Lucas 4:1-44
4 Zezusi hã ꞌRe ihâimana uꞌâsi mono Pẽꞌẽzani ré, ma tô apâ sina siri, Zodã pa hawi. Apâ te te sina siri wamhã, ꞌRe ihâimana uꞌâsi mono Pẽꞌẽzani hã ma tô saprõ, rop si ꞌre irosaꞌwari mono u.
2 Tame ma tô Waꞌuburé hã pibu, 40 na bâdâ ãma isiꞌutõrĩ ꞌremhã. Tame sãmra ré hã marĩ te te ꞌrẽne õ di. Tahawa mra hã ma tô azâ.
3 Tahawa Waꞌuburé hã ma tô tãma tinha, ãne:
— Tô sena, a hã ꞌRe ihâimana uꞌâsi mono ꞌra wamhã, maꞌãpé ã hã ẽtẽ ma nharĩ, iꞌuꞌẽtẽ wapu na aima siꞌmanharĩ da.
4 Tawamhã Zezusi hã ma sadaꞌâ, ãne:
— ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne: “Iꞌuꞌẽtẽ wapu na si, ꞌre dahâimana zaꞌra mono õ di za, tiꞌai ãma hã.”
5 Taha parimhã, Waꞌuburé hã ma tô Zezusi saprõ, saꞌa nhisi u. Ta hawi ma tô tãma hâiꞌré, danhibꞌapito norĩ tiꞌai mono bâ te te ꞌre idaꞌmadâꞌâ zaꞌra mono zé hã.
6 Tawamhã, ãne te duré tãma tinha:
— Uburé ã norĩ nhimiꞌmadâꞌâ nhiptetezé hã wa za aima tisõ, duré uburé marĩ iwẽ iwa ꞌre ihâimana zaꞌra mono zama. E marĩ wa. Uburé ã norĩ ĩma isaꞌré hã hâimana wa, te dama ꞌre anhomri waihuꞌu pese mono di, te ĩsima ꞌre idaꞌawẽ mono zéb zarina.
7 Ãne wa, ĩꞌãma aiwata da, aihiꞌrãtitõ ĩma aimei wamhã, uburé ã hã ate hã za.
8 Tawamhã Zezusi hã te asa tãma tinha, ãne:
— ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne te nomro:“Uburé Danhibꞌapito ãma si ꞌre aiwata zaꞌra waꞌaba mono, ate zaꞌra waꞌwa ꞌRe ihâimana uꞌâsi mono ãma si. Duré õhõ ma si ꞌre romhuri zaꞌra waꞌaba mono.”
9 Taha parimhã, Waꞌuburé, ma tô duré Zezusi hã saprõ, Zeruzalẽ u. Tame hâimo ma tô tisã, ꞌRe ihâimana uꞌâsi mono nhorõwa ꞌri ꞌrãihâ, ꞌri nhisi uptabi u. Ãne te duré tãma tinha:
— Tô sena a hã ꞌRe ihâimana uꞌâsi mono ꞌra wamhã, maꞌãpé ã hawi asime na, tiꞌai u.
10 E marĩ wa. Ãne, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã nomro wa:“ꞌRe ihâimana uꞌâsi mono te za we satõrĩ zaꞌra tite hâiwa hawi romhuriꞌwa norĩ hã, te te siwi aiꞌmadâꞌâ da.
11 Tawamhã tinhibꞌrata na te za siwi asapa, aipara wi ẽne hã te te aiꞌuꞌa tõ da.”
12 Tawamhã Zezusi hã te duré asa tãma tinha, ãne:
— Tane nherẽ, ãne duré ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te nomro: “Uburé Danhibꞌapito hã ꞌre pibu zaꞌra waꞌaba mono tõ, ate zaꞌra waꞌwa ꞌRe ihâimana uꞌâsi mono hã.”
13 Tawamhã Waꞌuburé hã uburé marĩ na Zezusi te te pibui parimhã, ma tô oto mo aꞌâ, isiti.
Zezusi hã, romhuri na te te isãnaꞌratazé, Galiléia ãma
14 Tawamhã Zezusi hã Galiléia u ma tô apâ mo. ꞌRe ihâimana uꞌâsi mono Pẽꞌẽzani siptete na ꞌre ihâimana mono hã ma tô isiré tihâiba. Iwasuꞌu hã ma tô ropé, daro mono bâ Galiléia ãma hã.
15 Tawamhã Zudeu norĩ te, rowahutuzé mono na ma tô te te dama rowahutu. Tahawa ma tô uburé da te dasiwi uzei wẽ.
Zezusi hã, Nazaré ãma da te dasiwi iwẽꞌõzé
16 Tawamhã Zezusi hã ma tô mo Nazaré u, tiprédubzéb u. Sabadu dawaꞌutuzém na ꞌre izasi uꞌâsi mono zéb zarina, ma tô dame ãzé, Zudeu norĩ te, rowahutuzéb u hã. Tame ma tô hâiwi za, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te te dama sõré da.
17 Tawamhã ma tô tãma sõmri ni, ibaihâ Izaiasihi nhimiꞌuiꞌéré hã. Te te ꞌridawa wamhã, ma sõpẽtẽ, ãne robꞌuiꞌéré inomro hã:
18 “Uburé Danhibꞌapito, ma tô Tipẽꞌẽzani hã ĩma tisõ. Ta hã ma tô ĩpisutu, Rowasuꞌuwẽ itém na, isibrobꞌõ norĩ ma, te ꞌre robꞌmahârâ mono da. Ma tô duré ĩzatõ, dazazéb ꞌre, ꞌre idasimasa mono ne, ꞌre ihâimana zaꞌra mono norĩ ma, te ꞌre robꞌmahârâ mono da, sima iwẽ na oto ꞌre hâimana zaꞌra mono da, duré itobꞌa norĩ hã te ꞌre ato pese mono da, duré da te ꞌre iwati pese zaꞌra mono norĩ hã te ꞌre anhoꞌreptui mono da,
19 duré te ꞌre rowasuꞌu mono da, bâdâ oto iwisi na hã, Uburé Danhibꞌapito tinhibꞌaꞌuwẽ te te ꞌre iꞌanhoꞌreptui mono zé hã.”
20 Tawamhã Zezusi ma tô ibaihâ hã apâ oto sito. Ma tô tisõ, rowahutuzéb ꞌre dapawaptoꞌwai ma. Taha pari ma tô apâ nhamra. Tawamhã rowahutuzéb ꞌre idahâimana zaꞌra hã te dasiwi ꞌmadâꞌâ pese ni.
21 Tawamhã Zezusi hã ma tô rowasuꞌu na tãma sãnaꞌrata zaꞌra, ãne:
— Ã bâtâ na hã ma tô sina uwaimra, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré inomro hã, nimosi iwapari zaꞌra waꞌwa hã.
22 Tahawa Zezusi hã ma tô uburé dasiwi uze ni. Ma tô duré imreme wapari ze na ãma tatobꞌuzu zaꞌra ni. Tane nherẽ, ma tô ãne ãma tasisadanharĩ zaꞌra ni:
— E ã hã, Zuzéhé ꞌra ã bâ.
23 Tawamhã Zezusi hã ma tô tãma nharĩ zaꞌra, ãne:
— Ãne na ꞌre idamreme zusi uꞌâsi mono zém na te za tô ĩma inharĩ zaꞌra waꞌwa: “Dawedeꞌwa, maꞌãpé ꞌrâwi aihâzé asima pari.” Te za duré ãne ĩma inharĩ zaꞌra waꞌwa: “Uburé marĩ, Cafarnau ãma ꞌre iꞌabꞌmanharĩ mono zé hã wa tô wapari zaꞌra ni. Maꞌãpé ãme airob ãma zama tane hã duré abꞌmanharĩ.”
24 Tawamhã ma duré ãma uzusi, ãne:
— Tô sena wa za ãne hã aima waihuꞌu zaꞌra waꞌwa: ꞌRe ihâimana uꞌâsi mono zadawa ꞌmahârâꞌwa hã ꞌmaihâimana õ di, isiptiꞌai ꞌre, sô ꞌre idatobꞌuzu zaꞌra mono hã.
25 Tô sena wa za duré ãne hã aima waihuꞌu zaꞌra waꞌwa: Izaraéu tiꞌai ꞌremhã, ꞌRe ihâimana uꞌâsi mono zadawa ꞌmahârâꞌwa Elias ꞌre hâimana mono ré, te piꞌõ imrotõ norĩ hã ahâ na ꞌre hâimana zaꞌra. Tawamhã tã taꞌa õ wa, siꞌubdatõ wahum na duré aiwa wahu ãma isipoꞌo u hã, mrab zépada hã ma tô tihâiba, uburé taha tiꞌai ꞌremhã.
26 Tane nherẽ, ꞌRe ihâimana uꞌâsi mono, Elias hã te te satõrĩ õ di, ta norĩ piꞌõi mrotõ tẽmemhã. Misi piꞌõi mrotõ Sarepita ãma ꞌre isãmra mono u si ma tô satõ, Sidõ ꞌratamhã.
27 Duré ꞌRe ihâimana uꞌâsi mono zadawa ꞌmahârâꞌwa Elizeu ꞌre hâimana mono ré hã ma tô iꞌwaꞌre ré norĩ hã ahâ na ꞌre siꞌubumro, Izaraéu tiꞌai ꞌremhã. Tane nherẽ, ꞌmaipese õ di. Naꞌama, Siria tiꞌai ꞌre, ꞌre isãmra mono si ma tô tipese.
28 Tawamhã uburé rowahutuzéb ꞌre idasiꞌubumro norĩ, ãne hã da te wapari zaꞌra wamhã, ma tô tazahi zaꞌra ni.
29 Tahawa ma tô sô tawahutu zaꞌra ni. Ma tô dasiwi wazere ni, ꞌri waꞌõtõ nhiti. Saꞌa nhisi ꞌrãsutu u, ma tô duré dasiwi saprõni ni, ꞌri waꞌõno iwa isab u, ta hawi da te dasiwi me da, piꞌreba.
30 Tane nherẽ, Zezusi hã daꞌahâ uptabi waꞌwa, ma roꞌrazâ. Ma tô oto mo.
Zezusi hã aibâ hawi, waꞌuburé te te isamarĩzé
31 Tawamhã Zezusi hã ma tô mo Cafarnau u, ꞌri waꞌõno ꞌre ihâimana mono Galiléia tiꞌai ꞌremhã. Tame te nasi dama rowahutu, sabadu na.
32 Tawamhã uburé ma tô ãma tatobꞌuzu zaꞌra ni, te te ꞌre irowahutu mono zém na, simiroti pire na te te ꞌre rowahutu mono wa.
33 Tawamhã Zudeu norĩ te, rowahutuzéb ꞌremhã aibâ hã te ꞌre sãmra, waꞌuburé ré hã. Ta hã ma tô hârâ ꞌrãihâ na hâ, ãne:
34 — Zezusi, Nazaré ãma iꞌaiprédu, e marĩ te asima iwẽ, waꞌãma zaꞌra hã. E waꞌuprosi da, te we aimo. Ĩma aiwaihuꞌu pese uptabi di, a hã niꞌwa na hã. A hã ꞌRe ihâimana uꞌâsi mono te te iꞌaipisudu, aimawi tãma ꞌre aihâimana mono da.
35 Tawamhã Zezusi hã ma tô Waꞌuburé ma timreme hã ꞌmorõwĩ, ãne:
— Ariꞌiwi! Mo oto aiwatobro, ã hã aibâ hawi!
Tawamhã Waꞌuburé ma tô aibâ hã time tiꞌai u, uburé danhoꞌa. Taha pari ma tô ihawi watobro, te te uꞌa ãna.
36 Tahawa, ma tô uburé ãma tatobꞌuzu zaꞌra ni. Ãne te duré dasima nharĩ zaꞌra ni:
— E niha hã, ã hã imreme. Ã hã aibâ hã, waꞌuburé norĩ ma zama te za mreme pire na robꞌru, duré mreme nhiptete na. Tawamhã isadawa zarina te za wairé!
37 Tahawa, Zezusihi wasuꞌu hã ma tô ropé, uburé tame tiꞌai waꞌõtõ zababa ꞌre idasiꞌubumroi mono norĩ u hã.
Zezusi hã, daꞌahâ na te te idaꞌapesezé
38 Tawamhã Zezusi hã ma tô oto watobro, rowahutuzém hawi. Simahã nhorõwa u, ma tô mo. Simahã maprewa hã waꞌro di. Iwaꞌro hã hâimo uptabi. Tahawa ma tô Zezusihi wi waptẽrẽ zaꞌra ni, ãma sime da.
39 Tahawa ma tô itẽme mo. Ma tô mazazâ, isaꞌwarizéb ꞌrata. Taha pari ma tô robꞌru, iwaꞌro ma. Tawamhã piꞌõi hawi ma tô iwaꞌro hã watobro. Tahawa awaꞌawi pesere ma tô wahudu, piꞌõ hã. Ma tô oto tãma a zaꞌra, saihuri da.
40 Tawamhã bâdâ oto isébrézéb u hã, Zezusihi u ma tô ãwisi zaꞌra ni, siwaꞌru dahâzé sipuꞌu pese na daꞌãma ꞌre ihâimana zaꞌra mono hã. Tinhibꞌrada hã ma tô nasi ãma a zaꞌra, hâiba mono bâ. Tahawa ma tô daꞌapese.
41 Taha siré hã, daꞌahâ na waꞌuburé ré, ꞌre idahâimana zaꞌra mono norĩ hawimhã, ma tô wairé, hârâ sina, ãne:
— A hã, ꞌRe ihâimana uꞌâsi mono ꞌra!
Tane nherẽ, Zezusi hã ma tô timreme hã tãma ꞌmorõwĩrĩ zaꞌra. Te te tãma ꞌru zaꞌra õ di, imreme zaꞌra da hã, õ hã Cristu na da te dasiwi waihuꞌu pese wa.
42 Tawamhã awẽ wamhã, Zezusi hã te oto mo, aꞌubuni u. Tahawa ma tô daꞌahâ uptabi hã sô darĩtĩ zaꞌra. Isãmrazéb u dasihutu wamhã, ma tô dazadawa zaꞌréi ãna tiwi waptẽrẽ zaꞌra ni, dahawi morĩ tõ da.
43 Tane nherẽ, Zezusi hã ma tô ãne tãma nharĩ zaꞌra:
— Iꞌru zahi Rowasuꞌu wẽ Ité, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã, ꞌri waꞌõtõ amoi u zama te dama ꞌre iwasuꞌu mono da hã, taha da ꞌRe ihâimana uꞌâsi mono hã we te te ĩzatõrĩ wa.
44 Tahawa Zudeu norĩ te, rowahutuzé ꞌre isimasa mono na ma tô te te dama ꞌre rowasuꞌu, Zudéa na danhiptiꞌa nhoꞌõmo nhisi ꞌremhã.
