Roma ꞌre wasisãnawã norĩ hã, wawasuꞌu hã ma tô wapari zaꞌra, iwasihutu na hã. Tahawa ma tô we aiꞌabaꞌré dasina iꞌubumrozé Apiu u duré Siꞌubdatõ Rowedezéb u. Paulu hã wasisãnawã norĩ te te ꞌmadâꞌâ zaꞌra wamhã, ꞌRe ihâimana uꞌâsi mono ãma te tiwata. Ma tô tãma tirowẽ.
Paulu hã Roma ãma ihâimanazé
16 Roma u wasihutu wamhã, Pauluhu ma rowairébé hã ma tô tihâiba, hâiba pisutu hâimana da, misi dasiꞌwapéi ꞌmanharĩꞌwa hã te te duré nasi ꞌmadâꞌâ da.
17 Siꞌubdatõ bâdâ ne parimhã, Paulu hã ma tô sô tihârâ zaꞌra, Roma ãma Zudeu norĩ ma ipire norĩ zô. Itẽme siꞌrãꞌõtõ wamhã, ma tô tãma nharĩ zaꞌra, ãne:
— Ĩsisãnawã norĩ, marĩ hã te ꞌmanharĩ õ di, wanhibꞌaꞌuwẽ norĩ ma hã, duré wahiꞌrata norĩ hâimanazéb da hã. Tane nherẽ, Zeruzalẽ ãma hã dazazéb ꞌre ma tô ĩnherẽ ni. Ma tô duré ĩhâiba nhomri ni, romanu norĩ ma hã.
18 Ta norĩ hã ma tô siwi ĩzadanharĩ pese. Tane nherẽ, marĩ te iꞌupazé hã te te ĩꞌãma sãmri zaꞌra õ di, taha zarina da te dasiwi ĩwĩrĩzéb da hã. Tahawa, dazazém hawi te te siwi ĩwazere da, ma tô aré sima wẽ zaꞌra.
19 Tane nherẽ, Zudeu norĩ hã te te sima wẽ zaꞌra õ di, dazazém hawi ĩwatobro da hã. Tahawa, nihai õ wa, wa tô waptẽ, we ĩmorĩ da, apito Cézaha si te te ĩꞌãma rowairébé da, marĩ hã wanhibꞌaꞌuwẽ norĩ zada ĩma hâimana õ nherẽ.
20 Ãne wa, wa ãma asô ĩhârâ zaꞌra waꞌwa, te aiꞌmadâꞌâ zaꞌra waꞌaba da, duré wa te wasima robzanhamri zaꞌra da zama. Ãhã na hã isiꞌuwazi nhorõ rutu na ĩwasisi ré wa za, Izaraéu nhihudu norĩ, sô ꞌre isimipari zaꞌra mono uꞌâbâ.
21 Tawamhã te asa tãma nharĩ zaꞌra, Pauluhu ma, ãne:
— Aiwasuꞌu na robꞌuiꞌéré hã wei wama wisi zaꞌra õ di, Zudéa hawimhã. Duré wasisãnawã norĩ ta hawi we isihutu mono hã, niha hã te te siwi aiwasuꞌu wasété õ di.
22 Tane nherẽ, wa wasima wẽ zaꞌra ni, wa te aiwapari zaꞌra da, niha hã asimirosaꞌrada hã. Wa waihuꞌu zaꞌra ni. Daro mono bâ te da te ꞌre wasuꞌu wasété zaꞌra, dasima idasipoꞌozép té, isiniwĩ ꞌre iꞌaihâimana mono hã.
23 Tawamhã nimahã bâdâ hã te te sima pisutu zaꞌra parimhã, ahâ na ma tô itẽme aiꞌrãꞌõtõ, Pauluhu zaꞌwarizéb u. Tahawa, mararé Paulu hã ma tô ãma sãnaꞌrata hâiwahâ u, ꞌRe ihâimana uꞌâsi mono, daꞌãma ꞌre isibꞌaꞌuwẽ mono zém na te te tãma irowasuꞌu zaꞌra na hã. ꞌRe ihâimana uꞌâsi mono nhimiroti zahi na Mozési te te irobꞌuiꞌérézéb zarina, duré isadawa ꞌmahârâꞌwa norĩ nhimiꞌuiꞌéré zarina, ma tô ãma tãma rowasuꞌu pese zaꞌra, te te saze zaꞌra da, Zezusihi wasuꞌu hã.
24 Nima norĩ hã ma tô timreme na pizari zaꞌra. Tane nherẽ, nima norĩ hã te te saze zaꞌra õ di.
25 Tawamhã uburé ma tô oto aiꞌabaꞌré. Siꞌremhã te te ãma saze zaꞌra õ di. Tane nherẽ, siꞌabaꞌréi wana ré, Paulu hã ma tô ãne tãma nharĩ zaꞌra:
— ꞌRe ihâimana uꞌâsi mono Pẽꞌẽzani ma, waihuꞌu siromo wa, ma tô tizadawa ꞌmahârâꞌwa Izaiasihi ma waihuꞌu siro, aihiꞌrata norĩ ma, te te sadawa wasuꞌu zaꞌra da hã.
26 Ãne ma tô Izaiasihi ma waihuꞌu:“Aimorĩ, ã hã aꞌuwẽ norĩ ma, ĩzadawa ꞌmahârâ da, ãne:Ĩnhimiroti hã tô aipoꞌre na ꞌre wapari zaꞌra waꞌaba mono nherẽ, niwa isadaihuꞌu zaꞌra waꞌaba da hã mare di.Duré atõmo na tô ꞌre robꞌmadâꞌâ zaꞌra waꞌaba mono nherẽ, marĩ hã iꞌmadâꞌâ waihuꞌu zaꞌra waꞌaba da hã mare di.
27 E marĩ wa. Ã hã aꞌuwẽ norĩ hã pẽꞌẽ tete zaꞌra wa. Ma sipoꞌre nhidâ zaꞌra. Duré ꞌrâwi ma sitõmo zuwa zaꞌra.Ãnei õ ꞌwaꞌâhã, titõmo na te aré robꞌmadâꞌâ zaꞌra. Tipoꞌre na te duré aré wapari zaꞌra. Tinhimirosaꞌrata na te aré sadaihuꞌu zaꞌra.Tawamhã apâ te aré ĩtẽme aipizari zaꞌra. Tawamhã wa hã wa aré duré pese zaꞌra.”
28 Tawamhã Paulu hã ma ãma tãma ꞌrãsutu zaꞌra, ãne:
— Tahawa, maꞌãpé waihuꞌu zaꞌra waꞌaba. ꞌRe ihâimana uꞌâsi mono hã te oto satõ danhoꞌreptuzé wasuꞌu hã, zudeuꞌõ norĩ u. Tawamhã ta norĩ hã te za wapari zaꞌra.
29 [Paulu hã ãne na te te tãma nharĩ zaꞌra parimhã, Zudeu norĩ hã ma tô oto aiꞌabaꞌré, ꞌrâwi ãma sisadaꞌâbâ zaꞌra sina saꞌẽtẽ.]
30 Tawamhã maparane wahum na Paulu ma tô nhamra, ꞌri iwaꞌâbâ zô da te ꞌre iꞌru zaꞌra mono ꞌre. Ma tô duré te te ꞌre aiwaibui wẽ, te te ꞌre sabu zaꞌra mono da, uburé itẽme ꞌre isihutu mono hã.
31 Tawamhã ꞌRe ihâimana uꞌâsi mono daꞌãma ꞌre isibꞌaꞌuwẽ mono zém na ma tô te te dama ꞌre rowahutu. Duré Wanhibꞌapito Zezu Cristuhu wasuꞌu wẽ na, pahi ãna ma tô te te ꞌre rowasuꞌu, duré marĩ hã te te sõwada ãna.
