Tiagu 2:1-26
2 Ĩsisãnawã norĩ, Wanhibꞌapito Zezu Cristu wẽ uptabi na ꞌre ihâimana mono zazeiꞌwa na ꞌre anomro aba mono wamhã, niwa aiwab õ na hã dama ꞌre aihâimana zaꞌra waꞌaba mono tõ, dabaꞌa na hã.
2 Ãne hã: Aiꞌrãꞌõtõ aba ré, aibâ ẽtẽ waipo pré oru na isiptõmohi tétézé hã, duré iꞌuza iwaꞌâbâ zaꞌẽne hã sébré wamhã, duré aibâ ihâiba amo sébré wamhã, isimarĩꞌõ iꞌuza ihâꞌratare ré duré ihâi ra ré hã,
3 ãté tawamhã, te za iꞌmadâꞌâ wẽ waꞌwa, aibâ iꞌuza iwaꞌâbâ zaꞌẽne hã. Ãne te za tãma inharĩ ꞌwa: “Ãme asãmra, danhamrazé iwẽ ihâimana ãma.” Tane nherẽ, niwamhã ãne te za inharĩ ꞌwa, isibrobꞌõ ma hã: “A hã õme hâiwi asa na” niwamhã “Ãme tiꞌai wa asãmra, ĩpara ãma.”
4 Ãne hã ꞌre ꞌmanharĩ zaꞌra waꞌaba mono wamhã, aiwab õ hã te ꞌrâwi asima ꞌre iꞌmanharĩ zaꞌra waꞌaba mo. Duré asimirosaꞌrata wasété zarina, te dabaꞌa na daꞌãma ꞌre irowairébé zaꞌra waꞌaba mo.
5 Ĩsisãnawã norĩ, ĩma iꞌasawi pese zaꞌra waꞌaba norĩ hã, maꞌãpé ĩwapari pese zaꞌra waꞌaba! E ꞌRe ihâimana uꞌâsi mono hã te te pisutu zaꞌra ã bâ, sibrob ãna tiꞌai ãma datõmo nhoꞌa dama ꞌre ihâimana zaꞌra mono hã, sibro pese na oto ꞌre hâimana zaꞌra mono da, te te sina ꞌre iꞌumnhasi zaꞌra mono zém na, duré Daꞌãma ꞌre isibꞌaꞌuwẽ mono zéb ãma, ꞌre hâimana zaꞌra mono da, te te ãma iropisudu hã te te ꞌre iꞌazawi pese mono norĩ ma hã.
6 Tane nherẽ, te taré na ꞌre iꞌmadâꞌâ zaꞌra waꞌaba mo, isibrobꞌõ norĩ hã. E isibro pese norĩ hã te te ꞌre aiwati pese zaꞌra waꞌaba mono ã bâ. E duré ta norĩ hã te te ꞌre asimroi waꞌaba mono ã bâ, daꞌãma rowairébézéb u hã.
7 E ta norĩ hã, Cristuhu nhisi iwẽ uptabi ãma te te ꞌre wasété zaꞌra mono ã bâ, ite na tãma ꞌre iꞌaihâimana zaꞌra waꞌaba mono ãma hã.
8 Danhibꞌapito uptabi nhimiroti, Ibaihâ iwazé pese na robꞌuiꞌéré ãne inomro hã ꞌre ꞌmadâꞌâ pese zaꞌra waꞌaba mono wamhã: “ꞌRe daꞌazawi pese mono, ꞌre iꞌasisawi pese mono ne”, tawamhã iꞌuwaibaba te za tô ꞌre iꞌmanharĩ zaꞌra waꞌaba mo.
9 Tane nherẽ, aiwab õ na dama ꞌre ꞌmanharĩ zaꞌra waꞌaba mono wamhã, aiwasédé hã te za ꞌre iꞌmanharĩ zaꞌra waꞌaba mo. Tawamhã Wamama nhimiroti zahi hã te za te te aiꞌãma ꞌre aroti waꞌwa, roti zahi hã ꞌre upa zaꞌra waꞌaba mono wa.
10 E marĩ wa. Niꞌwa hã roti zahi te te ꞌre abꞌmadâꞌâ pese mono nherẽ, misi na siꞌmorõwĩrĩ wamhã, uburé te te iꞌaꞌupa na hã te za ãma upa, misi roti si te te upa nherẽ.
11 Tô õ hã: “Damro na dawi asipsaihuri tõ da” te te iroti hã, ma tô duré roti: “Daꞌmaiwĩrĩ tõ da.” Tahawa, damro na dawi asipsaihuri õ nherẽ, daꞌmaiwĩrĩ wamhã, iꞌupaiꞌwa na te za tô aihâiba, roti zahi hã rẽme wa, daꞌmaiwĩrĩ da.
12 Tahawa, maꞌãpé dama ꞌre rowasuꞌu zaꞌra waꞌaba mono, duré ꞌre aihâimana zaꞌra waꞌaba mono, ꞌRe ihâimana uꞌâsi mono nhimiroti zahi zarina, za te te waꞌãma rowairébé zaꞌra wa, isimiroti zahi hã wawasété wi te te ꞌre iwaꞌazani mono hã.
13 ꞌRe ihâimana uꞌâsi mono hã nimahã bâtâ na te te daꞌãma arowairébé wamhã, niꞌwam norĩ ãma siba õ di za, daꞌãma ꞌre isiba zaꞌra mono õ norĩ ãma hã. Tanei õ di, niꞌwam norĩ hã daꞌãma ꞌre isiba zaꞌra mono norĩ hã. Ta norĩ hã te za pahi ãna aimasa, Daꞌãma rowairébéꞌwa nhoꞌremhã, Bâdâ Rowairébézé za ihâimana ãma hã.
ꞌRe ihâimana uꞌâsi mono, da te dasina ꞌre umnhasi zaꞌra mono wamhã, te za da te tãma ꞌre romhuri zaꞌra
14 Ĩsisãnawã norĩ, e marĩ da bâ, niꞌwa hã te te nharĩ nherẽ, ꞌRe ihâimana uꞌâsi mono te te ꞌre iꞌumnhasi mono na hã, tane nherẽ, marĩ iwẽ te te ꞌre abꞌmanharĩ mono õ wamhã. E õne na te te ꞌre iꞌumnhasi mono zé hã te te sõꞌreptu da bâ.
15 Ãté niwamhã asisãnawã asiré isazeiꞌwa duré ãté niwamhã aihidiba asiré isazeiꞌwa zama, iꞌuza zô tiwi rowaptâꞌâ wamhã, duré niwamhã ãté dasa zô bâtâ sidâpâ ãma ihâimana da hã.
16 Tane nherẽ, tiwi sô irowaptâꞌâ na ãma aimei waꞌaba õ wamhã, marĩ dai õ di, ãne si tãma nharĩ aba wamhã: “Rowẽ na si aimorĩ. Asiꞌuza na, asiwaꞌro da. Duré asa na, iꞌmahâiwĩrĩzéb u.” Marĩ hã tãma sõmri aba ãna tãma nharĩ aba wamhã, e marĩ da bâ, tãma inharĩ aba zé hã.
17 Tane duré ꞌRe ihâimana uꞌâsi mono, da te dasina ꞌre iꞌumnhasi zaꞌra mono zé hã, siwaprosi hã hâimana waihuꞌu õ di. Marĩ iwẽ da te ꞌre iꞌmanharĩ zaꞌra mono zé isiré hâimana õ wamhã, dâꞌâ di.
18 Ãté niꞌwa hã te za ãne dama siwasuꞌu: “Ate iré hã ꞌRe ihâimana uꞌâsi mono asina ꞌre iꞌumnhasi mono zé hã. Tazahã ĩte hã, marĩ iwẽ, wa te te ꞌre abꞌmanharĩ.” Tane wamhã, maꞌãpé ĩma hâiꞌré na, ꞌRe ihâimana uꞌâsi mono ꞌre iꞌumnhasi mono zé hã, marĩ iwẽ ꞌre abꞌmanharĩ mono õ nherẽ. Tawamhã wa hã wa za aima hâiꞌré, ꞌRe ihâimana uꞌâsi mono te ꞌre iꞌumnhasi mono zé hã duré isiré marĩ iwẽ te ꞌre iꞌabꞌmanharĩ mono zéb zama.
19 E ma tô isaze, misire ꞌRe ihâimana uꞌâsi mono ꞌre ihâimana mono na hã. We di tô. Waꞌuburé norĩ zama te duré te te ꞌre saze zaꞌra. Ipipa te, te duré tãma ꞌre rẽrẽꞌẽ zaꞌra.
20 Aihâimana nhimizaꞌrese ãna ꞌre iꞌaihâimana mono! E waihuꞌu da hã asima wẽ ã bâ, ꞌRe ihâimana uꞌâsi mono, da te ꞌre iꞌumnhasi zaꞌra mono zé hã, marĩ iwẽ, da te ꞌre ꞌmanharĩ zaꞌra mono ãna, marĩ dai õ na hã.
21 E wahiꞌrada Abraꞌã hã marĩ iwẽ te te iꞌmanharĩ na ꞌRe ihâimana uꞌâsi mono hã te te wẽsãmri ã bâ, tiꞌra uptabi nherẽ, Izaquihi ãma aré tinhoprubzé hã te te iꞌmanharĩ hã, danhoprubzé da te ꞌre isaꞌra mono zé, ẽtẽ zaꞌra nhisiwi.
22 Maꞌãpé ãma rosaꞌrata pese zaꞌra waꞌaba, ꞌRe ihâimana uꞌâsi mono te te ꞌre iꞌumnhasi mono zé hã, duré marĩ iwẽ te te ꞌre iꞌabꞌmanharĩ mono zé hã, siré te te ꞌre iromhuri zahuré mono na hã. Marĩ iwẽ te te ꞌre iꞌabꞌmanharĩ mono zéb zarina, ma tô ꞌRe ihâimana uꞌâsi mono te te ꞌre iꞌumnhasi mono zé hã simisutu wahuré na hã oto tãma tihâiba.
23 Ãne wa, ma tô sina uwaimra, ꞌRe ihâimana uꞌâsi mono mreme na Ibaihâ iwazé pese na ãma irobꞌuiꞌéré hã, ãne: “Abraꞌã hã ma tô saze, ꞌRe ihâimana uꞌâsi mono. Tahawa ꞌRe ihâimana uꞌâsi mono hã ma tô wẽsã.” Tahawa Abraꞌãhã wamri hã, ꞌRe ihâimana uꞌâsi mono siwaihuꞌu na.
24 Tahawa maꞌãpé waihuꞌu zaꞌra waꞌaba. ꞌRe ihâimana uꞌâsi mono hã niꞌwa te za wẽsã ihâimanazéb zarina, mare di, te te ꞌre iꞌumnhasi mono zém na si hã.
25 Ãne ma tô tiromhâiba, Raabi piꞌõ siwaꞌâbâ zô ꞌre isisõmri mono ma hã. ꞌRe ihâimana uꞌâsi mono hã ma tô wẽsã, te te iꞌmanharĩzém na, Izaraéu nhihudu norĩ wapsãiꞌaꞌwa norĩ hã tinhorõwa u te te ꞌmazasi wa, duré ãma sime zahuré wa, bâdâdi aimawi na pusi da, ꞌri nhoꞌõmo hawimhã.
26 Niꞌwai wi ipẽꞌẽzani, ihâiba hawi watobro wamhã, dâꞌâ di. Tane duré marĩ iwẽ, da te ꞌre ꞌmanharĩ mono ãna, ꞌRe ihâimana uꞌâsi mono, da te dasina ꞌre iꞌumnhasi mono zép si dama ꞌre hâimana mono wamhã, dâꞌâ di. Marĩ dai õ di, ꞌRe ihâimana uꞌâsi mono, da te ꞌre iꞌumnhasi mono zép si hã.
