Marcus 5:1-43
5 Tawamhã Zezusi hã, isiré ꞌre inomro mono norĩ me ma tô saprĩ zaꞌra â zara u ubaꞌre na, Zeraza na tiꞌa nhisi u.
2 Tame Zezusi hã ubaꞌre hawi watobro wamhã, aibâ waꞌuburé ré ꞌre imorĩ hã ma tô sina uzusi, adâꞌâ ꞌru hawi.
3 Aibâ hã adâꞌâ ꞌru ãma te ꞌre sãmra. Niꞌwa hã te te ꞌre pawasisi waihuꞌu mono õ di ipara zama, isiꞌuwazi na hã.
4 Da te ꞌre pawasisi mono wamhã, ipara ãma zama ma tô isiꞌuwazi hã te te sina ꞌre anhinarĩ. Tahawa niꞌwa sada hâimana õ di, te te isõwada da hã.
5 Bâtâ na, duré mara na te ꞌre hâimana sadari sina, adâꞌâ ꞌru ãma duré ẽtẽ ꞌrãihâ norĩ waꞌwa. Ẽtẽꞌwa na te duré ꞌre sisihâri.
6 Tawamhã aibâ hã romhâ na Zezusi te te sãmri wamhã, ma tô itẽme wara. Hiꞌrãtitõ ma tô ipapara aime.
7 Tawamhã te saꞌẽtẽ ꞌmahâ, ãne:
— Zezusi, ꞌRe ihâimana uꞌâsi mono danhipai u ꞌre isãmra mono ꞌra, e marĩ te ĩꞌãma asima iwẽ. ꞌRe ihâimana uꞌâsi mono nhisi na wa aiwi waptẽ, ĩma robꞌmanharĩ tõ.
8 Ãne hã ma tô tãma tinha, Zezusi hã waꞌuburé ma, te te robꞌrui wa, aibâ hawi watobro da, ãne: “Waꞌuburé, aibâ hawi aiwatobro!”
9 Tawamhã Zezusi hã te ãne sadanha:
— E niha asisi hã.
— Ahâ na, ĩnhisi hã. E marĩ wa. Waꞌahâ uptabi wa.
10 Tawamhã Zezusihi wi, ma tô sadawa zaꞌréi ãna tiwi waptẽrẽ zaꞌra, õ hã tiꞌa nhizâri hawimhã te te tãma robꞌru zaꞌra tõ da.
11 Tamemhã te ꞌrâwi uhâbâ zari hã ꞌre hâimana, saꞌa ãma.
12 Tawamhã waꞌuburé norĩ hã sadawa zaꞌréi ãna ma tô Zezusihi wi waptẽrẽ zaꞌra, ãne:
— Maꞌãpé wazatõrĩ zaꞌra na, uhâbâi wa wanhisisi da.
13 Tahawa ma tô tãma rowairébé zaꞌra, aibâ hawi wairébé da, uhâbâi wa, sisisi da. Uhâbâ zari hã 2 miu na ihâiba zaꞌra hã robꞌrehâ u ma tô sisaꞌre, âi ba. Tame ma tô aiꞌutõ.
14 Tawamhã aibâ norĩ uhâbâi ꞌmadâꞌâꞌwa hã ma tô sisaꞌre, ꞌri waꞌõtõ u. Tame ma tô rowasuꞌu na ropé zaꞌra, rom na ꞌre idahâimana zaꞌra mono norĩ ma zama. Tahawa daꞌahâ uptabi na ma tô aiꞌabaꞌré ni, da te ꞌmadâꞌâ zaꞌra da, iromhâimanazé hã.
15 Tawamhã Zezusihi u da te dasina rotété zaꞌra wamhã, aibâ hã ma tô dasiwi ꞌmadâꞌâ ni, waꞌuburé norĩ ré aré ꞌre ihâimana mono hã. Uza ré te oto nhamra, rowẽ na. Tahawa ma tô tapahi pese zaꞌra ni.
16 Te te iꞌmadâꞌâ zaꞌra norĩ hã ma tô dama rowasuꞌu pese zaꞌra, aibâ ma iromhâimanazé hã duré uhâbâ norĩ ma zama.
17 Tawamhã te Zezusihi ma nharĩ zahi zaꞌra ni, danhiptiꞌai hawi watobro da.
18 Tawamhã Zezusi hã ubaꞌre wa oto sébré wamhã, aibâ waꞌuburé ré aré ꞌre imorĩ hã ma tô sina tizadahutuꞌõ, isiré morĩ da.
19 Tane nherẽ, Zezusi hã te te tãma rowairébé õ di. Tahawa, te ãne tãma tinha:
— Asõrõwa u aimorĩ, Uburé Danhibꞌapito, iwẽ te te aima iꞌmanharĩzé hã wasuꞌu da, asiré aꞌuwẽ norĩ ma.
20 Tawamhã aibâ hã ma tô mo. Decapoli ãma, ma tô te te dama wasuꞌu, Zezusi hã te te tãma iꞌmanharĩ zé hã. Tahawa isimirowasuꞌu na, ma tô ãma tatobꞌuzu zaꞌra ni.
Zezusi hã, Zairuhu ꞌra te te ihâiwaꞌutuzé duré piꞌõ te te ipesezé
21 Tawamhã Zezusi hã zara u apâ te te saprĩ wamhã, daꞌahâ uptabi na ma itẽme tasiꞌrãꞌõtõ ni, â zaihâ u.
22 Tawamhã ma tô itẽme wi, Zairu na isisi hã Zudeu norĩ te, rowahutuzé ꞌmadâꞌâꞌwa hã. Zezusi te te sãmri wi, ma tô ipapara hiꞌrãtitõ aime.
23 Ma tô tiwi waptẽ sadawa zaꞌréi ãna, ãne:
— Ĩꞌra sipiꞌõ hã te za ĩwi aiꞌutõ. Maꞌãpé we ĩsiré aimorĩ, asibꞌrada hã ãma hiri da, pese da, duré aꞌâ ꞌre hâimana mono da.
24 Tawamhã Zezusi hã ma tô isiré mo. Daꞌahâ uptabi na ma tô isiré aiꞌabaꞌréi ni. Tahawa ma dasiwi hõti pese ni.
25 Tame ma tô dasiré mo piꞌõ hã, 12 na ãma iwahu piꞌõi hâzé ãma ꞌre hâimana mono ré hã.
26 Ma tô te te ꞌre robzépata zaꞌẽtẽ. Tinhimarĩ hã ma tô duré uprosi, dawedeꞌwa norĩ hã te te siwi ꞌre iwede mono zém na. Tãma rowẽ da newa, tane nherẽ, te tiwi pire uꞌâsi.
27 Ta hã piꞌõ, Zezusihi wasuꞌu te te wapari wamhã, isarina ma tô mo dawaꞌwa, ibabarãi hawi. Te te itẽme sina rotété wamhã, ma tõ iꞌuza hã upi,
28 ãne te te sima rosaꞌrata sina: “Iꞌuza si te upi wamhã, wa za ĩpese.”
29 Tawamhã te te upi wamhã, awaꞌawi pesere ihâzé hã ma tô tãma mazazâ. Tahawa ma tô siwaihuꞌu, ipese na hã.
30 Tawamhã awaꞌawi pesere, Zezusi hã ma tô duré siwaihuꞌu, ihawi iwaihuꞌu pe iwatobro na hã. Tahawa, ma aipiꞌra, daꞌahâ waꞌwa. Ãne te anha:
— E ꞌwa hã ma tô ĩꞌuza hã upi.
31 Tawamhã isiré ꞌre inomro mono norĩ hã ma sadaꞌâbâ zaꞌra, ãne:
— Ma tô idaꞌaꞌmadâ, da te dasiwi iꞌaihõti pese na hã. E niha te tane nherẽ asinha, niꞌwa te te aiꞌupi zô.
32 Tane nherẽ, Zezusi hã ma tô daꞌaꞌmadâ simana wawi, niꞌwa hã te te iꞌupi zô.
33 Tahawa, piꞌõ hã siwaihuꞌu pese wa, te te iꞌmanharĩ zém na hã ma tô Zezusihi u sina rotété, rẽrẽꞌẽ sina, pahi te. Hiꞌrãtitõ ma ipapara aime. Tahawa ma tô tãma siwasuꞌu pese.
34 Tawamhã Zezusi hã ma tô tãma tinha, ãne:
— Ĩꞌra, asina ĩꞌumnhasizé hã ma tô aipese. Rowẽ sina aimorĩ. ꞌRe irobzépata mono zé wi, te za oto rowẽ na ꞌre aihâimana mo.
35 Tawamhã Zezusi hã zahadu piꞌõi ma te te nharĩ ré, ma tô aihutu, nima norĩ romhuriꞌwa hã Zairuhu ma. Ãne te tãma rowasuꞌu zaꞌra:
— Aiꞌra azarudu hã ma tô aiꞌutõ. Siꞌwaꞌrutu nherẽ, Rowahutuꞌwai ma, nharĩ zahu tõ, asõrõwa u morĩ da hã.
36 Tane nherẽ, Zezusi hã rowasuꞌu na te te rosaꞌrata õ di. Tahawa, te Zairuhu ma tinha, ãne:
— Aipahi tõ. Ĩꞌumnhasi.
37 Tawamhã Zezusi hã te te rowairébé õ di, niꞌwa isiré imorĩ da hã. Pedru, Tiagu duré ino Zuwã norĩ si ma tô te te siré simro.
38 Tawamhã Zairuhu nhorõwa u sihutu wamhã, Zezusi hã ma tô daꞌaꞌmadâ. Robꞌru te, te taꞌruꞌru ni, dawawa ꞌrãihâ na.
39 Tawamhã Zezusi sébré wamhã, ma tô ãne dama tinha:
— E marĩ da, te robꞌru te, aiwawa ꞌrãihâ na aiꞌruꞌru waꞌwa. Azarudu hã dâꞌâ õ di. Taré te nhono.
40 Tane nherẽ, ma tô Zezusihi ãma aihâ zaꞌra ni. Tawamhã Zezusi hã ma tô dama robꞌru, rob u dawairébé da, uburé. Azarutu mama duré ina, isiré ꞌre inomro mono norĩ zama isiré isiꞌabaꞌré norĩ si ma tô asisi, azarudu inomrozéb u hã.
41 Tawamhã ma tô paꞌâ. Ãne te tãma tinha:
— Talita cumi.
Ãne ãma isaprĩzé hã: “Azarudu, wa aima tiꞌru: Aiꞌutu!”
42 Tawamhã awaꞌawi pesere azarudu, 12 na ãma iwahu hã ma tô udu. Ma tô oto ꞌre mo. Tawamhã uburé ma ãma tatobꞌuzu zaꞌra ni.
43 Tawamhã Zezusi hã ma tô sawi pese imama norĩ wi, rowasuꞌu na te te ropé zahuré tõ da. Ma tô duré tãma ꞌru zahuré, azarutu ma, ĩsa te te a zahuré da.
