DAMAMA DURÉ DANA MA
6 Daꞌra ma ĩpẽtẽdzé
E MARĨ TE WATSUꞌU.
Aiꞌra ma pẽtẽ da, te dza tãma ĩroti duré te dza tãma ĩrowahu. Nimahã na hã, te dza duré ĩpe aiꞌuté ĩhöimana prédubꞌõ. Tadzahã, danhipai u, te dza ĩhöimana prédu aiꞌra tsimidzaꞌretse na te te ꞌre pitsutu wẽ mono da tihöimanadzém na.
E MARĨ WA WẼ DI.
à bötö mono na hã, nimahã damama duré dana norĩ te te ꞌre pẽtẽ dzaꞌra mono õ di oto tiꞌra norĩ ma. Tahã te te ꞌmanharĩ dzaꞌra õ di, tãma dzaꞌra hã ãne te te tsibꞌuwa dzaꞌra õꞌumnhatsite aiꞌuté norĩ tsitsawidzé. Tadzahã damama duré dana ĩtsimidzaꞌretse norĩ pibui petse na te natsi roti dzaꞌra tiꞌra norĩ ma duré te pawaptob dzaꞌra te te tsadawa dzamarĩ dzaꞌra da.
“Damama duré dana norĩ, daꞌra norĩ ma te te ĩrowahutu dzaꞌra da tsi e tiha te te ĩꞌmanharĩ dzaꞌra da hã duré e tiha te te ĩꞌmanharĩ dzaꞌra tõ da hã. Ãne daꞌra norĩ tsimidzaꞌretse na te dza tiprédu wẽ dzaꞌra. Ĩpẽtẽdzéb ãna aiꞌuté aiwa ubaꞌre ĩꞌmaprabadzéb ãna — taré te dza wara duré ãté te dza aipiꞌra.” — Pamela.
E MARĨ TE DZA ĨꞌMANHA.
Aimreme na ãma uwaimrami. Aiꞌra atsimiroti te te tsadawa dzamarĩ õ wamhã te dza tama ĩpẽ. Taha waꞌrãmimhã te te atsadawa dzamarĩ wamhã, waptu na te dza ãma ꞌre aiwata.
“Ã bötö na dapoꞌre õ na te ꞌre dahöimana dzaꞌra. Taha wa, wa natsi ĩ̱wata ĩ̱ꞌra norĩ ãma poꞌre petse na ꞌre höimana dzaꞌra mono wamhã. Aiꞌuté norĩ ãma natsi wawata dzaꞌra wamhã, danhipai u wapu di dza, te te tsadawa dzamarĩ dzaꞌra da wa te tãma pẽtẽ dzaꞌra wamhã.” — Christine.
ROPOTOꞌWAI MREME NHIMIROTI: “Da te ꞌre ĩdzuri mono dzéb dzarina, te dza da te ꞌre ubumro.” — Gálatas 6:7 TNM.
Pibui petse na aihöimana. Aiꞌra ma pẽtẽ da wamhã, te dza tãma ĩpẽ ãma ĩwahu dzarina, ĩtsimirowaihuꞌu dzarina duré ĩꞌupa te te ĩꞌmanharĩdzéb dzarina. Tãma ĩpẽtẽdzé te dza danhipai u pawapto ĩꞌupa hã te te ĩꞌmanharĩdzéb dzarinai wamhã. Ãma ĩtsimiré, ãté aiꞌra, te dza tsadawa rẽ atsimiroti dahörödzé upi na. Ãne wamhã, te dza ĩpitsu tsuru na dahörödzé te te upi da niwamhã te te upi tõ da aꞌö. Duré tsada atsiptete atsiꞌrãi waꞌro tõ da marĩ tsuru na te te upai wamhã.
“Wa ĩ̱tsiwatsutu te waihuꞌu da ĩ̱ꞌra tsima ĩwẽ na te te ĩ̱dzadawa rẽme dzô niwamhã taré te te ãma upa dzô. Aimawi na te dza tãma ĩpẽ tihöimana watsédé hã te te rẽme õ wamhã, duré taré marĩ ĩtsuru na te te upai wamhã.” — Wendell.
ROPOTOꞌWAI MREME NHIMIROTI: ‘Aiꞌra norĩ ma ꞌre ĩpẽtẽ uꞌötsi dzaꞌra waꞌaba mono dzém na ꞌre tsahi dzani dzaꞌra waꞌaba mono tõ, robdzei ãna ꞌre höimana dzaꞌra mono tõ da.’ — Colossenses 3:21.
Atsimidzawi na aihöimana. Aiꞌra norĩ ma atsimidzawi na pẽtẽ wamhã, te dza waihuꞌu dzaꞌra duré wapu di dza te te atsadawa dzamarĩ dzaꞌra da.
“Waꞌra marĩ na te te upai wamhã, wa aré natsi tãma nharĩ ni, wama ĩrowẽ na hã marĩ ĩwẽ oto te te ĩpitsutu na hã. Wa aré tãma rowatsuꞌu ni, tsiwatsutu wamhã tsihiri wẽ da õhõ ĩꞌupa ĩhöimanadzé te te ĩꞌuptobꞌõ na hã, duré dza wa te ĩpawaptom na hã.” — Daniel.
ROPOTOꞌWAI MREME NHIMIROTI: ‘Danhimidzawi petse na dahöimanadzé hã . . . marĩ na daꞌãma ꞌre waꞌa tsuꞌu dzaꞌra mono õ di dza. Daꞌãma ꞌre ĩpẽꞌẽdzé dzaꞌra mono dzarina, te dza tô te te ꞌre dapawaptob uꞌötsi dzaꞌra.’ — 1 Coríntios 13:4.
