Lucas 18:1-43
18 Tawamhã Zezusi hã ma tô rowasuꞌu na romnhimiréꞌé, isiré ꞌre inomro mono norĩ ma, te te tãma hâiꞌré zaꞌra da, te te ꞌre rowaptẽrẽ uꞌâsi zaꞌra mono da, duré tiwi ꞌre robzeiꞌõ zaꞌra mono tõ da zama, ãne:
2 — Nimame ꞌri waꞌõtõ ꞌremhã, te ꞌre hâimana, daꞌãma rowairébéꞌwa hã, ꞌRe ihâimana uꞌâsi mono te te ꞌre iwazé mono õ hã duré isimiwazéb õ hã.
3 Tame ꞌri waꞌõtõ ꞌremhã te duré ꞌre sãmra, piꞌõi mrotõ hã. Ta hã te daꞌãma rowairébéꞌwa tẽme ꞌre neb uꞌâsi, te te tãma ãma rowairébé da. Te nasi tãma tinha, ãne: “Maꞌãpé ĩꞌãma aime na, duré rowairébé, ĩzada ihâimana hã iꞌuwaibaba na ĩma ꞌre hâimana mono da.”
4 — Tawamhã daꞌãma rowairébéꞌwa hã wahub ahâ na te te sima wẽ õ di, ite romhâimanazém na te te ãma irowairébé da hã. Tane nherẽ, ma tô oto rosaꞌrata, ãne: “Tô sena tô, ꞌRe ihâimana uꞌâsi mono hã te ꞌre wazé mono õ di. Duré ĩnhimiwazéb õ di.
5 Tane nherẽ, ã hã piꞌõi mrotõ te te we ĩwasutu uꞌâsi wa, wa za oto ite romhâimanazém na tãma rowairébé. Ãne hã te ꞌmanharĩ õ wamhã, te za we ĩwasutu uꞌâsi za.”
6 Tawamhã Wanhibꞌapito hã ma duré ãma uzusi, ãne:
— Maꞌãpé, wapari pese zaꞌra waꞌaba, daꞌãma rowairébéꞌwa sena ihâimanaꞌõ te te inharĩzém na hã.
7 E tawamhã, ꞌRe ihâimana uꞌâsi mono hã iꞌuwaibaba te te ꞌre ꞌmanharĩ mono õ di za bété, tinhibꞌaꞌuwẽ norĩ ma hã, bâtâ bâre duré mara bâre, isimipawaptobzéb zô, sô ꞌre ihãsi mono norĩ ma hã. E sô rowaptâꞌâ da bâ, za te te ipawaptob zaꞌra da hã.
8 Tô sena wa za aima waihuꞌu zaꞌra waꞌwa, ãne: Iꞌuwaibaba na te za tô rowairébé waptu na, tinhibꞌaꞌuwẽ norĩ niwĩmhã. Tazahã, Tiꞌai ãma Dasiré Ipodo hã niwa apâ wei morĩ wamhã, e te za ꞌmanhopẽtẽ, da te dasina ꞌre iꞌumnhasi zaꞌra mono zé hã.
Farizeu duré danhibꞌapito ma, robꞌuiprazé arĩ ubumroiꞌwa
9 Tawamhã Zezusi hã ma tô duré rowasuꞌu na romnhimiréꞌé, niꞌwam norĩ hã wẽ na ꞌre inomro mono na, ꞌre isiꞌmadâꞌâ ze zaꞌra mono norĩ ma, duré te te ꞌre idaꞌruiwapari zaꞌra mono norĩ ma, ãne:
10 — Aibâ norĩ hã ma tô tineb zahuré ꞌRe ihâimana uꞌâsi mono nhorõwa ꞌri ꞌrãihâ u, te te rowaptẽrẽ zahuré da. Ihâiba amo hã farizeu. Duré ihâiba amo hã danhibꞌapito ma robꞌuiprazé arĩ ubumroiꞌwa.
11 Zasi wamhã, farizeu hã hâiwi ma tô za. Siwaprosi te rowaptẽ, ãne: “ꞌRe ihâimana uꞌâsi mono, wa aiꞌãma ĩwata, wa hã dasinei õ wa, ĩnhimisaihuri õ wa, senaiꞌõ na ꞌre ĩhâimana mono õ wa, duré piꞌõ na dawi ꞌre ĩnhimisaihuri mono õ wab zama, duré ã hã robꞌuiprazé arĩ ubumroiꞌwa ꞌre imorĩ nei õ wa.
12 Romhuri ꞌremhã maparane ãma isahu na wa ĩsai ãna ꞌre ĩhâimana mono na hã te ꞌre ꞌmanharĩ. Ĩnhoprubzé, wa duré te ꞌre poꞌo aima hã, uburé ĩpawaꞌâ te ꞌre imrami mono na hã.”
13 — Tanei õ di, robꞌuiprazé arĩ ubumroiꞌwa hã. Romhâ na te za. Duré hâimo hã te te robꞌmadâꞌâ õ di. Tinhoꞌutu wi si te nasi siꞌahâ. Ãne ma tô rowaptẽ: “ꞌRe ihâimana uꞌâsi mono, maꞌãpé ĩꞌãma aiwamri na. Wa hã ĩwasétére na wa ꞌre mo.”
14 Tawamhã Zezusi hã ma tô ãma ꞌrãsutu, ãne:
— Tô sena wa za aima waihuꞌu zaꞌra waꞌwa, ãne: Robꞌuiprazé arĩ ubumroiꞌwa si ma tô tinhorõwa u hã mo, ꞌRe ihâimana uꞌâsi mono te te iwẽsãmri na. E marĩ wa. Niꞌwa hã danhipai u na ꞌre siꞌmadâꞌâ zei mono wamhã, ꞌRe ihâimana uꞌâsi mono hã te za te te ꞌre sisém nomri. Tanei õ di, niꞌwa hã tiwapu na ꞌre siꞌmadâꞌâ mono wamhã, ꞌRe ihâimana uꞌâsi mono hã te za hâimo te te ꞌre simizusi.
Zezusi hã aiꞌuté norĩ te te iꞌazawizé
15 Taha parimhã, niꞌwam norĩ hã ma tô aiꞌuté norĩ hã ãwisi zaꞌra Zezusihi u, ãma mreme zaꞌra da, iwẽ hã te te tãma apisutu da. Tane nherẽ, isiré ꞌre inomro mono norĩ ãne hã te te ꞌmadâꞌâ zaꞌra wamhã, ma tô timreme hã dama pẽtẽ zaꞌra, aiꞌuté te te itẽme iꞌwasari norĩ ma.
16 Tane nherẽ, Zezusi hã aiꞌuté norĩ zô ma tô sitẽme sô tihârâ zaꞌra. Ãne ma tô tinha, isiré ꞌre inomro mono norĩ ma:
— Aꞌâ we ĩtẽme siꞌabaꞌré, aiꞌuté norĩ hã. Tiwi rosawi zaꞌra waꞌaba tõ, ãne hã te te ꞌmanharĩ zaꞌra tõ da hã. E marĩ wa. ꞌRe ihâimana uꞌâsi mono hâiwa ãma daꞌãma ꞌre isibꞌaꞌuwẽ mono zé hã, niꞌwam norĩ hã aiꞌuté ne ꞌre ihâimana zaꞌra mono norĩ te si.
17 Tô sena wa za aima waihuꞌu zaꞌra waꞌwa, ãne: Niꞌwa hã, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé, aiꞌuté norĩ ne, te te âri wẽ õ wamhã, niwa iwa isébré da hã, mare di.
Aibâ iprédupté isibro pe
18 Tawamhã Zudeu norĩ ma rotiꞌwa hã ma tô Zezusi sadanha, ãne:
— Rowahutuꞌwa iꞌaiwẽ, e marĩ wa za ꞌmanha, dahâimanazé isiꞌutõrĩꞌõ te ĩsina uwaimrami da hã.
19 Tawamhã Zezusi hã ma tô sadaꞌâ, ãne:
— E marĩ da, ma tô ĩwẽ na ĩꞌãma aiwa. ꞌRe ihâimana uꞌâsi mono si iwẽ hã. Niꞌwa isine hã hâimana õ di.
20 Aima waihuꞌu pese di, ꞌRe ihâimana uꞌâsi mono nhimiroti zahi norĩ, ãne hã: “Damro na dawi asipsaihuri tõ. Daꞌmaiwĩrĩ tõ. Marĩ simiꞌuri tõ. Tô senai õ nherẽ, niha na dawasuꞌu wasété tõ. Aimama ꞌre wazé pese mono, ana zama.”
21 Tawamhã aibâ hã ma tô ãma sadaꞌâ, ãne:
— Ĩzapore hawim haré, wa tô uburé ã norĩ isimiroti zahi hã te ꞌre aꞌmadâꞌâ pese.
22 Tawamhã Zezusi hã isiꞌrãzarõtõzé te te wapari wamhã, ma tô tãma tinha, ãne:
— Marĩ zô misi te aiwi rowaptâ, iꞌmanharĩ da hã. Maꞌãpé uburé asibro hã dama wede zaꞌra na. Taha pari, robꞌuiprazé iwaꞌâ hã isibrobꞌõ norĩ ma sõmri mono. Tawapsi te za marĩ iwẽ uptabi hã hâiwa ãma asô ꞌre hâimana zaꞌra, tiꞌai ãma marĩ iwaꞌâbâ zaꞌẽne ꞌre ihâimana zaꞌra mono ne. Taha parip si we aimorĩ, ĩzarina ꞌre aimorĩ da.
23 Tawamhã aibâ iprédupté, ãne hã te te wapari wamhã, ma tô tiwi tirobzeiꞌõ pese, sibro pese uptabi wa.
24 Tawamhã Zezusi hã tiwi irobzeiꞌõ na te te waihuꞌu wamhã, ma tô tinha, ãne:
— E niha ipire uptabi, isibro pese norĩ, ꞌRe ihâimana uꞌâsi mono, daꞌãma ꞌre isibꞌaꞌuwẽ mono zéb u ꞌre isisisi mono da hã.
25 Awaru baꞌõmore hã isiꞌuwazi zazahâ hâibabarĩzé paraꞌõtõ zapuꞌu ꞌre, isébré waihuꞌu õ nhipai u, isibro pe hã sébré waihuꞌu õ di, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb u hã.
26 Tahawa, iwapariꞌwa norĩ hã ma tô siwi sadanha, ãne:
— Tane wamhã bété, e ꞌwa hã tinhoꞌreptuzé te te sina uwaimrami da bâ.
27 Tawamhã Zezusi hã ma tô tãma waihuꞌu zaꞌra, ãne:
— Marĩ hã tiꞌai ãma aꞌuwẽ norĩ ma iꞌmanharĩ waihuꞌuꞌõ hã, ꞌRe ihâimana uꞌâsi mono ma hã wapure di.
28 Tawamhã Pedru hã ma tô tãma tinha, ãne:
— Wa norĩ hã bété. Uburé marĩ hã wa tô rẽme zaꞌra ni, asarina ꞌre wanomro mono da.
29 Tawamhã Zezusi hã ma tô ãma sadaꞌâ, ãne:
— Tô sena wa za aima waihuꞌu zaꞌra waꞌwa, ãne: Niꞌwa hã ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb uꞌâbâ, tinhorõwa, duré timro, duré tisisãnawã norĩ, duré tisiwadi norĩ niwamhã tiꞌra norĩ hã te te aꞌâ sisaꞌu ꞌre rẽme zaꞌra mono wamhã,
30 ta norĩ nhipai u pese te za marĩ iwẽ hã waibu, tiꞌai ãma ꞌre hâimana mono ré hã. Duré romhutuꞌõmhã te za dahâimanazé isiꞌutõrĩꞌõ hã sina uwaimra.
Zezusi hã siꞌubdatõ ãma isiwasuꞌuzé, tidâꞌâzém na duré za apâ ihâiwaꞌutuzém na zama
31 Tawamhã Zezusi hã aibâ norĩ 12 na ihâiba zaꞌra norĩ zô ma tô hâ. Ma tô tãma nharĩ zaꞌra, ãne:
— Ĩwapari zaꞌra waꞌaba! Zeruzalẽ u, wa aiꞌabaꞌré ni. Tawamhã tame, Tiꞌai ãma Dasiré Ipoto ãma ꞌRe ihâimana uꞌâsi mono zadawa ꞌmahârâꞌwa norĩ te te ãma irobꞌuiꞌéré zaꞌra zém na te za uburé sina uwaimra.
32 Ta hã te za dasiwi hâiba nhomri ni, Zudeuꞌõ norĩ ma. Tawamhã ta norĩ hã te za ãma tiwaꞌẽ zaꞌra. Te za ãma wasété zaꞌra. Tizadaipro na te za nasi siwi upto.
33 Te za te te siwi ꞌre préꞌé. Taha pari, te za duré siwi tiwĩ. Tane nherẽ, siꞌubdatõ bâtâ ãma te za apâ hâiwaꞌudu.
34 Tane nherẽ, isiré ꞌre inomro mono norĩ hã, ãne Zezusi te te sina tãma inharĩ zaꞌra zé hã, te te siwi sadaihuꞌu õ di, simiꞌuri na tiwi hâimana zaꞌra wa. Tahawa te te sadaihuꞌu zaꞌra õ di, tãma isiwasuꞌu zaꞌra zé hã.
Zezusi hã aibâ itobꞌa te te ito pesezé
35 Tawamhã Zezusi hã ma tô oto sina rotété, Zerico u. Tame te aibâ itobꞌa hã nhamra, bâdâdi zadaꞌré ãma. Ta hã te nasi daꞌawa.
36 Tawamhã daꞌahâ uptabi na da te iroꞌrahâri zaꞌra na te te daꞌawapari wamhã, ma tô anha, marĩ hâimana zô.
37 Tahawa, ma tô tãma rowasuꞌu zaꞌra ni, ãne:
— Zezusi, Nazaré ãma iprédu, ma roꞌrazâ.
38 Tahawa aibâ itobꞌa hã te oto nasi ꞌmahâ, ãne:
— Zezusi, Davihi nhihudu, maꞌãpé ĩꞌãma aipẽꞌẽzé na!
39 Tawamhã niꞌwam norĩ hã danhowa isiꞌabaꞌré hã ma tô timreme hã tãma ꞌmorõpãrĩ zaꞌra, ariꞌiwi sãmra da. Tane nherẽ, ma tô nasi ꞌmahâ, ãne:
— Davihi nhihudu, maꞌãpé ĩꞌãma aipẽꞌẽzé na!
40 Tawamhã Zezusi hã ma tô mazazâ. Ma tô tiꞌru, aibâ itobꞌa hã da te dasiwi saprõni da itẽme. Tawamhã ꞌrâwi itẽme te te sina rotété wamhã, Zezusi hã ma tô sadanha, ãne:
41 — E marĩ te asima iwẽ, te aima iꞌmanharĩ da hã.
— Apito, apâ te robꞌmadâꞌâ da, wa ĩsima wẽ. — Ãne ma tô aibâ itobꞌa hã sadaꞌâ.
42 Tawamhã Zezusi hã te tãma tinha, ãne:
— Maꞌãpé apâ robꞌmadâꞌâ. Asina ĩꞌumnhasizé hã ma aipese.
43 Tawamhã awaꞌawi pesere aibâ itobꞌa hã ma tô oto robꞌmadâ. Tahawa Zezusihi zarina ma tô oto mo, ꞌRe ihâimana uꞌâsi mono ãma wata mono sina. Ãne hã da te wapari zaꞌra wamhã, ꞌRe ihâimana uꞌâsi mono ãma ma tô tawata zaꞌra ni.
