ĨMRO RÉ NORĨ MA
1: Damro ꞌre datsina ropitsudu
E MARĨ TE WATSUꞌU.
Aibö timro me te te tsina ropitsutu dzahuré mono wamhã datsina damro ꞌremhã, te ꞌmadöꞌö dzahuré timrodzé ĩtsiꞌutõrĩꞌõ na hã. Ãne wamhã, romharé te dza tãma ꞌre höimana dzahuré. Te dza tsiꞌumnhatsi dzahuré dza ĩtsirẽme dzahuré õ na hã ropire watobro nherẽ.
Niꞌwa ĩmro ré norĩ tsirẽme dzaꞌra õ di ĩtsitsãnawã norĩ duré ĩtsiwaihuꞌu norĩ datsirẽmedzé te te ꞌmadöꞌö dzaꞌra ꞌru te. Tadzahã danhipai u rowẽ di ĩmro ré norĩ tsirẽme dzaꞌra õ wamhã tsitsawi petse dzaꞌra wa duré tsiwadzéb dzaꞌra wa.
ROPOTOꞌWAI MREME NHIMIROTI: ‘Aibö norĩ hã timro te te ꞌre rẽme dzaꞌra mono õ di dza.’ — 1 Coríntios 7:11.
“A hã aimro me ꞌre atsina ropitsutu aba mono wamhã, atsitiꞌrui wadzere tsuꞌu õ di dza te te aiwaiꞌre wamhã. Taha waꞌrãmimhã, wapu di dza ꞌruiwapari tõ da duré ĩꞌupa hã ãma aipoꞌre tsiꞌöri da. Te dza duré ĩꞌmadö ropire norĩ hã marĩ taré aꞌö te te aiwi ĩroꞌwaꞌrutu aba na hã. Duré rotsaꞌrata õ di dza taha wẽ te, aimro rẽme da.” — Micah.
E MARĨ WA WẼ DI.
Ropire watobro wamhã ĩmro ré norĩ te te tsina ĩropitsutu dzaꞌra õ hã, te dza rotsaꞌrata tsuꞌu dzaꞌra: “Ãté tsadai õ nherẽ watsiré wahöimana da hã”. Duré marĩ na te dza rotsaꞌrata dzaꞌra tsirẽme dzaꞌra da.
“Daꞌahö na te datsina damro dzaꞌra rotsaꞌrata ré, wẽ na watobro õ wamhã, wapu di datsirẽme dzaꞌra da. Niꞌwa tsina mro wamhã te te rotsaꞌrata tsina ãté te te ĩrẽme na hã datsina ĩropitsutudzé tãma höimana õ di datsina damro ꞌremhã.” — Jean.
E MARĨ TE DZA ĨꞌMANHA.
ÃMA ROTSAꞌRATA
E niha te ĩrotsaꞌra atsitsadaꞌöbö wamhã aimro me.
-
E te atsiꞌruiwapa ãma ĩꞌaimro na hã.
-
E te atsina ĩrotsaꞌra aimawi u ĩꞌaimro na hã.
-
E a hã, te ĩnha “te ĩꞌairẽme da tsi!” niwamhã “niꞌwa te te ĩ̱dzawi dzô wa dza rĩni”.
Tsadaꞌöbö wamhã “ĩhe” nimahã dadzadanharĩ da hã, tawamhã ĩꞌatsiwatsutu da tsi datsina ĩropitsutudzé hã tsiptete da tsi atsina aimrodzéb ꞌremhã.
ATSIMA ROBDZANHAMRI ABA
-
E watsina ĩropitsutudzé tsibꞌuwa di. Ãne wamhã e marĩ wa.
-
E marĩ, wa dza ꞌmanharĩ ni watsina ĩropitsutudzé watsina wamrodzéb ꞌremhã wa te tsiptete da.
AIPAWAPTODZÉB DA
-
Nimahã na hã, tãma romnhihötö aimro ma tãma höiꞌré da aima ĩtsawi na hã.
-
Tsãrĩ aimro podo atsimiromhuridzéb ãma hã, höiꞌré da atsimiwadzé atsina ĩropitsutudzém na aimro me hã.
-
Romhuri ré niwamhã aimro nhiti aꞌö aihöimana ré, tãma taꞌa natsi bötö tsidöpötsi.
ROPOTOꞌWAI MREME NHIMIROTI: ‘Ĩwẽ hã niꞌwa hã ãma ĩtsiwanhidzari dzahuré õ da tsi, ꞌRe ĩhöimana uꞌötsi mono, ãma ĩtsitobdzé hã.’ — Mateus 19:6.
