Marcus 15:1-47
15 Tawamhã awẽm na mararé, sasedoti ipire norĩ hã duré Zudeu norĩ ma rotiꞌwa norĩ hã, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama, ma tô ãma sisaze zaꞌra, Zezusihi hâiba na hã. Ma tô siwi pawasisi. Te siwi saprõ, Pilatuhu u. Ma siwi ãwisi.
2 Tawamhã Pilatu hã te Zezusi sadanha, ãne:
— E a hã, Zudeu norĩ nhibꞌapito.
Tawamhã Zezusi hã ma sadaꞌâ, ãne:
— Tane na hã a hã te inha.
3 Tawamhã sasedoti ipire norĩ hã ma tô Zezusihi ãma ahâ na iwasédé hã saꞌra zaꞌra.
4 Tahawa, Pilatu hã te duré sadanha, ãne:
— E asadawa na waꞌrãmi õ di za. Maꞌãpé ãma rosaꞌrata pese, marĩ ꞌre iꞌaꞌmanharĩ mono zém na te te iꞌaiwasuꞌu wasété zaꞌra zém na hã.
5 Tane nherẽ, Zezusi hã tizadawa na te te ãma tãma waꞌrãmi õ di. Tahawa, ma tô Pilatu hã ãma titobꞌuzu.
6 Wahub sidâpâ, Pascoa na dato nhisi ꞌre hâimana mono wamhã, Pilatu hã misi ma tô te te ꞌre azani, dazazéb ꞌre, ꞌre isimasa mono hã, da te tiwi ꞌre iwaptẽrẽ zaꞌra mono zéb uwaibaba.
7 Taha bâtâ ꞌremhã aibâ hã te za, dazazéb ꞌre, Barabas na isisi hã, niꞌwam norĩ siré. Ta norĩ hã romanu norĩ da, ꞌre hâimana zaꞌra mono wa, te te idaꞌmapãrĩ zaꞌra, ꞌrâwi siꞌwapé zaꞌra wa.
8 Tawamhã daꞌahâ uptabi na ma tô tasiꞌrãꞌõtõ ni, da te tiwi waptẽrẽ zaꞌra da, Pilatuhu wi, te te ꞌre iꞌmanharĩ mono zéb zarina, misi te te ꞌmaiwazere da, dazazém hawimhã.
9 Tahawa, Pilatu hã te daꞌaꞌmahâ, ãne:
— E te asima iwẽ zaꞌra waꞌwa, Zudeu norĩ nhibꞌapito te aima wazere zaꞌra waꞌaba da hã.
10 Tawamhã sasedoti ipire norĩ hã Zezusi te te siwi ꞌre sõꞌrui mono wa, te te itẽme iꞌãwisi zaꞌra na hã te te waihuꞌu pese wa, ma tô ãne hã tãma nharĩ zaꞌra.
11 Tane nherẽ, sasedoti ipire norĩ hã ma tô dawadaꞌuri zaꞌra, dazahutu ãna, Pilatuhu wi, da te waptẽrẽ zaꞌra da, Barabasihi ma si te te robꞌru da, morĩ da, Zezusihi upana.
12 Tawamhã Pilatu hã te duré daꞌaꞌmahâ, ãne:
— E marĩ, wa za bété ꞌmanha, ã hã aibâ Zudeu norĩ nhibꞌapito na asiwi ꞌre isisi aba mono ãma hã.
13 — Wedepoꞌo nhonhiꞌrãmi na sasõmri! — Ãne ma tô tahãsi ni.
14 — E marĩ wa. E marĩ iꞌupa ma tô ꞌmanharĩ wasété. — Ãne te daꞌaꞌmahâ, Pilatu hã.
Tane nherẽ, ma tô oto tahârâ ꞌrãihâ pese zaꞌra ni:
— Wedepoꞌo nhonhiꞌrãmi na sasõmri!
15 Tawamhã Pilatu hã te te dama arowẽ da, ma tô robꞌru Barabasihi ma si, da te tiwi iwaptẽrẽ zaꞌra zéb uwaibaba. Taha pari, ma tô Zezusi hã tiꞌru, powawẽ hâi waré na da te dasiwi ꞌre préꞌé mono da. Taha pari, dasiꞌwapéi ꞌmanharĩꞌwa norĩ ma, ma tô hâiba zaꞌré Zezusi hã, wedepoꞌo nhonhiꞌrãmi na te te siwi sasõmri da.
Zezusihi ãma dasiꞌwapéi ꞌmanharĩꞌwa norĩ iwaꞌẽ zaꞌra zé
16 Tawamhã dasiꞌwapéi ꞌmanharĩꞌwa norĩ hã, Zezusi ma tô siwi saprõ, apito Pilatuhu nhorõwa* ꞌri ꞌre waꞌwa nhoꞌõmo u. Tame ma tô uburé siꞌrãꞌõtõ, dasiꞌwapéi ꞌmanharĩꞌwa norĩ hã.
17 Tawamhã ma tô siwi uza Zezusi hã, daꞌuza ihâpa ihâpré na. ꞌWabzéré panhipti na ma duré siwi sõpre.
18 Taha pari ma tô timreme na ãne nasi siwi sawi, ãma waꞌẽ zaꞌra sina:
— Zudeu norĩ nhibꞌapito, rowẽ na ꞌre aihâimana mono!
19 Tawamhã iꞌrãi wi, ma tô nasi siwi ahâ, wede waré na. Tizadaipro na te duré nasi siwi upto. Hiꞌrãtitõ te duré nasi tãma asimro, ãma to sina, ãma wata zaꞌra da.
20 Tawamhã ãma waꞌẽ zaꞌra parimhã, iꞌuza ihâpré hã ma tô tiwi wazere zaꞌra. Taha pari, iꞌuza na ma oto apâ siwi uza. Tawamhã te oto rob u siwi saprõ, ꞌri nhoꞌõmo nhiti, wedepoꞌo nhonhiꞌrãmi na te te siwi sasõmri da.
Zezusi hã wedepoꞌo nhonhiꞌrãmi na da te dasiwi isasõmrizé
21 Tawamhã bâdâdi na te te siwi saprõni ré, ma tô aibâ hã siwi sõpẽtẽ Simau na isisi hã, Cireni ãma iprédu hã, ta hã aꞌubuni hawi iwatobro ꞌri nhoꞌõmo u, Alesãdri duré Rufu norĩ mama. Taha ma, ma tô ꞌru zaꞌra, wedepoꞌo nhonhiꞌrãmi hã te te âri da, Zezusihi ma.
22 Tawamhã Zezusi hã ma tô siwi saprõ, Gougota na romnhisi u. (Gougota te wasuꞌu, “Daꞌrãihi Ubumrozé”.)
23 Tawamhã dasiꞌwapéi ꞌmanharĩꞌwa norĩ hã te te aré tãma õb zaꞌra da, uva ꞌrãi waꞌu isé hã mirra na wedepa waꞌu nhisi na, iwazari hã. Tane nherẽ, te te hâꞌrẽne õ di, Zezusi hã.
24 Taha pari, ma tô oto siwi sasõ, wedepoꞌo nhonhiꞌrãmi na. Te duré ẽtẽ zapotore iꞌuiꞌéré ré hã nasi sima sãmra, niꞌwam norĩ hã te te ãma iꞌuwaimrami zaꞌra zarina, iꞌuza iꞌupsãtã mono bâ te te sima waibu da, hâiba mono bâ.
25 Tawamhã Zezusi hã te te siwi isasõmrizé hã 9 hora na bâtâ pibuzé hã.
26 Tawamhã Zezusihi ꞌrãi uwaibaba ma tô wedepoꞌo waꞌõtõ na robꞌuiꞌéré hã siwi sasõ, iwasété da te ãma dasiwi ihirizé hã, da te ãma waihuꞌu zaꞌra da, ãne: “Ã hã, Zudeu norĩ nhibꞌapito.”
27 Tawamhã Zezusihi siré, ma tô duré sasõmri zahuré ni aibâ norĩ maparane, danhibrob zô dama robꞌmanharĩ wasété ꞌwa norĩ hã, isimire niwĩ duré isimiꞌe niwĩ.
28 [Ãne hã ma tô robꞌuiꞌéré zarina sina uwaimra, duréihã ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne: “Ma tô tãma robꞌmanharĩ wasété zaꞌra ni, ꞌRe ihâimana uꞌâsi mono nhimiroti zahi wazébꞌõꞌwa newa.”]
29 Tawamhã iwaꞌwaibaba, da te nasi iroꞌrahâri zaꞌra hã ma tô nasi ãma tawaꞌẽ zaꞌra ni. Daꞌrã siwamnarĩ sina, te nasi ãma wasété zaꞌra ni, ãne:
— Oro a hã nharĩ za, ꞌRe ihâimana uꞌâsi mono nhorõwa hã ꞌri prub da. Oro duré siꞌubdatõ bâtâ ãma apâ ꞌri ꞌru za.
30 Maꞌãpé, wedepoꞌo nhonhiꞌrãmi hawi we siꞌra na. ꞌRâwi asisõꞌreptu na.
31 Tane duré sasedoti ipire norĩ hã ãma waꞌẽ sina, te ãne nasi sima nharĩ zaꞌra, ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama:
— Te te ꞌre daꞌanhoꞌreptui mono nherẽ hã, ꞌrâwimhã sisõꞌreptui waihuꞌu õ di.
32 Danhoꞌreptuiꞌwa Izaraéu nhihudu norĩ nhibꞌapito, maꞌãpé siꞌra na wedepoꞌo nhonhiꞌrãmi hawi, wa te aiꞌmadâꞌâ zaꞌra da, duré wa te asaze zaꞌra da.
Tawamhã Zezusihi siré isaꞌo zahuré norĩ zama, te nasi tãma nharĩ wasété zahuré.
33 Tawamhã abzuma waꞌwa ma tô tirobra uburé daro mono bâ. Bâdâ isipiꞌrazéb u siꞌubdatõ na bâtâ pibuzéb u, te robra na tiromhâiba.
34 Tawamhã siꞌubdatõ na bâtâ pibuzéb ãma, Zezusi hã hârâ ꞌrãihâ na ma tô hâ, ãne:
— “Eloi, Eloi, lema sabactani.”
à hã imreme ãma isaprĩzé hã ãne:
— “Ĩte ꞌRe ihâimana uꞌâsi mono, Ĩte ꞌRe ihâimana uꞌâsi mono, e marĩ wa, ma tô ĩsiwaprosi ĩrẽ.”
35 Tawamhã niꞌwam norĩ iꞌrata isimasa hã Zezusihi hârâ te te wapari zaꞌra wamhã, ma tô ãne nharĩ zaꞌra:
— Maꞌãpé wapari zaꞌra waꞌaba. Eliasihi zô te hâ.
36 Tawamhã niꞌwa hã siꞌabaꞌré na ma tô pizaꞌre upsõzé hã ꞌmaiꞌâ. Ta hã ma tô uva ꞌrãi waꞌu isé na diꞌi, iwaꞌâbâ suru na. Wedewaré ꞌrãsutu na ma tô wẽ, Zezusihi ma, te te hâꞌrẽne da. Ãne te tinha:
— Aꞌâ pé, wa te robꞌmadâꞌâ zaꞌra waꞌaba, Elias hã we sô morĩ õꞌumnhasite, wedepoꞌo nhonhiꞌrãmi hawi te te siꞌra da.
37 Tawamhã Zezusi hã hârâ ꞌrãihâ na ma tô hâ, irẽme ma. Taha pari, ma tô pẽꞌẽ haiꞌutõ.
38 Tawamhã zazahâ ihâpa hã, ꞌRe ihâimana uꞌâsi mono nhorõwa ãma ꞌri ꞌre waꞌwa nhitobzé hã ma tô hâihaipoꞌo, hâimo hawi piꞌreba maparane iwaꞌõtõ na aiwa.
39 Tawamhã Romanu na dawamri na dasiꞌwapéi ꞌmanharĩꞌwa norĩ wadaꞌuriꞌwa Zezusihi nhoꞌre ipapara isa hã, Zezusi hã hârâ ꞌrãihâ na ihârâzé te te wapari wamhã, duré niha na idâꞌâzé te te ꞌmadâꞌâ wamhã, te ãne tinha:
— Tô sena ã hã aibâ hã, ꞌRe ihâimana uꞌâsi mono ꞌra.
40 Tawamhã nima norĩ piꞌõ norĩ zama, te romhâ hawi Zezusi hã siwi ꞌmadâꞌâ. Dasiré ihâimana zaꞌra hã: Maria Madalena, Salomé, duré Maria, Zuzé norĩ na hã, Tiaguhu me, duré Tiagu hã ihâiba té.
41 Ã hã piꞌõ norĩ hã Zezusi Galiléia ãma ꞌre morĩ ré, te isiré ꞌre nomro. Te te duré tãma ꞌre romhuri zaꞌra. Duré ahâ na piꞌõ norĩ Zeruzalẽ u isiré isiꞌabaꞌré hã ma tô dame tihâimana zaꞌra.
Zezusi hã da te isẽrẽzé urébé ꞌre
42 Tawamhã marazéb u oto romhuri ꞌrãsudu sexta na, sabadu u bâdâ iwisizéb u hã.
43 Zuzé Arimatéia hawimhã, Zudeu norĩ ma rotiꞌwa ipire hã, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb zô ꞌre isimipari mono hã, ma tô mo Pilatuhu u, pahi ãna. Zezusihi hâiba hã ma tô tiwi waptẽ.
44 Tawamhã Pilatu hã ma tô tãma aꞌrãmi pese, Zezusi hã idâꞌâ suꞌu na te te waihuꞌu wamhã. Tahawa romanu na dawamri na dasiꞌwapéi ꞌmanharĩꞌwa norĩ wadaꞌuriꞌwa zô te hâ, Zezusi hã tô sena dâꞌâ zô te te sadanharĩ da.
45 Tawamhã dasiꞌwapéi ꞌmanharĩꞌwa norĩ wadaꞌuriꞌwa hã tô sena Zezusi idâꞌâ na te te tãma wasuꞌu parimhã, Zuzéhé ma, ma tô tiꞌru, Zezusihi hâiba hã.
46 Tawamhã Zuzé hã zazahâ ihâiwẽ uptabi hã ma sada uipra, ihâirã hã. Taha pari, Zezusihi hâiba hã ma tô siꞌra. Zazahâ hâirã na ma ubu. Tawamhã saꞌa zahâpâ ẽtẽ wa, ma tô tisẽ, abꞌre siromo ꞌre. Taha pari, te ẽtẽ tõmo wawẽ hã te te pizari, abꞌre te te ãma iré sitob da.
47 Tawamhã Maria Madalena duré Maria Zuzéhé na me, ma tô ꞌmadâꞌâ zahuré Zezusihi hâiba, nimame Zuzé te te isẽrẽzé hã.
Ĩwaꞌõtõ piꞌreba watsuꞌu mono
^ 15:16 apito Pilatuhu nhorõwa à hã romanu norĩ nhibꞌapito nhorõwa si hã
