2 Samuweli 12:1-31
12 Waza uYehova wathumela uNatan+ kuDavide. Wafika ke yena kuye+ waza wathi kuye: “Kwakukho amadoda amabini awayekwisixeko esinye, enye isisityebi yaye enye iswele.
2 Le ndoda isisityebi yayineegusha neenkomo ezininzi kakhulu;+
3 kodwa indoda esweleyo yayingenanto ngaphandle nje kwethokazi lemvu, elincinane, eyayilithengile.+ Yaligcina liphila, yaye lalikhula nayo kunye noonyana bayo, xa bebonke. Lalisidla eqhekezeni layo, kwaye lalisela endebeni yayo, lalilala esifubeni sayo, laba njengentombi kuyo.
4 Ethubeni kwafika undwendwe kule ndoda isisityebi, kodwa yayeka ukuthabatha kwezayo izimvu nezayo iinkomo ukuze ilungiselele umhambi lowo wayefike kuyo. Ngoko yathabatha ithokazi lemvu lendoda esweleyo yaza yalilungiselela indoda eyayifikele kuyo.”+
5 Koku wavutha kakhulu umsindo kaDavide kwindoda leyo,+ kangangokuba wathi kuNatan: “Ephila nje uYehova,+ indoda eyenza oku ifanelwe kukufa!+
6 Ke lona ithokazi lemvu ifanele ilibuyekeze+ ngamane,+ ngenxa yokuba yenze le nto nangenxa yokuba ingabanga namfesane.”+
7 Wandula ke uNatan wathi kuDavide: “Wena ngokwakho uyiloo ndoda! Utsho uYehova uTHIXO kaSirayeli ukuthi, ‘Mna ndakuthambisa+ njengokumkani phezu koSirayeli, yaye mna ndakuhlangula+ esandleni sikaSawule.
8 Yaye ndavuma ukukunika indlu yenkosi yakho+ nabafazi benkosi yakho+ esifubeni sakho, nokukunika indlu kaSirayeli nendlu kaYuda.+ Kwaye ukuba oko bekunganelanga, bendithanda ukukongezelela izinto ezinjengezi kwakunye nezinye izinto.+
9 Kutheni na ukuze ulidelele ilizwi likaYehova ngokwenza okubi+ emehlweni akhe? U-Uriya umHiti umxabele ngekrele,+ nomfazi wakhe umthabathile njengomfazi wakho,+ ibe yena umbulele ngekrele loonyana baka-Amoni.
10 Ke kaloku ikrele+ aliyi kumka endlwini yakho ukusa kwixesha elingenammiselo,+ ngenxa yokuba undidelile kangangokuba wathabatha umfazi kaUriya umHiti ukuze abe ngumfazi wakho.’
11 Utsho uYehova ukuthi, ‘Yabona, ndikuvelisela intlekele endlwini yakho;+ yaye ndiza kubathabatha abafazi bakho emehlweni akho ndize ndibanike idlelane lakho,+ yaye lona ngokuqinisekileyo liya kulala nabafazi bakho phambi kwelanga eli.+
12 Ngoxa wena wenze emfihlekweni,+ mna ndiya kuyenza le nto phambi koSirayeli+ wonke naphambi kwelanga.’”+
13 Ke kaloku uDavide wathi+ kuNatan: “Ndonile kuYehova.”+ Wathi ke uNatan kuDavide: “NoYehova uyasidlulisa isono sakho.+ Akuyi kufa.+
14 Kwangokunjalo ke, ngenxa yokuba ngokungathandabuzekiyo uye wamphatha ngokungenantlonelo+ uYehova ngale nto, kwanonyana lowo, osandul’ ukumzalelwa, ngokuqinisekileyo uya kufa.”+
15 Wandula ke uNatan waya endlwini yakhe.
UYehova ke wambetha ngesibetho+ umntwana lowo umfazi kaUriya wayemzalele uDavide wagula.
16 UDavide ke wamfuna uTHIXO oyinyaniso ngenxa yenkwenkwe leyo, yaye uDavide waqhubeka ezila ukutya ngokungqongqo+ waza wangena wachitha ubusuku elele phantsi emhlabeni.+
17 Ngoko amadoda amakhulu endlu yakhe ema phezu kwakhe ukuze amvuse emhlabeni, kodwa yena akavumanga waza akadla sonka+ kunye nawo.
18 Kwathi ke ngomhla wesixhenxe wafa umntwana. Yaye abakhonzi bakaDavide babesoyika ukumxelela ukuba umntwana ufile; kuba bathi: “Khangela! Ngoxa umntwana ebeqhubeka ephila sathetha kuye, yaye akazange aliphulaphule ilizwi lethu; singathini ngoko ukuthi kuye, ‘Umntwana ufile’? Ngokuqinisekileyo ke uya kuthi enze into embi.”
19 Xa uDavide wabona abakhonzi bakhe besebezelana, waqonda ukuba umntwana ufile. Ngoko uDavide wathi kubakhonzi bakhe: “Ufile na umntwana?” Bathi bona: “Ufile.”
20 Wandula ke waphakama uDavide, wahlamba, wazithambisa+ ngeoli, watshintsha iingubo zakhe zokwaleka waza waya endlwini+ kaYehova, waqubuda;+ emva koko waya endlwini yakhe waza wacela, baza ngokukhawuleza babeka isonka phambi kwakhe, wadla.
21 Ngenxa yoko abakhonzi bakhe bathi kuye: “Ithetha ntoni na le nto uyenzileyo? Ngoxa ebesaphila umntwana wazila ukutya waza walila; kwakamsinya nje akuba efile umntwana wesuka waza waqala ukudla isonka.”
22 Wathi yena: “Ngoxa umntwana ebesaphila ndazila ukutya+ ndaza ndalila,+ ngenxa yokuba ndazixelela oku, ‘Ngubani na owaziyo enoba uYehova angandibabala, aze ngokuqinisekileyo umntwana aphile?’+
23 Efile nje kaloku, kutheni na ukuba ndibe ndisazila ukutya? Ndiyakwazi na ukumbuyisa kwakhona?+ Ndiya kuye mna,+ kodwa, yena ke, akayi kubuyela kum.”+
24 Waza uDavide wamthuthuzela uBhatshebha umfazi wakhe.+ Ngokubhekele phaya, wangena kuye waza walala naye. Ekuhambeni kwexesha wazala unyana,+ yaye igama lakhe kwathiwa nguSolomon.+ NoYehova ngokwakhe wamthanda.+
25 Ngoko wathumela ngoNatan+ umprofeti waza wabiza igama lakhe ngokuba nguYedidiya, ngenxa kaYehova.
26 UYowabhi+ ke waqhubeka esilwa neRabha+ yoonyana baka-Amoni waza wasithimba isixeko sobukumkani.
27 Ngoko uYowabhi wathumela abathunywa kuDavide waza wathi: “Ndilwile neRabha.+ Ndasithimba nesixeko samanzi.
28 Ke kaloku hlanganisa abantu abaseleyo uze umise inkampu nxamnye nesixeko eso, usithimbe ke; ukuze ingabi ndim othimba isixeko, ungabizwa nangegama lam.”
29 Ngako oko uDavide wabahlanganisa bonke abantu, waya eRabha waza walwa nayo wayithimba.
30 Wasithabatha nesithsaba sikaMalekam entlokweni yakhe,+ ubunzima baso babuyitalente yegolide, kunye namatye axabisekileyo; yaye saba sentlokweni kaDavide. Namaxhoba+ eso sixeko awaphuma nawo ayemaninzi kakhulu.
31 Abantu ababekuso, wabakhupha ukuze ababeke ematyeni okusarhela nakwizixhobo ezibukhali zentsimbi+ nasemazembeni entsimbi, yaye wabasebenzisa ekwenzeni izitena. Kwaye leyo yayiyindlela awenza ngayo kuzo zonke izixeko zoonyana baka-Amoni. Ekugqibeleni uDavide nabantu bonke babuyela eYerusalem.
