Marcus 3:1-35
3 Tawamhã Zezusi hã ma tô duré âzé, Zudeu norĩ te rowahutuzéb u. Tame aibâ hã te dame nhamra, isibꞌrata amo niwĩ isibꞌrata tede hã.
2 Tame te duré niꞌwam norĩ hã dame tihâimana zaꞌra isõpré hã, Zezusihi ãma iwasédé te te siwi hiri da. Tahawa ma tô siwi ꞌmadâꞌâ pese, te te daꞌmaipese zô, sabadu na nherẽ.
3 Tawamhã Zezusi hã aibâ te ꞌmahâ, ãne:
— Aiwahutu! We aimorĩ, dawaꞌwa u.
4 Taha pari te daꞌaꞌmahâ, ãne:
— E marĩ iꞌru zahi, sabadu na wa te ꞌre iꞌmanharĩ zaꞌra mono da hã: E iwẽ. E iwasédé. E wa za wa te ꞌre danhoꞌreptu zaꞌra. E niwamhã wa za wa te ꞌre danhimro.
Tane nherẽ, niꞌwa hã te te sadaꞌâbâ õ di.
5 Tawamhã Zezusi hã toi ãna ma tô simana wawi daꞌaꞌmadâ. Ma tô tiwi tirobzeiꞌõ pese, pẽꞌẽ tete zaꞌra wa. Taha pari te aibâ ma tinha, ãne:
— Maꞌãpé, asibꞌrada wahutu.
Aibâ hã tinhibꞌrada ma tô wahutu. Ma tô oto tipese.
6 Taha pari, ma tô awaꞌawi wairé, farizeu norĩ hã. Tawamhã Erodihi niwĩ ꞌre ihâimana zaꞌra mono norĩ* me, ma tô sima rowaꞌõtõ zaꞌra, Zezusihi hâiba na, te te siwi wĩrĩ da.
Zezusi hã te te idaꞌapesezé
7 Tawamhã Zezusi hã duré isiré ꞌre inomro mono norĩ me ma tô aiꞌabaꞌré, Galiléia isõꞌui pa u. Tawamhã daꞌahâ uptabi na te isarina aiꞌabaꞌré ni, Galiléia tiꞌai hawimhã, duré Zudéa hawib zama,
8 duré Zeruzalẽ hawimhã, Iduméa, Zodã pa zara hawimhã, Tiru, duré Sidõ tiꞌai hawib zama, Zezusi hã da te dasiwi sõpẽtẽ da, marĩ te te ꞌre iꞌaꞌmanharĩ mono zém na iwasuꞌu hã da te wapari zaꞌra wa.
9 Tawamhã Zezusi hã ma tô isiré ꞌre inomro mono norĩ ma tiꞌru, ubaꞌre hã te te ꞌmaꞌâri zaꞌra da dawi, iwap sébré da, da te dasiwi hõti tõ da, dasina.
10 Tawamhã daꞌahâ uptabi na te te daꞌapese wa, ma tô ihâzé ré norĩ hã iteme ꞌre sisãmra, te te siwi upi da.
11 Waꞌuburé dawa ꞌre ihâimana zaꞌra mono norĩ hã, Zezusi te te nasi ꞌmadâꞌâ zaꞌra wamhã, hiꞌrãtitõ te ipapara nasi tãma ana. Ãne te saꞌẽtẽ nasi siwi ꞌmahâ:
— A hã ꞌRe ihâimana uꞌâsi mono ꞌra.
12 Tane nherẽ, Zezusi hã waꞌuburé norĩ wi mreme tete na ma tô tiwi sisawi zaꞌra, ꞌRe ihâimana uꞌâsi mono ꞌra na hã te te dama hâiꞌré zaꞌra tõ da.
Zezusi hã aibâ norĩ 12 na te te ipisutu zaꞌra zé
13 Tawamhã Zezusi hã ẽtẽꞌrãihâ na ma tô saiꞌu. Tame te te sima iwẽ zaꞌra norĩ zô ma tô hâ. Ta norĩ hã ma tô itẽme aiꞌabaꞌré ꞌrâwi.
14 Tame 12 na aibâ norĩ hã ma tô pisutu zaꞌra, isiré ꞌre hâimana zaꞌra mono da, te te duré datẽme satõrĩ zaꞌra da, Rowasuꞌu wẽ ité hã te te dama ꞌre wasuꞌu zaꞌra mono da.
15 Isimiroti pire hã ma tô duré tãma sõmri zaꞌra, waꞌuburé hã te te dama ꞌre sãmra zaꞌra mono da.
16 Tawamhã 12 na ihâiba zaꞌra norĩ nhisi hã, ãne: Simau, Zezusi te te isisi té Pedru na.
17 Tiagu duré Zuwãhã me, ta norĩ hã Zebedeu ꞌra zahuré. Buanezi na ma tô sisi téb zahuré. “Tãirãrãꞌã ꞌra” te wasuꞌu, isisi téb zahuré hã.
18 Ãdré, Filipi, Bartolomeu, Mateus, Tome, Tiagu Afeuhu ꞌra, Tadeu, Simau, zeloti norĩ niwĩ ꞌre ihâimana mono,
19 duré Zudasi Iscarioti, Zezusihi hâiba nhomriꞌwa da hã dama.
Zezusi hã tiwaihuꞌu pese na waꞌuburé te te ꞌre iꞌanhamra mono zé
20 Tawamhã Zezusi hã ꞌri, ꞌre izasi pese mono zéb u morĩ wamhã, daꞌahâ na ma tô duré itẽme dasito. Tahawa Zezusi norĩ hã saihuri waihuꞌu õ di.
21 Ina duré isiwadi norĩ hã, Zezusihi wasuꞌu te te wapari zaꞌra wamhã, ma tô sô aiꞌabaꞌré, da te dasiwi wasuꞌu wa, iꞌrãsiwamnarĩ na hã.
22 Tawamhã ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã, Zeruzalẽ hawi isihutu norĩ hã te ãne nasi nharĩ zaꞌra:
— Beuzebu te iwa tihâiba, waꞌuburé norĩ nhibꞌapito hã. Taha zadawa para te waꞌuburé hã te te dama ꞌre anhamra.
23 Tawamhã Zezusi hã te sô tihârâ zaꞌra. Tame ma tô tãma rowasuꞌu zaꞌra, romnhimiréꞌé na. Ãne:
— E niha te za Satanasi hã ꞌrâwi te te sima ꞌre robꞌru.
24 Tiꞌai waꞌõtõ nhoꞌu hã maparane iwaꞌõtõ na sisada sipoꞌo wa siꞌwapé zaꞌra wamhã, ꞌrâwi te za siꞌuprosi.
25 Dasisãnawã nherẽ, dasisada ꞌre dasipoꞌo mono wa, ꞌre dasiꞌwapé zaꞌra mono wamhã, te za ꞌre dasiꞌuprosi.
26 Tane Satanasi norĩ hã maparane iwaꞌõtõ na sisada sipoꞌo wa, siꞌwapé zaꞌra wamhã, te za siꞌuprosi. Tame te za aiꞌutõ.
27 — E niꞌwa hã sébré waihuꞌu pese bâ, aibâ isiptete nhorõwa u hã isibro te te tiwi duri da, aꞌâ te te pawasisi õ ré hã. Te te pawasisi parip si, te te tiwi robduri waihuꞌu pese di, aibâ isiptete nhorõwa hawimhã.
28 — Tô sena wa za aima rowasuꞌu zaꞌra waꞌwa, ãne: ꞌRe ihâimana uꞌâsi mono te te daꞌãma ꞌre aꞌmadâꞌâ mono õ di za, uburé dawasédé, da te ꞌre iꞌmanharĩ zaꞌra mono zé hã, duré da te ãma ꞌre iwasété zaꞌra mono zé hã.
29 Tane nherẽ, ꞌRe ihâimana uꞌâsi mono Pẽꞌẽzani ãma da te ꞌre wasété zaꞌra mono wamhã, te te dama ꞌre apari waihuꞌu mono õ di za. Te za te te daꞌãma ꞌre aꞌmadâꞌâ uꞌâsi. Ta hã dawasédé isiꞌutõrĩꞌõ.
30 Ãne ma tô Zezusi hã tãma rowasuꞌu zaꞌra, te te tãma nharĩ zaꞌra wa, waꞌuburé ré ihâimana na hã.
Zezusihi na duré ino norĩ
31 Taha pari, Zezusihi na duré ino norĩ hã ma tô itẽme aihutu. Rowi simasa wa, ma tô sô daꞌmazatõrĩ zaꞌra, da te tãma ꞌmairowasuꞌu da.
32 Daꞌahâ uptabi na te imana wawi asimro ni. Tawamhã niꞌwam norĩ hã te tãma rowasuꞌu zaꞌra, ãne:
— Ana duré ano norĩ hã te rowi aimasa. Te asô tirĩtĩ zaꞌra.
33 Tawamhã Zezusi hã te sadanharĩ zaꞌra, ãne:
— E ꞌwa hã ĩna bâ. Duré e ꞌwam norĩ hã ĩno norĩ.
34 Tawamhã ma tô abꞌmadâ, te te siwi iꞌuirĩ norĩ hã. Tahawa te ãne tinha:
— Maꞌãpé ꞌmadâꞌâ zaꞌra waꞌaba! Ãhãta te ĩna norĩ hã asimro, duré ĩno norĩ.
35 Niꞌwa hã ꞌRe ihâimana uꞌâsi mono te te sima ꞌre iwẽ zaꞌra mono zéb zarina te te ꞌre abꞌmanharĩ mono wamhã, ta hã ĩsisãnawã, ta hã ĩhidiba, duré ta hã ĩna.
Ĩwaꞌõtõ piꞌreba watsuꞌu mono
^ 3:6 Erodihi niwĩ ꞌre ihâimana zaꞌra mono norĩ Ta norĩ ma, wẽ zaꞌra di, Erodihi nhihudu si, ꞌmasiꞌapito da hã, romanu norĩ te apito upana.
