Lucas 19:1-48
19 Tawamhã Zezusi hã ma tô oto ãzé, Zerico na. Te oto roꞌrazâ, taha ꞌri waꞌõtõ na.
2 Tawamhã tame te ꞌre sãmra, aibâ isibro pe Zaqueu na isisi hã. Ta hã danhibꞌapito ma robꞌuiprazé arĩ ubumroiꞌwa norĩ nhibꞌihâꞌa.
3 Ta hã ma tô aré sima wẽ, niꞌwa hã zô Zezusi te te ꞌmadâꞌâ da. Tane nherẽ, sapore wa, te te ꞌmadâꞌâ waihuꞌu õ di, duré daꞌahâ uptabi wa.
4 Tahawa, danhowa ma tô wara. Robꞌrã figu wede na ma tô saiꞌu, taha waꞌwaibaba Zezusi hã za te te roꞌrazâri wa.
5 Tawamhã Zezusi hã wede zahâpâ u oto wisi wamhã, hâimo ma tô robꞌmadâ. Tame ma tô Zaqueu ꞌmahâ, ãne:
— Zaqueu, maꞌãpé waptu na siꞌra na. Wa ĩsima wẽ, ã bâtâ na hã asõrõwa ãma ĩnhamra da.
6 Tawamhã Zaqueu hã waptu na ma tô siꞌra. To sina ma tô ꞌmazé, tinhorõwa u.
7 Tawamhã isõrõwa u isébré na, uburé da te ꞌmadâꞌâ zaꞌra wamhã, ma tô dasima ãma wasété zaꞌra ni, ãne:
— E niha hã ma tô ãzé, aibâ iwasété nhorõwa u.
8 Tawamhã Zaqueu hã hâiwi ma tô za. Wanhibꞌapito ma, ma tô tinha, ãne:
— Apito, ĩwapari! Isibrobꞌõ norĩ ma, wa za ĩnhibrom na aiwa ãma aipoꞌo. Niꞌwai wi ãma ĩnhimisaihuri wamhã, wa za ãma tãma sisiwi, maparane siꞌuiwa na.
9 Tahawa Zezusi hã ma tô tãma tinha, ãne:
— Ã bâtâ na hã, ãwa ꞌri u ma tô danhoꞌreptuzé hã we ãzé. E marĩ wa. Ã hã aibâ zama Abraꞌãhã nhihudu ꞌre hâimana mono wa duré.
10 Tiꞌai ãma Dasiré Ipodo hã ma tô wei mo, siwaꞌru ꞌre inomro mono zô ꞌre rĩtĩ mono da, duré te te ꞌre anhoꞌreptui mono da.
Apito, duré 10 na tãma iromhuriꞌwa norĩ
11 Tawamhã Zezusi hã ma tô duré romnhimiréꞌé na rowasuꞌu, te te inharĩzém na te te iwapari zaꞌra norĩ ma. Zeruzalẽ ꞌrata ꞌrâwi oto hâimana wa, ma tô ta norĩ hã ãma rosaꞌrata zaꞌra, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã, za iwisi suꞌu na hã.
12 Tahawa, Zezusi hã ma tô tãma rowasuꞌu zaꞌra romnhimiréꞌé na, ãne:
— Nimahã na aibâ hã, imama sipoto hawi aꞌuwẽ norĩ pire na ꞌre ihâimana zaꞌra mono hawimhã, ma tô mo tiꞌai waꞌõtõ nhoꞌu romhâ na uptabi ꞌre ihâimana mono u, tame siꞌapito da, taha parip si apâ te te sina siri da, tirob u hã.
13 Tawamhã morĩ wana ré, tite romhuriꞌwa norĩ 10 na ihâiba zaꞌra norĩ zô ma tô hâ. Hâiba mono bâ ma tô misisi robꞌuiprazé isapotore ẽtẽ waipo pré oru ꞌmanharĩ hã tãma sõmri zaꞌra. Taha pari ma tô tãma nharĩ zaꞌra, ãne: “Maꞌãpé ã hã robꞌuiprazém na, marĩ hã ãma ꞌmanharĩ zaꞌra waꞌaba, ãma sisiwi zaꞌra waꞌaba da, apâ we te ĩsina isirizéb u.”
14 — Tane nherẽ, ite tiꞌai waꞌõtõ nhoꞌõmo ãma hã, te te siwi ꞌru ti. Tahawa ma tô isãmrazéb u tiꞌai waꞌõtõ nhoꞌõmo amoi u dazatõrĩ zaꞌra, tame apito ma, te te nharĩ zaꞌra da, ãne: “Wa te wasima wẽ zaꞌra õ di, ã hã aibâ, wama isiꞌapito zaꞌra da hã.”
15 — Tane nherẽ, apito hã ma tô pisutu, siꞌapito da. Taha pari aibâ hã ma tô apâ sina siri, tinhiptiꞌai u. Tawamhã tãma iromhuriꞌwa norĩ zô ma tô tihârâ zaꞌra, robꞌuiprazé te te tãma isõmri zaꞌra norĩ zô, niha te te ãma tãma isisiwi zaꞌra zô, te te waihuꞌu da.
16 Tawamhã imorĩꞌrada hã ma tô itẽme wi. Ma tô tãma wasuꞌu, ãne: “Apito, robꞌuiprazé isapotore ẽtẽ waipo pré oru ꞌmanharĩ ĩma isõmri hã, wa tô ãma aima sisiwi, 10 na.”
17 — Tawamhã isibꞌapito hã ma tô tãma tinha, ãne: “Wẽ uptabi di! A hã romhuriꞌwa iꞌaiwẽ! Marĩ surure nherẽ, sena na te ãma aihâiba. Tahawa 10 na ꞌri waꞌõtõ norĩ ꞌmadâꞌâꞌwa na te za oto ꞌre aihâimana mo.”
18 — Tawamhã maparane ãma ma tô duré itẽme wi. Ta hã ma tô duré tãma siwasuꞌu, ãne: “Apito, robꞌuiprazé ĩma isõmri ẽtẽ waipo pré oru ꞌmanharĩ hã, wa tô ãma aima sisiwi, imrotõ na duré.”
19 — Tawamhã isibꞌapito hã ma tô tãma tinha, ãne: “Tane tô. Wa za aima pisutu, ꞌri waꞌõno hã imrotõ na, ꞌre abꞌmadâꞌâ mono da.”
20 — Tawamhã romhuriꞌwa ihâiba amo hã ma tô duré itẽme wi. Ta hã ma tô duré tãma siwasuꞌu, ãne: “Apito, ãhãta ate robꞌuiprazé isapotore. Zazahâ na, wa tô ubu. Taha pari wa tô simiꞌu.
21 Wa tô aima ĩpahi, a hã aibâ iꞌaihâimana tete na ĩma aiwaihuꞌu pese wa, duré atei õ nherẽ, dawi ꞌre iꞌazani mono na hã, duré nimame iꞌaꞌre õ ãma ꞌre iꞌaroptehâri mono na hã.”
22 — Tawamhã isibꞌapito hã ma tô tãma tinha, ãne: “A hã romhuriꞌwa iꞌaiwasétére! Wa za aiꞌãma rowairébé niha hã, ĩma inharĩzéb zarina. Aima ĩwaihuꞌu pese di pâ, ĩhâimana tete na hã duré ĩtei õ nherẽ, te dawi ꞌre iꞌazani mono na hã duré te ꞌre iroptehâri mono na hã nimame te ꞌre irobꞌre mono õ ãma.
23 Tane ze te bâ, e niha bâ bété ĩte robꞌuiprazé hã sẽrẽ õ di, robꞌuiprazé ubumrozéb ꞌre*. Tawamhã apâ we ĩwisi wamhã, wa aré tiꞌâ, robꞌuiprazé ubumrozé te te ãma ĩma isisiwizéb zu.”
24 — Tawamhã iꞌrata isimasam norĩ ma, ma tô tinha, ãne: “Maꞌãpé robꞌuiprazé isapotore tiwi wazere aba, 10 na robꞌuiprazé tãma ihâimana ma, sõmri aba da.”
25 — Tane nherẽ, ma tô siwi sadaꞌâ, ãne: “Apito, oro ite hã 10 na robꞌuiprazé isapotore hã tãma hâimana siromo zaꞌra za.”
26 — Tawamhã isibꞌapito hã ma tô duré tãma nharĩ zaꞌra, ãne:
— “Tô sena wa za aima waihuꞌu zaꞌra waꞌwa, ãne: Niꞌwai ma marĩ hã saꞌẽtẽ na hâimana wamhã, te za duré ãma tãma sisiwi, saꞌẽtẽ na tãma hâimana da. Tane nherẽ, niꞌwai ma hâimana õ wamhã, suru na tãma hâimana nherẽ, te za tô tiwi wazere ni.
27 Tahawa, maꞌãpé ĩnhitobꞌru norĩ hã we simroi waꞌaba mono, apito na tãma ꞌre ĩhâimana zaꞌra mono da, te te sima iwẽ zaꞌra õ hã. Taha pari, maꞌãpé simroi waꞌaba ĩnhoꞌre.”
Zezusi hã, Zeruzalẽ u oto iwisizé
28 Tawamhã Zezusi hã ãne na te te tãma rowasuꞌu zaꞌra parimhã, isõwab zaꞌra ma tô oto mo, Zeruzalẽ u.
29 Tawamhã Olivera ẽtẽ ꞌrãihâ nhisi ꞌrata Betifazé u, duré Betãnia u sihutu wamhã oto, Zezusi hã ma tô maparane sisõwa satõrĩ zahuré isiré ꞌre inomro mono norĩ siré hã,
30 te te tãma iroti zahuré ré, ãne:
— Mo oto ane waꞌaba, ꞌri waꞌõno wanhowab zaꞌra ihâimana u. Azasi aba wi, te za awaru poꞌrepore ihâiba tébre hã isõpẽtẽ ꞌwa za, butu wazi na isa, zahadu niꞌwa ãma isãmra õ hã. Ta hã wasihui waꞌaba za, we ĩma saprõni aba da.
31 Niꞌwa hã te te ãma asadanharĩ aba wamhã, ãne: “E marĩ da, te iwasihui waꞌwa”, ãne tãma wasuꞌu waꞌaba za: “Wanhibꞌapito te sô amnhasi”.
32 Tawamhã oto neb zahuré wamhã, ma tô awaru poꞌrepore hã sõpẽtẽ zahuré, Zezusi te te ãma tãma irowasuꞌu zahuré zéb zarina.
33 Tawamhã awaru poꞌrepore ihâiba té hã te te wasihu zahuré ré, te itedeꞌwa norĩ hã sadanharĩ zahuré, ãne:
— E marĩ da, te awaru poꞌrepore hã iwasihui waꞌwa.
34 Tawamhã ma tô sadaꞌâbâ zahuré, ãne:
— Rowahutuꞌwa hã te sô amnhasi.
35 Tahawa, awaru poꞌrepore ihâiba té hã ma tô oto saprõni zahuré, Zezusihi ma. Tiꞌuza ihâpa na ma tô bazadâ zahuré. Zezusi hã ma tô duré pawaptob zahuré, iba nhisiwi ãma sãmra da hã.
36 Tawamhã ãma morĩ wamhã oto, daꞌuza ihâpa na ma tô da te tãma waptâ zaꞌra, bâdâdi na.
37 Tawamhã Zezusi hã ẽtẽ ꞌrãihâ Olivera na siꞌrazéb u te te oto sina rosahutu wamhã, uburé daꞌahâ uptabi na isazeiꞌwa norĩ hã ma tô ãma sãnaꞌrata zaꞌra ni, dato sina, ꞌRe ihâimana uꞌâsi mono ãma dawata zaꞌra mono na hã, duré damreme ꞌrãihâ sina, uburé marĩ dama iꞌmanharĩ waihuꞌuꞌõ hã da te iꞌmadâꞌâ zaꞌra zém na, ãne:
—
38 Apito, Uburé Danhibꞌapito nhisi na we imorĩ hã, ꞌRe ihâimana uꞌâsi mono iwẽ hã te te tãma ꞌre ipisutu uꞌâsi mono da si, iwẽ hã! Hâiwa ãma rowẽ uꞌâ hã ꞌre isaꞌwari mono da si. Duré ꞌRe ihâimana uꞌâsi mono ãma zama, ꞌre wawata zaꞌra waꞌaba mono, hâiwa ãma ꞌre isãmra mono ãma!
39 Tawamhã nima norĩ farizeu norĩ dawazari ihâimana zaꞌra hã ma tô Zezusihi ma nharĩ zaꞌra, ãne:
— Rowahutuꞌwa, maꞌãpé asazeiꞌwa norĩ ma nharĩ zaꞌra na, hãsi mono tõ da.
40 Tahawa Zezusi hã ma tô ãma sadaꞌâbâ zaꞌra, ãne:
— Tô sena wa za aima waihuꞌu zaꞌra waꞌwa, ãne: Ariꞌiwi siꞌabaꞌré da wamhã, ẽtẽ norĩ hã te za hãsi, isibrobꞌreb zaꞌra.
Zezusi hã isiwaꞌõzé, Zeruzalẽ ãma pẽꞌẽzé wa
41 Tawamhã Zezusi hã Zeruzalẽ u te te oto robꞌumhutu wamhã, ma tô ꞌmadâ, ꞌri waꞌõno hã. Tahawa ma tô aiwaꞌõ, ãma pẽꞌẽzé wa.
42 Tahawa, ma tô tinha, ãne:
— Zeruzalẽ! Ãhã na aima waihuꞌu pese ꞌwaꞌâhã, sô iꞌasimnhasi na hã rowẽ aima hâimana da hã! Tane nherẽ, ãhã na hã, ta hã aima ꞌmadâꞌâ waihuꞌu õ di, simiꞌuri na aiwi hâimana wa.
43 Niwapsi, bâdâ hã te za wi, asitobꞌru norĩ hã waꞌra ꞌrãihâ te te siwi iꞌmanharĩ na, za te te siwi iꞌaiꞌuirĩzé hã. Te za siwi aiꞌuirĩ ropâ, aiꞌaꞌre siꞌuiwa na hã.
44 Tawamhã ta norĩ hã te za uburé siwi aipru pese. Duré uburé aiwa ꞌre isiꞌubumroi mono norĩ zama te za siwi uprosi. Ẽne hã sisisiwi simiꞌwara õ di za oto, aima sadaihuꞌu õ wa, bâdâ ꞌRe ihâimana uꞌâsi mono we imorĩzé hã te te daꞌanhoꞌreptu da hã.
Zezusi hã te te idazate mono zé, ꞌRe ihâimana uꞌâsi mono nhorõwa ꞌri ꞌrãihâ hawi
45 Tawamhã Zezusi hã ma tô ãzé, ꞌRe ihâimana uꞌâsi mono nhorõwa ꞌri ꞌrãihâ u, ꞌri ꞌwawi waꞌra ꞌre. Tame ma tô ta hawi te te iwanoꞌõ mono na sãnaꞌrata, te te irowede zaꞌra norĩ hã.
46 Ãne te tãma nharĩ zaꞌra:
— ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te nomro, ãne: “Ĩnhorõwa hã te za da te dasiwi ꞌre sisi, da te ĩwi ꞌre irowaptẽrẽ zaꞌra mono zém na.” Tane nherẽ, a norĩ waꞌwa hã ma tô isimisaihuri norĩ simaꞌurizém na asiwi iꞌmanharĩ ꞌwa.
47 Tawamhã bâtâ sidâpâsi, ma tô Zezusi hã te te dama ꞌre rowahutu, ꞌRe ihâimana uꞌâsi mono nhorõwa ꞌri ꞌrãihâ ãma hã, ꞌri ꞌwawi waꞌra ꞌre. Tane nherẽ, sasedoti norĩ nhibꞌihâꞌa norĩ hã, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã duré dama rotiꞌwa norĩ zama, ma tô sô ꞌre sõpré, te te siwi wĩrĩ da hã.
48 Tane nherẽ, te te siwi wĩrĩ waihuꞌu õ di, niha te te siwi iwĩrĩzé hã, te te sada ꞌmasãmri zaꞌra õ wa, imreme hã da te ꞌre wapari pese zaꞌra mono wa.
Ĩwaꞌõtõ piꞌreba watsuꞌu mono
^ 19:23 Robꞌuiprazé ubumrozé hã “Banco” na hã.
