Romanu 8:1-39
8 Cristu Zezusihi ãma ꞌre inomro mono norĩ hã, ꞌRe ihâimana uꞌâsi mono te te siwi ꞌre iꞌawẽꞌõ mono zé hã hâimana õ di oto. Taha zarina, te te duré oto ꞌre ahâ zaꞌra mono õ di za.
2 ꞌRe ihâimana uꞌâsi mono Pẽꞌẽzani hã ma tô te te ꞌre waꞌapisutu, Cristu Zezusihi ãma si ꞌre wanomro wẽ uꞌâsi mono da. Taha zarina, ma tô ĩwasété uꞌâsi ꞌre ĩhâimana mono nherẽ, ĩnhoꞌreptu, ĩpẽꞌẽ ꞌre, ĩdâꞌâ uꞌâsi aré ꞌre ĩhâimana mono zém hawi. Tiwaihuꞌu pese na ma tô ãne hawi duré ĩnhoꞌreptu.
3 ꞌRe ihâimana uꞌâsi mono nhimiroti ꞌrata na Mozési te te irobꞌuiꞌérézé hã wa te ꞌre iꞌmadâꞌâ pese zaꞌra mono zéb zarina, te te sima waꞌãma ꞌre aroti mono õ di za ꞌRe ihâimana uꞌâsi mono hã, wawasédé hã te te oto waꞌãma ꞌre aꞌmadâꞌâ tõ mono da, taha zarina te te oto ꞌre waꞌawẽsãmri mono da. E marĩ wa. Wawasété uꞌâsi wahâimanazém hawi, wanhibꞌuware na ꞌre wanomro uꞌâsi mono wa. Tahawa, wa te wasina ꞌre uwaimrami waihuꞌu zaꞌra mono õ di, ꞌRe ihâimana uꞌâsi mono nhimiroti ꞌrata na robꞌuiꞌéré hã. Wawasété si, wa te ꞌre iꞌmanharĩ zaꞌra mono zé hã ma tô te te siwi ꞌre awẽꞌõ pese, ꞌRe ihâimana uꞌâsi mono hã. Tahawa, ma tô tiꞌra hã we satõ tiꞌai u, daꞌupana dazada dâꞌâ da, dawasété uꞌâsi ꞌre idahâimana zaꞌra mono zém hawi, te te ꞌre daꞌanhoꞌreptui mono da. Tiꞌai ãma dahâiba na ma tô ꞌre mo, Cristu hã. Tane nherẽ, dasine tiꞌai ãma hã tiwasédé hã te te ꞌre abꞌmanharĩ mono õ di, tihâiba na hã.
4 Ãne ma tô ꞌRe ihâimana uꞌâsi mono hã ꞌmanha, isimiroti na robꞌuiꞌéré hã wa te wasina ꞌre iꞌuwaimrami zaꞌra mono zéb da hã, Ipẽꞌẽzani, wa te ꞌre iꞌmadâꞌâ pese zaꞌra mono zéb zarina, wapẽꞌẽ ꞌre wanhimirosaꞌrata wasété na ꞌre wahâimana zaꞌra mono õ wamhã.
5 Niꞌwam norĩ hã ꞌre ihâimana wasété zaꞌra mono ma si, tihâiba te te ꞌre isõmri uꞌâsi zaꞌra mono norĩ hã ta norĩ hã te siwaꞌru ꞌrâwi te te sima ꞌre iwẽ zaꞌra mono zéb zarina si, te te ꞌre rosaꞌrata wasété uꞌâsi zaꞌra. Tane nherẽ, niꞌwam norĩ hã ꞌRe ihâimana uꞌâsi mono Pẽꞌẽzani nhimiroti zarina si ꞌre ihâimana zaꞌra mono norĩ hã, ta norĩ si te te sima ꞌre rosaꞌrata wẽ uꞌâsi zaꞌra, Ipẽꞌẽzani te te tãma ꞌre iwẽ zaꞌra mono zéb zarina si.
6 Niꞌwam norĩ hã tihâimana wasété ma si, tihâiba te te ꞌre sõmri uꞌâsi zaꞌra mono wamhã, ta norĩ hã te za ipẽꞌẽ ꞌre, dâꞌâ uꞌâsi ꞌre hâimana zaꞌra, ꞌRe ihâimana uꞌâsi mono nhiti. Tane nherẽ, niꞌwam norĩ hã ꞌRe ihâimana uꞌâsi mono Pẽꞌẽzani te te tãma ꞌre iwẽ zaꞌra mono zéb zarina si, ꞌre hâimana wẽ zaꞌra mono wamhã, ta norĩ si te za ꞌRe ihâimana uꞌâsi mono ꞌrata ꞌre hâimana uꞌâsi zaꞌra, robzei uꞌâsi na.
7 Niꞌwam norĩ hã siwaꞌru ꞌrâwi te te sima ꞌre iwẽ zaꞌra mono zéb zarina si, te te ꞌre rosaꞌrata wasété uꞌâsi zaꞌra mono wamhã, ta norĩ hã te za ꞌRe ihâimana uꞌâsi mono nhitobꞌru ꞌre hâimana zaꞌra. Ta norĩ hã ꞌRe ihâimana uꞌâsi mono nhimiroti te te ꞌre ꞌmadâꞌâ zaꞌra mono õ di. Te te duré ꞌre ꞌmadâꞌâ waihuꞌu zaꞌra mono õ di.
8 Niꞌwam norĩ hã tihâimana wasété ma, tihâiba te te ꞌre sõmri uꞌâsi zaꞌra mono wamhã, ta norĩ ma, ꞌRe ihâimana uꞌâsi mono hã tãma ꞌre toi waihuꞌu zaꞌra mono õ di za.
9 Tane nherẽ, a norĩ waꞌwa hã aipẽꞌẽ ꞌre, aiwasédé hã aima ꞌre ihâimana zaꞌra waꞌaba mono zéb zarina, ꞌre anomro aba mono õ di oto. ꞌRe ihâimana uꞌâsi mono Pẽꞌẽzani te te aima ꞌre ipisutu zaꞌra waꞌaba mono zéb zarina si, te oto ꞌre aihâimana wẽ zaꞌra waꞌaba mo, Ipẽꞌẽzani hã sena na aipẽꞌẽ ꞌre, ꞌre sãmra zaꞌra waꞌaba mono wa. Niꞌwam norĩ ma, Ipẽꞌẽzani, ipẽꞌẽ ꞌre, tãma ꞌre hâimana zaꞌra mono õ wamhã, ta norĩ hã Cristuhu nhibꞌaꞌuwẽ ꞌre hâimana zaꞌra mono õ di za.
10 A norĩ waꞌwa hã Cristu, aipẽꞌẽ ꞌre, aima ꞌre hâimana zaꞌra waꞌaba mono nherẽ, niwamhã te za aihâiba zaꞌra waꞌwa hã aiwi ꞌre siꞌutõrĩ zaꞌra waꞌwa, aiwasédé hã aima ꞌre hâimana zaꞌra waꞌaba mono wa. Tane nherẽ, ꞌRe ihâimana uꞌâsi mono te te ꞌre iꞌaiwẽsãmri zaꞌra waꞌaba mono zéb zarina si, te za Ipẽꞌẽzani hã te te ꞌre aipisutu zaꞌra waꞌwa, iꞌrata ꞌre asimroi uꞌâsi aba mono da.
11 ꞌRe ihâimana uꞌâsi mono hã Zezusihi hâiwaꞌutuꞌwa hã, Ipẽꞌẽzani te aipẽꞌẽ ꞌre, ꞌre sãmra zaꞌra waꞌwa. Tô õ hã Cristu te te ihâiwaꞌudu hã te za aihâiba hã niwamhã aiwi ꞌre siꞌutõrĩ pese zaꞌra waꞌaba mono nherẽ, te te ꞌre aihâiwaꞌutu zaꞌra waꞌwa, Ipẽꞌẽzani hã aipẽꞌẽ ꞌre, ꞌre isãmra zaꞌra waꞌaba mono zéb zarina.
12 Ĩsisãnawã norĩ, tahawa, wapẽꞌẽ ꞌremhã wanhimirosaꞌrata wasété na ꞌre iwahâimana zaꞌra mono zé hã, mare di za oto.
13 Aipẽꞌẽ ꞌremhã asimirosaꞌrata wasété na ꞌre aihâimana zaꞌra waꞌaba mono wamhã, te za atâꞌâ uꞌâsi ne ꞌre anomro aba mo, ꞌRe ihâimana uꞌâsi mono nhiti. ꞌRe ihâimana uꞌâsi mono Pẽꞌẽzani nhimipawaptobzém na, uburé aiwasédé ꞌre iꞌmanharĩ zaꞌra waꞌaba mono zé hã asiwi ꞌre uprosi pese zaꞌra waꞌaba mono wapsi, te za ꞌre aihâimana uꞌâsi zaꞌra waꞌaba mo, ꞌRe ihâimana uꞌâsi mono ꞌrata.
14 Uburé ꞌRe ihâimana uꞌâsi mono Pẽꞌẽzani ꞌmadâꞌâ sina ꞌre ihâimana zaꞌra mono norĩ si, te ꞌRe ihâimana uꞌâsi mono ꞌra, ꞌre nomro, Ipẽꞌẽzani te te ꞌre isimroi wẽ mono norĩ hã.
15 E marĩ da, ma tô ꞌRe ihâimana uꞌâsi mono hã Tipẽꞌẽzani te te aima ꞌre sõmri zaꞌra waꞌwa. E isimirobꞌmanharĩzé ma, ꞌre aipahi zaꞌra waꞌaba mono sina, tãma ꞌre romhuri zaꞌra waꞌaba mono da, ma tô te te aima ꞌre sõmri zaꞌra waꞌwa. Mare di. Taha dai õ di. ꞌRe ihâimana uꞌâsi mono hã aiꞌãma ꞌre ꞌra zaꞌra waꞌaba mono da si, ma tô te te aima ꞌre sõmri zaꞌra waꞌwa, Tipẽꞌẽzani hã. Taha nhimipawaptobzéb zarina, wa ꞌRe ihâimana uꞌâsi mono hã wa te ꞌre ꞌmahârâ zaꞌra, ãne: “Wamama, Wamama.” Ãne wa te ꞌre iꞌmahârâ zaꞌra mono zé hã.
16 Wa norĩ hã ꞌrâwi wapẽꞌẽ ꞌre, wa tô wa te wasina ꞌre waihuꞌu pese zaꞌra, ꞌRe ihâimana uꞌâsi mono ꞌra oto ꞌre iwahâimana zaꞌra mono na. Duré Ipẽꞌẽzani hã te te wama ꞌre iꞌawaihuꞌu mono zéb zarina zama, wa tô ꞌrâwi wa te wasina ꞌre waihuꞌu zaꞌra, iꞌra oto ꞌre iwahâimana zaꞌra mono na.
17 ꞌRe ihâimana uꞌâsi mono ꞌra, oto ꞌre wanomro mono wa, marĩ iwẽ na tinhibꞌaꞌuwẽ ma, ꞌre isõpru mono zéb da, te te tãma ꞌre iropisutu zaꞌra mono zéb ré, wa za ꞌre wahâimana zaꞌra. Duré uburé marĩ iwẽ na Cristuhu ma, isõprubzéb da, te te tãma iropisutuzéb ré, wa za isiré ꞌre wahâimana zaꞌra. Zezusihi ne, wa te ꞌre robzépata zaꞌra mono wamhã, wa za isine rowẽ uptabi na ꞌre wahâimana zaꞌra.
ꞌRe ihâimana uꞌâsi mono, tizazeiꞌwa norĩ ma, za iwẽ te te tãma ꞌre iꞌapisutu mono zé wasuꞌu
18 Tiꞌab ré, wa te ꞌre irobzépata zaꞌra mono zé hã, taré, ꞌRe ihâimana uꞌâsi mono, za iwẽ hã te te wama ꞌre iꞌapisutu mono zé ma hã. Tô sena, wa tô ãne na waihuꞌu, wa hã.
19 ꞌRe ihâimana uꞌâsi mono hã uburé te te iꞌapoto mono hã, simisutu te umnhasi sina sô ꞌre simipari zaꞌra, bâdâ iwa iwaptãꞌãzéb zô, uburé tiꞌra na sõꞌawi za te te oto dama iwasuꞌu hâiꞌré zaꞌra zô.
20 8:20-21 ꞌRe ihâimana uꞌâsi mono, marĩ te te iꞌapoto mono hã te wasété na ꞌre hâimana zaꞌra, aꞌâ. Tinhimipoto mono bâ, niha tãma ꞌre ihâimana zaꞌra mono zéb da, te te tãma ꞌre apisutu mono nherẽ, te te sina tãma ãma ꞌre uwaimrami zaꞌra mono õ di. Siwaꞌru te aꞌâ ꞌre hâimana zaꞌra, siwamnarĩ na. Tane nherẽ, ãne na siꞌuihâ na ꞌre hâimana zaꞌra mono õ di. ꞌRe ihâimana uꞌâsi mono si, ma tô tãma pisutu zaꞌra, siwaꞌru aꞌâ ꞌre hâimana zaꞌra mono da. Niwapsi uburé marĩ te te iꞌapoto mono hã wasété uꞌâsi ꞌre ihâimana zaꞌra mono hawi, te za anhoꞌreptu. Taha zô, wa sô ꞌre wanhimipari uꞌâsi zaꞌra, siwamnarĩ ãna oto ꞌre hâimana zaꞌra mono da. Tawamhã wasine, robzei uꞌâsi te za oto ꞌre hâimana zaꞌra, ꞌRe ihâimana uꞌâsi mono ꞌra, oto ꞌre wanomro mono wa, rowẽ uꞌâsi ꞌre iwahâimana zaꞌra mono ne.
21 ꞌMadâꞌâ 8:20
22 Piꞌõi ãma, iwasã ꞌre sépuꞌu zaꞌra mono wamhã, te za ꞌre wabꞌẽtẽ zaꞌra, ꞌre séptâꞌâ zaꞌra mono hâ. Tane te za duré uburé marĩ hã ꞌRe ihâimana uꞌâsi mono te te iꞌapoto mono hã aꞌâ ꞌre wabꞌẽtẽ zaꞌra, tiꞌab ré, wasété na ꞌre ihâimana zaꞌra mono zém hawi ꞌre wairébé mono hâ. Ãne hã wama waihuꞌu pese zaꞌra di oto.
23 Tane nherẽ, uburé ropodo hã ta norĩ si ꞌre wabꞌẽtẽ zaꞌra mono õ di. Wa norĩ zama, wa ꞌre wawabꞌẽtẽ uꞌâsi zaꞌra, ꞌRe ihâimana uꞌâsi mono hã tinhoprubzéb zarina, imorĩꞌrata na Tipẽꞌẽzani, te te wama ꞌre anhomri mono wa, wapẽꞌẽ ꞌre, ꞌre isãmra uꞌâsi mono da hã. ꞌRâwi wapẽꞌẽ na, wa ꞌre wawabꞌẽtẽ uꞌâsi zaꞌra, ꞌRe ihâimana uꞌâsi mono hã uburé tiꞌra na sõꞌawi za te te oto dama iwawasuꞌu hâiꞌré zaꞌra zéb zô, ꞌre wanhimipari zaꞌra mono ré. Duré tiꞌab ré, wanhibꞌuware na wahâimana wasété na ꞌre iwahâimana zaꞌra mono zém hawi, za te te ꞌre iwaꞌawaibui mono zéb zô, ꞌre wanhimipari zaꞌra mono ré, wa ꞌre wawabꞌẽtẽ uꞌâsi zaꞌra.
24 8:24-25 ꞌRe ihâimana uꞌâsi mono, iwẽ si za te te wama ꞌre iꞌapisutu mono zéb zô, wa te ꞌre wawã zaꞌra mono ãna, sô ꞌre iwanhimipari zaꞌra mono zéb zarina, ma tô te te ꞌre waꞌanhoꞌreptu. Tiꞌab ré, marĩ zô ꞌre wanhimipari zaꞌra mono ré, wa te oto ꞌre ꞌmadâꞌâ zaꞌra mono wamhã, e wa za õne uꞌâsi sô ꞌre wanhimipari zaꞌra. Mare di. Tâibâ oto, sô ꞌre iwanhimipari zaꞌra mono zé hã za. Marĩ zô ꞌre iwanhimipari zaꞌra mono zé hã, zahadu wa te ꞌre ꞌmadâꞌâ zaꞌra mono õ ré si, wa za tô wanhiptete sina sô ꞌre wanhimipari uꞌâsi zaꞌra, wa te ꞌre sazei utõrĩ zaꞌra mono ãna.
25 ꞌMadâꞌâ 8:24
26 Tane duré ꞌRe ihâimana uꞌâsi mono, iwẽ hã za te te wama ꞌre iꞌapisutu mono zéb zô, wasina sô ꞌre wanhimipari waꞌa zaꞌra mono wamhã, Ipẽꞌẽzani si te za te te ꞌre waꞌapawapto, sô ꞌre wanhimipari waꞌa zaꞌra mono tõ da. Duré, wa norĩ hã niha ꞌRe ihâimana uꞌâsi mono ma, wasiꞌãma ꞌre iwamreme zusi mono zéb da hã, wa te wasina tãma ãma ꞌre uwaimrami waihuꞌu zaꞌra mono dai õ nherẽ, te za Ipẽꞌẽzani si waꞌãma ꞌre mreme uꞌâsi, ꞌRe ihâimana uꞌâsi mono ma, wahâiba mono bâ, waꞌãma ꞌre pẽꞌẽzé uptabi mono sina. Wasiꞌuihâ na iwẽ hã wa te tiwi ꞌre iwaptẽrẽ zaꞌra mono zém na, wa te tãma ãma ꞌre uwaimrami waihuꞌu zaꞌra mono dai õ nherẽ, te õhõ si waꞌãma ꞌre mreme uꞌâsi, te te ꞌre waꞌapawapto mono da, Ipẽꞌẽzani hã.
27 ꞌRe ihâimana uꞌâsi mono hã dapẽꞌẽ ꞌre, uburé danhimirosaꞌrada hã tãma waihuꞌu pese di. Tahawa, Ipẽꞌẽzani nhimirosaꞌrada hã tãma waihuꞌu pese di duré. ꞌRe ihâimana uꞌâsi mono te te tãma ꞌre iꞌawẽ mono zéb uwaibaba si, te Ipẽꞌẽzani hã isibꞌaꞌuwẽ norĩ ãma ꞌre mreme uꞌâsi.
28 ꞌRe ihâimana uꞌâsi mono zawi pese ꞌwa norĩ da, marĩ iwasédé hã ahâ na sada ꞌre hâimana zaꞌra mono nherẽ, te za ꞌRe ihâimana uꞌâsi mono hã iwẽ si te te tãma ꞌre apisutu iwaꞌrãmi, te te sima ꞌre iꞌawẽ mono zéb zarina, tinhibꞌaꞌuwẽ da, te te sima ꞌre iꞌapisutu mono norĩ ma hã. Ãne hã wama waihuꞌu pese zaꞌra di oto wa norĩ hã.
29 Duréihã marĩ õ ré hã, ꞌRe ihâimana uꞌâsi mono te te sima ãma irotizéb zarina, te te sima ꞌre iwaꞌapisutu mono norĩ hã, iꞌra ne, tô Zezusihi ne, oto ꞌre wahâimana zaꞌra mono da, ma tô duré te te ꞌre waꞌapisutu siro. Ta hã uburé isazeiꞌwa norĩ dubꞌrada, ꞌre hâimana mono da, ma tô ãne te te ꞌre waꞌapisutu siro, sima.
30 Duré ꞌRe ihâimana uꞌâsi mono te te sima ꞌre iwaꞌapisutu mono norĩ hã ma tô te te sima ꞌre waꞌawẽ, itẽme ꞌre wanomro mono da, wa te ꞌre saze zaꞌra mono da. Tawamhã itẽme ꞌre wanomro mono wamhã, ma tô duré te te ꞌre waꞌawẽsãmri, wawasédé hã te te oto waꞌãma ꞌre iꞌaꞌmadâꞌâ mono õ zarina. Ma tô duré te te wama ꞌre apisutu siro, niwapsi iꞌra Zezusi ꞌre imorĩ wẽ uptabi ne, ꞌre wahâimana zaꞌra mono da oto.
Cristuhu nhimizawi pese zé hã dawi isiꞌutõrĩꞌõzé wasuꞌu
31 ꞌRe ihâimana uꞌâsi mono hã ãne hã te te wama ꞌre apisutu mono wamhã, e niha wa za tawamhã ꞌre wahâimana zaꞌra. Ta hã, wa niwĩ oto ꞌre hâimana zaꞌra mono wa, e ꞌwa hã te za waꞌãma aiꞌuté. Mare di. Uburé wanhitobꞌru norĩ nhiptetezé hã, tarére ꞌRe ihâimana uꞌâsi mono ma hã.
32 ꞌRe ihâimana uꞌâsi mono hã tiꞌra te te wawi sawi zaꞌra õ di, wazada dâꞌâ zaꞌra tõ da. Waꞌudâna ma tô wama sõmri zaꞌra tô, te te wawi sawi zaꞌra ãna. E tawamhã uburé marĩ iwẽ hã te te wama ꞌre anhomri mono õ di za. Te te wawi ꞌre azawi mono ãna, te za tô te te wama ꞌre anhomri, ꞌRe ihâimana uꞌâsi mono hã.
33 8:33-34 Wa norĩ hã ꞌRe ihâimana uꞌâsi mono, tinhibꞌaꞌuwẽ da, te te sima ꞌre iwaꞌapisutu mono norĩ si, ma tô te te ꞌre waꞌawẽsãmri, wawasédé hã te te oto waꞌãma ꞌre iꞌaꞌmadâꞌâ mono õ zarina. E niꞌwam norĩ hã wawasédé te te waꞌãma ꞌre saꞌra mono da bâ bété. Niꞌwam norĩ hã, wawasédé te te waꞌãma ꞌre saꞌra waihuꞌu mono õ di za oto. Ãne wa za duré aima waihuꞌu zaꞌra waꞌwa. Cristu Zezusi hã ma tô wazada dârâ, waꞌupana. Apâ ma tô duré hâiwaꞌudu. Tahawa, te oto Timama nhimire niwĩ ꞌre sãmra, dama pire na. Timama ma, te duré te te ꞌre waꞌawasuꞌu wẽ uꞌâsi, wazada idâꞌâzéb zarina, wawasédé hã te te waꞌãma ꞌre aꞌmadâꞌâ tõ mono da oto. Ãne wa, e niꞌwam norĩ hã wawasété na te te wama ꞌre nharĩ zahu zaꞌra mono da bâ oto. Mare di.
34 ꞌMadâꞌâ 8:33
35 Cristu hã te te ꞌre waꞌazawi pese uptabi. E ꞌwa hã te Cristuhu nhimizawi pese zém nhiti te te ꞌre iwaꞌazani mono da hã, ꞌre hâimana. Niꞌwai õ uptabi di. Tane nherẽ, ãté wa za aꞌâ wa te ꞌre robzépata zaꞌẽtẽ zaꞌra. Ãté marĩ iwasédé hã te za aꞌâ wazô ꞌre wairébé. Ãté isazeiꞌwa ꞌre wanomro mono wa, te za aꞌâ da te wama ꞌre robꞌmanharĩ wasété zaꞌra. Ãté mra hã wa za aꞌâ wa te ꞌre sépata zaꞌra. Ãté wanhibrob ãna, wa za aꞌâ ꞌre wahâimana zaꞌra. Ãté te za duré aꞌâ da te wama ꞌre amhâzépa zaꞌra, da te ꞌre wanhimroi mono da. Ãté te za duré da te ꞌre wanhimro. E tawamhã, ãne na wa te ꞌre robzépata zaꞌra mono ꞌru te, te za Cristu te te ꞌre iwaꞌazawi pese mono zé hã, wawi ꞌre siꞌutõrĩ zaꞌra. Mare di. Wawi ꞌre siꞌutõrĩ waihuꞌu zaꞌra mono õ di za.
36 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Wamama, ꞌRe ihâimana uꞌâsi mono, wa norĩ hã asibꞌaꞌuwẽ ꞌre wanomro mono wa, wama romnhimimnhasi uꞌâsi na, wa ꞌre wahâimana zaꞌra, da te ꞌre wanhimroi mono õꞌumnhasite.Poneꞌẽrebâi ãma ꞌre dapẽꞌẽzé zaꞌra mono ãna, dasazéb da, da te ꞌre isimroi mono ne, te da te dasima ꞌre wawẽ zaꞌra, da te ꞌre wanhimroi mono da, da te ꞌre waꞌruiwapari zaꞌra mono wa oto.”
37 E tawamhã, uburé marĩ iwasédé hã wazada ꞌre ihâimana zaꞌra mono zéb zarina, te za Cristu te te ꞌre iwaꞌazawi pese mono zé hã wawi ꞌre siꞌutõrĩ zaꞌra. Mare di. Uburé marĩ na da te wama ꞌre robꞌmanharĩ wasété zaꞌra mono da nherẽ, ta hã te te ꞌre iwaꞌazawi pese mono, te za te te ꞌre waꞌapawapto, Cristuhu si, wanhitobꞌru norĩ ãma wa te ãma ꞌre aiꞌuté pese zaꞌra mono da.
38 Uburé marĩ hã wazada ꞌre ihâimana zaꞌra mono zém hawi, ꞌRe ihâimana uꞌâsi mono hã tinhimizawi pese zé hã te te wawi ꞌre iꞌazani mono da hã, mare di. Ãne na sena na, wa tô ĩsina waihuꞌu, wa hã. Wahâiba ré ꞌre wahâimana zaꞌra mono wamhã, duré oto ꞌre wadâꞌâ zaꞌra mono nherẽ, tinhimizawi pese zé te te wawi ꞌre azani mono õ di za. Duré ihâibaꞌõ norĩ hã isibꞌapito norĩ zama, te te wawi ꞌre sani waihuꞌu zaꞌra mono õ di, ꞌRe ihâimana uꞌâsi mono te te ꞌre iwaꞌazawi pese mono zé hã. Duré, ã bâtâ na marĩ hã wazada ꞌre hâimana zaꞌra mono ꞌru te, te te wawi ꞌre azani mono õ di za, tinhimizawi pese zé hã, ꞌRe ihâimana uꞌâsi mono hã. Duré niwamhã uburé marĩ hã za wazada ꞌre hâimana zaꞌra mono ꞌru te, te te wawi ꞌre iꞌazani mono da hã, mare di za tô.
39 Uburé marĩ hã hâiwa na ꞌre isimasa mono hã duré tiꞌai ꞌrowi ꞌre ihâimana zaꞌra mono hã te te wawi ꞌre sawi waihuꞌu zaꞌra mono õ di za, ꞌRe ihâimana uꞌâsi mono nhimizawi pese zé hã. Uburé ꞌRe ihâimana uꞌâsi mono te te iꞌapoto mono hã, niwamhã te te wawi ꞌre sani waihuꞌu zaꞌra mono õ di za tô, isimizawi pese zé hã. Robaba uptabi di. Wanhibꞌapito Cristu Zezusihi ãma si ꞌre wanomro mono wa, te te ꞌre waꞌazawi pese uptabi, ꞌRe ihâimana uꞌâsi mono hã, õne uꞌâsi.
