Salmu 103:1-22
Davihi nhoꞌre
103 Uburé Danhibꞌapito, ĩpẽꞌẽ na aiꞌãma ꞌre ĩwata mono da si, wa ĩsima te ꞌre ꞌruiwapari uꞌâsi!ꞌRe ihâimana uꞌâsi mono, marĩ iwasédé, aiꞌãma ꞌre ihâimana mono õ ãma, uburé ĩnhiptede ĩma ꞌre ihâimana mono na, aiꞌãma ꞌre ĩwata mono da si, duré ĩma iwẽ hã!
2 Uburé Danhibꞌapito, ĩpẽꞌẽ na tô aiꞌãma ꞌre ĩwata mono da si, wa ĩsima te ꞌre ꞌruiwapari!Duré marĩ iwẽ na ꞌre ĩpawapto mono zém na ꞌre ĩpoꞌre simrami tõ mono da, wa tô ĩsima te ꞌre wẽ uꞌâsi!
3 Uburé Danhibꞌapito, maꞌãpé ĩpẽꞌẽ ꞌre, uburé ꞌre ĩwasété mono zé hã ĩꞌãma ꞌre aꞌmadâꞌâ mono tõ.Duré maꞌãpé ĩpese, uburé ꞌre ĩhâzé mono hawimhã.
4 Õ hã ma tô te te ꞌre ĩnhoꞌreptui uꞌâsi, abꞌre ꞌre, adâ da te ꞌre iséme mono zé wi.Duré tinhimizawizéb zarina ĩꞌãma ꞌre siwamri mono wa, te iwẽ si te te ĩma ꞌre anhomri.
5 Õ hã te duré marĩ iwẽ na ĩpẽꞌẽ ꞌremhã te te ĩma ꞌre saꞌẽtẽ.Ãne wa, wa tô ĩhâiba tém na ꞌre ĩhâimana mono zém na, te ãma uzusi uꞌâsi, siꞌõmo wawẽ siptete na ꞌre ihâimana mono ne.
6 Uburé Danhibꞌapito, te iꞌuwaibaba na si da te ꞌre iwati pese zaꞌra mono norĩ ma, te te ꞌre arowairébé, iwẽ na si.Ta norĩ ꞌwawimhã te duré ꞌre simapa uꞌâsi.
7 Ta hã, niha na te te sima irowaꞌõtõzé hã Mozésihi ma, ma tô tãma hâiꞌré.Ma tô duré tiwaihuꞌu pese na tinhimiꞌmanharĩzé hã Izaraéu nhihudu norĩ ma hâiꞌré, ta norĩ te te siwi ꞌmadâꞌâ da hã.
8 Uburé Danhibꞌapito, iwẽ si te te dama ꞌre abꞌmanharĩ uꞌâsi. Te duré daꞌãma ꞌre siwamri uꞌâsi.Te duré simizawi uptabi na ꞌre hâimana.
9 Õ hã te te dama ꞌre ipẽtẽ uꞌâsi mono na, ꞌre hâimana mono õ di.Duré dazada ꞌre isitiꞌrui uꞌâsi mono na, ꞌre hâimana mono õ di.
10 Wawasédé, wa te ꞌre iꞌmanharĩ zaꞌra mono zarina te te ꞌre wahâ zaꞌra mono õ di, ibâ zarina. Te nasi te te wama ãma ꞌre atiꞌawi, tinhimihâzém na.Duré wawasété zarina, ibâ na te te duré wama ꞌre awaꞌâbâ mono õ di.
11 Hâiwa, tiꞌa nhisiwi romhâ uptabi na ꞌre isaꞌwari mono ne, te isimizawizé hã saꞌẽtẽ na ꞌre hâimana, te te ꞌre iwazéb zaꞌra mono norĩ ãma hã.
12 Bâtâ pusizém niwĩ tiꞌa, bâtâ zasizém niwĩ tiꞌai me romhâ uptabi na siwi ꞌre isaꞌwari zahuré mono ne, tane te wawasédé hã romhâ na wanhiti te te wama ꞌre azatõrĩ.
13 Damama, tiꞌra norĩ ãma ꞌre isiwamri pese mono ne, te duré Uburé Danhibꞌapito te te ꞌre iwazéb zaꞌra mono norĩ ãma hã saꞌẽtẽ na ꞌre siwamri.
14 E marĩ wa. Õhõ ma hã waihuꞌu pese di, niha na we iwasiꞌmanharĩ zaꞌra zé hã.Te duré tiꞌa zapru ꞌmanharĩ na hã waꞌãma ꞌre sipoꞌre puꞌu zaꞌra.
15 Dahâimanazé hã aiwa du ne hã.Duré dahâimanazé hã aiwa rom na romnhirãrã wede ꞌre iprédub zaꞌra mono ne hã, duré ꞌre isirãrã wairébé mono ne.
16 Tawamhã rowaꞌu watobro wa, te te wapõrĩ wamhã, te za oto sirãrã haimani zaꞌra. Nimame isirãrã nhimiꞌwarazé hã dama waihuꞌu õ di oto.
17 Uburé Danhibꞌapito nhimizawizé te siꞌutõrĩ ãna te te ꞌre iwazéb zaꞌra mono norĩ ãma hã ꞌre hâimana uꞌâsi.Ta norĩ ꞌra nhihudu norĩ ma sidâpâsi, te õne uꞌâsi iꞌuwaibaba na si te te tãma ꞌre iꞌabꞌmanharĩ mono zé hã ꞌre hâimana,
18 isimiropisutu zahi te te sima ꞌre itété zaꞌra mono norĩ ma, duré isimiroti te te ꞌre iwapari pese zaꞌra mono norĩ ma.
19 Uburé Danhibꞌapito, hâiwa ãma tisimasisizéb da hã ma tô pisutu, pire na te te ãma ꞌre idaꞌaꞌmadâꞌâ mono zéb da hã.Ta hã te uburé marĩ ꞌre ihâimana zaꞌra mono hã pire na te te ꞌre aꞌmadâꞌâ, apito na õ hã.
20 Uburé Danhibꞌapito ãma si ꞌre aiwata zaꞌra waꞌaba mono, hâiwa ãma romhuriꞌwa asiptete na ꞌre iꞌaihâimana zaꞌra waꞌaba mono norĩ, duré imreme ꞌre iwapari pese zaꞌra waꞌaba mono na ꞌre iꞌaihâimana zaꞌra waꞌaba mono norĩ hã!
21 Uburé Danhibꞌapito ãma si, tô uburé ãma ꞌre aiwata zaꞌra waꞌaba mono, uburé hâiwa ãma romhuriꞌwa norĩ, duré uburé isibꞌaꞌuwẽ na ꞌre iꞌaihâimana zaꞌra waꞌaba mono norĩ, marĩ te te sima ꞌre iwẽ mono zéb zarina ꞌre iꞌmanharĩ zaꞌra waꞌaba mono norĩ hã!
22 Uburé Danhibꞌapito ãma tô isimipoto mono bâ, ꞌre dawata zaꞌra mono, ropâ te te ꞌre idaꞌaꞌmadâꞌâzé mono bâ!Uburé Danhibꞌapito ãma, wa hã ĩpẽꞌẽ ꞌrem na ãma ꞌre ĩwata mono da si, wa ĩsima te ꞌre wẽ!
