Salmu 10:1-18
Iꞌuwaibaba na dama rowairébézéb da, rowaptẽrẽzé wasuꞌu
10 Uburé Danhibꞌapito, e marĩ wa, te romhâ na ꞌre aihâimana mo.E marĩ wa, ma tô robzépata ꞌremhã, ꞌre aimaꞌuri mo.
2 Iwasété norĩ hã te ꞌre siꞌmadâꞌâ ze zaꞌra. Te duré isimarĩꞌõ norĩ ma, te te ꞌre robꞌmanharĩ wasété zaꞌra.Iwasété zarina ꞌre isisitob zaꞌra mono zéb u, ꞌre irereꞌe mono da si, ibâre hã.
3 Iwasété norĩ hã te mreme nhiséb ãna marĩ iwasété si te te sima ꞌre iꞌruiwapari zaꞌra mono na ꞌre mreme zusi, isiꞌmadâꞌâ ze zéb zarina.Duré danhimarĩ zô hâimana nhipese sina te te sima ꞌre idaꞌwani zaꞌra mono norĩ hã, te Uburé Danhibꞌapito ãma te te ꞌre wasété zaꞌra.
4 Aibâ iwasété ma hã, tarére hã ꞌRe ihâimana uꞌâsi mono hã. ꞌRâwi ꞌre isiꞌmadâꞌâ zei mono zarina, te ãne te te sima ꞌre rosaꞌrata:“Ĩma hã, ꞌRe ihâimana uꞌâsi mono hã marĩ dai õ di.”
5 Ã hã aibâ iwasédé hã, sima hã te uburé marĩ iꞌuwaibaba na si, te te ꞌre abꞌmanharĩ.Tane nherẽ, ꞌRe ihâimana uꞌâsi mono te te daꞌãma irowairébézém na hã te te ãma rosaꞌrata waihuꞌu õ di.Te duré tinhitobꞌru norĩ ãma hã ꞌre waꞌẽi uꞌâsi.
6 ꞌRâwi te tinhimirosaꞌrata na te te sima ꞌre nharĩ ãne: “Niwamhã marĩ te te ĩꞌmarõwĩrĩ da hã mare di.Duré niwamhã marĩ ipire, ĩzô iwatobro da hã mare di za.”
7 Imreme wasédé hã isadawa ꞌremhã ꞌmasisi uptabi di, isadawa nhipe hã, duré te te dama ꞌre iꞌamhâzépa mono zé hã.Ta hã te daꞌãma roꞌwaꞌrutu na si, duré marĩ iwasété na si ꞌre mreme uꞌâsi.
8 Ta hã, ꞌri waꞌõtõ ꞌrata simaꞌuri sina, te za dazô hã ꞌre simipari, marĩ ꞌmanharĩ wasété õ ꞌwa norĩ hã te te ꞌre ꞌmapãrĩ mono da.
9 Huꞌu zérépa ne, te tô ꞌre isimaꞌuri mono zéb ãma hã dazô ꞌre simipari.Te duré siꞌwawi ꞌre isimapa waihuꞌu õ norĩ zô hã ꞌre rĩtĩ.Simire sina te sô ꞌre simipari zaꞌra. Te te daꞌmaiꞌâri wamhã, te za te te daꞌãma robâdâ.
10 Tawamhã siꞌwawi ꞌre isimapa waihuꞌu zaꞌra mono õ norĩ, da te ꞌre hâiba zu pese zaꞌra mono wamhã, te za tô tiꞌai u hã ꞌre rereꞌe, iwasété norĩ nhimirobꞌmanharĩ nhiptetezéb zarina.
11 Ã hã aibâ iwasédé hã te za ãne te te sima ꞌre rosaꞌrata:“ꞌRe ihâimana uꞌâsi mono hã te te ĩꞌãma rosaꞌrata dai õ di. Õ hã ma tô siꞌubu upsi, te te ĩꞌmadâꞌâ tõ da.”
12 Uburé Danhibꞌapito, maꞌãpé aipa hã sarõtõ, ã hã aꞌuwẽ iwasété norĩ ma, robꞌmanharĩ zaꞌra da!Maꞌãpé da te ãma ꞌre iroꞌwaꞌrutu zaꞌra mono ãma hã aipoꞌre siꞌâri tõ!
13 E niha te za aꞌuwẽ iwasédé, ꞌRe ihâimana uꞌâsi mono hã te te ꞌre wazébꞌõ zaꞌra. E niha te za duré te te ꞌre rosaꞌrata zaꞌra, ꞌRe ihâimana uꞌâsi mono te te ꞌre ihâ zaꞌra mono õ na hã za, wasété nherẽ.
14 Tane nherẽ, ꞌRe ihâimana uꞌâsi mono, a hã robzépatazé, duré robzeiꞌõzé, ꞌre aꞌmadâꞌâ mono wamhã, te õne uꞌâ ꞌre daꞌapawapto mono da hã asima ꞌre iwẽ mo.Duré niꞌwam norĩ, siꞌwawi ꞌre isimapa waihuꞌu zaꞌra mono õ norĩ, te aiwétési te te sina ꞌre aiꞌumnhasi uꞌâsi zaꞌra.Tahawa, marĩ zô tiwi ꞌre iroꞌwanhiꞌriti zaꞌra mono hã te õne uꞌâ ꞌre iꞌapawaptob uꞌâsi mo.
15 Maꞌãpé, iwasété norĩ nhiptetezé hã, duré waima na ꞌre ihâimana zaꞌra mono norĩ nhiptetezéb zama tiwi uprosi zaꞌra na.Duré maꞌãpé tiwasédé te te ꞌre iꞌmanharĩ zaꞌra mono zarina hâ zaꞌra na, iwasété zaꞌra zô ꞌre robaba mono hâ.
16 Uburé Danhibꞌapito, õne uꞌâ te danhipai u apito na hã ꞌre hâimana.Tahawa, te za aꞌuwẽ iwasété norĩ hã isiptiꞌai hawimhã sô tirobaba zaꞌra.
17 Uburé Danhibꞌapito, a hã te za da te ãma ꞌre iroꞌwaꞌrutu zaꞌra mono norĩ mreme hã ꞌre iꞌawapari mo.Te za duré ipẽꞌẽ nhiptetezé hã tãma ꞌre iꞌanhomri mo.
18 A hã te za, te te ꞌre irobzépata zaꞌra mono da, da te ꞌre iwati zaꞌra mono norĩ zadari hã, duré marĩ zô tiwi ꞌre irowaptâꞌâ zaꞌra mono norĩ zadari hã ꞌre iꞌawapari mo.Te za duré ta norĩ uꞌâbâ dama ꞌre iꞌarobꞌmanharĩ mo, aꞌuwẽ idâꞌâ pese norĩ, niwamhã apâ marĩ iwasété na hã te te ãma dama ꞌre ropé zahu zaꞌra mono tõ da.
