Marcus 6:1-56
6 Tawamhã Zezusi hã apâ ma tô mo Nazaré u. Isiré ꞌre inomro mono norĩ zama te isiré aiꞌabaꞌré, aré ꞌre isãmra mono zéb u.
2 Tawamhã Romhuri ꞌrãsutu wamhã, sabadu na te dama rowahutu, Zudeu norĩ te rowahutuzéb ãma. Daꞌahâ uptabi na da te iwapari zaꞌra hã ma tô ãma tatobꞌuzu zaꞌra ni. Ãne te ãma tasisadanharĩ zaꞌra ni:
— Pra! E mame ma tô uburé marĩ hã awaihuꞌu. E niha hã te rowaihu tãma ꞌre hâimana, marĩ dama iꞌmanharĩ waihuꞌuꞌõ te te dama ꞌre iꞌabꞌmanharĩ mono da hã.
3 E ã hã wedeꞌé na romhuriꞌwai ã bâ. E Mariaha ꞌra ã bâ. Duré e ino norĩ hã Tiagu, Zuzé, Zudasi, duré Simau norĩ ã bâ. E duré ihidiba norĩ hã ãme ꞌre siꞌubumroi mono ã bâ.
Tahawa ãne uꞌâbâ, ma tô siwi wẽꞌõ, Zezusi hã.
4 Tawamhã Zezusi hã te tãma nharĩ zaꞌra ãne:
— ꞌRe ihâimana uꞌâsi mono zadawa ꞌmahârâꞌwa hã daro mono bâ dama wazé pese di. Isiptiꞌai ãma si sô datobꞌuzu waihuꞌu õ di, isisãnawãi ꞌremhã duré isõrõwa ꞌreb zama.
5 Tahawa, Nazaré ãma hã marĩ dama iꞌmanharĩ waihuꞌuꞌõ hã te te aꞌmanharĩ waihuꞌu õ di. Niꞌwam norĩ ãma si, ma tô tinhibꞌrada hã azaꞌra, te te apese da.
6 Tahawa, Zezusi hã ma tô daꞌãma titobꞌuzu, da te dasiwi iꞌumnhasiꞌõzém na hã.
Zezusi hã tisiré ꞌre inomro mono norĩ te te isatõrĩ zaꞌra zé
Tawamhã Zezusi hã Nazaré ꞌrata ꞌre idahâimana zaꞌra mono norĩ ma, te te ꞌre rowahutu oto, ꞌri waꞌõtõ mono bâ.
7 Tawamhã 12 na ihâiba zaꞌra isiré ꞌre inomro mono norĩ zô, te tihârâ zaꞌra. Taha pari, ihâiba maparane si ma tô satõrĩ zaꞌra. Isimiroti pire hã ma tô tãma sõmri zaꞌra, waꞌuburé hã te te dama sãmra zaꞌra mono da.
8 Te duré tãma roti pese zaꞌra, marĩ hã te te siré ꞌwasari tõ da, bâdâdi na da hã, tisiwazusizép si te te siré ꞌwasari da, mra hã, romramizé duré robꞌuiprazé hã te te ꞌwasari tõ da,
9 tiparaꞌuza ré si siꞌabaꞌré da, duré daꞌuza ihâpa isõꞌutuꞌu ré si siꞌabaꞌré da, isapariꞌwa hã te te ꞌwasari tõ da.
10 Te duré tãma nharĩ zaꞌra, ãne:
— Danhorõwa u, asô dahârâ zaꞌra waꞌaba mono wa, asisisi aba mono wamhã, tamep si aihâimana zaꞌra waꞌaba mono, ta hawi iꞌaiwairébé aba zéb u.
11 Tazahã nimame da te aiwaibui wẽ waꞌaba õ wamhã, duré da te aiwapari zaꞌra waꞌaba õ wamhã, dahawi aiwairébé suꞌu aba mono. Duré oto ta hawi aiwairébé aba zéb u, aipara zapru hã asisaꞌu tataꞌa zaꞌra waꞌaba mono, tiꞌai u rereꞌe da.
12 Tawamhã isiré ꞌre inomro mono norĩ hã ma tô oto datẽme aiꞌabaꞌré, te te dama sadawa wasuꞌu zaꞌra da, dawasété na dasisãmri zaꞌra wa, ꞌRe ihâimana uꞌâsi mono ma dasiwẽꞌõ zaꞌra da.
13 Tawamhã Waꞌuburé hã ahâ uptabi na te te dama sãmra zaꞌra. Duré azeite ꞌrãi waꞌui wam na, te te daꞌrãi uꞌré zaꞌra mono pari, ma tô daꞌahâ na te te dapese zaꞌra, dahâzé ré ꞌre idahâimana zaꞌra mono hã.
Zuwã Batista hã idâꞌâzé
14 Tawamhã Apito Erodi hã ma tô ãne hã rowasuꞌu wapa, Zezusihi wasuꞌu hã daro mono bâ dama saꞌrese wa oto. Ãne te niꞌwam norĩ hã Zezusihi ãma nasi romnomri zaꞌra:
— Ã hã aibâ hã, Zuwã Batista apâ ihâiwaꞌudu. Tahawa, waihuꞌu pese di, marĩ dama iꞌmanharĩ waihuꞌuꞌõ hã te te ꞌre iꞌabꞌmanharĩ mono da hã.
15 Tawamhã niꞌwam norĩ hã te te duré ãma ꞌre romnomri zaꞌra, ãne:
— Õ hã Elias.
Niꞌwam norĩ hã te te duré ãma ꞌre romnomri zaꞌra, ãne:
— Õ hã ꞌRe ihâimana uꞌâsi mono zadawa ꞌmahârâꞌwa, duréihã isadawa ꞌmahârâꞌwa norĩ ne hã.
16 Tawamhã Apito Erodi ãne hã te te wapari wamhã, ma tô ãne tinha:
— Õ hã Zuwã Batista, wa hã te iꞌru, da te butu nhizâri da, apâ ihâiwaꞌudu.
17 Erodi hã tô te te dama ꞌrui wa, Zuwã Batista da te pawasisi da, da te dasiwi sẽrẽ da hã, dazazéb ꞌre. Ãne hã ma tô ꞌmanha, Erodiaha ma rowẽ da, ãma isiꞌré, tisisãnawã Filipihi mro nherẽ.
18 Ãma mro wa, Zuwã hã ma tô nasi tinha, Erodihi ma, ãne: “ꞌRe ihâimana uꞌâsi mono nhimiroti zahi na Mozési te te irobꞌuiꞌérézém na hã, ãma aimro waihuꞌu õ di, Erodizaha ãma hã.”
19 Tahawa, Erodiaha ma ꞌru ti, Zuwã hã. Te te iwĩrĩ da si. Tane nherẽ, te te wĩrĩ waihuꞌu õ di.
20 Erodi hã te te tiwi ꞌre ꞌmadâꞌâ pese, Zuwã Batistaha ma ꞌre pahi mono wa, te te waihuꞌu pese wa, iwẽ na hã, duré ꞌRe ihâimana uꞌâsi mono ma si ꞌre ihâimana mono na hã. Tahawa, ma tô te te ꞌre ꞌmadâꞌâ pese, Zuwã hã. Zuwãhã nhimirowasuꞌu te te ꞌre wapari mono wamhã, te tiwi ꞌre rowaihuꞌuꞌõ. Tane nherẽ, ma tô te te ꞌre wapari ze.
21 Tawamhã bâdâ ma tô oto wi, Erodiza te te sima iwẽzé hã. Iwaptãꞌãzém na Erodi hã dasa isaꞌẽne ma tô ꞌmanha dama ipire norĩ ma, te te ꞌre idaꞌaꞌmadâꞌâ mono zéb ꞌremhã, dasiꞌwapéi ꞌmanharĩꞌwa norĩ nhibꞌapito norĩ ma, duré Galiléia ãma dama ipire norĩ ꞌre ihâimana zaꞌra mono ma.
22 Tawamhã dasaihuri ré hã, Erodiaha ꞌra sipiꞌõ hã ma ãzé, ꞌri para u. Tame ma tô aipese. Tawamhã Erodi duré isiré isaihuri norĩ ma, ma tô rowẽ pese, tisipese na. Tahawa, te apito hã azarutu ma tinha, ãne:
— Marĩ ĩwi waptẽrẽ, asima iwẽzéb uwaibaba. Wa za aima tisõ.
23 Tawamhã ma tô tãma ropisutu zahi:
— Marĩ hã asima iwẽzéb uwaibaba waptẽrẽ wamhã, wa za aima tisõ. Te ꞌre idaꞌaꞌmadâꞌâ mono zé ĩwi waptẽrẽ wamhã, aiwa wa za ãma wasima aipoꞌo ni.
24 Tahawa, te tina u aꞌâ mo, marĩ hã apito wi te te iwaptẽrẽ da hã, te te tãma waihuꞌu da. Tawamhã ina ma ãma sadaꞌâ, ãne:
— Maꞌãpé waptẽrẽ, Zuwã Batistaha ꞌrã hã.
25 Tahawa, siꞌabaꞌré na ma apâ ãzé apito u, azarudu hã. Ãne te tiwi waptẽ:
— Wa ĩsima wẽ, Zuwã Batistaha ꞌrã hã ĩma sõmri da, pratu wa, ãhã na awaꞌawi.
26 Tawamhã apito Erodihi wi ma tô tirobzeiꞌõ pese. Tane nherẽ, ropisutu zahi isaihuri norĩ nhoꞌa te te ꞌmanharĩ wa, isiré azarudu hã te te tiwi iwaptẽrẽzé te te wẽꞌõ waihuꞌu õ di.
27 Tahawa ma tô tiꞌru, dasiꞌwapéi ꞌmanharĩꞌwa hã Zuwãhã ꞌrã te te tãma âri da. Tawamhã awaꞌawi te sô mo, dazazéb u. Tame ma tô ꞌrãnhizâ, Zuwã Batista hã.
28 Ma tô tiꞌâ, pratu wa. Azarutu ma, ma tô tisõ. Ta hã tina ma, ma oto tisõ.
29 Tawamhã Zuwã Batistaha siré ꞌre inomro mono norĩ hã ãne hã te te waihuꞌu zaꞌra wamhã, ihâiba hâ zô ma tô aiꞌabaꞌré. Ma tô siwi tiꞌâ. Taha pari ma tô ãma siwi tiꞌa.
Zezusi hã daꞌahâ uptabi na te te idaꞌasaihurizé
30 Tawamhã Zezusihi siré ꞌre inomro mono norĩ hã apâ sihutu wamhã, ma tô tãma siwasuꞌu pese zaꞌra, uburé marĩ hã te te iꞌmanharĩ zaꞌra mono zém na hã, duré te te dama irowasuꞌu zaꞌra mono zém na zama.
31 Tamemhã daꞌahâ uptabi na dasiwaꞌrãmi itẽme dasisamarĩ pese wa, saihuri waihuꞌu õ di, Zezusi norĩ hã. Tahawa, ma tô isiré ꞌre inomro mono norĩ ma tinha, ãne:
— We ĩsiré aiꞌabaꞌréi waꞌaba aꞌubuni u, wawaꞌutu zaꞌra da aꞌâ.
32 Tawamhã hâiba pisutu ma tô sisaꞌre ubaꞌre na, aꞌubuni u.
33 Tane nherẽ, daꞌahâ na da te ꞌmadâꞌâ zaꞌra wamhã, da te waihuꞌu zaꞌra wa, ma tô isõꞌrãmib zaꞌra dasisaꞌre, â zadaꞌréi baba, uburé ꞌri waꞌõtõ na ꞌre idahâimana zaꞌra mono hã. Ma tô iwana zaꞌra aihutu ni.
34 Tawamhã Zezusi hã ubaꞌre hawi watobro wamhã, daꞌahâ uptabi na ma tô daꞌaꞌmadâ. Tahawa, ma tô daꞌãma tipẽꞌẽzé, poneꞌẽrebâ norĩ, ꞌmadâꞌâꞌwai ãna ꞌre inomro mono ne, ꞌre danomro mono wa. Tame ma tô tinhimirowahudu iwẽ na, ahâ uptabi na ãma daꞌapawapto.
35 Tawamhã hâiwahâ pesere wa oto, ma tô Zezusihi siré ꞌre inomro mono norĩ hã itẽme sina rotété zaꞌra. Ãne te tãma nharĩ zaꞌra:
— Ma tô tihâiwahâ. Aꞌubuni wi wa wahâimana zaꞌra ni.
36 Maꞌãpé aꞌâ dama robꞌru na, dasiꞌabaꞌré da, marĩ dasazéb da, da te dasima uipra zaꞌra da, uridi dama isimasa mono u, niwamhã ꞌrâwi ꞌre idasiꞌubumroi mono u zama.
37 Tane nherẽ, Zezusi hã ma tô ãne sadaꞌâbâ zaꞌra:
— Maꞌãpé a norĩ waꞌwa hã dama azaꞌra waꞌaba, dasaihuri da.
Tawamhã isiré ꞌre inomro mono norĩ hã te ãne tãma nharĩ zaꞌra:
— Iꞌuꞌẽtẽ wapu wa te dama uipra zaꞌra da wamhã, 200 na robꞌuiprazé isapotore ẽtẽ waipo prã prata na hã*, wama hâimana zaꞌra wapsi, aré dahâiba wamhã.
38 Tawamhã Zezusi hã te sadanharĩ zaꞌra, ãne:
— E niha iꞌuꞌẽtẽ wapu hã te aima tihâimana zaꞌra waꞌwa. Maꞌãpé sabu zaꞌra waꞌaba.
Tawamhã isiré ꞌre inomro mono norĩ hã te te sabu zaꞌra parimhã, te ãne tãma wasuꞌu zaꞌra:
— Imrotõ na te iꞌuꞌẽtẽ wapu hã wama tihâiba, duré tebe hã maparane.
39 Tawamhã Zezusi hã ma tô dama robꞌru, dawaꞌõtõ mono bâ dasiꞌubumroi mono da, duiroire wa.
40 Tahawa, ma tô dasiꞌubumro, dawaꞌõtõ mono bâ, 100 na dahâiba na, duré 50 na dahâiba na zama.
41 Tawamhã Zezusi hã ma tô waibu imrotõ na iꞌuꞌẽtẽ wapu hã, duré maparane tebe hã. Hâiwa u te robꞌmadâ. ꞌRe ihâimana uꞌâsi mono ãma te tiwata. Taha pari, ma tô te te wẽꞌẽ, iꞌuꞌẽtẽ wapu hã. Isiré ꞌre inomro mono norĩ ma, ma tô te te sõmri, te te dama sõmri zaꞌra mono da. Tebe maparane ihâimana zahuré zama ma tô te te wẽꞌẽ zahuré. Taha zama ma tô tãma sõmri.
42 Tawamhã uburé ma tô tasaihuri ni. Ma tô duré da te ꞌmahâpãrĩ.
43 Tawamhã isiré ꞌre inomro mono norĩ hã 12 na siꞌõno hã ma tô ubumro zaꞌra isiꞌatarẽme ré hã, iꞌuꞌẽtẽ wapu na ꞌmasisi na tepe na zama.
44 Tawamhã dasiré isaihuri hã 5 miu na aibâ norĩ hã.
Zezusi hã â nhisi baba imorĩzé
45 Tawamhã ãma ronomro õ ré, Zezusi hã ma tô robꞌru, isiré ꞌre inomro mono norĩ ma, ubaꞌre wa sisisi da, iwana sisaꞌrei mono da, Betisaida na ꞌri waꞌõtõ nhisi u, te te daꞌazatõrĩ ré, oto dasiꞌabaꞌré da.
46 Tawamhã dahawi watobro pari, ẽtẽ ꞌrãihâ u ma tô mo, te te rowaptẽrẽ da.
47 Mara wamhã oto, ubaꞌre hã â waꞌwa u, ma tô oto tihâiba. Taha ré hã, te Zezusi hã siwaprosi tihâiba tiꞌa na.
48 Tawamhã ma tô ꞌmadâꞌâ zaꞌra isiré ꞌre inomro mono norĩ hã, pire na te te iwasi zaꞌra mono na ubaꞌre hã, rowaꞌu hã iwaꞌrãmi te te rowapõrĩ zaꞌra wa. Tawamhã robzaꞌrã ré, Zezusi hã ma tô itẽme timorĩ zaꞌra â nhisi baba, duré te te isaꞌre zaꞌra zéb u.
49 Â nhisi baba itẽme imorĩ zaꞌra na te te ꞌmadâꞌâ zaꞌra wamhã, te ãma rosaꞌrata zaꞌra, dahâiba warõ na hã. Tahawa te tãma ꞌre sadari zaꞌra, tãma pahi zaꞌra wa.
50 Tawamhã uburé ma tãma tipahi zaꞌra, te te iꞌmadâꞌâ zaꞌra ma hã. Tane nherẽ, te Zezusi hã awaꞌawi ꞌmahârâ zaꞌra, ãne:
— Maꞌãpé, aipahi zaꞌra waꞌaba tõ! Asibꞌru zaꞌra waꞌaba! Wa hã!
51 Tawamhã ubaꞌre wa, ma tô itẽme tizébré zaꞌra. Tame ma rowaꞌu hã sazâ. Tahawa isiré ꞌre inomro mono norĩ hã ma tô ãma titobꞌuzui pese zaꞌra.
52 E marĩ wa. Pẽꞌẽ tete zaꞌra wa, duré marĩ dama iꞌmanharĩ waihuꞌuꞌõ iꞌuꞌẽtẽ wapu na, te te dama iꞌmanharĩzé hã te te siwi sadaihuꞌu õ wa.
Zezusi hã, Zenezaré ãma te te idaꞌapesezé
53 Tawamhã Zezusi duré isiré ꞌre inomro norĩ hã isõꞌu na zara u te te saprĩ zaꞌra wamhã, ma tô aihutu, Zenezaré na tiꞌa nhisi u. Tame â zadaꞌré ãma, ubaꞌre na ma ãma siwi wasisi.
54 Tawamhã wairébé wi ubaꞌre hawi, ma tô Zezusi hã dasiwi waihuꞌu ni.
55 Tahawa daro mono bâ, dawara sina ihâzé ré norĩ hã isaꞌwarizéb ré ma tô ꞌwasari ni, Zezusi hã nimame ihâimanazéb u, da te iwapari zaꞌra zéb zarina.
56 Tawamhã daro mono bâ ꞌre ine mono zéb u, re na ꞌri ꞌre isimasa mono u, ꞌri waꞌõtõ u, duré ꞌri nhoꞌõmo u zama, ihâzé ré norĩ hã ma tô da te ꞌre ꞌwasari, ꞌre idasiꞌrãꞌõtõ mono zéb u hã. Tawamhã Zezusihi wi, ma tô da te ꞌre waptẽrẽ zaꞌra, ꞌre siꞌrui mono da, taré iꞌuza hâ ꞌrãsudu hã da te tiwi ꞌre upi zaꞌra mono da. Tawamhã iꞌuza hâ nhisutu si te te ꞌre iꞌupi zaꞌra mono hã ma tô uburé ꞌre pese zaꞌra.
Ĩwaꞌõtõ piꞌreba watsuꞌu mono
^ 6:37 robꞌuiprazé misi isapotore prata na hã, misi bâtâ na dapawaꞌâbâzé
