Salmu 16:1-11
Davihi nhoꞌre
16 ꞌRe ihâimana uꞌâsi mono, maꞌãpé ĩꞌwawimhã ꞌre aimapa uꞌâsi mono,aiꞌãma si marĩ wi ĩsimaꞌurizé hã ĩma hâimana wa!
2 Wa hã Uburé Danhibꞌapito ma, wa tinha, ãne:“A hã, Ĩnhibꞌapito. Uburé marĩ iwẽ ĩma ꞌre ihâimana mono hã, aihawip si.”
3 ꞌRe ihâimana uꞌâsi mono ma, ꞌre isisõmri uꞌâsi zaꞌra mono norĩ si hã danhipai u tô sena iwẽ uptabi.Ta norĩ siré ꞌre ĩhâimana mono da si, ĩma iwẽ hã.
4 Aimawi ihâibaꞌõ norĩ zô ꞌre irĩtĩ zaꞌra mono norĩ hã te ꞌrâwi robzépatazé hã te te sisô ꞌre sani zaꞌra.Isiré ꞌre ĩhâimana zaꞌra mono õ di za, tinhoprubzé danhimizama wapru na ihâibaꞌõ norĩ ma, ꞌre isõprub zaꞌra mono na hã.Duré ite zaꞌra ihâibaꞌõ ãma hã isiré zaꞌra ꞌre ĩwata mono õ di za.
5 Uburé Danhibꞌapito, aiwétési te ĩnhimarĩ na hã ĩma ꞌre aihâimana mo.Duré za niwa aptoꞌoré ĩma iromhâimanazé hã te asibꞌratamhã tihâiba.A hã te duré ĩhâimanazé hã ĩma ꞌre isaprõni mo.
6 E niha ma tô marĩ iwẽ si ĩma ꞌre iꞌapisutu mo. E niha iwẽ uptabi!
7 Uburé Danhibꞌapito ãma hã wa ꞌre ĩwata, õ hã ĩma roti wẽ ꞌwai wa.Duré mara na hã te za ꞌrâwi ĩnhimirosaꞌrata na si nherẽ, te te sina ꞌre ĩpoꞌre puꞌu mono.
8 Tô sena te Uburé Danhibꞌapito hã ĩsiré uꞌâsi ꞌre mo.Ĩnhimire niwĩ ꞌre ihâimana mono wa, marĩ te te ĩꞌmarõwĩrĩ da hã, mare uptabi di.
9 Tahawa, ĩpẽꞌẽ ꞌremhã ĩma robzei uptabi mono di. Duré ĩma hã rowẽ zaꞌẽtẽ di.Wa duré ĩsima iwẽ na ĩsina ĩhâtâꞌâ ãna ꞌre ĩnhamra.
10 E marĩ wa. A hã ꞌRe ihâimana uꞌâsi mono, dadâꞌâ nhiptetezé wi ꞌre ĩꞌmadâꞌâ uꞌâsi mono wa.Wa hã aiꞌãma si ꞌre ĩmorĩ wa, ĩrẽme õ di za, dadâꞌâ pese zéb u ĩmorĩ da hã.
11 A hã te ꞌre idanomro mono zép té na bâdâdi hã ĩma ꞌre iwasuꞌu mo.Duré ĩsiré ꞌre iꞌaihâimana mono zé hã te rowẽ hã te te ĩma ꞌre saꞌẽtẽ. Te duré õne uꞌâ ĩma ꞌre irowẽ mono zé hã te te ĩma ꞌre sani.
