Tiagu 1:1-27
1 Wa hã Tiagu, ꞌRe ihâimana uꞌâsi mono ma romhuriꞌwa, duré Wanhibꞌapito Zezu Cristuhu ma zama, wa ãma asawi zaꞌra waꞌwa, uburé ꞌRe ihâimana uꞌâsi mono nhibꞌaꞌuwẽ ropâ ꞌre iꞌaihâimana zaꞌra waꞌaba mono norĩ hã.
2 Ĩsisãnawã norĩ, marĩ ahâ na asada ꞌre hâimana zaꞌra waꞌaba mono wamhã, ato zaꞌẽtẽ na ꞌre aihâimana zaꞌra waꞌaba mono, sipuꞌu pese na marĩ asada ꞌre hâimana zaꞌra waꞌaba mono nherẽ, ꞌre irobzépata zaꞌra waꞌaba mono zéb da hã.
3 E marĩ wa. Aima waihuꞌu pese zaꞌra waꞌaba wa, ãne hã: ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zé, sena zô, aipibuzé hã asada ꞌre hâimana zaꞌra waꞌaba mono parimhã, te za oto aima ꞌre hâimana zaꞌra waꞌwa, asiptete na ꞌre iꞌaihâimana zaꞌra waꞌaba mono zé hã, wẽ na ãma ꞌre roꞌrahâri zaꞌra waꞌaba mono wamhã.
4 Asiptete na oto ꞌre iꞌaihâimana zaꞌra waꞌaba mono zé hã, ibâ na aima ꞌre hâimana zaꞌra waꞌaba mono wapsi, aiprédup sina duré iꞌuwaibaba na oto ꞌre aihâimana zaꞌra waꞌaba mono da, marĩ na ꞌre upa zaꞌra waꞌaba mono ãna.
5 Niꞌwai wi aiwazarib zaꞌra waꞌaba hã, dahâimanazém na rowaihu iwẽ zô tiwi rowaptâꞌâ wamhã, ꞌRe ihâimana uꞌâsi mono wi te te waptẽrẽ. Tawamhã te za tãma tisõ, tãma wẽ uptabi wa, daꞌãma ꞌre isiwãrĩ mono da hã. Tahawa te uburé te te dama ꞌre anhomri, wẽ na.
6 ꞌRe ihâimana uꞌâsi mono iꞌumnhasi sina, te za duré tiwi ꞌre irowaptẽrẽ zaꞌra waꞌaba mono, ꞌre asiwawã zaꞌra waꞌaba mono ãna. E marĩ wa. Niꞌwa hã siwawãi wamhã, ta hã aiwa â sisasisi ne, rowaꞌu hã te te ꞌre iꞌâzasisi mono ne.
7 Niꞌwa hã ãne hâimana wamhã, te te rosaꞌrata tõ, Uburé Danhibꞌapito za marĩ te te tãma isõmri na hã.
8 E marĩ wa. Isimirosaꞌrada hã misi tãma hâimana õ wa, duré tihâimanazém na waptu na te te ãma ꞌre saprĩ mono wa.
9 Isazeiꞌwa hã sibrob õ wa, dama wapu na ꞌre hâimana mono nherẽ, te za tô te te sima ꞌre rowẽ, ꞌRe ihâimana uꞌâsi mono ma si, pire na ꞌre hâimana mono wa.
10 Tane, niꞌwa isazeiꞌwa hã sibro pese na ꞌre hâimana mono nherẽ, te za duré te te sima ꞌre rowẽ, ꞌRe ihâimana uꞌâsi mono hã te te tãma ꞌmanharĩ wamhã, dama wapu na oto ꞌre hâimana mono da. E marĩ wa. Niꞌwa hã sibro pese nherẽ, te za sô tirobaba, romnhirãrã rom na ꞌre isimasa mono ne.
11 Bâdâ hã ꞌrãi watobro wamhã, duré rowaꞌro uptabi wamhã, te za ꞌré, robꞌre hã. Isu hã te za duré rere. Tawamhã ꞌmadâꞌâ ze na ihâimanazé hã te za aiꞌutõ. Tane duré isibro pe hã. Tinhibrom na si ꞌre ꞌrãzaꞌõtõ mono ré, te za sô tirobaba.
ꞌRe ihâimana uꞌâsi mono hã te te ꞌre daꞌapibui waihuꞌu mono õ di, iwasété na hã
12 Niꞌwai ma ꞌre rowẽ uptabi mono di, robzépata nherẽ, siptete uꞌâsi ꞌRe ihâimana uꞌâsi mono ãma ꞌre ihâimana mono ma hã. E marĩ wa. Ipibuzé robzépata na te te ãma saprĩ wẽ wamhã, ꞌRe ihâimana uꞌâsi mono hã te za tãma pisutu dahâimanazé isiꞌutõrĩ õ, te te ꞌre iꞌazawi pese mono norĩ ma, te te ãma iropisudu hã.
13 Niꞌwa sada ipibuzé hã hâimana wamhã, niwa te te nharĩ tõ, ãne hã: “ꞌRe ihâimana uꞌâsi mono hã ma ĩpibu.” E marĩ wa. Niꞌwa hã te te pibui waihuꞌu õ di, ꞌRe ihâimana uꞌâsi mono, tiwasédé te te iꞌmanharĩ da hã. Duré simipibui õ di ta hã, dawasédé, da te iꞌmanharĩ da hã.
14 Dahâiba mono bâ dapibuzé hã te dama ꞌre hâimana zaꞌra, ꞌrâwi marĩ iwasédé, da te ꞌre iꞌmanharĩ zaꞌra mono zéb zarina, da te dasima ꞌre iwẽ zaꞌra mono zé hã te te sitẽme ꞌre daꞌwani zaꞌra mono wa, duré iwẽ newa te te ꞌre daꞌrãiwamnarĩ zaꞌra mono wa.
15 Tawamhã ã hã ꞌrâwi marĩ iwasédé, da te dasima ꞌre iwẽ zaꞌra mono zé hã, dapẽꞌẽ ꞌre sihâiba wamhã, dawasédé, da te ꞌre iꞌmanharĩ zaꞌra mono zé hã te za oto podo. Tawamhã dawasédé hã saꞌẽtẽ wamhã oto, niꞌwa hã te za tiwĩ, iwasédé hã.
16 Ĩsisãnawã norĩ, ĩma iꞌasawi pese zaꞌra waꞌaba norĩ, ãne na ꞌrâwi asima ꞌre robꞌrãꞌrata zaꞌra waꞌaba mono tõ.
17 Uburé marĩ iwẽ, duré iꞌuwaibaba wama ꞌre ihâimana zaꞌra mono hã, ta norĩ hã hâiwa hawip si te wama ꞌre hâimana zaꞌra, ꞌRe ihâimana uꞌâsi mono hâiwa na robꞌuiwẽꞌwa ꞌre ihâimana zaꞌra mono norĩ Potoꞌwai hawip si. Ta hã tihâimanazém na te te saprĩ waihuꞌu õ di, awã isisaprĩ ahâ ne hã.
18 Te te sima iwẽzéb zarina ma tô ꞌmanha, iꞌra na ꞌre wahâimana zaꞌra mono da hã, isimiroti tô sena ꞌre ihâimana mono zéb zarina, iꞌra potoꞌrata na ꞌre wahâimana zaꞌra mono da, uburé marĩ te te iꞌapoto norĩ nhipai u.
ꞌRe ihâimana uꞌâsi mono nhimiroti zarina ꞌre idahâimana zaꞌra mono zé
19 Ĩsisãnawã norĩ, ĩma iꞌasawi pese zaꞌra waꞌaba norĩ, ãma ꞌre aipoꞌre puꞌu zaꞌra waꞌaba mono, ãhã na hã: ꞌRe asisaꞌra pese uꞌâsi zaꞌra waꞌaba mono, aꞌâ ꞌre dawapari zaꞌra waꞌaba mono da hã. Aimreme hã ꞌre sani suꞌu zaꞌra waꞌaba mono tõ, aꞌâ. Duré ꞌre asahi suꞌu zaꞌra waꞌaba mono tõ.
20 E marĩ wa. Tiꞌai ãma ꞌre idazahi zaꞌra mono zé hã, te te dama ꞌre tébré waihuꞌu zaꞌra mono õ di, ꞌRe ihâimana uꞌâsi mono te te sima ꞌre iwẽ mono zéb zarina, iꞌuwaibaba na ꞌre idahâimana zaꞌra mono zéb da hã.
21 Tahawa, maꞌãpé ꞌre rẽme pese zaꞌra waꞌaba mono, uburé senai õ na dahâimana nhiséb õ na ꞌre idahâimana zaꞌra mono zé hã, duré marĩ iwasédé aima ꞌre ihâimana zaꞌra waꞌaba mono hã. ꞌRe ihâimana uꞌâsi mono nhimiroti si ꞌre waibui wẽ waꞌaba mono, aipire na ꞌre asiꞌmadâꞌâ zaꞌra waꞌaba mono ãna, aipẽꞌẽ ꞌre, te te aima ꞌre iꞌre zaꞌra waꞌaba mono hã. Taha si waihuꞌu pese uptabi di, te te ꞌre iꞌasõꞌreptu zaꞌra waꞌaba mono da hã.
22 Maꞌãpé isimiroti zarina ꞌre aihâimana zaꞌra waꞌaba mono. Mare di taré, iwapariꞌwa na hã, ꞌrâwi asima ꞌre robꞌrãꞌrata zaꞌra waꞌaba mono tõ da.
23 Niꞌwa hã isimiroti te te wapari nherẽ, ãma hâimana õ wamhã, aiwa aibâ hã za isiꞌmadâꞌâ ne, dasiꞌmadâꞌâzém na.
24 Siꞌmadâꞌâ parimhã, te za oto mo. Tane nherẽ, te za awaꞌawi tiꞌubu na poꞌre haꞌâ, isiꞌmadâꞌâzém na hã.
25 Tazahã, niꞌwa hã ꞌRe ihâimana uꞌâsi mono nhimiroti zahi iwẽ uptabi hã, rowẽ sina dasima iwẽ na ꞌre idahâimana zaꞌra mono zém nhomriꞌwa hã, te te ꞌre sabui pese mono wamhã, duré siptete sina ãma ꞌre hâimana mono wamhã, mare di, taré iwapariꞌwa na te te ãma ꞌre ipibui pese õ na hã, tazahã, õne uꞌâsi ãma ꞌre ihâimana mono na hã, taha ma ꞌre rowẽ uptabi mono di za, marĩ te te ꞌre iꞌabꞌmanharĩ mono na hã.
26 Niꞌwa hã, ꞌRe ihâimana uꞌâsi mono nhimiroti zahi ꞌmadâꞌâ pese ꞌwa na ꞌrâwi ꞌre siꞌmadâꞌâ zei mono nherẽ, timreme waptu na te te ꞌre sani mono tõ da, ꞌre sitété mono õ wamhã, ta hã te za ꞌrâwi te te sima ꞌre robꞌrãmi. Tawamhã duré isimizaze hã marĩ dai õ di.
27 Danhimizaze iꞌuptabi hã duré tô sena hã, ꞌRe ihâimana uꞌâsi mono Wamama hã te te ꞌre iꞌawẽsãmri mono hã, ã hã: Imamaꞌõ norĩ hã duré piꞌõi mrotõ norĩ hã da te ꞌre pawaptob zaꞌra mono wapsi, te te ꞌre robzépata zaꞌra mono ré hã, duré ꞌre dasiꞌmadâꞌâ pese zaꞌra mono wapsi, marĩ iwasédé tiꞌai ãma ꞌre ihâimana zaꞌra mono na ꞌre dasihâiba wamnarĩ zaꞌra mono tõ da hã.
