Salmu 51:1-19
Davihi nhoꞌre, Bate-Sebaha na tiwasédé te te ꞌmanharĩ wa, Natã iwasété na te te ãma tãma nharĩ pari, te te irobꞌuiꞌérézé
51 ꞌRe ihâimana uꞌâsi mono, asimizawizéb zarina, maꞌãpé ĩꞌãma aiwamri na.Duré saꞌẽtẽ na ĩꞌãma aipẽꞌẽzé zarina, maꞌãpé ĩwasédé hã ĩma pari.
2 Maꞌãpé uburé marĩ te ꞌre iꞌabꞌmanharĩ wasété mono zé hã ĩma pari pese.Duré maꞌãpé ĩꞌupsõ na, ꞌre ĩwasété mono zém na hã.
3 E marĩ wa. Marĩ na te ꞌre iꞌupai mono zé hã ĩma waihuꞌu pese di.Ta hã te te sina ꞌre ĩnhoꞌre uꞌâsi.
4 Aiwi wa tô ĩwasédé hã ꞌmanha, tô aiwi si.Aima iwẽꞌõ hã wa tô ꞌmanha.Tahawa, tô ibâre ma tô niha hã ĩꞌãma iwaihu, taha zarina niha na ĩma irobꞌmanharĩ da hã.
5 Sena ĩpotozém hawim haré, te ĩwasédé hã ĩma ꞌre hâimana.Ĩna wasãzém hawim haré, wa tô ĩwasété ré hã ꞌre ĩnhamra tô.
6 A hã, dapẽꞌẽ ꞌre, sena na iꞌuwaibaba na si ꞌre idahâimana zaꞌra mono zép si aima iwẽ hã.Tahawa maꞌãpé ĩpẽꞌẽ ꞌremhã asimirowaihu iwẽ hã ĩma saꞌẽtẽ.
7 Maꞌãpé ĩwasédé hã ĩma pari, ĩꞌuptob ãna oto ĩhâimana da.Duré ĩꞌupsõ na, rowahâ pĩni uꞌẽtẽ zarobꞌa nhipai u, ĩzarobꞌa uptabi na ꞌre ĩhâimana mono da.
8 Maꞌãpé ĩpẽꞌẽ ꞌre ĩto sina ꞌre ĩhâimana mono zé hã apâ ĩma sõmri, a hã ꞌre ĩwati mono nherẽ, robze sina apâ ꞌre ĩnhamra mono da.
9 Ĩwasédé hã maꞌãpé ĩꞌãma ꞌre aꞌmadâꞌâ mono tõ.Uburé pese ĩma pari, marĩ te ꞌre iꞌabꞌmanharĩ wasété mono zé hã.
10 ꞌRe ihâimana uꞌâsi mono, maꞌãpé ĩpẽ ĩpe hã sena uptabi hã ĩma sõmri.Maꞌãpé ipẽꞌẽ ꞌre ĩnhiptede ité hã apâ ĩma sõmri.
11 ꞌRe iꞌasãmra mono zém hawimhã maꞌãpé ĩwazere tõ.Duré aipẽꞌẽzani iwẽ hã ĩhawimhã wazere tõ.
12 Apâ rowẽzém na ꞌre idaꞌanhoꞌreptui mono zé hã, maꞌãpé apâ ĩma sõmri.Duré maꞌãpé asimiroti te ꞌre iwapari pese mono da hã, ꞌre ĩꞌupari mono.
13 Ãne wamhã, wa za asimiroti te te ꞌre iwapari zaꞌra mono õ norĩ ma, te tãma ãma ꞌre aroti. Tawamhã te za apâ atẽmemhã ꞌre sipizari zaꞌra.
14 ꞌRe ihâimana uꞌâsi mono, Ĩnhoꞌreptuiꞌwa, ĩdâꞌâzé wi hã maꞌãpé ĩnhoꞌreptu na.Tawamhã ĩto sina, wa za asiminhoꞌreptuzé wasuꞌu na hã te dama ãma ꞌre robꞌmahârâ!
15 Uburé Danhibꞌapito, maꞌãpé ĩzadawa na damreme iwẽ hã ĩma ꞌre sõmri mono.Tawamhã wa za aiꞌãma ꞌre ĩwata uꞌâsi.
16 A hã asima ꞌre wẽ mono õ di, danhimizama zata na aima ꞌre ĩnhopru mono da hã.Asima wẽ ꞌwaꞌâhã, wa aré tô ãma aima ꞌre ĩnhopru.
17 ꞌRe ihâimana uꞌâsi mono, aima ĩnhoprubzé hã, ĩpẽꞌẽ ꞌremhã ꞌrâwi ꞌre ĩsiꞌmadâꞌâ zei mono õ zém na.A hã dapẽꞌẽ ꞌre, ꞌrâwi ꞌre idasiꞌmadâꞌâ ze zaꞌra mono õ zé hã duré dawasété wa, ꞌre idasiwẽꞌõ zaꞌra mono zé hã, ꞌre awẽꞌõ mono õ di.
18 ꞌRe ihâimana uꞌâsi mono, maꞌãpé asimiꞌmanharĩ wẽ zéb zarina,Zeruzalẽ hã pawapto na, apâ iꞌwawi waꞌra ꞌrãihâ hã da te dasiwi ꞌmanharĩ da!
19 Tawamhã danhimizama zata na aima danhoprubzé hã te za asima ꞌre iꞌawaibui wẽ mo.Te za duré powawẽ ibaꞌõmore ihâiba té wedezane nhisiwimhã da te aima ꞌre zata zaꞌra.
