Lucas 24:1-53
24 Tawamhã dumigu mararé uptabi, piꞌõ norĩ hã ma tô aiꞌabaꞌré abꞌre u. Siré ma tô siwi tiꞌâ, wedewaꞌu isadaze te te siwi sada isaꞌra pe hã.
2 Abꞌre u oto sihutu wamhã, ẽne ma tô siwi ꞌmadâ, abꞌre nhitobzé niꞌwa te te isaꞌré na.
3 Tawamhã sisisi wamhã, Wanhibꞌapito Zezusihi hâiba hã te te siwi sõpẽtẽ õ di.
4 Te te duré ãma rosaꞌrata waihuꞌu zaꞌra õ di. Tawamhã rosaꞌrese õ ré, waptu na ma tô maparane aibâ norĩ iꞌuza ihâirã uptabi zahuré hã, isababab zaꞌra sihâiꞌré zahuré.
5 Tahawa, ma piꞌõ norĩ hã tãma tipahi pese zaꞌra. Hiꞌrãtitõ ma tãma aiꞌubumro. Tiꞌubu na tiꞌai u ma ãma roptob zaꞌra. Tawamhã aibâ norĩ hã ma tô tãma nharĩ zaꞌra, ãne:
— E marĩ da, te hâiba ré ihâimana zô asõpré waꞌwa, idâꞌâ norĩ ꞌre isimiꞌwara mono zéb ãma hã.
6 Ta hã ãme oto hâimana õ di. Apâ ma tô hâiwaꞌudu! Maꞌãpé ãma aipoꞌre puꞌu zaꞌra waꞌaba, Galiléia ãma asiré hâimana zaꞌra waꞌaba ré, te te sina aima iroti zaꞌra waꞌaba zém na hã, ãne:
7 “Tô iꞌru zahi, Tiꞌai ãma Dasiré Ipodo hã dawasété na ꞌre idanomro mono norĩ nhibꞌrata da te ihâiba nhomri da hã, duré wedepoꞌo nhonhiꞌrãmi na da te isasõmri da hã, duré siꞌubdatõ bâtâ ãma apâ za ihâiwaꞌutu da hã.”
8 Tahawa, ma piꞌõ norĩ hã Zezusihi mreme na oto tipoꞌre puꞌu zaꞌra.
9 Tawamhã taha pari oto siꞌabaꞌréi wamhã, ma tô rowasuꞌu pese zaꞌra, Zezusihi siré ꞌre inomro mono norĩ 11 na ihâiba zaꞌra norĩ ma, duré uburé isiré isazeiꞌwa norĩ isiré ihâimana zaꞌra norĩ ma zama.
10 Piꞌõ norĩ nhisi hã, ãne: Maria Madalena duré Zuãna duré Maria, Tiaguhu na. Ã norĩ hã duré piꞌõ norĩ isiré isiꞌabaꞌré norĩ zama, ma tô Zezusihi zadawa wasuꞌuꞌwa norĩ ma hã rowasuꞌu zaꞌra.
11 Tane nherẽ, te te ãma saze zaꞌra õ di, isimirowasuꞌu zaꞌra na hã, ꞌrãsiwamnarĩ zaꞌra newa.
12 Tazahã Pedru hã ma tô wahudu. Abꞌre u ma tô wara. Wisi wamhã, ma tô ahâpâ, te te robꞌmadâꞌâ da, abꞌre u. Tane nherẽ, ma tô zazahâ ihâirã iꞌubuzép si ꞌmadâ. Taha pari ma tô apâ mo. Ma tô ãma titobꞌuzu, iromhâimanazém na hã.
Emaus u, isazeiꞌwa norĩ ineb zahuré zé
13 Tawamhã tô taha bâtâ na, te Zezusihi zazeiꞌwa norĩ hã tineb zahuré, Emaus na ꞌri waꞌõtõ nhisi u. Zeruzalẽ hawimhã Emaus u hã, 11 quilometru na tiꞌai pibuzé hã.
14 Ta norĩ hã te bâdâdi na neb zahuré sina, te te sima rowasuꞌu zahuré, uburé iromhâimanazém na hã.
15 Te te sima rowasuꞌu zahuré mono ré, duré ãma sisadaꞌâbâ zahuré mono ré, ma tô Zezusi hã ãma tiwisi zahuré. Tawamhã te oto mo, isiré zahuré.
16 Tane nherẽ, ꞌRe ihâimana uꞌâsi mono hã marĩ ma tô tãma ꞌmanharĩ zahuré, Zezusi te te waihuꞌu zahuré tõ da.
17 Tawamhã Zezusi hã ma tô sadanharĩ zahuré, ãne:
— E marĩ na, te asima irobzanhamri aba mo, bâdâdi na ane waꞌaba sina hã.
Tahawa, ma tô mazahâri zahuré, ubu ze zahuré ãna robzeiꞌõ wa.
18 Tawamhã ihâiba amo, Cleopa na isisi hã ma tô Zezusihi ma tinha, ãne:
— Ãté niwamhã asiwaprosi aima iwaihuꞌu õ, Zeruzalẽ ꞌre marĩ ihâimana zaꞌra zém na, ã nimosi iwairébé mono zém na hã.
19 Tahawa, Zezusi hã ma tô asa sadanharĩ zahuré, ãne:
— E marĩ hâimana bâ.
— Zezusi, Nazaré ãma iprédu ma iromhâimanazém na, wa wasima robzanhamri ni. Ta hã ꞌRe ihâimana uꞌâsi mono zadawa ꞌmahârâꞌwa. Imreme nhiptede, duré marĩ iwẽ te te dama ꞌre iꞌabꞌmanharĩ wẽ mono, ꞌRe ihâimana uꞌâsi mono ma hã, duré uburé dama zama.
20 Tane nherẽ, sasedoti ipire norĩ hã duré wama rotiꞌwa norĩ hã, ma tô siwi tisõ, da te tãma pisutu da, da te dasiwi wĩrĩ da, duré wedepoꞌo nhonhiꞌrãmi na da te dasiwi sasõmri da.
21 Wa tô sô ꞌre wanhimipari zaꞌra aré, Izaraéu nhihudu norĩ hã te te sõꞌreptu zaꞌra da newa, danhimiwadaꞌuri zarina oto ꞌre hâimana zaꞌra mono tõ da. Ãhã na hã, siꞌubdatõ bâdâ ma tô ãma ne, uburé iromhâimanazém na hã.
22 Nima norĩ piꞌõ norĩ, wasiré isazeiꞌwa norĩ nhimirowasuꞌu na wa tô ãma watobꞌuzu zaꞌra ni. Ta norĩ hã ãhã na mararé ma tô aiꞌabaꞌré, abꞌre u.
23 Tane nherẽ, ihâiba hã te te siwi sõpẽtẽ õ di. Apâ watẽme sihutu wamhã, ma tô wama rowasuꞌu zaꞌra, hâiwa hawi romhuriꞌwa norĩ itẽmeb zaꞌra isihâiꞌré zahuré na hã. Ta norĩ hã ma tô u tãma rowasuꞌu zaꞌra, hâiba ré ihâimana na hã.
24 Tahawa nima norĩ wasiré isazeiꞌwa norĩ hã ma tô duré aiꞌabaꞌré, abꞌre u. Tawamhã ma tô sõpẽtẽ zaꞌra, piꞌõ norĩ hã uburé te te irowasuꞌu zaꞌra zéb zarina. Tane nherẽ, ta norĩ hã te te duré siwi sõpẽtẽ õ di, Zezusi hã.
25 24:25-26 Tawamhã Zezusi hã ma tô tãma nharĩ zahuré, ãne:
26 ꞌMadöꞌö 24:25
— E niha iꞌaiꞌrãnhimizaꞌrese aba õ! Duré iꞌasapari nhimahudu aba õ, ꞌRe ihâimana uꞌâsi mono zadawa ꞌmahârâꞌwa norĩ te te ãma irobꞌuiꞌéré zaꞌra zé isadaihuꞌu aba da hã. Oro tô iꞌru zahi za, Danhoꞌreptuiꞌwa da, ꞌRe ihâimana uꞌâsi mono te te ipisudu za aꞌâ te te irobzépata da hã, taha parip si isimiroti pire hã duré dama iwazé pese zé hã ꞌRe ihâimana uꞌâsi mono te te tãma pisutu da, iwẽ uptabi hã.
27 Tawamhã te te tãma nharĩ zahuré pari, Zezusi hã ma tô tãma aꞌrãzarõtõ zahuré, iwasuꞌu na, uburé ꞌRe ihâimana uꞌâsi mono mreme na Ibaihâ iwazé pese na robꞌuiꞌéré ãma isimiꞌwara siromo hã. Mozésihi nhimiꞌuiꞌéré na ma tô ãma tãma sãnaꞌrata zahuré, duré uburé ꞌRe ihâimana uꞌâsi mono zadawa ꞌmahârâꞌwa norĩ te te ãma irobꞌuiꞌéré zaꞌra zém na.
28 Tawamhã ꞌri waꞌõno Emaus u te te oto robꞌumhutu zaꞌra wamhã, Zezusi hã ma tô tihâiba, niꞌwa hã za romhâ na uptabi imorĩ ne.
29 Tane nherẽ, sadahutu ãna ma tô tãma nharĩ zahuré, ãne:
— Wasiré aꞌâ asãmra. Te za oto tirobra. Ma tô tihâiwahâ pesere.
Tahawa, Zezusi hã ma tô isiré tizébré zahuré, ꞌri para u.
30 Tawamhã meza na isiré sãmra zahuré wamhã, iꞌuꞌẽtẽ wapu hã ma tô tiꞌâ. ꞌRe ihâimana uꞌâsi mono ãma te tiwata. Taha pari ma tô tãma awẽꞌẽ zahuré.
31 Tawamhã ꞌRe ihâimana uꞌâsi mono, ma tô ito hã oto tãma ꞌridawa zahuré. Tahawa ma tô oto waihuꞌu zahuré, Zezusi na. Tane nherẽ, ma tô tiwi aimani zahuré.
32 Tawamhã ma tô sima nharĩ zahuré, ãne:
— Õne wa, wapẽꞌẽ ꞌremhã rowẽ isaꞌẽne hã, e uzâ iwaꞌro uptabi ne te te waꞌahâri ã bâ bété, bâdâdi na ꞌRe ihâimana uꞌâsi mono mreme na Ibaihâ iwazé pese na robꞌuiꞌéré na te te wei wama rowasuꞌu mono ré hã.
33 Tawamhã ma tô tiwahutu zahuré. Awaꞌawi pesere waptu na ma tô apâ tineb zahuré, Zeruzalẽ u hã. Simasisi wamhã, Zezusihi zadawa wasuꞌuꞌwa norĩ 11 na ihâiba zaꞌra hã ma tô sõpẽtẽ zaꞌra, siré isiꞌrãꞌõno hã aimawi isazeiꞌwa norĩ me.
34 Tawamhã isadawa wasuꞌuꞌwa norĩ hã ma tô nharĩ zaꞌra, ãne:
— Tô sena, Wanhibꞌapito hã ma tô hâiwaꞌudu. Simahã ma, ma tô sihâiꞌré.
35 Tawamhã maparane isazeiꞌwa norĩ hã ma tô rowasuꞌu zahuré, bâdâdi na neb ré, tãma iromhâimana zahuré zém na hã, duré Wanhibꞌapito te te iwaihuꞌu zahuré zém na, iꞌuꞌẽtẽ wapu te te tãma awẽꞌẽ zahuré wapsi.
Zezusi hã, tizazeiꞌwa norĩ ma isihâiꞌrézé
36 Tawamhã taha na te te sima rowasuꞌu zaꞌra ré, ma tô Zezusi hã tãma sihâiꞌré zaꞌra, iwaꞌwab zaꞌra. Ãne te tãma nharĩ zaꞌra:
— Rowẽ hã, asiré ꞌre ihâimana zaꞌra waꞌaba mono da si!
37 Tawamhã ma tô tãma aꞌrãmi pese zaꞌra. Ma duré tãma tipahi pese zaꞌra. Te ãma rosaꞌrata zaꞌra, dahâiba warõ te te ꞌmadâꞌâ zaꞌra newa.
38 Tane nherẽ, ma tô Zezusi hã tãma nharĩ zaꞌra, ãne:
— E marĩ da, ma aipahi zaꞌra waꞌwa. E marĩ da, ma duré aipẽꞌẽ ꞌre asiwawã zaꞌra waꞌwa.
39 Maꞌãpé ꞌmadâꞌâ zaꞌra waꞌaba, ĩnhibꞌrada duré ĩpara zama. Tô wa hã! Maꞌãpé ĩꞌupi zaꞌra waꞌaba. Duré ĩꞌmadâꞌâ zaꞌra waꞌaba. Dahâiba warõ hã nhi õ di, duré hi õ di. Tazahã wa hã asiwi ĩꞌmadâꞌâ ꞌwa hã, tô ĩhâiba uptabi.
40 Tawamhã ãne tãma siwasuꞌu zaꞌra parimhã, Zezusi hã ma tô tinhibꞌrada hã tãma sõꞌa zaꞌra, duré tipara zama.
41 Tawamhã isiré ꞌre inomro mono norĩ hã toi uptabi zaꞌra wa, duré ãma tobꞌuzui pese zaꞌra nherẽ, zahadu ãma simizaze waihuꞌu zaꞌra õ di. Tawamhã Zezusi hã te sadanharĩ zaꞌra, ãne:
— E marĩ, aima hâimana zaꞌra waꞌaba õ di, te iꞌrẽne da hã.
42 Tahawa, tepe zebre waꞌõno hã ma tô tãma sõmri zaꞌra.
43 Ta hã ma tô tiꞌâ. Ma tô tiꞌrẽ, isõꞌa zaꞌra.
44 Taha pari te tãma nharĩ zaꞌra, ãne:
— Asiré ĩhâimana zaꞌra waꞌaba ré hã, wa tô aima ĩsiwasuꞌu zaꞌra waꞌwa, tô iꞌru zahi zarina uburé za tô ĩma iromhâimana zaꞌra na hã, ĩꞌãma robꞌuiꞌéré zarina ꞌRe ihâimana uꞌâsi mono nhimiroti zahi na Mozési te te ãma irobꞌuiꞌérézéb zarina, duré ꞌRe ihâimana uꞌâsi mono zadawa ꞌmahârâꞌwa norĩ nhimiꞌuiꞌéré zarina, duré Salmu ãma robꞌuiꞌéré zarina zama.
45 Tawamhã Zezusi hã ma tô oto iꞌrã tãma ꞌridawa zaꞌra, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré isimiꞌwara hã te te sadaihuꞌu zaꞌra da.
46 Ãne ma tô tãma nharĩ zaꞌra:
— ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te dabaꞌwara siro, Danhoꞌreptuiꞌwa da, ꞌRe ihâimana uꞌâsi mono te te ipisudu hã, za tô te te irobzépata na hã, duré taha pari za apâ ihâiwaꞌutu na hã siꞌubdatõ bâtâ ãma.
47 Duré isisi na, dawasété na ꞌre idasiꞌruiwapari zaꞌra mono zéb zarina, ꞌre dasipizari zaꞌra mono wa, ꞌRe ihâimana uꞌâsi mono, dawasédé te te daꞌãma ꞌre iꞌabꞌmadâꞌâ mono õ zé hã, te za uburé dapoto mono bâ oto da te dasima ꞌre wasuꞌu zaꞌra. Ta hã Zeruzalẽ ãma te za tinhanaꞌrata.
48 A norĩ waꞌwa ma tô ĩꞌãma iꞌmadâꞌâ zaꞌra waꞌwa, uburé ã hã marĩ mono hã.
49 Duré Ĩmama te te ãma iropisudu hã wa za we atẽme satõrĩ zaꞌra waꞌwa. Tane nherẽ, ãme Zeruzalẽ ꞌre, aꞌâ sô asimipari zaꞌra waꞌaba, hâiwa hawi ꞌRe ihâimana uꞌâsi mono waihuꞌu pe iwaibui waꞌaba zéb u.
Zezusi hã, hâiwa u apâ imorĩzé
50 Taha pari, Zezusi hã ma tô isiré ꞌre inomro mono isazeiꞌwa norĩ hã te te simro ꞌri nhoꞌõmo hawi, Betãnia na ꞌri waꞌõtõ nhisi ꞌrata ro ꞌre ihâimana mono u. Tame ma tô tinhibꞌrada hâimo wẽ. Iwẽ hã ma tô tãma pisutu zaꞌra.
51 Iwẽ te te tãma pisutu zaꞌra ré, Zezusi hã ma tô oto rẽme zaꞌra. Imama ma tô oto tiꞌâ, hâiwa u.
52 Tawamhã ma tô ãma tiwata zaꞌra. Taha pari ma tô apâ aiꞌabaꞌré Zeruzalẽ u, ipẽꞌẽ ꞌremhã rowẽ ꞌmasisi uptabi zaꞌra sina.
53 Tawamhã ꞌRe ihâimana uꞌâsi mono nhorõwa ãma te bâtâ sidâpâsi nasi tihâimana zaꞌra. Te nasi ãma tiwata uꞌâsi zaꞌra.
