Lucas 23:1-56
23 Taha pari, uburé ma tô tiwahutu zaꞌra. Zezusi hã te oto siwi saprõ, Pilatuhu u.
2 Tame ma tô siwi wasuꞌu wasété, ãne:
— Ã hã aibâ hã romanu norĩ zada, te te daꞌawadaꞌuri wasété ré, wa tô wasiwi sõpẽtẽ ni. Ma tô te te dawi ꞌre azawi, robꞌuiprazé arĩ hã apito Cézaha ma, da te ꞌre sõmri zaꞌra mono tõ da. ꞌRâwi te duré ꞌre siwasuꞌu, Danhoꞌreptuiꞌwa da, ꞌRe ihâimana uꞌâsi mono te te ipisutu na hã, duré apito na zama.
3 Tahawa, Pilatu hã ma tô sadanha Zezusi, ãne:
— E a hã, Zudeu norĩ nhibꞌapito.
Tahawa, Zezusi hã te asa tãma tinha, ãne:
— A hã te inha, tane na hã.
4 Tawamhã Pilatu hã ma tô tinha sasedoti ipire norĩ ma, duré daꞌahâ uptabi na idahâimana zaꞌra norĩ ma, ãne:
— Marĩ iꞌupa te ãma sãmri õ di, iwasédé te ãma ihiri da hã, ã hã aibâ ãma hã.
5 Tane nherẽ, sadawa zaꞌréi ãna te nharĩ zaꞌra ãne:
— Õ hã ma dawi roꞌwaꞌrutu aꞌuwẽ norĩ ꞌremhã, uburé Zudéa ãma hã. Galiléia ãma ma tô tinhimiroti na ãma sãnaꞌrata. Ta hawi ma wei wi oto ãwa.
6 Tawamhã Pilatu, ãne hã te te wapari wamhã, ma tô anha, Zezusi hã Galiléia hawib zô.
7 Tawamhã Zezusi, apito Erodi te te ꞌre irobꞌmadâꞌâ mono zém hawim na, Pilatu hã te te waihuꞌu wamhã, ma tô tiꞌru, Zezusi hã da te dasiwi itẽme saprõni da, Erodihi u. Ta hã, taha bâtâ mono na hã te Zeruzalẽ ãma nhamra.
8 Tawamhã Erodi hã, Zezusi te te ꞌmadâꞌâ wamhã, toi uptabi di, iwasuꞌu hã te te ꞌre wapari mono wa, duré te te iꞌmadâꞌâ da si, te te sima ꞌre wẽ mono wa, duréi pese. Te duré te te sima ꞌre wẽ, isõꞌa marĩ dama iꞌmanharĩ waihuꞌu õ hã te te ꞌmanharĩ da, Zezusi hã.
9 Tahawa, Erodi hã ma tô sadanharĩ ahâ. Tane nherẽ, Zezusi hã te te ãma sadaꞌâbâ õ di.
10 Tawamhã sasedoti ipire norĩ duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ dame ihâimana zaꞌra hã, ma tô mreme tete na iwasédé hã ãma hiri zaꞌra, Zezusihi ãma.
11 Tawamhã Erodi duré ite dasiꞌwapéi ꞌmanharĩꞌwa norĩ hã ma tô Zezusihi ãma tiwaꞌẽ zaꞌra. Ma tô duré ãma tito zaꞌra. Daꞌuza ihâpa iwaꞌâbâ zaꞌẽne ma tô tãma sẽrẽ zaꞌra. Taha pari ma siwi tiꞌru, apâ Pilatuhu u da te dasiwi saprõni da.
12 Taha bâtâ na hã, Erodi norĩ Pilatuhu me hã, tisiwaihuꞌu na ma tô sima tihâimana zahuré, iwana ré hã tinhitobꞌru na sima ꞌre hâimana zahuré mono nherẽ.
Zezusi hã da te dasiwi wĩrĩ da, Pilatu te te ãma dazazei wa, te te tãma ipisutuzé
13 Tawamhã Pilatu ma tô sitẽme daꞌrãꞌõtõ, sasedoti ipire norĩ hã duré rotiꞌwa norĩ hã, duré uburé idahâimana zaꞌra norĩ zama.
14 Ãne ma tô tãma nharĩ zaꞌra:
— Ã hã aibâ hã ma we asiwi iꞌãwisi ꞌwa ĩtẽme. Iwasédé te ãma asiwi ihiri ꞌwa, romanu norĩ zada, te te idaꞌawadaꞌuri wasété na hã. Tahawa asõꞌa zaꞌra waꞌaba, wa tô sadanharĩ pese. Tane nherẽ, marĩ iꞌupa hã te ãma sãmri õ di, iwasédé ãma asiwi ihiri aba zéb zarina hã.
15 Erodihi zama marĩ iꞌupa hã te te ãma sõpẽtẽ õ di. Tahawa ma tô apâ wei watẽme satõrĩ zaꞌra. Tawamhã, ã hã aibâ hã marĩ te te upai õ di, taha zarina da te dasiwi iwĩrĩ da hã.
16 Tahawa, taré wa za tiꞌru, da te ꞌre préꞌé mono da. Taha parimhã wa za tãma robꞌru, oto morĩ da.
17 [Pascoa na dato nhisi ꞌre hâimana mono sidâpâsi, Pilatu hã ma tô dazazéb ꞌre, ꞌre isimasa mono hã misi si te te ꞌre azani, da te tiwi ꞌre iwaptẽrẽ zaꞌra mono zéb zarina.]
18 Tawamhã dahârâ na ma tô sãnaꞌrata zaꞌra ni. Uburé ma tô tahãsi ni, ãne:
— Da te dasiwi wĩrĩre, ã hã aibâ hã. Barabasihi si, wama wazere zaꞌra na.
19 (Barabas hã dazazéb ꞌre, ma tô sẽrẽ ni, Zeruzalẽ ãma romanu norĩ zada, te te daꞌawadaꞌuri wasété wa, dasiꞌwapé iwatobro uꞌâbâ, duré te te daꞌmaiwĩrĩ wa.)
20 Tawamhã Pilatu hã ma tô sima wẽ, Zezusihi ma, te te robꞌru da, oto morĩ da. Tahawa ma tô duré apâ timreme na dama sahu, daꞌahâ uptabi na idahâimana zaꞌra ma hã.
21 Tane nherẽ, ma tô dahârâ ꞌrãihâ na tahãsi uꞌâsi ni, ãne:
— Wedepoꞌo nhonhiꞌrãmi na sasõmri! Wedepoꞌo nhonhiꞌrãmi na sasõmri!
22 Tawamhã siꞌubdatõ ãma Pilatu hã ma tô duré dama tinha, ãne:
— E marĩ iꞌupa te te ꞌmanharĩ bâ. Marĩ iꞌupa hã te ãma sõpẽtẽ õ di, taha zarina da te dasiwi iwĩrĩ da hã. Wa za tiꞌru, taré da te dasiwi ꞌre préꞌé mono da. Taha parimhã, wa za tãma robꞌru za, morĩ da oto.
23 Tane nherẽ, hârâ nhiptete na te waptẽrẽ uꞌâsi zaꞌra, Zezusi hã wedepoꞌo nhonhiꞌrãmi na da te dasiwi sasõmri da. Tawamhã idahãsi uꞌâsi zé hã ma tô siptete na tihâiba.
24 Tahawa Pilatu hã waꞌa wa, ma tô oto rowairébé, da te dasima iwẽ zaꞌra zéb zarina, te te dama ꞌmanharĩ da.
25 Tawamhã aibâ ma, ma tô oto robꞌru, da te dasima iwẽ zaꞌra ma. Ta hã aibâ hã ma tô sẽrẽ ni, romanu norĩ zada te te daꞌawadaꞌuri wasété wa, dasiꞌwapé watobro wa, duré te te daꞌmaiwĩrĩ wab zama. Tazahã, Zezusi hã ma tô tãma ꞌru zaꞌra, da te dasima iwẽ zaꞌra zéb uwaibaba da te tãma robꞌmanharĩ zaꞌra da.
Zezusi hã, wedepoꞌo nhonhiꞌrãmi na da te dasiwi isasõmrizé
26 Tawamhã dasiꞌwapéi ꞌmanharĩꞌwa norĩ hã ma tô oto siwi saprõ, Zezusi hã. Bâdâdi na te te siwi saprõni ré, ma tô siwi sõpẽtẽ, Simau na aibâ nhisi hã. Ta hã Cireni na ꞌri nhoꞌõmo nhisi hawimhã, ma tô daꞌrazâ, aꞌubuni hawi. Tawamhã ma tô siwi paꞌâ. Taha pari ma tô wedepoꞌo nhonhiꞌrãmi hã tãma hiri zaꞌra, te te duri da, Zezusihi zarina.
27 Tawamhã daꞌahâ uptabi na ma tô Zezusihi zarina dasiꞌré. Dawazarimhã, te nima norĩ piꞌõ norĩ hã dame aiꞌabaꞌré, wawa sina duré pẽꞌẽzé uptabi zaꞌra sina, Zezusihi ãma.
28 Tawamhã Zezusi hã ma tô itẽme aipiꞌra zaꞌra. Te tãma nharĩ zaꞌra, ãne:
— Piꞌõ norĩ, Zeruzalẽ ãma ꞌre iꞌaiꞌubumroi waꞌaba mono hã, ĩꞌãma aiꞌruꞌru waꞌaba tõ. Asisô si te za ꞌre aiꞌruꞌru waꞌaba mo, duré aiꞌra norĩ zô zama.
29 E marĩ wa. Bâdâ hã te za iwa waptãrã, za da te inharĩ zaꞌra zéb da hã, ãne: “Piꞌõ iꞌra waihuꞌuꞌõ norĩ ma si, ꞌre rowẽ uptabi zaꞌra mono di, niwa iꞌra tãma ipoto zaꞌra õ norĩ ma hã, duré niwa tiꞌra te te iwapsõmri zaꞌra õ norĩ ma zama.”
30 Ãne te za duré nharĩ zaꞌra ni za, ẽtẽ ꞌrãihâ ma: “Wanhisiwi airereꞌe aba!” Tawamhã te za duré nharĩ zaꞌra ni za, saꞌa ma, ãne: “Uburé wazuwa zaꞌra waꞌaba.”
31 E marĩ wa. Ãne hã wede iwede waptiꞌi ma, da te ꞌre robꞌmanharĩ zaꞌra mono wamhã, e niha te za bété ꞌre romhâimana, wede iwede ꞌré norĩ ma hã.
32 Tawamhã Zezusihi me, ma tô aibâ norĩ hã saprõni zahuré ni, da te pãrĩ da. Ta norĩ hã rowasété ꞌmanharĩꞌwa zahuré.
33 Tawamhã Daꞌrãihi na romnhisi u oto sihutu wamhã, tame ma tô Zezusi hã sasõmri ni, wede poꞌo nhonhiꞌrãmi na. Robꞌmanharĩ wasété ꞌwa norĩ zama ma tô isiré sasõmri zahuré ni, ihâiba amo hã isimire niwĩ duré ihâiba amo hã isimiꞌe niwĩ.
34 Tawamhã Zezusi hã Timama wi ma tô rowaptẽ, te te siwi isasõmri norĩ ãma, ãne:
— Ĩmama, iwasédé hã ãma ꞌmadâꞌâ zaꞌra tõ, te te iꞌmanharĩ zaꞌra zé hã te te waihuꞌu zaꞌra õ wa.
Tawamhã Zezusihi uza na ma tô ãma sima aipé, ẽtẽ zapotore iꞌuiꞌéré ré hã te te nasi sima sãmra wa, isisi nasi iwairébé zarina.
35 Zezusi norĩ simnhatã ré hã, ma tô dasiwi ꞌmadâꞌâ ni. Tawamhã Zudeu norĩ ma rotiꞌwa norĩ hã ma tô Zezusihi ãma tiwaꞌẽ zaꞌra, ãne:
— Oro te te ꞌre daꞌanhoꞌreptui mono za, pé ãhã na awaꞌawi hã ꞌrâwi sisõꞌreptu, tô sena Danhoꞌreptuiꞌwa da, ꞌRe ihâimana uꞌâsi mono te te ipisutu wamhã.
36 Dasiꞌwapéi ꞌmanharĩꞌwa norĩ hã te duré nasi itẽme sina rotété zaꞌra. Te duré nasi ãma tiwaꞌẽ zaꞌra. Uva ꞌrãi waꞌu isé iwaꞌâbâ surure hã ma tô duré nasi tãma wẽ zaꞌra.
37 Ãne te nasi tãma nharĩ zaꞌra:
— A hã, tô sena Zudeu norĩ nhibꞌapito wamhã, maꞌãpé ꞌrâwi asisõꞌreptu na.
38 Zezusihi ꞌrã nhisiwimhã, te robꞌuiꞌéré hã daꞌo, ãne: “Ã hã Zudeu norĩ nhibꞌapito.”
39 Tawamhã rowasété ꞌmanharĩꞌwa ihâiba amo hã isiré isaꞌo hã ma tô Zezusihi ma tinha, te te ãma wasété sina, ãne:
— Oro a hã Danhoꞌreptuiꞌwa za. Maꞌãpé ꞌrâwi asisõꞌreptu na, duré wa norĩ hã wanhoꞌreptu na.
40 Tane nherẽ, ihâiba amo hã ma tô timreme tãma pẽtẽ, ãne:
— Tôꞌã. E ꞌRe ihâimana uꞌâsi mono hã asima pipa ã bâ, isiré atâꞌâ da, da te aima pisutu nherẽ.
41 Wama hã robꞌmanharĩ pipa pisudu hã te iꞌuwaibaba na tihâiba. E marĩ wa. Wa norĩ hã marĩ iwasété uptabi hã wa te ꞌre abꞌmanharĩ mono wa. Tanei õ di, õ hã. Marĩ iwasédé te te ꞌmanharĩ õ di.
42 Taha pari, ma tô Zezusihi ma oto tinha, ãne:
— Zezusi, maꞌãpé ĩꞌãma aipoꞌre puꞌu za, apito na oto ꞌre aihâimana mono wamhã.
43 Tawamhã Zezusi hã ma tô asa tãma tinha, ãne:
— Tô sena wa za aima waihuꞌu, ãne. Ã bâtâ na te za oto ĩsiré ꞌre asãmra mo, rowẽ uptabi ãma ꞌRe ihâimana uꞌâsi mono ꞌrata.
Zezusi hã, ipẽꞌẽ siꞌutõrĩzé
44 Tawamhã oto abzuma waꞌwa, robra hã ma tô robꞌupsi, uburé daro mono bâ, siꞌubdatõ bâtâ pibuzéb u bâdâ isiprazéb u.
45 Taha ré hã, bâdâ te te robꞌuiwẽ õ di. Tawamhã zazahâ ihâpa ma tô hâihaipoꞌo iwaꞌwa, ꞌRe ihâimana uꞌâsi mono nhorõwa ꞌri ꞌrãihâ ãma hã.
46 Tawamhã Zezusi hã ma tô mreme ꞌrãihâ na Timama ꞌmahâ, ãne:
— Ĩmama, asibꞌrata wa ãma aima tisõ, ĩpẽꞌẽzani hã.
Tawamhã ãne te te nharĩ pari, ma tô oto pẽꞌẽ haiꞌutõ.
47 Tawamhã ãne iromhâimanazé dasiꞌwapéi ꞌmanharĩꞌwa norĩ wadaꞌuriꞌwa te te ꞌmadâꞌâ wamhã, ma tô ꞌRe ihâimana uꞌâsi mono ãma tiwata, ãne:
— Tô sena tô, ã hã aibâ hã ꞌre imorĩ wẽ!
48 Tawamhã ta hã iromhâimanazé, da te ꞌmadâꞌâ zaꞌra da, uburé tame da te iꞌubumro hã da te ꞌmadâꞌâ zaꞌra parimhã, ma tô oto ropé ni, robzeiꞌõ uptabi wa, danhoꞌutu wi dasihâ zaꞌra mono sina.
49 Tazahã, Zezusihi siwaihuꞌu norĩ, duré piꞌõ norĩ Galiléia hawim haré isiré ꞌre inomro mono norĩ hã, ma tô romhâ na ãma tinhopré, uburé iromhâimanazém na hã.
Zezusi hã, da te isẽrẽzé
50 Tawamhã aibâ te ꞌre hâimana, Zuzé na isisi hã. Ta hã aibâ ꞌre imorĩ wẽ, duré iꞌuwaibaba si ꞌre ihâimana mono, duré Zudeu norĩ ma rotiꞌwa norĩ siré ꞌre ihâimana mono.
51 Tane nherẽ, ta hã tisiré norĩ te te ãma saze zaꞌra õ di, te te siwi irowairébézém na hã, duré uburé marĩ te te iꞌmanharĩ zaꞌra zém na zama. Ta hã, ꞌri nhoꞌu Arimatéia hawimhã, Zudéa ãma, duré ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb zô ꞌre isimipari mono.
52 Ta hã ma tô mo Pilatuhu u, Zezusihi hâiba te te tiwi waptẽrẽ da.
53 Tawamhã Pilatu hã te te tãma ꞌrui wa, ma tô siꞌra, Zezusihi hâiba hã. Zazahâ ihâirã na ma tô ubu. Taha pari, ma tô tisẽ, ẽtẽ zahâpâ abꞌre siromo wa, niwa niꞌwa, da te iwa isẽrẽ õ ãma.
54 Ãne hã romhuri zahârizém na ma tô uburé tiromhâiba. Duré romhutu di, dawaꞌutuzé sabadu iwa iwaptãꞌãzéb u hã.
55 Tawamhã piꞌõ norĩ, Galiléia hawim haré Zezusihi siré ꞌre inomro mono norĩ hã ma tô aiꞌabaꞌré abꞌre u, Zuzéhé siré. Abꞌre hã ma tô siwi ꞌmadâ, Zezusihi hâiba, da te isẽrẽzé hã.
56 Taha pari, ma tô aiꞌabaꞌré, ꞌri tẽme. Tawamhã wedewaꞌu isadaze hã ma tô sada saꞌra pese zaꞌra, te te ãma siwi hâiba uꞌré da. Tawamhã sabadu na ma tô oto tiwaꞌutu zaꞌra, ꞌRe ihâimana uꞌâsi mono nhimiroti zahi na robꞌuiꞌéré zarina.
