Eyesibini YooKumkani 19:1-37
19 Emva kokuba uKumkani uHezekiya eyivile le nto, wakhawuleza wazikrazula iimpahla zakhe, wanxiba amalaphu okwenza ingxowa, waza waya endlini kaYehova.+
2 Emva koko, wathumela uEliyakim owayephethe indlu,* uShebhena unobhala nababingeleli abangabadala, benxibe amalaphu okwenza ingxowa, kumprofeti uIsaya,+ unyana ka-Amotsi.
3 Bathi kuye: “Uthi uHezekiya, ‘Le yimini yentlungu, yokukhalinyelwa* nokuhlazeka; kuba abantwana balungele ukuzalwa,* kodwa akukho mandla akuzala.+
4 Mhlawumbi uYehova uThixo wakho uza kuweva amazwi eRabheshake, ethunywe ngukumkani waseAsiriya inkosi yayo ukuba igezele uThixo ophilayo,+ aze uYehova uThixo wakho amphendulise ngamazwi awavileyo. Ngoko thandazela+ abambalwa abasindileyo.’”
5 Izicaka zikaKumkani uHezekiya zaya kuIsaya,+
6 yena wathi kuzo: “Yithini kwinkosi yenu, ‘Uthi uYehova: “Mawanganoyikisi+ amazwi eniwavileyo athethwe zizicaka zikakumkani waseAsiriya, zindidelela.+
7 Ndiza kufaka iingcinga engqondweni yakhe,* yaye uza kuva ingxelo aze abuyele elizweni lakhe; ibe ndiza kumenza awe ngekrele kanye kwilizwe lakhe.”’”+
8 Emva kokuba iRabheshake ivile ukuba ukumkani waseAsiriya umkile eLakishe,+ yabuyela kuye, yafika esilwa neLibhena.+
9 Ukumkani weva kusithiwa ngoKumkani uTiraka waseTiyopiya: “Nanko ezokulwa nawe.” Ngoko wathumela abathunywa+ kuHezekiya, wathi kubo:
10 “Nize nithi kuKumkani uHezekiya wakwaYuda, ‘Ungamvumeli uThixo wakho othembele ngaye akuqhathe athi: “IYerusalem ayizukunikelwa kukumkani waseAsiriya.”+
11 Jonga! Uvile ukuba ookumkani baseAsiriya bawatshabalalise onke amazwe.+ Ucinga ukuba wena uza kusindiswa?
12 Ngaba oothixo beentlanga ezatshatyalaliswa ngookhokho bam bakwazi ukuzisindisa? Iphi iGozan, iHaran,+ iRetsefe nabantu base-Eden ababeseTele-asare?
13 Uphi ukumkani waseHamati, ukumkani waseArpadi nokumkani wezixeko zaseSefarvayim nowaseHena naseIva?’”+
14 UHezekiya wazithatha iileta ezandleni zabathunywa, wazifunda. Emva koko wenyuka waya endlini kaYehova waza wazitwabulula* phambi koYehova.+
15 UHezekiya wathandaza kuYehova+ esithi: “Owu Yehova Thixo kaSirayeli, ohleli etroneni entla* kweekherubhi,+ nguwe wedwa uThixo wokwenene kuzo zonke izizwe zomhlaba.+ Wenze amazulu nomhlaba.
16 Vula indlebe yakho Yehova, uze uve!+ Vula amehlo+ Yehova, uze ubone! Weve onke la mazwi athunyelwe nguSenaribhe ethuka uThixo ophilayo.
17 Yinyaniso Yehova ukuba ookumkani baseAsiriya bazitshabalalise zonke iintlanga namazwe azo.+
18 Noothixo bazo babaphose emlilweni, ngenxa yokuba bebengengabo oothixo,+ kodwa bebengumsebenzi wezandla zomntu,+ benziwe ngomthi nelitye. Yiloo nto beye bakwazi ukubatshabalalisa.
19 Ngoku ke Yehova Thixo wethu, sicela usisindise esandleni sakhe, ukuze zonke izizwe zomhlaba zazi ukuba nguwe wedwa uThixo, yhini Yehova.”+
20 UIsaya unyana ka-Amotsi wathumela lo myalezo kuHezekiya: “Uthi uYehova uThixo kaSirayeli, ‘Ndiwuvile umthandazo wakho+ ngoKumkani uSenaribhe waseAsiriya.+
21 Uthi uYehova ngaye:
“Intombi yaseZiyon engazange yalala nandoda ikudelile, ihlekisa ngawe.
Intombi yaseYerusalem ikunikinela intloko.
22 Ngubani lo umthukayo nomdelelayo?+
Ngubani lo umkhwazayo xa uthetha?+Ingubani lo umjonge ngamehlo anekratshi?
NguLowo Ungcwele kaSirayeli!+
23 Uthuke uYehova+ ngabathunywa bakho+ wathi,‘Ngeenqwelo zam zokulwa ezininziNdiza kunyukela kwimimandla ephakamileyo yeentaba,Kweyona mimandla ithe qelele yaseLebhanon.
Ndiza kuyigawula imithi yayo yemisedare ephakamileyo, nemithi yayo emihle yejunipha.
Ndiza kungena kwezona ndawo zayo zithe qelele, kwawona mahlathi ayo ashinyeneyo.
24 Ndiza kumba imithombo ndize ndisele amanzi abasemzini,Ndiza komisa yonke imisinga yaseYiputa* ngeenyawo zam.’
25 Awuvanga na? Oku ndakugqiba* kwakudala.+
Ndakulungiselela* kwamandulo.+
Ngoku ndiza kukwenza.+
Izixeko ezikhuselekileyo uza kuzenza iimfumba zamabhodlo.+
26 Abemi bazo baza kuba ziintsizana;Baza kungcangcazela baze bahlaziswe.
Baza kuba njengezityalo zasendle nengca eluhlaza,+Njengengca ephezu kwendlu etshiswe ngumoya wasempuma.
27 Kodwa ndikwazi kakuhle ukuhlala, ukuphuma, nokungena kwakho,+Kwanaxa undiqumbele,+
28 Kuba ukundiqumbela kwakho+ nokugquma kwakho kunyuke kwaza kufika ezindlebeni zam.+
Ngoko ndiza kufaka ihaki yam empumlweni yakho nomkhala wam+ phakathi kwemilebe yakho,Yaye ndiza kukubuyisa ngendlela obuze ngayo.”+
29 “‘Nantsi into oza kubona ngayo:* Kulo nyaka uza kutya ummilela;* ngonyaka wesibini utye iinkozo zawo;+ kodwa ngonyaka wesithathu uza kutyala imbewu, uvune, utyale iidiliya uze utye isiqhamo sazo.+
30 Abo basindileyo bendlu kaYuda, abo bashiyekileyo,+ baza kumila iingcambu, bavelise isiqhamo.
31 Kuba kuza kuphuma abashiyekileyo eYerusalem nabasindileyo eNtabeni YeZiyon. UYehova wemikhosi uzimisele, ibe uza kuyenza le nto.+
32 “‘Ngoko uthi uYehova ngokumkani waseAsiriya:+
“Akazukungena kwesi sixeko+Akazukutola notolo oluAkazukulwa naso enekhakaAkazukusakhela nethambeka lokuhlasela.+
33 Uza kujika ngalaa ndlela ebeze ngayo;Akazukungena kwesi sixeko,” utsho uYehova.
34 “Ndiza kusikhusela esi sixeko+ ndize ndisisindise ngenxa yegama lam+Nangenxa yomkhonzi wam uDavide.”’”+
35 Ingelosi kaYehova yaxabela amadoda ayi-185 000 enkampini yama-Asiriya kanye ngobo busuku.+ Xa bevuka abantu ekuseni, babona kuthe saa izidumbu.+
36 Ngoko uKumkani uSenaribhe waseAsiriya wemka wabuyela eNineve,+ wahlala apho.+
37 Yaye wathi esaqubudile endlini* kathixo wakhe uNiseroki, oonyana bakhe uAdrameleki noSharezere bamxabela ngekrele,+ baza babalekela kwilizwe laseArarati.+ Unyana wakhe uEsar-hadon+ waba ngukumkani endaweni yakhe.
Umbhalo osemazantsi
^ Okanye “indlu kakumkani.”
^ Okanye “yokuthukwa.”
^ Ngokoqobo, “bafikile emlonyeni wesibeleko.”
^ Ngokoqobo, “Ndiza kumfaka umoya.”
^ Ngokoqobo, “wayitwabulula.”
^ Okanye kusenokwenzeka, “phakathi.”
^ Okanye “imisinga yomNayile.”
^ Ngokoqobo, “ndakwenza.”
^ Okanye “Ndakwenza.”
^ Okanye “ukutya okukhule ngenxa yeenkozo ezichithekileyo.”
^ Oko kukuthi, uHezekiya.
^ Okanye “etempileni.”
