Roꞌmahörö ꞌrada 2. Mra

‘Datsa tsurure wa, te dza da te ꞌre robdzépata dzaꞌra’. — MARCOS 13:8.

● Aibö te mo ꞌriꞌahö Quaratadji u datsa dzô Níger ãma. Ĩtsitsãnawã norĩ ma tô duré tsimani dzaꞌra mra wi tite ꞌriꞌahö nhiti höimana dzaꞌra da. Tane nherẽ tahã aibö tsiwaprotsi tiꞌai wa te nomro. E marĩ wa. Sidi, rotiꞌwa Quaratadji te, te watsuꞌu: “Datsa te te tãma tsõmri waihuꞌu dzaꞌra õ wa [ĩtsitsãnawã norĩ ma] taha wa tsitséb di te te tõmo ꞌmadöꞌö dzaꞌra da.”

E MARĨ ĨROMHÖIMANADZÉ HÃ TE HÖIꞌRÉ. Daro mono bö daꞌahö na da te datsina uwaimrami dzaꞌra õ di dza datsa na da te ꞌmahöpãrĩ da bötö tsidöpötsi. Duré danhipai u pire di África ãma tsupararo Saara ꞌratamhã, daꞌahö na ãne te tahöimana dzaꞌra ni daꞌwahi na. Tsadaihuꞌu da ãma rotsaꞌrata damama, dana, duré ĩꞌra dzahuré família ꞌre. Datsa ĩré wamhã maparane aꞌuwẽ norĩ ma tsi, e ꞌwa tsai õ di dza. E damama. E dana. E ĩꞌra dzahuré. Família ahö na tahã te te tsima pitsutu dzaꞌra bötö tsidöpötsi.

E MARĨ NIꞌWAM NORĨ TE NATSI NHARĨ DZAꞌRA. Tiꞌa tsiꞌuihö na te ꞌmanha datsa tsaꞌẽtẽ na aihĩni norĩ ma hã. Tane nherẽ ãhã datsa da te tsõmri dzaꞌra õ di aihĩni ma hã.

E TÔ TSENA TE TE ĨNHARĨ DZAꞌRA DZÉ HÃ. Tô tsena robꞌre na te te ĩromhuri dzaꞌra norĩ hã te ꞌre dzaꞌra datsa duré te adzaꞌwari dzaꞌra ã bötö mono na hã duréi nhipai u. Duré danhimirobꞌrudzé norĩ hã datsa na te te ĩpoꞌo waihuꞌu petse dzaꞌra da tsi. Tadzahã duréi hawi ãne hã te te ꞌwapé dzaꞌra nherẽ ãma ĩtsahu na te te ãma uwaimrami dzaꞌra õ di.

E NIHA ATSIMIROTSAꞌRADA HÃ. E Marcos 13:8 mreme dzarina te tiromhöiba. E daꞌahö na Tiꞌai mono bö te tsépata dzaꞌra ni datsa tsurure wa.

Roꞌwaꞌrutu ĩhöiba amo Bíblia oto ĩwatsuꞌu na hã te tihöiba tiꞌai popo duré mra uꞌöbö.

[Ĩwatsuꞌudzé hã]

“Aiꞌuté ahö na ĩdöꞌö dzaꞌra na hã daꞌwadzaꞌa na, danhana u hã duré dahödzé ĩhöiba amo norĩ uꞌöbö, dzahadu te aré tihöimana dzaꞌra, mra na te ꞌre tsépata dzaꞌra mono õ ꞌwaꞌöhã.” — ANN M. VENEMAN, UNICEF NHIBꞌIHÖꞌA ꞌRADA.

[Dapoto tedeꞌwa norĩ hã]

© Paul Lowe/Panos Pictures