Atus 8:1-40
8 Tawamhã Estevã da te iwĩrĩzém na ma tô Saulu hã daꞌapaꞌuze.
Saulu hã isazeiꞌwa norĩ ãma te te ꞌre irowasété mono zé
Taha bâtâ ꞌremhã, Zeruzalẽ ꞌremhã ꞌRe ihâimana uꞌâsi mono zazeiꞌwa norĩ ma, ma tô oto da te tãma ꞌre irobꞌmanharĩ wasété zaꞌra mono zé hã te te ꞌre sépata naꞌrata zaꞌra. Tawamhã uburé isazeiꞌwa norĩ hã ma tô ropé, Zudéa na danhiptiꞌa nhoꞌõmo nhisi u duré Samaria u zama. Zezusihi siré ꞌre inomro mono norĩ si te te ropéi õ di.
2 Tawamhã nima norĩ ꞌRe ihâimana uꞌâsi mono nhimiroti ꞌmadâꞌâ pese ꞌwa norĩ hã ma tô Estevãhã ãma tiꞌa zaꞌra. Idâꞌâzém na ma tô duré saꞌẽtẽ na aiwaꞌõ zaꞌra.
3 Tawamhã Saulu hã saꞌẽtẽ te ꞌre hâimana, Zezusihi zazeiꞌwa norĩ hã te te uprosi zaꞌra da. ꞌRi baba te sô ꞌre zasi zaꞌra. Ta hawi rob u te te ꞌre azani. Te te ãma ꞌre arobâdâ. Dazazéb ꞌre te te ꞌre aꞌmaza, aibâ norĩ duré piꞌõ norĩ zama.
Filipi hã Samaria ãma Rowasuꞌuwẽ na te te dama irowahutuzé
4 Tawamhã daro mono bâ, isazeiꞌwa norĩ hã te te iropéi mono, ma tô te te dama rowasuꞌu zaꞌra, Rowasuꞌuwẽ na hã, nimomo ꞌre isihutu mono zéb u.
5 Filipi* hã ma tô mo, Samaria ꞌre, ꞌri waꞌõno dama iꞌrãnhoꞌõmo u. Tame ma tô Cristu hã dama wasuꞌu.
6 Tawamhã daꞌahâ uptabi na Filipi hã da te wapari zaꞌra wamhã, duré marĩ dama iꞌmanharĩ waihuꞌuꞌõ te te iꞌabꞌmanharĩ hã da te ꞌmadâꞌâ zaꞌra wamhã, ma tô wapari prédub zaꞌra ni, isimirowasuꞌu hã.
7 Waꞌuburé norĩ hã sadari sina ma tô daꞌahâ na dahawi wairé. Imorĩꞌõ norĩ duré ihiꞌré norĩ zama ma tô tipese zaꞌra.
8 Ãne wa, datoi uptabi zaꞌra di, taha ꞌri nhoꞌõmo ꞌre, ꞌre idahâimana zaꞌra mono norĩ hã.
9 Tamemhã te ꞌre hâimana, Simau na aibâ nhisi hã. Wahub ahâ na ma tô simiꞌâ na te te daꞌãma ꞌre romhuri. Taha ꞌri nhoꞌõmo ꞌremhã, ma tô uburé aꞌuwẽ norĩ hã ãma ꞌre tobꞌuzu zaꞌra. Dama pire na ꞌre ihâimana mono na ma tô ꞌre siꞌmadâꞌâ.
10 Uburé ma tô da te ꞌre wapari prédub zaꞌra, dama iwapu norĩ hã duré isimarĩ pese norĩ zama. Ãne ma tô da te tãma ꞌre nharĩ zaꞌra:
— Ã hã aibâ hã ꞌRe ihâimana uꞌâsi mono waihuꞌu pe. Isisi hã “Iwaihuꞌu pe Isaꞌẽne”!
11 Tawamhã uburé ma tô da te ꞌre wapari prédub zaꞌra, isimiromhõsi na ꞌre datobꞌuzu zaꞌra mono wa, wahub ahâ na hã.
12 Tane nherẽ, ma tô saze zaꞌra ni Filipi te te irowahutuzé hã, Rowasuꞌuwẽ ité ꞌRe ihâimana uꞌâsi mono daꞌãma ꞌre isibꞌaꞌuwẽ mono zé wasuꞌu na hã, Zezu Cristuhu wasuꞌu na zama. Â dawabzuri ma tô ꞌmanharĩ zaꞌra ni, aibâ norĩ piꞌõ norĩ zama.
13 Simahã zama ma tô saze. Â dawabzuri hã ma tô duré dame ꞌmanha. Tahawa Filipihi siré si te oto ꞌre mo. Te nasi ãma titobꞌuzu, dama iꞌmanharĩ waihuꞌuꞌõ hã duré iwẽ uptabi hã Filipi te te ꞌre iꞌabꞌmanharĩ mono hã te te oto ꞌre abꞌmadâꞌâ mono wa.
14 Tawamhã Zezusihi zadawa wasuꞌuꞌwa norĩ hã Zeruzalẽ ãma ihâimana zaꞌra hã ma tô wapari zaꞌra Samaria ꞌre, ꞌre ihâimana zaꞌra mono norĩ hã ꞌRe ihâimana uꞌâsi mono zadawa wasuꞌu te te isaze zaꞌra na hã. Tahawa, Pedru norĩ Zuwãhã me ma tô siwi satõrĩ zahuré, tamomo neb da.
15 Ta norĩ hã simasisi zahuré wamhã, ma tô daꞌãma rowaptẽrẽ zahuré, ꞌRe ihâimana uꞌâsi mono Pẽꞌẽzani, da te waibu da,
16 ꞌRe ihâimana uꞌâsi mono Pẽꞌẽzani hã zahadu niꞌwai u hã tamomo te te siꞌrai õ wa, Wanhibꞌapito Zezusihi nhisi na si â dawabzuri hã te te ꞌmanharĩ zaꞌra wa.
17 Tawamhã Pedru norĩ Zuwãhã me ma tô tinhibꞌrada hã ãma azaꞌra zahuré. Tahawa ma tô ꞌRe ihâimana uꞌâsi mono Pẽꞌẽzani hã waibu oto.
18 ꞌRe ihâimana uꞌâsi mono Tipẽꞌẽzani te te dama iꞌanhomri na, Zezusihi zadawa wasuꞌuꞌwa norĩ, tinhibꞌrada te te daꞌãma azaꞌra zahuré wa, Simau hã te te ꞌmadâꞌâ wamhã, robꞌuiprazém na ma tô tãma ropisutu zahuré.
19 Ãne te tãma nharĩ zahuré:
— Wa ĩsima wẽ, ĩma zama sõmri waꞌaba da, Iwaihuꞌu pe hã duré wa hã ĩnhibꞌrada te daꞌãma ꞌre azaꞌra mono wamhã, da te ꞌre waibui mono da, ꞌRe ihâimana uꞌâsi mono Pẽꞌẽzani hã.
20 Tawamhã Pedru hã ma ãma sadaꞌâ, ãne:
— ꞌRe ihâimana uꞌâsi mono, ropipa u te te iꞌasatõrĩ aba da si iwẽ hã, ate robꞌuiprazé me! E ꞌRe ihâimana uꞌâsi mono nhoprubzé iwẽ uptabi hã robꞌuiprazém na uipra waihuꞌu bâ, te ãne irosaꞌra.
21 Wasiré romhuri iꞌmanharĩ zaꞌra da, iꞌaihâimana da hã waihuꞌu õ di. E marĩ wa. Aipẽꞌẽ ꞌremhã awaꞌawi aihâimana õ di, ꞌRe ihâimana uꞌâsi mono nhoꞌremhã.
22 Aiwasété na asisãmri wa, asiwẽꞌõ na. Taha parimhã Uburé Danhibꞌapito wi rowaptẽrẽ. Tawamhã ãté te te aiꞌãma ꞌmadâꞌâ õ di za, aipẽꞌẽ ꞌre irosaꞌratazé hã.
23 Wa aiꞌmadâ, marĩ na iꞌasiminhoꞌru zaꞌẽtẽ na duré aiwasédé te te iꞌatété wi hã aiwatobro waihuꞌu õ di.
24 Tawamhã Simau hã ma ãma sadaꞌâ, ãne:
— Maꞌãpé ĩꞌãma rowaptẽrẽ aba Uburé Danhibꞌapito wi, marĩ ĩꞌãma hâimana tõ da, ĩma inharĩ waꞌaba zéb zarina.
25 Tawamhã Pedru norĩ Zuwã me, Wanhibꞌapito wasuꞌuwẽ na te te dama rowahutu zahuré parimhã, ma tô apâ tineb zahuré, Zeruzalẽ u. Neb zahuré wamhã, te sipa zahuré Samaria ꞌre, ꞌri waꞌõtõ mono bâ, Rowasuꞌuwẽ hã te te dama wasuꞌu zahuré mono da.
Filipi hã duré Etiopia ãma romhuriꞌwa dama ipire
26 Uburé Danhibꞌapito ma hâiwa hawi romhuriꞌwa hã ma tô Filipihi ma tinha, ãne:
— Aimorĩ hâiwa nhimiꞌe niwĩ, rop si ꞌre irosaꞌwari mono na bâdâdi inomro na Zeruzalẽ hawi, Gaza na ꞌri nhoꞌõmo nhisi u. (Taha bâdâdi na hã daꞌumro na te ãma ꞌre danomro.)
27 Tawamhã Filipi hã ma tô wahudu. Ma tô mo. Morĩ wamhã, bâdâdi na ma tô sõpẽtẽ, Etiopia ãma danhibꞌihâꞌa hã. Ta hã dama ipire robꞌuiprazé ꞌmadâꞌâꞌwa, Cãdasi na piꞌõ sirotiꞌwai ma, Etiopia ꞌre dama ipire ma hã. Ta hã aibâ hã ꞌRe ihâimana uꞌâsi mono ãma wata da, ma tô mo, Zeruzalẽ u.
28 Apâ morĩ wamhã tirob u, awaru na wedewara zapore ꞌre, te nhamra. Morĩ sina te te sõré, ꞌRe ihâimana uꞌâsi mono zadawa ꞌmahârâꞌwa Izaiasihi nhimiꞌuiꞌéré hã.
29 Tawamhã ꞌRe ihâimana uꞌâsi mono Pẽꞌẽzani ma tô Filipihi ma tinha:
— Itẽme asina rotété awaru na wedewara zapore u. Isababa aimorĩ.
30 Tawamhã Filipi hã wedewara zapore u ma tô wara. Ma tô wapa, danhibꞌihâꞌa hã te te sõré mono ré, ꞌRe ihâimana uꞌâsi mono zadawa ꞌmahârâꞌwa Izaiasihi nhimiꞌuiꞌéré hã. Tawamhã ma tô ꞌmahâ, ãne:
— E aima sadaihuꞌu pese di, isõré mono hã.
31 Tawamhã danhibꞌihâꞌa hã ma sadaꞌâ, ãne:
— E niha wa za sadaihuꞌu, niꞌwa hã te te ãma ĩma rowasuꞌu õ nherẽ.
Ãne wa, danhibꞌihâꞌa hã Filipihi zô ma tô hâ, itẽme sébré da, wedewara zapore na isababa sãmra da.
32 Tawamhã danhibꞌihâꞌa hã, ꞌRe ihâimana uꞌâsi mono mreme na Ibaihâ iwazé pese na te te isõré mono hã, ã hã:“Ma tô dasiwi saprõni ni, poneꞌẽrebâ ipãrĩzéb u da te isaprõni ne. Duré poneꞌẽrebâ iꞌrare iséré nhihâriꞌwa te te séré nhihâri wa, isadari õ ne, niha hã te te nharĩ õ di.
33 Ma tô tãma robꞌmanharĩ wasété ni, da te ꞌre danhisém nomri zaꞌra mono da, da te dama ꞌre irobꞌmanharĩ zaꞌra mono zém na. Iꞌuwaibaba hã da te tãma ꞌmanharĩ zaꞌra õ di. Isihudu hã da te dasima ꞌre iwasuꞌu zaꞌra mono da hã waihuꞌu õ di, bâdâ hã tãma ꞌrãsutu wa, tiꞌai ãma ꞌre ihâimana mono zé hã.”
34 Tawamhã danhibꞌihâꞌa hã te Filipi ãma sadanha, ãne:
— Maꞌãpé ĩma waihuꞌu! ꞌRe ihâimana uꞌâsi mono zadawa ꞌmahârâꞌwa hã, e ꞌwa hã te wasuꞌu. E niwamhã ꞌrâwi te siwasuꞌu. E aimawi hã.
35 Tawamhã Filipi hã robꞌuiꞌéré te te isõré mono zém na ma tô tãma rowasuꞌu naꞌrata. Zezusihi wasuꞌuwẽ itém na ma tô tãma rowasuꞌu.
36 Bâdâdi na sisamroi ré hã ma tô aimasisi zahuré, â ꞌre ihâimana mono u. Tawamhã danhibꞌihâꞌa hã ma tô Filipihi ma tinha, ãne:
— Maꞌãpé ꞌmadâꞌâ, õhõta â iré hã. E marĩ te te ĩwi roꞌwaꞌrutu da bâ, â dawabzuri te iꞌmanharĩ da hã.
37 Tahawa, Filipi hã ma ãma sadaꞌâ, ãne:
— Aipẽꞌẽ na sazei pese wamhã, te za tô iꞌmanha.
Tawamhã danhibꞌihâꞌa hã ma ãma sadaꞌâ, ãne:
— Ĩhe, tô sena wa saze, Zezu Cristu hã, ꞌRe ihâimana uꞌâsi mono ꞌra na.
38 Tahawa, danhibꞌihâꞌa hã ma tô tiꞌru, wedewara zapore simizazâri da. Tawamhã Filipi duré danhibꞌihâꞌa me âi ba ma tô siꞌra zahuré. Tame Filipi hã â dawabzuri ma tô tãma ꞌmanha.
39 Â hawi pusi wamhã, Uburé Danhibꞌapito pẽꞌẽzani hã ma tô tiꞌâ Filipi nimomo. Danhibꞌihâꞌa hã te te oto ꞌmadâꞌâ õ di. Tãma rowẽ uptabi sina, ma tô timorĩ na tite bâdâdi na ãma uzusi.
40 Tawamhã Filipi hã ma tô duré sihâiꞌré, Azotu na ꞌri nhoꞌõmo nhisi ãma. Ta hawi ma tô mo, Cézaréia u. Uburé ꞌri nhoꞌõmo na te te iroꞌrahâri mono zém na hã, ma tô Rowasuꞌuwẽ ité hã te te dama wasuꞌu.
Ĩwaꞌõtõ piꞌreba watsuꞌu mono
^ 8:5 Filipi hã Zezusihi zadawa wasuꞌuꞌwa norĩ pawaptoꞌwa, 7 na ihâiba zaꞌra norĩ siré hã, Zeruzalẽ ãma isazeiꞌwa norĩ te te ipisutu zaꞌra norĩ
