Iincwadi zevangeli zeBhayibhile zithetha ngoYohane umBhaptizi owayeshumayela ngoBukumkani bukaThixo kwaYuda. Ngaba ezi zinto zithethwa yiBhayibhile ngoYohane ziyinyani? Khawujonge ezi zinto zilandelayo:

•   IBhayibhile ithi: “UYohane umBhaptizi weza kushumayela entlango kwelakwaYuda, esithi: ‘Guqukani, kuba sele buza kufika uBukumkani bamazulu.’” (Mateyu 3:1, 2) Ngaba bukhona obunye ubungqina obuvumelana nesi sibhalo? Ewe.

   Umbhali-mbali wakudala uFlavius Josephus kwincwadi yakhe wathetha ngendoda “enguYohane umBhaptizi, eyakhuthaza amaYuda ukuba ahambe endleleni elungileyo azinikele kuThixo aze abhaptizwe.”—Jewish Antiquities, Incwadi yesi-18.

•   IBhayibhile ithi uYohane walungisa uHerode Antipas, owayengumlawuli waseGalili nasePereya. UHerode wayezichaza njengomYuda othobela umthetho kaMoses. UYohane wamxelela uHerode ukuba wenze into embi ngokutshata uHerodiya umfazi womntakwabo. (Marko 6:18) Nale vesi inabo ubungqina obuyixhasayo obufumaneka kwezinye iincwadi.

   Umbhali-mbali uJosephus wabhala ukuba uAntipas “wayemthanda uHerodiya, waza wamxelela ukuba ufuna batshate.” UHerodiya wavuma washiya umyeni wakhe waza watshata noAntipas.

•   IBhayibhile ithi “babesiya kuye bonke abantu bevela eYerusalem, kwelakwaYuda nakwiilali ezikufutshane neYordan, ukuze ababhaptize kuMlambo iYordan.”—Mateyu 3:5, 6

   Nale uJosephus uyayingqina. Wabhala wathi, abantu babesiza “ngobuninzi” kuYohane ibe “izinto awayebafundisa zona babezithanda.”

 Kucacile ukuba umbhali-mbali wakudala uJosephus wayebona uYohane umBhaptizi njengomntu wokwenene. Ngoko nathi sifanele senze njalo.