Lucas 20:1-47
20 Nimahã bâtâ na hã, Zezusi hã ma tô Rowasuꞌuwẽ itém na dama rowahutu, ꞌRe ihâimana uꞌâsi mono nhorõwa ꞌri ꞌrãihâ ãma, ꞌri ꞌwawi waꞌra ꞌre. Taha ré ma tô itẽme aimasa, sasedoti norĩ nhibꞌihâꞌa norĩ hã, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã, duré Zudeu norĩ ma rotiꞌwa norĩ zama.
2 Ta norĩ hã ma tô siwi sadanha, ãne:
— Maꞌãpé wama wasuꞌu zaꞌra na: E ꞌwa sadawa para ma tô ãhã marĩ hã ꞌre iꞌabꞌmanharĩ mo. E ꞌwa hã ma tô asimiroti pire aima tisõ.
3 Tawamhã Zezusi hã ma tô asa tãma nharĩ zaꞌra, ãne:
— Ĩzama wa za duré asa asadanharĩ zaꞌra waꞌwa. Maꞌãpé ĩma waihuꞌu zaꞌra waꞌaba za.
4 E ꞌwa sadawa para, Zuwã hã ma tô â dawabzuri hã te te dama ꞌre abꞌmanharĩ. E ꞌRe ihâimana uꞌâsi mono zadawa para, e niwamhã tiꞌai ãma dazadawa para.
5 Tahawa, ma tô sima nharĩ zaꞌra, ãne:
— ꞌRe ihâimana uꞌâsi mono zadawa param na, wa te ãma wasiwi sadaꞌâbâ wamhã, te za wazadanharĩ zaꞌra, ãne: “Tawamhã bété, e niha bâ Zuwã hã asiwi sazei waꞌaba õ di.”
6 Tazahã, tiꞌai ãma dazadawa param na, wa te ãma sadaꞌâbâ zaꞌra wamhã, ã hã daꞌahâ uptabi hã te za ẽtẽ na dasiwi waꞌuprosi ni, Zuwã hã ꞌRe ihâimana uꞌâsi mono zadawa ꞌmahârâꞌwa na, da te dasiwi ꞌre ꞌmadâꞌâ mono wa.
7 Tahawa, ma tô siwi sadaꞌâ, ãne:
— Wa te waihuꞌu zaꞌra õ di, niꞌwa sadawa para Zuwã hã â dawabzuri te te dama ꞌre iꞌabꞌmanharĩ mono na hã.
8 Tawamhã Zezusi hã ma tô asa tãma nharĩ zaꞌra, ãne:
— Tane duré wa hã, te aima waihuꞌu zaꞌra waꞌaba õ di za, niꞌwa sadawa para, ã hã marĩ te ꞌre iꞌabꞌmanharĩ mono na hã.
Buru ꞌmadâꞌâꞌwa norĩ iwasété norĩ
9 Taha parimhã, Zezusi hã ma tô duré dama rowasuꞌu romnhimiréꞌé na, ãne:
— Aibâ hã ma tô aꞌre, uvaꞌru hã. Tawamhã buru ꞌmadâꞌâꞌwa norĩ ma, ma tisõ, iwaꞌâbâ apoꞌo zô. Taha pari darob amoi u ma tô mo romhâ na, wahub ahâ na aꞌâ sãmra da, tame.
10 Tawamhã iꞌrã nhinarĩzé bâdâ oto wisi wamhã, tite romhuriꞌwa hã ma tô ꞌmazatõ, iꞌrãi apo hã te te tãma sõmri zaꞌra da, ite hã. Tane nherẽ, buru ꞌmadâꞌâꞌwa norĩ hã ma tô siwi azâ. Taha pari ubana ma tô siwi satõ.
11 Tawamhã aimawi hã ma tô duré ꞌmazatõ. Tane nherẽ, ta hã ma tô duré siwi azâ. Taha pari ma tô tãma robꞌmanharĩ zaꞌra, sisém na apâ morĩ da. Taha pari ma tô siwi satõ, sibꞌrata baba na.
12 Tawamhã siꞌubdatõ ãma hã ma tô duré satõ tite romhuriꞌwa hã. Tane nherẽ, ta hã buru ꞌmadâꞌâꞌwa norĩ hã ma tô duré siwi uꞌa, taha pari ma tô duré siwi sama apâ.
13 Tawamhã buru tedeꞌwa hã ma tô sima tinha, ãne: “E marĩ wa za oto ꞌmanha. Ĩꞌra hã wa za oto satõ ĩma isawi uptabi hã. Ãté ta hã te za siwi wazé.”
14 — Tane nherẽ, buru ꞌmadâꞌâꞌwa norĩ hã, iꞌra te te siwi ꞌmadâꞌâ wamhã, ma tô sima nharĩ zaꞌra, ãne: “Õ hã, buru tedeꞌwai ꞌra. Niwamhã õhõ te hã za, buru hã. Oto wa te wasiwi wĩrĩ aba. Tawamhã buru hã wate zaꞌra za oto.”
15 — Tawamhã buru nhiti ma tô siwi time. Tame ma tô siwi tiwĩ.
— Ãne wamhã, e marĩ te za ꞌmanha, buru tedeꞌwa hã.
16 Te za sô timorĩ zaꞌra. Tawamhã te za uprosi, buru ꞌmadâꞌâꞌwa norĩ hã. Taha parimhã te za tisõ oto, aimawi norĩ buru ꞌmadâꞌâꞌwa norĩ ma.
Tawamhã ãne hã Zezusihi nhimirowasuꞌu da te iwapari zaꞌra norĩ hã ma tô nharĩ zaꞌra ni, ãne:
— Õne hã niwa iromhâimana õ da si.
17 Tawamhã Zezusi hã ma tô daꞌaꞌmadâꞌâ pese. Taha pari ma tô daꞌazadanha, ãne:
— Tawamhã bété e marĩ te wasuꞌu, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré inomro hã, ã hã: “Ẽne, ꞌriꞌwa norĩ te te siwi iwẽꞌõ hã, ta hã danhipai u te pire uptabi na oto tihâiba.”
18 Ã hã ẽtẽ nhisiwi, niꞌwa hã waptãꞌã wamhã, te za te te waꞌõtõ ꞌrare. Duré ã hã ẽne hã niꞌwa nhisiwi waptãꞌã wamhã, te za su pese.
Zezusi hã, da te dasiwi isadanharĩzé, robꞌuiprazé danhibꞌapito ma, da te ꞌre iꞌarĩ zaꞌra mono zém na
19 Tawamhã ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã duré sasedoti norĩ zama, ma tô sina sadaihuꞌu zaꞌra, Zezusi hã rowasuꞌu na romnhimiré te te iwasuꞌu hã, tô õ norĩ udâna na hã. Tahawa tô aré tame te te siwi iꞌâri da si. Tane nherẽ, dama pahi zaꞌra di.
20 Tahawa, ma tô Zezusihi hâimanazém na tirĩtĩ nhoꞌõmo zaꞌra oto. Wapsãiꞌaꞌwa norĩ hã ma tô duré satõrĩ zaꞌra, sena newa isiré hâimana zaꞌra da, Zezusi hã te te siwi âri da, nimame marĩ na te te iꞌupazéb ãma hã, tawapsi te te siwi ãwisi da, daꞌãma rowairébézéb u, duré apito u zama.
21 Tawamhã wapsãiꞌaꞌwa norĩ hã ma tô siwi sadanha, ãne:
— Rowahutuꞌwa, wa aiwaihuꞌu zaꞌra ni, sena na ꞌre inharĩ mono na hã duré iꞌuwaibaba na si ꞌre irowahutu mono na hã, duré iꞌasimibaꞌa õ na hã. Tazahã, ꞌRe ihâimana uꞌâsi mono te, bâdâdi na sena uptabi te dama ꞌre irowahutu mo.
22 Tahawa, maꞌãpé ãma wazadaꞌâbâ zaꞌra na. E iꞌuwaibaba, robꞌuiprazé arĩ hã, Cézaha ma, wa te ꞌre iwaꞌâbâ zaꞌra mono da hã. E niwamhã mare di.
23 Tane nherẽ, Zezusi hã ma tô tiwi waihuꞌu zaꞌra, hâimana nhipese na te te siwi isadanharĩ na hã. Tahawa ma tô tãma nharĩ zaꞌra, ãne:
24 — Maꞌãpé, we ĩma ꞌmaiꞌâri aba, robꞌuiprazé isapotore hã. E ꞌwa nhisi ãma hã, duré e ꞌwai podo ãma hã.
Tawamhã ma tô ãma siwi sadaꞌâ, ãne:
— Apito Cézaha podo.
25 Tawamhã Zezusi hã ma tô tãma nharĩ zaꞌra, ãne:
— Cézaha te marĩ hã, maꞌãpé tô Cézaha ma ꞌre sõmri zaꞌra waꞌaba mono. Tane duré ꞌRe ihâimana uꞌâsi mono te marĩ hã, ꞌRe ihâimana uꞌâsi mono ma, ꞌre sõmri zaꞌra waꞌaba mono.
26 Tawamhã iꞌuwaibaba na te te ãma sadaꞌâbâ zaꞌra wa, timreme na te iꞌupazé hã hâimana õ di, danhoꞌa hã. Tahawa, te ariꞌiwi aimasa. Ma tô ãma titobꞌuzu zaꞌra, te te ãma isadaꞌâbâ zaꞌra zém na hã.
Zezusi hã, dahâiwaꞌutuzém na da te isadanharĩzé
27 Tawamhã nima norĩ saduceu norĩ hã ma aihutu, Zezusihi u, apâ ꞌre idahâiwaꞌutu zaꞌra mono õ na te te dama ꞌre iroti zaꞌra mono hã.
28 Tahawa te siwi sadanha, ãne:
— Rowahutuꞌwa, Mozési hã ma tô robꞌuiꞌéré ãne wama hiri zaꞌra: “Aibâ dâꞌâ wamhã, timro ꞌra ãna te te rẽme wamhã, isisãnawã hã tô ãma mro da, iꞌamo aba ãma, ꞌra zahuré wamhã, iꞌra hã isisãnawã idâꞌâ ꞌra ne ꞌre hâimana zaꞌra mono da.”
29 Wa za pé oto aima rowasuꞌu zaꞌra ni. Aibâ norĩ hã te ꞌre hâimana zaꞌra, 7 na ihâiba zaꞌra sisãnawã si hã. Tawamhã ipotoꞌrada hã ma tô timro. Tane nherẽ, ma tô dârâ, ꞌra õ ré.
30 Tahawa, ma tô isõsi hã duré ãma timro, tizédéꞌaba mro na. Tane nherẽ, ma duré dârâ, ꞌra õ ré.
31 Tahawa, ma tô duré taha nhosi hã ãma timro. Tane nherẽ, ma duré dârâ, ꞌra õ ré. Ãne siparabâsi, ma tô aré sisõwaꞌreꞌre nasi ãma timro zaꞌra. Tawamhã ma tô oto uburé sisarina aiꞌutõ, ꞌra õ ré.
32 Tawamhã piꞌõ zama ma tô oto dârâ, timro norĩ zarina.
33 Taha zarina, ꞌRe ihâimana uꞌâsi mono te te idaꞌahâiwaꞌutuzé bâtâ ãma hã, e ꞌwai mro na te za piꞌõ hã tihâiba, 7 na uburé ãma imro zaꞌra ꞌremhã.
34 Tahawa, te Zezusi hã asa tãma rowasuꞌu zaꞌra, ãne:
— Tiꞌab ré si, te za dasina ꞌre damro zaꞌra.
35 Tane nherẽ, hâiwa ãma hã dasina ꞌre damro zaꞌra mono õ di za oto. Niwapsi, te za ꞌRe ihâimana uꞌâsi mono hã abꞌre hawi ahâiwaꞌutu, te te ꞌre iꞌawẽsãmri mono norĩ hã, hâiwa ãma iꞌrata ꞌre siꞌubumroi uꞌâsi mono da.
36 Ta norĩ hã, hâiwa ãma ꞌRe ihâimana uꞌâsi mono ma romhuriꞌwa norĩ ne, te za dâꞌâ ãna ꞌre hâimana uꞌâsi zaꞌra, dâꞌâ waihuꞌu ãna. ꞌRe ihâimana uꞌâsi mono ꞌra, te za ꞌre dahâimana zaꞌra, abꞌre hawi za te te daꞌahâiwaꞌutu wamhã.
37 Mozési hã ma tô sõꞌawi hâiꞌré, idâꞌâ zaꞌra norĩ ꞌRe ihâimana uꞌâsi mono za te te iꞌahâiwaꞌutu na hã. Wede zapore iroꞌo hawi te te tãma nharĩ wamhã, ma tô Uburé Danhibꞌapito hã tãma siwasuꞌu, ãne: “Wa hã Abraꞌãhã te ꞌRe ihâimana uꞌâsi mono, duré Izaquihi te ꞌRe ihâimana uꞌâsi mono, duré Zacoho te.”
38 Ãne na ma tô sihâiꞌré, ꞌRe ihâimana uꞌâsi mono, idâꞌâ norĩ tei õ na hã, dâꞌâ ãna ꞌre ihâimana zaꞌra mono norĩ te si na hã, uburé dadâꞌâ ãna ꞌre idahâimana zaꞌra mono hã õhõ ma si ꞌre dahâimana zaꞌra mono wa.
39 Tawamhã nima norĩ rowahutuꞌwa norĩ hã ma tô tãma nharĩ zaꞌra, ãne:
— Rowahutuꞌwa, ãma iwazadaꞌâbâ zaꞌra zé hã wẽ uptabi di!
40 Tahawa niꞌwa hã oto sada siꞌaibâ õ di, te te isadanharĩ zahu da hã.
Danhoꞌreptuiꞌwai ãma, Zezusi te te idaꞌazadanharĩzé
41 Taha pari Zezusi hã ma tô daꞌazadanha, ãne:
— ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã te Danhoꞌreptuiꞌwa hã te te dama ꞌre wasuꞌu zaꞌra, Davihi nhihudu na. E niha te ãma ꞌre irosaꞌrata zaꞌra waꞌaba mo.
42 Tô õ hã Davi hã siꞌuihâ na ma tô ãma robꞌuiꞌéré, Salmo ãma hã, ãne:
“Uburé Danhibꞌapito hã ma tô Ĩnhibꞌapito ma tinha, ãne:‘Ĩnhimire niwĩ asãmra,
43 asitobꞌru norĩ aipara nhimizusizéb zahâpâ, te isõrézéb u.’ ”
44 Tawamhã Davi hã, Danhoꞌreptuiꞌwa hã Tinhibꞌapito na te te ꞌre sisi mono nherẽ, e niha tawamhã merẽ Danhoꞌreptuiꞌwa hã te Davihi nhihudu ꞌre mo.
Zezusi te te dama iroti mono zé, ꞌRe ihâimana uꞌâsi mono nhimiroti zahi na robꞌuiꞌéré na rowahutuꞌwa norĩ ne, ꞌre dahâimana zaꞌra mono tõ da
45 Tawamhã da te wapari zaꞌra ré, te Zezusi hã tinha, isiré ꞌre inomro mono norĩ ma, ãne:
46 — Maꞌãpé ꞌre asipibui pese zaꞌra waꞌaba mono, ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hâimanazé wi hã. Ta norĩ ma hã iwẽ, uza hâi wẽ na ꞌre inomro mono da hã. Duré da te dasina ꞌre iꞌubumroi mono zéb ãma, wazép sina, da te ꞌre iwaibui wẽ mono da si, tãma iwẽ zaꞌra hã. Duré dama ipire norĩ simasisizém na ꞌre siꞌubumroi mono da si, tãma iwẽ zaꞌra hã, Zudeu norĩ te rowahutuzéb ãma hã duré dasiré ꞌre idasaihuri mono zéb ãma zama.
47 Piꞌõi mrotõ norĩ wi, te hâimana nhipese na isibrom na ꞌre simisaihuri zaꞌra. Duré hâimana wẽ newa, te hâimana nhipese na rowaptẽrẽ hã pa na te te ꞌre ꞌmanharĩ zaꞌra. Tahawa te za ta norĩ ma, danhipai u ꞌRe ihâimana uꞌâsi mono hã tãma robꞌmanharĩ wasété uptabi zaꞌra.
